1 Jisösnöŋ keu pakpak mi jim teköba gwarekurupŋi kewö jii mötket, 2 *Eks 12.1-27“Silim yahöt teköigun Pasowa kendonŋi kam kuŋguma. *Pasowa mi nanine keunöŋ Ak-kömukömu kendon. Keu miaŋgö könaŋi: neŋgehoriba neŋgoŋgirök. Eksodus 12.15 Iŋini mi ölöp mötze. Kam kuŋguiga Suep gölmegö azi ölŋi mi kian gawman yeŋgö böröŋine algetka maripomnöŋ qegetka kömuma.”

3 Nalö miaŋgöreŋ jike nup galöm aka kantrigö jitŋememe yeŋön tokoba jike nup galöm bohonŋi qetŋi Kaiafas yaŋgö jakömbuak miriŋe tatket. 4 Miaŋgöreŋ tata denöwö möndöŋninga Jisös ölöŋ memba qeget kömumbawak, miaŋgö könaŋi jaruba kewötket. 5 Jaruba kewöta kewö jiget, “Ambazip irimŋini seholiiga karimŋi karimŋi asuhubepuköra mi sösöŋgai kendon nalöŋe akingö osibin.” Mewö.

6 Jisösnöŋ Betani mirinöŋ mala Saimon kun uzikukuŋi mem solaniyöhi, yaŋgö mire öŋgöba tarök. 7 *Luk 7.37-38Miaŋgöreŋ nene nemba tariga ambi kunöŋ köt-kirin kun memba yaŋgöreŋ kayök. Kirin mi nöluk tuat-tuat qetŋi alabastö miaŋön memeŋa. Mia o umköhöwakŋambuk miaŋön kokolak qeqeŋa. Yaŋön mi bohonŋi ketaŋan memba kaba oŋi Jisösgö nöröpŋe mimbiliba miriyök.

8 Miriiga gwarekurupŋan mi eka urubölö aka kewö jiget, “Mi mönö wuanöŋgöra mewö ayuhuzawi? 9 O kelökŋambuk mi bohonŋi memegöra ali moneŋ öŋgöŋgöŋan asuhuiga mi ambazip wanapŋi eŋgiiga dop kölbawak.”

10 Jisösnöŋ urumötmötŋini mi ek kutuba kewö jii mötket, “Ambi kiaŋgö uruŋi mi wuanöŋgöra mem bölize? Yaŋön silik ölöpŋi ak soroköm niŋgiiga dop kölja. 11 *Dut 15.11Ambazip wanapŋi mi nalöŋi nalöŋi sutŋine malmemö, nöŋön eŋgö sutŋine nalö dop qahö malmam.

12 “Nöŋön kömumbi löm köl niŋgimeaŋgöra aka kelök miaŋön sileni nömiriza. 13 Nöŋön keu ölŋi kun kewö jibi mötket: Ölöwak Buŋa ki kantri igen waigen jim sehigetka anmawi, miaŋgöreŋ ambi kiaŋön yuai ak niŋgizawi, miaŋgö buŋaŋi mohok jiget sehiiga yaŋgöra mötmöriba malme.” Mewö.

14 Nalö miaŋgöreŋ gwarekurupŋi 12 yeŋgöreŋök kun qetŋi Judas Iskariot yaŋön jike nup galöm yeŋgöreŋ anda 15 *Zek 11.12kewö qesim eŋgiyök, “Nöŋön Jisös mamalolo mem waŋgiba böröŋine albiga eŋön töwa wania niŋgibeak?” Qesim eŋgiiga silwö moneŋ kötŋi 30 oyoŋda böröŋe alget. 16 Aua miaŋgöreŋök könahiba Jisös nalö kungen mamalolo mem waŋgimamgö köna möt jaruba köiŋbiŋgöba malök. Mewö.

17 Beret yistŋi qahö miaŋgö kendon silim mutukŋe (Seqononöŋ) gwarek yetkön Jisösgöreŋ kaba kewö qesim waŋgiyohot, “Böhi! Nini miri denikeaŋgöreŋ anda pasowa lama mözözömgöm gihiziga neman? Sihimgi denöwö ahöza?”

