15
A Tavila i Polorua
1 Muri a kilakila vakaturutu i bele na hunu. I dagi hateka, e huriki ri turutu vona. A matai a agelo ala polorua, ri nugu a vuranga i polorua. A vuranga nga, a iku na maka vuranga lobo, a vuhuna ri gi vakaloboa a rongova na Vure.
2 Muri a masia tara maki, i mata manga a dari ni rata na glas, ni pulo turana kanono. A matai tabu e huriki ri rangi mugea e Livoa turana hanuna, ri rangia a namba na rana. Ri pesi na harena dari ni rata na glas, ri nugu a hap,* A hap i manga popote a gita. i habi ne ria a Vure. 3 * Nim 15:1; Sng 139:14; 145:17Ri kalolo a linge ne Moses, a vora na Vure, a linge na Tuna Sipsip. Ri kalolo maea,
“O Bakovi Dagi, a Vure tuhaka hateka!
E huriki ri turutu na maka maki o rata, ri dagi hateka!
Hariki ne huriki lobo na malala,
A naromu i muholi, i malamala!
4 * Sng 86:9; Jer 10:6-7O Bakovi Dagi, e huriki lobo ri vakabagetua a ramu,
ri mangenge vomu.
Ioe kikeri o malamala.
E huriki na tanga lobo ri gi valai
ri gi kavurike ioe,
a vuhuna i bele kavakava a naro kiripi vomu.”
5 * Nim 38:21Muri a masia a Roho na Vure na hunu ni tala, ra Kape na Ngava Dagi. 6 E huriki a agelo i polorua ri pagitala valai, ri nugu a vuranga i polorua. Ri rodo a varakia ola keakea, ri kabakaba, ri para hateka. Ri huraki a mota ni rata na gol. 7 Tara ne huriki a maki mahuri i va i valai, i habi ne ria a tavila i polorua ni rata na gol. A tavila nga ri vona a rongova na Vure, ra i mahuri vakaroro. 8 * 1Ki 8:10-11; 2Sto 5:13-14; Ais 6:4Ngane a pokona bagetuanga turana nitora na Vure i vakavonu a Roho. E huriki ri keri ni dili na roho, i harena na tahuna a vuranga i polorua na agelo i polorua ri lobo.