5
E Huriki a Matakari
1 Mua o huriki a gare na lotu, iau tara a gare. Iau a matai a maregoa i bolea e Kristo. Bara te vaveru vona a bagetuanga vona, ra ge bele kavakava muri ma. I mavonga, a taki tora mua, 2 * Ion 21:15-17; Apo 20:28mu matakari kamumu a kabu na Vure, ra ri made turane mua. Mu rata mavonga, i uka ma mu ramai kunana a nitagu. Nahea mu gu rata kunana a leho ni bole a moni. A naro iea, a naro ni maruhu vona. Mu matakari ria a vuhuna mu ngaru hateka ni rata, i manga a Vure i ngaru. 3 * 2Ko 1:24; Pili 3:17; Tit 2:7Naha ni matakari hateka a kabu na Vure. Mu muga ria, mu vakasiri a naro kamumu ne ria, ri gi ramai. 4 Muri, na tahuna a Matakari dagi i bele, bara i habi ne mua a mapa kamumu ge tabuli vakaroro.
5 * Snd 3:34; Epe 5:21; Iak 4:6Mua o huriki a riau, mu longototo e huriki a gare ne mua. Mu vakakiroko mua, mu vakori, a vuhuna a Hinere i ta maea,
“E huriki ri bibi rike mule a rane ria, a Vure bara i gege ria.
Pali e huriki ri vakakiroko ria, a Vure bara i rata kamumu ria.”
6 * Mat 23:12; Luk 14:11; Iak 4:10I mavonga, mu vakakiroko mua polotano na nitora dagi na Vure. Muri, na parava i vulakia, bara i kavurike mua. 7 * Mat 6:25-30Mu habi na limana a maki lobo mu loho lege vona, a vuhuna i ngaru hateka mua.
8 * 1Tes 5:6Mu matapara, mu matadoko, a vuhuna a pile ne mua, e Satan, i laho viliha manga a laion i roro, i matakana a viri ge ratapilea. 9 * Epe 6:11-13; Iak 4:7Mu gegea, mu pesi tora na niluhoi tora, a vuhuna mu lohoka vona e huriki e turane mua na tabeke ranga na malala, ria ranga ri bole a nimadihi manga mua. 10 I mavonga, na tahuna mu bole pali a nimadihi popote, a Vure na nidodo bara i kisi mua, i vakatora mua, i rata mua mu pesi tora. Ra Vure i rata kamumu mua, i gale mua mu gu made turana vakaroro na bagetuanga vona, a vuhuna mu luhoi torea e Isu Kristo. 11 A nitora lobo ge ne vona kunana vakaroro. I muholi.
A Nitalo
12 * Apo 15:22,40E Sailas i manga e turagu muholi, i rata kamumu a leho lobo a habi vona. I kori iau, i here poloa a raukea kiroko iea, ra a vara mua, a taki tala ne mua a naro kamumu muholi na Vure. Mu pesi tora vona.
13 * Apo 12:25; 2Tim 4:11A ngatavine ra i made o Babilon* E huriki a bakovi na lohokanga ri takia ra ngatavine iea, a nita vakakika. I taki virihi e huriki a tara na Vure ri made o Babilon. i talo mua. Ia tara, a Vure i vulakia. E tugu e Markus tara, i talo mua. 14 Mu vatagui na naro kamumu ni vangaru.
Mua o huriki mu rihi e Kristo, a nivalemu ge tabuli ne mua.