18 Qesim waŋgiyohotka kewö meleŋnök, “Iŋiri Jerusalem sitinöŋ öŋgöba azi kun mötzali, i miwikŋaiba kewö jiyohotka mötma, ‘Böhinöŋ jiza: Nöŋgö nalönan mönö †Anutunöŋ Jisös kömumawaŋgö nalöŋi alöhi, miaŋgöra jiza. dopdowiza. Nöŋön göhö mire kaba gwarekurupni yembuk Pasowa lama membin.’ ” 19 Gwarek yetkön Jisösnöŋ jim kutum etkiyöhi, miaŋgö dop aka Pasowa lama mözözömgöyohot.

20 Mare aiga miri söŋauiga Jisösnöŋ gwarekurupŋi 12 yembuk miri miaŋgöreŋ kaŋgota öŋgöba dum kösutŋe tata nene mendeŋda neget. 21 Nene negeraŋgöreŋ Jisösnöŋ kewö jii mötket, “Nöŋön keu ölŋi kun kewö jibi mötket: Eŋgöreŋök kunŋan mönö mamalolo mem niŋgima.” 22 Mewö jii möta miaŋgöreŋök uruŋinan wösöbirik ketaŋi aiga könahiba nanŋök nanŋök qesim waŋgiba jiget, “Kembu, mönö nöŋgöra jibanbuk?”

23 *Sum 41.9Qesim waŋgigetka kewö meleŋnök, “Nömbuk beret kuluŋnöŋ kundumgözawi, mönö yaŋön. 24 Suep gölmegö azi ölŋan mönö yaŋgöra keu ohoget ahözawaŋgö dop ölŋa gölme mosöta anmapmö, kunŋan i mamalolo mem waŋgimawi, yaŋgöra mönö Yei! jiba sahötzal. Miaŋgö likepŋi kanjamŋambuknöŋ mönö yaŋgö qakŋe öŋgöma. Azi mi nam körö uruŋeyök qahö asuhubawak, miaŋön mönö amqem waŋgibawak.” Mewö.

25 Mewö jiiga Judas mamalolo mem waŋgimawaŋön kewö meleŋda jiyök, “Böhi, mi mönö nöŋgöra jibanbuk?” Jisösnöŋ kewö jii mörök, “Jizani, mönö mewö!” Mewö.

26 Nene nemba tata Jisösnöŋ beret memba kötuetköba mindipköba eŋgiba kewö jiyök, “Ki nani busuni. Ki memba neget.”

27 Mewö jiba wain qambi memba saiwap jiba eŋgiba kewö jiyök, “Iŋini körek qambi kiaŋgöreŋök neget. 28 *Eks 24.8; Jer 31.31-34Ki nani sepni. Mi Anutunöŋ ambazip yembuk jöhöjöhö areŋ aiga köhöimapköra sepni mokoget geiga ambazip gwötpuk yeŋgö siŋgisöndokŋini mosötma. 29 Nöŋön keu kun kewö jibi mötket: Nöŋön wain kösögö ölŋi ki kiaŋgöreŋ kunbuk toroqeba qahö nemam. Könaŋgep Iwinaŋgö bemtohoŋ uruŋe eu taringa közölömbuaŋ almawi, wehön miaŋgöreŋ mönö wain o qainŋi kun mia nemam.”

30 Mewö jiiga sösöŋgai liŋet köla mosöta anda Oil ip kunduŋe öŋgöget.

31 *Zek 13.7Öŋgöba Jisösnöŋ kewö jii mötket, “Kezapqetok azi kunöŋ keu kun kewö ohoi ahöza, ‘Nöŋön galömŋini qebiga lama kambuŋan deŋme.’

33 Mewö jiiga Pitönöŋ meleŋda kewö jii mörök, “Yeŋön körek uruŋini göhöra aka böliiga gömosöta buratime ewö, nöŋön mönö töndup nalö kunöŋ qahö gömosötmam.” 34 Jiiga Jisösnöŋ jii mörök, “Nöŋön keu ölŋi kun kewö jibi mötnöŋ: Kuruknöŋ qahö qeriga göŋön merak suŋgem qaŋ köl niŋginöŋga indimŋi karöbut akŋa.”

35 Mewö jiyökmö, Pitönöŋ kewö jii mörök, “Böhi! Mewö qahöpmö, ni nuŋgugetka göbuk mohotŋe kömumbirak, mi töndup nöŋön gi qahö qaŋ köl gihimam.” Gwarek tosatŋi pakpak mewöyök keu miyöhök jiget. Mewö.

36 Mewö eraum möta anda yembuk arö kun qetŋi Gezemane miaŋgöreŋ aŋgotket. Aŋgota Jisösnöŋ gwarekurupŋi kewö jii mötket, “Nöŋön endu anda köuluköbiga iŋini ölöp nalö sutŋe ki nanŋinök tatme.” 37 Mewö jiba Pitö aka Zebedigö nahönyahötŋi yahöt etkuaŋgita angetka Jisösnöŋ könahiba wösöbirik möriga köŋjiliŋan köna böröŋi qeköyök. 38 Nalö miaŋgöreŋ kewö jii mötket, “Nöŋgö urunan mönö kondum köla kotzawaŋgöra aka wösöbirik mötpiga kömukömuŋi ak niŋgiza. Iŋini ölöp kiaŋgöreŋ tata nömbuk guli malbin.”

39 Mewö jiba nanŋök borom kun toroqeba anda simin köla sipköba kewö köuluköba jiyök, “Iwini, gi yuai kun qahö mölölömbizan. Miaŋgöra sihimgi ahöza ewö, sihimbölögö qambiŋi kiaŋön mönö nöŋgö qakne öŋgöbapuköra noaŋgitman. Noaŋgitman me qahö, mi mönö nangi jit keugahö dop asuhuma. Mi nöŋgö sihimgö dop qahö.”

40 Mewö jiba liliŋgöiga gwarekurupŋi karöbut yeŋön gaun ahöget eŋgeka Pitögö kewö jii mörök, “Iŋini aua mohot-töp nömbuk guli malbingö kude köhöize me? 41 Uruninan guli malbingö sihimŋi mörakzinmö, sileninan lölöwöröŋi akza. Miaŋgöra esapesapnöŋ et eŋgubapuköra mönö köuluköba guliguli malme.”

42 Mewö jii möriga kunbuk eŋgömosöta anda indimŋi yahöt aiga kewö köuluköba jiyök, “Iwini, sihimbölögö qambi kiaŋön qahö noŋgitma ewö, mi ölöp nemam-mö, mi mönö nangi jitkahö dop asuhuma.”

43 Köuluköba liliŋgöiga jeŋini böŋböŋ meyöhaŋgöra kunbuk gaunök ahöget eŋgehök. 44 Kunbuk eŋgömosöta likep anda keu miyöhök kunbuk jiba köuluköiga indimŋi karöbut ahök. 45 Gwarek yeŋgöreŋ liliŋgöba kaba kewö jii mötket, “Iŋini toroqeba luhut memba gaunök ahöbingö mötze me? Mötket! Kunöŋ Suep gölmegö azi ölŋi mamalolo mem waŋgiiga bölöŋi meme yeŋgö böröŋine öŋgöma. Miaŋgö aua nalöŋan lök kam kuŋguza. 46 Mönö wahötketka anin! Mamalolo mem niŋgimawi, yaŋön mönö dowe ki kaza.” Mewö.

47 Jisösnöŋ mewö jiba kiniga miaŋgöreŋ gwarekurupŋi 12 yeŋgöreŋök kun qetŋi Judas yaŋön kambu ketaŋi kun jitŋe mem eŋgiiga kaŋgotket. Jike nup galöm aka kantrigö jitŋememe yeŋön i melaim eŋgigetka bimgö sou ketaŋi aka liŋgipŋini memba kaget. 48 Mamalolo memamgö ahöhi, yaŋön mutuk yembuk aiwesök keu kewö jöhöba jii mötket, “Nöŋön azi numbuŋi yöhötim nemami, yaŋön mönö mia akza. Mönö i memba jöhöme.”

