8
KAG KAYABAWAN IT BAG-ONG KASUGTANAN NAK GINGHIMOY NI KRISTO
Si Kristo kag Pinaka-mataas nak Saserdote it Bag-ong Kasugtanan
(2 Corinto 3:7-11)
Ngasing, kag pinaka-importanting inro dapat mabaoy dili sa ako naunang ingsiling ay kaling ato Pinaka-mataas nak Saserdote ay nag-iingkorey sa bandang tu-o it trono it Dios nak Makagagahom sa langit. Ag ruto sa langit, kaling ato Pinaka-mataas nak Saserdote kag nagsiserbisyo sa matuor nak Pinaka-sagradong Lugar nak inghimo it Ginoong Dios, ag kali ay buko tuyar rutong Toldang Dayawan nak dating ginghimo it tawo.
It katong una pa kag tanang Pinaka-mataas nak Saserdote it mga lahi it Hudyo ay ingtalaga it Dios nak maghalar it mga hadop ag iba pang mga inughalar nak ingtata-o it mga tawo. Kada kaling ato Pinaka-mataas nak Saserdote ay dapat inggwa ra it ihalar sa Dios. Pero buko hali sa duta, dahil kung Sida tan-a kag nagsiserbisyo rili sa duta ay indi puyde nak Sida ay magiging saserdote, kumo inggway it mga saserdote nak naghahalar sa Dios kumporme sa Kasuguan ni Moises.* 8:4 Kumporme sa Kasuguan ni Moises kag mga saserdote nak nagsiserbisyo sa Templo ay halin yang sa linya ni Levi, pero si Hesus ay halin sa linya ni Juda, kada bawal sa Ida nak maging saserdote sa Templo. Ag kinang lugar kung hariing inra ingsiserbisyuhan ay pay kopya ag anino yang it matuor nak lugar ruto sa langit. Ayam nato kali dahil tong ginghahanra ni Moises kag mga gamit para itukor ninra kinang Toldang Dayawan, kag Dios mismo kag nagsugo sa ida sa pagsiling, “Sunra it maado kag Ako ingpakita sa imo ruto sa baguntor tungor sa hitsura it kaling tanang kagamitan.” 8:5 Exo. 25:40. Pero kaling pagserbisyo nak ingtugyan it Dios kang Hesus ay lalong yabaw kisa sa pagserbisyo it kinang dating mga saserdote, dahil Sida kag manugpatunga nak naging kasiguruhan it kaling bag-o ag mas maadong kasugtanan it Dios. Ag kali ay mas maado dahil kag basihan ay mas maadong mga promisa it Dios.
Kung waya ngani it kakuyangan rutong dating kasugtanan, ay dey wayaey ra tan-a it kinahangyan nak inggwa pa it masubli. Pero gingpaayamey it Dios nak kag dating kasugtanan, pati kag Ida mga katawuhan ay inggwa it kakuyangan, kada kag Ida ingsiling ay,
“Maabot kag adlaw kung sauno ahimuon Nako kag bag-ong kasugtanan
sa mga taga-Israel ag taga-Juda.
Kaling bag-ong kasugtanan ay buko pareho sa dating kasugtanan
nak Ako inghimo sa inra mga ginikanan,
tong sinra ay Ako ing-agkay pramas pangunahan paliwas sa Ehipto,
kumo waya sinra nagpadayon sa pagsunor raha,
kada ingpabad-an yangey Nako sinra.
10 Pero kali kag bag-ong kasugtanan nak Ako ahimuon
sa mga inanak ni Israel sa palaabutong panahon.
Ako itanom kag Ako mga sugo sa inra isip ag tagipusuon.
Ag Ako kag inra magiging Dios ag sinra kag Ako magiging katawuhan.
11 Ag wayaey it kinahangyan nak magkakainggwa pa it tawo
nak matudlo sa ida kasimanwa sa pagsiling,
‘Kinahangyan nimo nak magkilaya sa Ginoong Dios,’
kumo sinrang tanan ay nagkikilayay sa Ako,
maging mataas man o mababa nak tawo.
12 Dahil akaluy-an gihapon Nako sinra aber sinra ay naghimo it kayainan,
ag indiey nak gador Nako girumrumon kag inra mga sala.” 8:8-12 Jer. 31:31-34.
13 Sa pagsiling it Dios nak kaling kasugtanan ay “bag-o,” Ida ingpaayam nak katong nauna ay wayaey it puyos. Ag ayamey nato nak kag butang nak wayaey it puyos dahil yumaey ay mayungotey mawagit.

*8:4 8:4 Kumporme sa Kasuguan ni Moises kag mga saserdote nak nagsiserbisyo sa Templo ay halin yang sa linya ni Levi, pero si Hesus ay halin sa linya ni Juda, kada bawal sa Ida nak maging saserdote sa Templo.

8:5 8:5 Exo. 25:40.

8:12 8:8-12 Jer. 31:31-34.