Judagöreŋ Kimbi
Judanöŋ Kimbiŋi alök.
Jim-asa-asari
Juda mi Jisös aka Jeimsgö munŋi. Tosatŋan “Kraist möt narizin,” jiba keu goŋgoŋi ambazip kusum sohom eŋgiba malgeri, Judanöŋ yeŋgöra aka galöm meme keu ohoyök. Buŋa Kimbi ki töröptökŋi. Keuŋi mi 2 Pitö 2 keu miaŋgö dop. Judanöŋ Kraistkö alaurupŋi neŋgö urunini kewö kuŋguyök, “Anutunöŋ nini nalö dop möt naribingöra mötnarip neŋgiiga könagesöurupŋi akzini, eŋön mönö mötnaripŋinan sehiba köhöimapköra toroqeba bim qeba malme.”
Buk kiaŋgö bahöŋi bohonŋi 4 mi kewö:
Keu mutukŋi 1-2
Böhi sohoboho yeŋgö könaŋini aka jimteköteköŋini 3-16
Toroqeba pöndaŋ möt naribingö jimkutukutuŋi 17-23
Kötumötuet keu 24-25
1
1 *Mat 13.55; Mak 6.3Juda bisop Jeimsgö munŋi nöŋön Jisös Kraistkö welenŋi qeba urumeleŋ alaurup embuk keu eraum mötpingöra kaba kimbi ohozal.
Anutu Iwinöŋ eŋgohola uru könömŋan jöpaköm eŋgii Jisös Kraistnöŋ sel jöhöm eŋgiiga malje.
2 Anutunöŋ mönö ak kömumba urukalemŋi keleŋmaleleŋ eŋgiiga luainöŋ malme. Mewö.
Buŋa keu möwököwöramgö galöm meme keu.
3 O wölböt alaurupni! Anutunöŋ amöt qem neŋgiiga letota mohotŋe Suepkö buŋaya akzini, nöŋön miaŋgö keuŋi jim tuariba ohom eŋgimamgö sihimni ketaŋi möta malal. Mala malbi lömböriiga toroqeba mambötmamgö osizal. Miaŋgöra ohoba uruŋini kewö kuŋgum eŋgizal: Anutunöŋ mötnaripkö keu kembaŋi pakpak mi ambazip sarakŋi neŋön memba galöm kölinga qahö utekömapköra ali buŋanina akza. Miaŋgöra böhi takapulakaŋi tosatŋan Buŋa keu loloŋqaloŋ akepuköra mönö böŋ kinda bim qeba malme.
4 Ambazip tosatŋan möndöba urumeleŋ kambu sutŋine ölöŋ ölölöŋgöba kaŋgotketka könaŋamŋini goŋgoŋi mi aukŋe qahö asuhui malje. Anutunöŋ ambazip mewöŋi yeŋgö keuŋini lök mönöwök jim teköiga ohogetka sihimbölöŋinan qakŋine öŋgö-mamgö akza. Anutuninan keuŋi ala kalem möriamŋaŋgö könaŋi ölŋa indelakzapmö, ambazip aŋgöjörakŋinambuk mieŋön mönö nanŋini sero namböŋnamböŋini turumegöra aka kalem möriamgö keuŋi mi möwököwöramgöba möŋaqöŋaigetka bölimakza. Mewö aka nanine Ketaŋamnini mohot Jisös Kraist Kembu ak neŋgi-makzawi, i qaŋ köla andö qemakze.
5 *Eks 12.51; Jaŋ 14.29-30Iŋini keu pakpak mi lök nalö köröpŋi möt teköba maljemö, töndup galöm meme keu ki ölum eŋgubapuköra kunbuk kewö jim gulim eŋgimamgö mötzal: Kembunöŋ könagesöurupŋi Ijipt kantrinöhök meköm eŋgiiga kagetmö, könaŋgep tosatŋan nalö kunöŋ qahö möt narim waŋgigetka mi köndeŋmöndeŋ ak eŋgii ayuhuget. Galöm meme keu mi eŋgöra aka kunbuk jizal.
6 Mewöyök Anutunöŋ Suep garataurupŋi jakömbuak tohoŋini al eŋgiiga malgetmö, yeŋgöreŋök tosatŋan urukönöp aka keu bapŋe qahö anda nanŋini jakömbuak tohoŋini galöm köl eŋgibingö urumohot qahö aka selŋini kösököget. Qeqetal akeraŋgöra aka Anutunöŋ i aköm eŋgiiga jakömbuak miriŋini mosöta etket. Etketka “Nalö ketaŋe keuŋini jim tekömam,” jiba tapepnöŋ (muŋgamuŋga) gwaröhöba pandaman uruŋe al eŋgiiga tata kotkera nalö teteköŋi qahö tat öŋgöme. Galöm meme keu mi eŋgöra aka kunbuk jizal. 7 *Jen 19.1-24Tandök mohot miaŋön Sodom, Gomora aka miri tosatŋi liliköba tatkeri, yeŋgöreŋ asuhuyök. Ambazip mieŋön mewöŋanök serowilin aka silegö sihim kömbönaŋini möwöramgöba tandökŋi kun kewö aket: Azi nanŋirök ambi nanŋirök amimba malget. Mewö malgetka Anutunöŋ likepŋini meleŋ eŋgiiga könöp jitŋi teteköŋi qahö eŋgohoi sihimbölö möta mala kota malme. Mewö mala böhi takapulakaŋi yeŋgö galöm mem aŋgubingö kaisöpsöpnina ahakze.
8 Ambazip takapulakaŋi mieŋön mönö nalö kewöŋe tandök mohot mewöŋanöhök ahakze. Jeŋini meleŋni imutimutŋini laŋ eka miaŋgöreŋ möndöba wuataŋgöba nanŋini sileŋinaŋgö malmalŋini mem böliba kölköljiŋjiŋ miwikŋaimakze. Mewö miaŋön Anutu jijiwilit aka jimoŋgot jim waŋgiba kukösumŋi memba et alakze. Mewö aka Suepkö bem suahö ambazip asakmararaŋinambuk euyaŋgöreŋ maljei, yeŋgöra uruqeqe keu töhöreŋ jim eŋgimakze.
9 *Dan 10.13, 21; 12.1; Ind 12.7; Dut 34.6; Zek 3.2Mewö ahakzemö, Suep garata bohonŋi qetŋi Maikel yaŋön mewöyök mewö akŋamgö lömböriba osiyök. Maikelnöŋ Mosesgö qamötŋaŋgöra Bölöŋaŋgö Toŋambuk aŋgururuk aka möndöm-kösök ahök. Mi aka öŋgöba erökmö, töndup uruqeqe keu töhöreŋ mi jim teköm waŋgimamgöra awösamkakak qahö miwikŋaiba osiyök. Osiba kewöyök jim waŋgiyök, “Kembunöŋ mönö mindiŋ-göm gihima.”
10 Maikelnöŋ mewöyök mi osiyökmö, ambazip sohoboho mieŋön mönö sileŋini memba öŋgöba Buŋa keu qahö möt kutumakzemö, töndup miaŋgöra uruqeqe keu töhöreŋ laŋ jimakze. Tönpin mala sömbup soŋ ewö laŋlaŋ malje. Mötkutukutuŋini ölŋi qahö asuhuiga sömbup malmalgö sihimŋini korembiŋi miyök mörakze. Nanŋini sihim mötmötŋini goŋgoŋmaŋgoŋi mieŋön mönö köndeŋ eŋgigetka ayuhume. 11 *Jen 4.3-8; Jaŋ 22.1-35; 16.1-35Anutunöŋ böhi takapulakaŋi mieŋgö likepŋi meleŋ eŋgiiga sihimbölö ketaŋi mötmeaŋgöra wölziköba Yei! jizal. Ambazip sohoboho mieŋön azi Kein (Kain) yaŋgö könaŋi mötöteiba anakze. Könaŋgep kerök azi kembu kunöŋ azi qetŋi Balam töwa waŋgiiga Israel ambazip tilipköm eŋgiiga jaŋjuŋ anget. Böhi takapulakaŋi mieŋön Balamgö silikŋi wuataŋgöba moneŋ miwikŋaibingöra urukönöp möta yuai iliŋölaŋ ak bibihiba laŋ sohomakze. Azi qetŋi Kora yaŋön Moses aka Aron tuarenjoŋ ak etkiba köndeŋmöndeŋ miwikŋaiiga ayuhuyöhi, böhi mieŋön mönö Kora ewö kezapjupjup aka mala ayuhume.
12 Urumeleŋ eŋön urukalem kondel aŋgubingöra tokoba lömbuaŋ algetka takapulaka böhi mieŋön mönö miaŋgöreŋ mewöyök kamakze. Kaba dogoŋini aukŋe kondela nanŋinanöhök gumohom aŋguba bau numbu nemakze. Mewö aka eŋgö sile töwötŋini boromŋi boromŋi gamuŋinambuk ewö akze. “Ziozgö lama galöm akzin,” jiba ala eŋgöra qahö mötmöriba kelök keu laŋ jimakze.*Böhi mieŋön törom ewö asamböta tatzemö, waŋgeŋinan yeŋgöreŋ qaköba jömgöbapuk. Kousu omaŋi töhöntöhön kieŋini qahö mewö malgetka luhutnöŋ muwutapköm eŋgiiga laŋlaŋ anda kamakze. Ölŋi ahumapkö nalöŋe ipŋi ipŋi araroŋi ölŋini qahö ewö kinje. Guluŋ sinŋinanök ewö aka mutuk köhömuŋi aka jalöŋini malmal köhöikŋaŋgö könaŋeyök qözöla tala kunbuk kömum köhöigetka yahöt aiga köhömuŋi kötökŋi aka malje.
13 Yeŋön köwet siri kukŋinambuk ewö laŋ kundutketka ahakmemeŋinan gamuŋambuk mi qölqölsöut gödöwörötŋambuk ewö aukŋe asuhumakza. Seŋgelau tosatŋan könaŋini siŋgiba laŋ erakzei, yeŋön mönö miaŋgö dop jaŋjuŋ qemakze. Seŋgelau mieŋgö dop eta Anutunöŋ yeŋgöra pandaman göjiwinaŋgö uruŋe miri areŋgöm eŋgiyöhi, mönö emuyaŋgöreŋ dutŋe geba nalö teteköŋi qahö tat öŋgöme.
14 *Jen 5.18, 21-24Adamgö sakonŋaŋgö isiŋi qetŋi Enok yaŋön mewöyök ambazip takapulakaŋi mieŋgö kezapqetok keuŋini qeljiŋe kewö jii ahöza: “Mötket, Kembunöŋ Suep suahö ambazip töröŋi tausenŋi tausenŋi jaŋgö öŋgöŋgöŋi ketaŋi mi eŋgömemba eta asuhume. 15 Asuhugetka körek pakpak neŋgö keunini jim teköma. Ambazip aŋgöjörakŋinambuk yeŋön ahakmeme aŋgöjörakŋambuk wuataŋ-göba siŋgisöndokŋini aŋgöjörakŋinambuk aka kotkeri, mi pakpak kewöta miaŋgö likepŋi meleŋ eŋgiiga körek yeŋgö qakŋine öŋgöma. Pinjit ambazip aŋgöjörakŋinambuk mieŋön keu jenöŋ gege gamuŋambuk miaŋön Anutu jim qetal waŋgiba kotkeri, miaŋgö likepŋi pakpak meleŋ eŋgiiga sihimbölöŋini möta malme.” Enoknöŋ galöm meme keu mewö jiyök.
16 Böhi sohoboho mieŋön jimoŋgot aka sesekŋai ewö ihururuk laŋ jim aŋgumakze. Nanŋini sihim kömbönaŋini bölöŋi wuataŋ-göba tereŋqereŋda sileŋini memba öŋgöba jakbak-öraŋböraŋ ahakze. Ambazip tosatŋi göda qeba kelök eŋguze ewö, mi yuai meleŋda nanŋine eŋgimegö sihimŋi möta kelewele ahakze. Mewö malje.