49 Mewö jiba kaba miaŋgöreŋök Jisösgöreŋ aŋgota “Böhi, bönjöŋ!” jiba numbuŋi yöhötim neyök. 50 Yöhötim neiga Jisösnöŋ kewö jii mörök, “Alani, gi wuanöŋgöra kazani, mi mönö zilaŋ akŋan.” Mewö jiiga azi kambu yeŋön Jisösgöreŋ kaŋgota qelanjiba memba jöhöget. 51 Jöhögetka Jisösbuk malgeri, yeŋgöreŋök kunŋan böröŋan bimgö sou ketaŋi öröba jike nup galöm bohonŋaŋgö welenqeqeŋi qeba kezapŋi köteköi erök.

52 Jisösnöŋ mi eka kewö jii mörök, “Mönö mosötnöŋ! Bimgö sou ketaŋi körök memei, i mönö körek bimgö sou ketaŋan eŋgui kömume. Miaŋgöra mönö sougi kupinŋe qenöŋ geyök! 53 Nöŋön Iwini köuluköbiga ölöp bauköm niŋgimawi, mi mötzan me qahö? Köuluköm waŋgibileŋahi, yaŋön mönö miaŋgöreŋök garata yarö kambu ‡Rom yeŋgöreŋ lijön me yarö kambu kun mi yarö azi 6000 miaŋgö dop aka maljema. Miaŋgöra yarö kambu 12 mieŋgö jaŋgöŋini mi Suep garata 72.000 miaŋgö dop. 12 oŋgita melaim eŋgii kaba bauköm niŋgibeak. 54 Bauköm niŋgibeak ewö, Buŋa Kimbigö keuŋan mönö denöwö ölŋambuk akawak? Buŋa Kimbi keugö dop yuai kiaŋön mönö asuhumapkö dop jijiŋa akza.”

55 *Luk 19.47; 21.37Nalö miaŋgŋöreŋök Jisösnöŋ yarö kambu yeŋgöra kewö jii mötket, “Ni kegwek-kahasililiŋ azia qahöpmö, töndup nöŋgöra mewö möta bimgö sou ketaŋi aka liŋgip memba nömemba jöhöbingöra kaŋgotze. Nöŋön wehön dop jöwöwöl jikenöŋ embuk tata kinda Buŋa keu kusum eŋgiba malbiga qahö nömiget. 56 Mewömö, yuai pakpak ki mönö kezapqetok ambazipnöŋ keu ohogeri, mieŋön ölŋinambuk akŋapköra asuhuza.” Jisös jöhögetka gwarek yeŋön körek Jisös mosöta buratiba unjurata anget. Mewö.

57 Yarö azi Jisös memba jöhögeri, yeŋön i waŋgita jike nup galöm bohonŋi qetŋi Kaiafas yaŋgö mire anget. Angetka Köna keugö böhi aka kantrigö jitŋememe yeŋön miaŋgöreŋ kaba tokoget. 58 Angetka Pitönöŋ sikepsikep eŋguataŋgöba miaŋgöreŋ aŋgota jakömbuak mirigö kiripo uruŋe öŋgöyök. Öŋgöba teteköŋe denöwö asuhumawi, mi ekŋamgöra welenqeqe azi yeŋgö sutŋine tarök.

59 Mewö tarökmö, jike nup galöm aka jike kaunsöl kambu yeŋön Jisösgö silenöŋ alal keu denöwö möndöba naŋgöinga qeget kömumapkö jim jaruget. 60 Jaruba kinda gwötpukŋan wahöta kinda keu muneŋi Jisösgö sileŋe ala naŋgöba jigetmö, töndup könaŋi kun qahö miwikŋaiget. Qahö miwikŋaigetmö, teteköŋe azi yahöt kaŋgota 61 *Jon 2.19kewö jiyöhot, “Azi kiaŋön kewö jiiga mörit, ‘Ni ölöp Anutugö jöwöwöl jikeŋi köndeŋbiga gölmenöŋ eriga wehön karöbutkö uruŋe mi kunbuk mem wahöta kuŋgumam.’ ”

