1 ལྷ་ཆོས་པའི་ཁྲོད་དུའང་བྱེད་མི་ཆོག་པའི་ལོག་གཡེམ་ཁྱོད་ཚོའི་ཁྲོད་དུ་ཡོད་པའི་གཏམ་དངོས་སུ་གོ་བྱུང་སྟེ། མི་ཞིག་གིས་རང་གི་ཕའི་བཟའ་ཟླ་མཉམ་དུ་འདུས། 2 དེ་ལྟར་སྤྱོད་མཁན་ཁྱོད་ཚོའི་ཁྲོད་ནས་འདོན་མི་དགོས་སམ། དེར་ཁྱོད་ཚོ་འགྱོད་གདུང་མི་སྐྱེ་བར་དེ་ལས་ལྡོག་དེ་ང་རྒྱལ་བྱེད། 3 ང་ནི་ལུས་ཀྱི་ཆ་ནས་ཁྱོད་ཚོའི་ཁྲོད་དུ་མེད་ནའང་སེམས་ཀྱི་ཆ་ནས་ཁྱོད་ཚོའི་རྩར་ཡོད། ང་རང་དངོས་སུ་ཁྱོད་ཚོ་དང་མཉམ་དུ་ཡོད་པ་བཞིན་དེ་ལྟར་སྤྱོད་མཁན་ལ་ཁྲིམས་གཅོད་བྱས་ཟིན་ནོ། 4 ཁྱོད་ཚོས་ངེད་ཀྱི་གཙོ་བོ་ཡེ་ཤུའི་མཚན་གྱི་ཐོག་ནས་འདུས་ཏེ་ངའི་སེམས་དང་གཙོ་བོ་ཡེ་ཤུའི་དབང་ཡང་ཁྱོད་ཚོ་མཉམ་དུ་ཡོད་དུས། 5 སྡིག་པའི་རང་གཤིས་མེད་པ་བྱེད་ཕྱིར་མི་འདི་བདུད་སཱ་ཏན་ལ་གཏོད་ཅིག དེ་ནི་གཙོ་བོ་ཡེ་ཤུ་འབྱོན་པའི་ཉིན་མོར་ཁོའི་སེམས་ཐར་བར་འགྱུར་བའི་ཕྱིར་རོ། 6 ཁྱོད་ཚོས་འུད་ཤོབ་བྱེད་པ་དེ་མི་ལེགས། སྐྱུར་རྩི་ཅུང་ཟད་ཅིག་གིས་བག་ཟན་ཧྲིལ་པོ་སྐྱུར་བར་བྱེད་པ་དེ་མི་ཤེས་སམ། 7 ཁྱོད་ཚོ་དོན་དངོས་ཐོག་སྐྱུར་རྩི་མེད་པ་ཡིན་པས་བག་ཟན་གསར་པར་འགྱུར་བའི་ཆེད་དུ་སྡིག་ཉེས་ཡིན་པའི་སྐྱུར་རྩི་རྙིང་པ་དེ་སྤོངས་ཤིག གང་ཡིན་ཞེ་ན། མཱ་ཤི་ཀ་ངེད་རྣམས་ཀྱི་པེ་སག་དུས་ཆེན་གྱི་ལུ་གུ་མཆོད་པ་ཕུལ་ཟིན་པས་སོ། 8 དེའི་ཕྱིར་གནོད་སེམས་དང་ངན་སེམས་ཡིན་པའི་སྐྱུར་རྩི་རྙིང་པ་མ་ཡིན་གྱིས། བཅོས་མིན་དང་བདེན་པ་ཡིན་པའི་སྐྱུར་རྩི་མེད་པའི་བག་ལེབ་ཀྱིས་ང་ཚོས་དུས་ཆེན་གཏོང་དགོས།

9 ངས་སྔར་ཁྱོད་ཚོར་བཏང་བའི་འཕྲིན་ཡིག་ལ་ལོག་གཡེམ་བྱེད་མཁན་དང་མི་འགྲོགས་ཞེས་པ་ནི། 10 འཇིག་རྟེན་འདིར་ལོག་གཡེམ་བྱེད་པའམ། ཧམ་སེམས་ཅན་ནམ། མགོ་སྐོར་གཏོང་མཁན། ལྷ་ཆོས་པ་སོགས་དང་མི་འགྲོགས་པ་ཞེས་པའི་དོན་རྩ་བ་ནས་མ་ཡིན། དེ་ལྟར་ཡིན་ན་འཇིག་རྟེན་འདི་ལས་ཕྱིར་ཐོན་དགོས་པ་ཡིན། 11 འོན་ཀྱང་སྤུན་ཟླ་ཡིན་ཞེས་ཟེར་བའི་ལོག་གཡེམ་བྱེད་མཁན་ནམ། ཧམ་སེམས་ཅན་དང༌། ལྷ་ཆོས་པའམ། དམའ་འབེབས་གཏོང་མཁན་ནམ། ར་བཟི་མཁན་ནམ། མགོ་སྐོར་གཏོང་མཁན་སོགས་དང་མི་འགྲོགས་ཞེས་ད་ལྟ་ཁྱོད་རྣམས་ལ་འབྲི། དེ་བཞིན་དུ་རྣམས་དང་ཁ་ལག་ཀྱང་མ་ཟ་ཤིག 12 ཆོས་ཚོགས་ཀྱི་ཕྱི་ལ་ཡོད་པ་རྣམས་ལ་ཁྲིམས་གཅོད་བྱེད་པ་དེ་ང་དང་འབྲེལ་བ་ཅི་ཡོད། ཁྱོད་ཚོས་ཆོས་ཚོགས་ཀྱི་ནང་ལ་ཡོད་པ་རྣམས་ལ་ཁྲིམས་གཅོད་མི་བྱེད་དམ། 13 དཀོན་མཆོག་གིས་ཆོས་ཚོགས་ཀྱི་ཕྱི་ལ་ཡོད་པ་རྣམས་ལ་ཁྲིམས་གཅོད་མཛད། ངན་པ་བྱེད་མཁན་ཁྱོད་ཚོའི་ནང་ནས་སྐྲོད་ཅིག །*5:13 ལུང་སྟོན་པ་མོ་ཤེ་ཡིས་བྲིས་པའི་མདོ་ལྔ་པ་སྟེ་བཀའ་ལུང་ལེའུ་13 ཨང་5 ལ་གཟིགས།