Galöm meme aka qambaŋ keu tosatŋi
17 Mewö maljemö, wölböt alaurupni, Kembunini Jisös Kraistkö aposolurupŋan böhi takapulakaŋi yeŋgö keuŋini lök qeljiŋe jiget ahöza. Iŋini yeŋgö keuŋini mi ölum eŋgubapuköra galömŋini mem aŋguba malme. 18 *2 Pitö 3.3Aposol yeŋön eŋgöra keu kewö jiget, “Jisösgö kaka nalöŋan töriiga nalö teteköŋe miaŋgöreŋ mepaqepaik ambazip asuhume. Yeŋön nanŋini sihim kömbönaŋini bölöŋi wuataŋgöba malmal aŋgöjörakŋambuk malme.” Mewö jiget.
19 Ambazip takapulakaŋi mieŋön mönö sutŋine urujujul ak eŋgigetka simbisembel akepuk. Uŋa Töröŋan qahö sölölöhöm eŋgiiga gölmegö sihim kömbönaŋi bölöŋan galöm köl eŋgiiga mi wuataŋgömakze. 20 O wölböt alaurupni, Anutunöŋ mötnarip qainŋi kun eŋgiyöhi, miaŋön mönö tandöŋini bohonŋi öŋgöŋgöŋi ewö akza. Eŋön mönö mötnarip miaŋgö qakŋe kinda naŋgöm aŋguba köhököhöi miwikŋaimakŋe. Uŋa Töröŋan inahöm eŋgimakzawaŋgö dop mönö yaŋgö ösumnöŋ kinda köuluköba malme. 21 Anutunöŋ jöpaköm eŋgimakzawi, iŋini mönö yaŋgö urukalemŋe böŋ qeba kinme. Kembunini Jisös Kraistnöŋ ak-kömukömu eŋgiba kunbuk asuhuba malmal köhöikŋe aŋgota oyaeŋkoyaeŋ malme. Iŋini mönö nalö mi kam kuŋgumapköra kapaŋ köla mamböta malme.
22 Ambazip uruŋini meleŋbingö uruyahöt akzei, mi mönö ak kömumba urukalem ak eŋgiba malme. 23 Tosatŋan könöp bölamnöŋ an taköbingö tandök akzei, i gebepuköra mönö wölaŋ öröba bohonŋini jöhöm eŋgigetka letotpeak. Tosatŋan sihim kömbönaŋini bölöŋan galöm köl eŋgiiga qemasolokep maljei, i mönö ak kömumba jöpaköm eŋgiba malme. Mewö malmemö, nanŋini malmalŋinan bölibapuköra mönö keŋgötŋini möta malme. Qemasolokep yeŋön siŋgisöndokŋi siŋgisöndokŋi aketka miaŋön uruŋini sileŋini kokolak qeiga aukŋe töwiba maljei, yeŋgöra mönö galömŋini mem aŋguba malme. Kölköljiŋjiŋ akepuköra mönö opo söröŋini töwötŋinambuk mi tok sisitŋini memba kude misirime. Mewö.
Möpömöpösei keu
24 Mönö Anutu möpöseimakin. Yaŋön iŋini tala et eŋguba-puköra sel jöhöm eŋgimamgö köhöiza. Yaŋön ölöp eŋguaŋgita nanŋi je mesoholŋe al eŋgii aŋgota solanŋi keuŋini qahö kinda asakmararaŋi eka söŋgaiba köiraŋ köla malme. 25 Anutu mohotŋan Amötqeqe Tonini akza. Kembunini Jisös Kraistnöŋ nam köl neŋgiiga Anutu möpöseim waŋgiinga qetŋi aködamunŋambuk aka ahöma. Yaŋön möpŋaŋgö möpŋeyök könahiba kota Öŋgöŋgö-ŋamnini kukösumŋambuk akza aiga nalö kewöŋe toroqeba yuai pakpak ösum-mumuŋan galöm köla nalö teteköŋi qahö Kembu ak neŋgiba malma. Keu mi ölŋa.