23
E Iosua i Tarulu e Huriki a Israel
Na maka pida ri polo pali, e BAKOVI DAGI i habi a nimade na nivalemu ne huriki a Israel, i uka ma ri vaubi ne huriki a pile ri made viliha vonga. Ngane e Iosua i gare. Lakea i gale palupu e huriki a Israel turana e huriki a gare, a matakari, a mari ni pelekado a maregoa, a bolekori, i taki ria, “Ngane a gare liu pali. Mu matai pali a maki e BAKOVI DAGI, a Vure ne mua i rata virihi na maka tanga ranga, i tuhori mua na vabinga i vaubi polo ne mua. Ngane mu longo kamumu. A malala ne huriki ranga i uka ma mu rangi ma, a pasivunu pali ne mua mu gu bole, i manga a naro a rata na malala ne huriki lobo a rangi ria na vabinga. A nagi na malala ne mua i tubu na naru e Iordan na tabeke na nirikena haro, i vano i harena na Dari na Kurukuruna Malala na tabeke na nirolona haro. E BAKOVI DAGI a Vure ne hita ge lili tala e huriki a pile, ge rata ria ri gi ha ne mua, bara mu bole a malala ne ria i manga a ngava i ta muholi vona.
“I mavonga, mu matadoko kamumu, mu ramai a ngava lobo na puhu na vinara ne Moses. Naha ni longotaroa tara nitana. Naha ni laho turana e huriki a bakovi a ngatavine o Kenan, ra ri tababana ni made turane mua, naha ni gale a rana a maka vure ne ria. Na tahuna mu kaba, naha ni kaba vona a maka rana vure ne ria. Naha ni turume mu gu kavurike ria. Mu madoko turane BAKOVI DAGI a Vure ne mua, mu ramaia, i manga a hini mu rata i valai i harena mona.
“E BAKOVI DAGI i lili tala pali a maka kabu dagi ri gao hateka, i uka tara ne ria ge pesi tora ge gege mua. 10  * Vin 3:22; 32:30A bakovi tara ne mua i kara ni vakamangenge a bakovi i ala rangale (1,000) ne ria, bara ri ha, a vuhuna e BAKOVI DAGI a Vure ne hita i tuhori mua na vabinga i vaubi polo ne mua, i manga a hini i ta muholi vona hosi ge rata.
11 “Ngane mu matadoko vona a narone mua. Mu ngaru hateka e BAKOVI DAGI a Vure ne hita. 12 Pali mua bara mu ngalahere ne BAKOVI DAGI, mu madoko turane huriki a bakovi a ngatavine ri made muga koea ri tababana turane mua, mu parangi ne ria, 13 mu lohoka pali e BAKOVI DAGI a Vure ne mua i uka ma ge lili tala e huriki nga na matane mua. Bara ria a pile muholi ne mua, ri manga a hoa bara mu kona vona. Bara ri habi a ni madihi ne mua, i manga a bakovi ni bole a lebo ni hotu na bitona, a barakau i padipupu a matana. Ra maregoa iea bara i tabuli mavonga, i harena na tahuna mu mate vona a malala kamumu iea, e BAKOVI DAGI a Vure ne hita i habia pali ne mua.
14 “I tabukoi ngane bara pe mua. Mu lohoka pali na hatene mua e BAKOVI DAGI a Vure ne hita i habi ne mua a maka maki kamumu, i ta muholi vona ge habi ne mua. A maki lobo i ta muholi vona ge rata, ri bele pali, i uka ma i rata kalevea tara. 15 A maka nita muholi kamumu e BAKOVI DAGI a Vure ne hita i rata i bele muholi, i mavonga kunana i ta muholi na maki hale ge valai ne mua ge ratapile mua na malala kamumu i habia ne mua. 16 A maki iea bara i bele, na tahuna i uka ma mu ramai a ngava dagi ne BAKOVI DAGI, a Vure ne mua, i vakuku mua mu gu ramai. Na tahuna mu ramai mu kavurike a vure ranga, e BAKOVI DAGI bara i tahate hateka mua. Muri i uka tara ne mua ge made vona a malala kamumu i habia ne mua. Mua lobo bara mu mate.”

*23:10: Vin 3:22; 32:30