1 དེའི་ཕྱིར་འགