2
Urunini qahö meleŋbinbukö galöm meme keu
1 Miaŋgöra Buŋa keu mörini, mi mönö törörök möt asaribingö kapaŋ köla kezap alme. Gölmenöŋ malmalgö iŋi me waiŋi kunŋan neŋguaŋgiri laŋ anda kaba liklak malbin ewö, mönö Jisösgö amötqeqe nupŋi oŋgita öne mala ayuhubinbuk. 2 Keu mi kewö jim tuarimam: Mutuk Suep garata yeŋön Buŋa keu jigetka ambazip jöhöm eŋgii malget. Mewö mala denike yeŋön Köna keu qahö tem köla selŋi walöŋgeri, Anutunöŋ mönö körek yeŋgö keuŋini diŋdiŋanök jim teköba likepŋi meleŋ eŋgii lömböt qakŋine öŋgöi mala kotket.
3 Yeŋön lömböt miwikŋaigetka neŋön mewöŋanök akzin ewö, lömbötköra mönö denöwö ölöŋ kölbinak? Amötqeqe nup ketaŋi mi nesampurek qakŋe nönöŋgan akin ewö, mönö lömbötnöhök ölöŋ kölbingö osibin. Kembunöŋ könahiba amötqeqegö könaŋi indeliga tosatŋan keu mi jitŋeyök möta naŋgöba jim köhöigetka sehiba dop köl neŋgiyök. 4 Mi naŋgöba jim köhöigetka Anutunöŋ yembuk mohotŋe kinda keuŋini naŋgöba jiiga aŋgöletot aiwesök könaŋi könaŋi mi kukösumŋinambuk asuhugetka Uŋa Töröŋi mokoba jitsihitŋaŋgö dop mendeŋniga dop köl neŋgiyök. Mewö.
Jisösnöŋ datnini aka Suepnöŋ neŋguaŋgitmamgö mötza.
5 Suep gölme dölökŋi asuhumegö keuŋi jimakzini, Anutunöŋ nini miaŋgöreŋ Suep garata nembö bapŋine malbingö areŋi qahö ala jim kutuyök. 6 *Sum 8.4-6Mewö qahöpmö, keu mi kunŋan naŋgöba jiiga Buŋa Kimbigö kembaŋi kunöŋ kewö ahöza, “Gölme azinöŋ mönö niŋia aiga i mötmörim waŋgimakzan? Suep gölmegö azi ölŋan mönö niŋia aiga i köyan kölakzan?
7 Göŋön i memba et al waŋginöŋga nalö töröpŋi Suep garata yeŋgö nembö bapŋine eta eretŋi aka malök. Mali waŋgitnöŋga asakmararaŋnöŋ öŋgöiga kösasorom ila jalö waŋginöŋga aködamunŋambuk aka qetbuŋaŋambuk malja. Mewö mala öröyuai pakpak galöm köla malja.
8 Börösöwögi pakpak mönö yaŋgö jimkutukutuŋaŋgö bapŋe malmegöra memba et al eŋginöŋga malme.”
Keu miaŋgö dop yuai pakpak mi yaŋgö kukösum bapŋe malmegöra memba et al eŋgiba miaŋgöreŋ yuai kun qahö mosöriga yaŋgö keuŋaŋgö bapŋe qahö ahöbawak. Areŋ mewö alökmö, nalö kewöŋe börösöwöŋi pakpak mi yaŋgö kukösum bapŋe memba et al eŋgii tem kölakzeaŋgö dop qahö eŋgehakzin.
9 Mewö qahö eŋgehakzinmö, Jisösnöŋ mönö kewö letota mali ehakzin: Kömupkö sihimbölöŋi möröhaŋgöra Anutunöŋ waŋgiri asakmararaŋnöŋ öŋgöiga kösasorom ila jalö waŋgiiga ehinga aködamunŋambuk aka qetbuŋaŋambuk malja. Anutunöŋ kalem möriamŋi kondel neŋgimamgö möta körek neŋgöra aka kömupkö sihimbölöŋi mötmapkö jim teköyök. Miaŋgöra memba et al waŋgiiga nalö töröpŋi Suep garata yeŋgö nembö bapŋine eta eretŋi aka malök. Mewö malökmö, nalö kewöŋe qetbuŋa öŋgöŋgöŋi memba malja. 10 Anutunöŋ mönö öröyuai pakpakö könaŋi akza. Yaŋön körek nini nanŋi möpöseim waŋgibingöra aka miwikŋaim neŋgiiga maljin. Yaŋön ambazip sehisehiŋi neŋguaŋgiri asak-mararaŋnöŋ öŋgöbingöra mötza. Mewö möta amötqeqeninaŋgö Toŋi mi qahö aŋgön köliga sihimbölö möta mewö miaŋön nupŋi mi mem teköi asakmararaŋi pakpak miwikŋaimapkö möri dop kölök.
11 Kunöŋ mem sarahim neŋgimakzawi aka ambazip sarakŋi ahakzini, körek neŋgö kondotkondot Toninan mönö mohot akza. Miaŋgöra Jisösnöŋ qetnini “Alaurupni,” mewö qetmamgö gamuŋi qahö mötza. 12 *Sum 22.22Könaninaŋgöra Buŋa keu kun kewö jii ahöza, “Nöŋön mönö göhö qetki mi nani alaurupni yeŋgöra qet asarim eŋgiba urumeleŋ könagesö sutŋine kinda möpöseim gihimakŋam.”
13 *Ais 8.17, 18Mewöyök miaŋgö Buŋa keuŋi kun kewö jii ahöza, “Nöŋön mönö mötnaripni Anutugöreŋ ala malmam.” Dumŋe kunbuk miaŋgö Buŋa keuŋi kun mi kewö jii ahöza, “Mötnöŋ, ni aka Anutunöŋ nahönbörat niŋgiyöhi, neŋön mönö ki maljin.”
14 Kunöŋ mem kömum neŋgimamgö kukŋi memba maljawi, Jisösnöŋ mönö i tulumgöi gemapköra aka kömumba miaŋön luhut alök. “Bölöŋaŋgö Toŋi tulumgömam,” jiba ambazip sep busuni-nambuk maljini, miaŋgöra yaŋön mönö mewöyök nembuk tandök mohot miyöhök gölme azia ahök. 15 Ambazip malmalŋini gölmenöŋ maljeaŋgö dop kömumbingö keŋgötŋinan jöhöm eŋgii mala kotkeri, mi mönö körek pösat eŋgii solanimegöra aka gölme azia ahök. 16 Suep garata köyan köl eŋgimapköra gölme azia qahö ahökmö, Abrahamgö gwölönarökurupŋi nini möt aŋgön köla bauköm neŋgimakŋapköra mönö mewö ahök.
17 Könaŋi miaŋgöra aka yaŋön öröyuai pakpak miaŋgöreŋ alaurupŋi nembuk tandök mohot miyöhök ahök. Jike nup galömnini bohonŋi aka nupŋi nömtik memba ak kömum neŋgiba malmapköra mönö nembuk tandök mohot ahök. Tandök mohot akagun mönö ölöp jitŋememenini aka jike galöm bohonŋaŋgö nupŋi memakza. Mi memamgöra siŋgisöndokninaŋgö töwaŋi ala Anutugö jeŋe mi köl könjörarök. 18 Gölme azia aiga esapköm waŋgigetka nanŋak sihimbölö möta malöhi, miaŋgöra ambazip esapköm neŋgimakzei, nini mönö ölöp bauköm neŋgimakŋa. Mewö.