62 Mewö jiyohotka jike nup galöm bohonŋan wahöta Jisös qesim waŋgiba kewö jiyök, “Yeŋön göhö silege keu ala naŋgözei, miaŋgö likepŋi kun jiman me qahö?” 63 Qesim waŋgiiga Jisösnöŋ yuai bölöŋi kun qahö ahökmö, töndup keuŋi bök kinök. Keuŋi bök kiniga jike nup galöm bohonŋan kewö jii mörök, “Nöŋön Anutu malmal Toŋaŋgö qetŋe kewö qesiba kuŋgum gihizal: Gi Anutugö Nahönŋi Kraist akzan me qahö, mi törörök jiba jöjöpaŋ keunöŋ jim köhöinöŋga mötpin.”

64 *Dan 7.13Mewö jiiga kewö jiyök, “Jizani, mönö mia. Miamö, nöŋön körek eŋgöra kewö jibi mötket: Nalö kewöŋeyök könahiba Suep gölmegö azi ölŋan mönö Kukösum Toŋaŋgö böröŋi ölŋe tata suepkö kousu qakŋe eri ekŋe.”

65 *Lew 24.16Keu mi jiiga jike nup galöm bohonŋan malukuŋi munjurata kewö jiyök, “Yei, iwinaŋgö jitŋi! Mönö Anutu mepaiköza. Tosatŋan keuŋi naŋgömegöra kunbuk qahö qesim eŋgibin. Anutu mepaiközawi, mi dölki nanŋinak möt teköze. 66 Miaŋgöra denöwö mötmörize?” Mewö qesim eŋgiiga kewö jim teköget, “Yaŋön mönö kömupkö buŋaya akŋa.”

67 *Ais 50.6Mewö jim teköba jeŋe söutkölap söutköm miriba böröŋinan misiba mesoholŋe qekötahöget. Tosatŋan nuŋgulumŋe qekötahöba 68 kewö jiget, “Gi kezapqetok azi Kraist akzanaŋgöra daŋön guhuzawi, mönö yaŋgö qetŋi qetnöŋ mörin.” Mewö.

69 Mewö asuhuiga Pitönöŋ yaigep kiripo uruŋe sombemnöŋ tarök. Tari welenqeqe ambi kunŋan yaŋgöreŋ kaba kewö jiyök, “Gi mewöyök Galili azi Jisösbuk mohotŋe malnöŋ.” 70 Mewö jiyökmö, körek yeŋgö jeŋine qaŋ köla kewö jiyök, “Keu jizani, mi köndatzal.” 71 Mewö jiba kiripo naŋguŋe geiga welenqeqe ambi kunŋan i eka azi kösutŋe kingeri, mi kewö jii mötket, “Azi kiaŋön mönö mewöyök Nazaret azi Jisösbuk malök.”

72 Mewö jiiga kunbuk qaŋ köla jöjöpaŋ keunöŋ jim köhöiba kewö jiyök, “Nöŋön azi mi qahö möt waŋgizal.” 73 Nalö borom kun teköiga azi kösutŋe kingeri, yeŋön Pitögöreŋ kota kewö jiget mörök, “Alakŋa! Göŋön mewöyök yeŋgöreŋök kun akzan! Galili keu jöl jizani, miaŋön mönö mewöyök mi kondeliga mötzin.” 74 Mi möta könahiba nanŋi qesuahöm aŋguba jöjöpaŋ keunöŋ jim köhöiba jiyök, “Ni azi mi qahö möt waŋgizal! Muneŋ jibileŋak ewö, Anutunöŋ mönö likepŋi meleŋ niŋgima.” Mewö jiiga miaŋgöreŋök kuruk qerök.

75 Kuruk qeri möta Jisösnöŋ keu kewö jii möröhi, mi mötmöriyök, “Göŋön mutuk indimŋi karöbut qaŋ köl niŋginöŋga kuruknöŋ qetma.” Keu mi mötmöriba wösöŋi julmamgö aiga yaigep geba sahöt böliyök. Mewö.