1 Anutunöŋ kalem möriamŋi neŋgii sehimapköra siŋgisöndok toroqeba aka malbin me qahö? Miaŋgöra mönö denöwö jiinga dop kölma? 2 Siŋgisöndok yapmakek! Nini siŋgisöndokö kösönöhök lolohoba urunini walŋan qamöt ewö aiga siŋgisöndok akingö tököba maljin ewö, mönö denöwögöra siŋgisöndoknöŋ toroqeba galöm köl neŋgii malbinak?

3 Keu ki mötze me qahö: Nini körek Kraistköreŋ qeköta-höbingöra aka o melun mem neŋgiget. Miaŋgöreŋ urunini walŋan mönö Jisös qeget kömuyöhaŋgö tandök kömui malbingöra o melun mi mem neŋgiget.

4 *Kol 2.12Iwinöŋ asakmararaŋi kondela Kraist mem gulii kömupnöhök wahöröhi, neŋgö uruninan mewöyök kölöŋaiiga dölökŋi aka malinga dop kölma. Iwininan nini Kraistkö tandök ewö guliba wahöta ahakmeme dölökŋi aka memba malbingöra mötza. Miaŋgöra o melun mi kewögöra mem neŋgiget: Urunini walŋan Jisösbuk mohotŋe kömumba ahömapköra urunini walŋi mi mewö löm kölget.

5 Urunini walŋan Kraistpuk öröröŋ kömui miaŋgöreŋ yambuk qekötahöba maljin ewö, Iwininan nini mewöyök Kraistpuk kinbingöra mötza. Kraistnöŋ kömupnöhök wahöröhi, mönö yaŋgö tandök öröröŋ guliba malinga dop kölma. 6 Urusilegö sihim kömbönaŋnini bölöŋan siŋgisöndok akingö köpösöŋgömakzawi, Anutunöŋ sihim mi köndeŋni gemapköra mörakza. Anutunöŋ siŋgisöndoknöŋ toroqeba galöm köl neŋgii welenŋi qeba malbinbuköra mötza. Miaŋgöra urunini walŋi mi Kraistpuk maripomnöŋ lök qeiga kömuyök. Miaŋgö dop maljin, mi mötzin.

7 Kungö uruŋi walŋan kömuiga yaŋön mönö siŋgisöndokö kösönöhök lolohoba malja. 8 Urunini walŋan Kraistpuk kömuyök ewö, mewöŋanök yambuk guliba mal köhöibingö möt narizin.

9 Mewö möt nariba Kraistkö könaŋi kewö ahöi möt yaközin: Anutunöŋ i mem gulii kömupnöhök wahöta mal köhöiba kunbuk qahö kömuma. Kömupnöŋ i qahö toroqeba galöm köliga mal öŋgöma. 10 Kömup kömuyöhi, mewö miaŋön mönö nalö mohot miaŋgöreŋ siŋgisöndokö kukösumŋi köndeŋniga nalö teteköŋi qahö lölöwöröŋi ahöm öŋgöma. Malmal köhöikŋi maljawi, mi mönö Anutugöra mala mal öŋgöma. 11 Qamötnöŋ siŋgisöndok akingö osime. Iŋini mönö mewöŋanök nanŋinaŋgö mötketka qamöt ewö aiga Kraist Jisösbuk qekötahöba kinda Anutugöra köhöiba malme.

12 Sileŋini kömumawi, miaŋgö sihim kömbönaŋi bölöŋan galöm köl eŋgiiga i tem köl waŋgiba siŋgisöndok akepuköra mi mönö jöhöba malme. 13 Miaŋgöra sile kitipŋini pakpak mi mönö siŋgisöndok Toŋaŋgö böröŋe kude alme. Mala mewö algetka buŋaŋi aiga bohon köliga aŋgöjörak asuhubapuk. Mewö qahöpmö, köhömuŋeyök gulibagun mönö nanŋini Anutu tököm waŋgime. Sile kitipŋini pakpak mi Anutugö böröŋe algetka buŋaŋi aiga bohon köliga ahakmeme solanŋi asuhumakŋa. 14 Iŋini Köna keu bapŋe qahöpmö, kalem möriam uruŋe malje. Miaŋgöra siŋgisöndoknöŋ mönö öne jöhöba galöm köl eŋgii malbepuk. Mewö.

15 Miaŋgöra denöwö jibinak? Nini Köna keu bapŋe qahöpmö, kalem möriam uruŋe mala siŋgisöndok ahinga dop kölja me qahö? Mi yapmakek! 16 To yahöt akzahot. Nanŋini yetköreŋök kungö böröŋe al aŋguba jitŋi tem köla welenŋi qemakzei, miaŋgöra mönö keu ki möt yaköme: Iŋini kun jitŋi tem kölakzei, mönö yaŋgö welenqeqeurupŋi akze. Siŋgisöndok Toŋaŋgö welenqeqeurupŋi akze ewö, yaŋön mönö eŋguaŋgiriga kömum köhöime. Anutugö jitŋi tem köla welenŋi qemakze ewö, yaŋön mönö keuŋini jim teköiga solanŋi aka mal öŋgöme.

17 Iŋini mutuk siŋgisöndok Toŋaŋgö welenqeqeurupŋi aka malget. Mewö malgetka Buŋa keu mindiŋgöm eŋgimakŋapköra kusum eŋgigetka mötket. Mi möta miaŋgö dop uruŋini meleŋda nalö kewöŋe Buŋa keu törörök tem köla Anutugö könaŋi wuataŋgömakze. Mewö möta eŋgöra “Anutu saiwap!” jiba maljin. 18 Mi wuataŋgöba siŋgisöndokö kösönöhök lolohoba Anutugö welenŋi qeba ahakmeme solanŋi aka memba malje.

19 Urusileŋinan lölöwöröŋi akzawaŋgöra aka keu miaŋgö könaŋi mi mönö gölme ambazip neŋgö keu jijigö dop nöŋön kewö jimam: Iŋini mutuk sile kitipŋini pakpak tököba iwilele Toŋaŋgö (Satangö) böröŋe ala welenŋi qeba malget. Mewö malgetka ahakmeme aŋgöjörakŋambuk asuhuiga uruŋinan tölöhoi malget. Mewö malgetmö, nalö kewöŋe sile kitipŋini pakpak mi mönö tököba Anutugö böröŋe alme. Mewö ala welenŋi qegetka ahakmeme solanŋi asuhuiga sarakŋi ahakŋe.

20 Iŋini siŋgisöndok Toŋaŋgö welenqeqeurupŋi malgeri, nalö miaŋgöreŋ ahakmeme solanŋi mi qahö wuataŋgögetmö, nanŋini imbi-imbi laŋ malget. 21 Nalö kewöŋe ahakmeme miaŋgöra gamuŋini mötzemö, nalö miaŋgöreŋ mewö aka mala ölŋi mönö denöwö miwikŋaiget? Ahakmeme gamuŋambuk miaŋgö ölŋi mi kömup köhöikŋi.

22 Nalö kewöŋe Anutunöŋ siŋgisöndokö kösönöhök pösat eŋgiiga lolohoba Anutugö welenqeqeurupŋi aketka ölŋi asuhuiga sarakŋi ahakze. Mewö aka malmal köhöikŋi mala teteköŋe oyaeŋkoyaeŋ aka mal öŋgöme. 23 Siŋgisöndok ahinga Toŋan töwa neŋgiiga kömup köhöikŋi miwikŋaibinmö, Anutugö kalemŋi mi oyaeŋkoyaeŋ malmal. Kraist Jisös Kembuninambuk qekötahöba kinbin ewö, mönö köhöiba teteköŋi qahö mal öŋgöbin. Mewö.