1 Muri e Moses i pagitala i taki e huriki a Israel i ta maea, 2 *Gi 20:12 “Iau a tahoka a pida i 120 i uka ma kara ni matakari mua tabu. E BAKOVI DAGI tara i taki iau, nahea ga tulu poloa a naru e Iordan. 3 E BAKOVI DAGI a Vure ne mua ge muga mua, ge ratapile e huriki ri made vona a tabeke iea, muri bara mu bolea a malala ne ria. E Iosua ge matakari mua i manga a ngava e BAKOVI DAGI i taki. 4 *Gi 21:21-35E BAKOVI DAGI ge ratapile e huriki ri made vona a robo iea, i manga a hini i ratapile a robo ne Sihon ne Og, a hariki ne huriki a Amor. 5 E BAKOVI DAGI ge tuhori mua bara mu rangi ria. Mu rata virihi ria vona a maka maki a taki ta mu gu rata virihi ria vona. 6 Mu pesi tora, nahea ge vakulu a tagane mua, mu gu mangenge ne ria. E BAKOVI DAGI a Vure ne mua bara i made turane mua. I uka ma ge lohopile mua o ge matataro mua mu gu made tavula.”

7 Muri e Moses i galea e Iosua i valai vona, na matane huriki a Israel i taki ria, i ta maea, “O pesi tora, naha ni mangenge ge vakulu a tagamu. O muga e huriki, o veru o habi ne ria ra malala e BAKOVI DAGI i ta muholi vona ne huriki a gare ge habia ne mua. 8 *Ios 1:5; Hib 13:5E BAKOVI DAGI ge laho turamu ge muga ioe. I uka ma ge pe ioe o ge matataro ioe go bole a vuranga. Naha ni mangenge, naha ni loholege.”

9 E Moses i here a maka vinara i habi ne huriki a prister na kabu ne Levi, ne huriki a gare ne Israel. E huriki a Levi ri matakari a Tava na Ngava Dagi ne BAKOVI DAGI. 10 *Vin 15:1; 16:13-15E Moses i taki ria, i ta maea, “Na Habu na Kape na poloruana pida, ra pida ni vakalobo a maka makoli, 11 na tahuna ri valai ri gi kavurike e BAKOVI DAGI a Vure ne mua na tabeke a Vure i vulakia, mu gi polo ne huriki a Israel a vinara. 12 Mu gale palupu e huriki a bakovi, a ngatavine, a koma, a mosi ri made na vuhu tanga, ri gi vapopo ri gi longo a vinara. Ri gi longo a vinara, ri gi togoa e BAKOVI DAGI a Vure ne mua, ri gi ramai kamumu a maka nitana. 13 Mu rata mavonga, e huriki a hamone mua i uka ma ri longo a vinara ma ri gi longo, ri gi togo vakaroroa e BAKOVI DAGI na tahuna ri made vona a malala na tabeke mule lokovonga ne Iordan.”

14 Muri e BAKOVI DAGI i takia e Moses i ta maea, “I tabukoi ngane bara o mate. O galea e Iosua ge valai na kape nau, ga vakasiria vona a leho a ngaru ia ge ratea.” Lakea e Moses e Iosua ru lakea na Kape na Vaponga.

15 Muri e BAKOVI DAGI i bele i made pololilo na bubu tabukoi polomeli na matana kape. 16 E BAKOVI DAGI i takia e Moses i ta maea, “Tabukoi ngane bara o mate. Muri e huriki bara ri pe iau ri ratapilea ra ngava dagi a taki ria vona. Bara ri ngalahere nau ri kavurike a maka vure na robo iea ra ri ngaru ni bolena. 17 Na tahuna ri rata maea, bara i madihi a hategu ne ria. Bara pe ria a ngalahere ne ria, bara ri bole a vuranga. A maka maki hale ri kupo bara i ratapile ria. Bara i kupo a maka maki hale i bele ne ria. Muri bara ri ta maea, ‘A Vure i uka ma i made turane hita, i bele ne hita a maka maregoa nga.’ 18 Bara marikoi liu ni tuhori ria na tahuna iea, a vuhuna ri rata a naro hale ri kavurike a maka vure ranga.

19 “Ngane a ngaru ni tovo ioe vona tara linge, o here purua. O tovo poloa ne huriki a Israel, muri ma ra nitana linge iea bara i taki tala ria. 20 Na tahuna a bole dili ria vona a robo kamumu iea, i manga a hini a ta muholi vona ne huriki a gare ne ria hosi. Bara ri made kamumu ri bole a maka maki ni kani i kupo vona a robo iea. Na tahuna iea bara ri ngalahere nau bara ri kavurike a maka vure taminga. Bara ri ngalahere ri ratapilea a ngava dagi a taki ria vona. 21 Muri a maka maki hale legelege bara i bele ne ria. Na tahuna hale iea, e huriki i uka ma ri gi longokaburungia a linge iea, bara ri kaloloa turane huriki e tune ria. Ra linge iea bara i vakapalala a niluhoi ne ria, i taki tala a naro hale ri rata. Iau i uka ma bole dili ria vona ma a malala iea, pali a lohoka vona pali a niluhoi ne ria.” 22 Na parava iea kunana e Moses i herea a linge iea i tovo e huriki a Israel vona.

23 *Gi 27:23; Ios 1:6E BAKOVI DAGI i takia e Iosua tune Nun, i ta maea, “O pesi tora, naha ni luhoi lege lae. Ioe kunana bara o taparaki e huriki a Israel lakea vona a robo a ta muholi vona ga habia ne ria. Iau kunana bara made turamu vakaroro.”

24 Na tahuna e Moses i here puru lobo a maka nitana vinara na puhu, 25 i taki e huriki a prister na kabu ne Levi, ri gi matakaria a Tava na Ngava Dagi ne BAKOVI DAGI. 26 Ri gi bolea a puhu i vona a vinara na Vure, ri gi ru tabukoia na Tava na Ngava Dagi, lakea ge takitala a naro hale ne ria. 27 A lohoka vona e huriki ri tagege ri longotaro a ngava. Na tahuna a tababana, ri longotaro a nitane BAKOVI DAGI, ri putu puru a maka vinara vona, na tahuna a mate pali, a luhoi kilala ra naro na tagenga ne ria bara i bele dagi hateka. 28 O gale palupu e huriki a matakari a bolekori ne huriki a kabu lobo, ri gi valai tabukoi nau. A ngaru ga habia ne ria a nitana linge iea. Ga gale a hunu a malala, ru gu matai iau a ratea ne mua a nita iea. 29 A lohoka vona na tahuna a mate pali, e huriki bara ri mapulo, bara i hale a vilone ria, i uka ma ri gi ramaia a nita a habia ne mua. Bara mu rata a maka naro hale i kupo, bara mu ratea e BAKOVI DAGI i tahate i rudu a maka maki hale ri bele ne mua.”

30 Na tahuna e huriki a Israel ri vapopo, e Moses i tovo ria vona a linge iea: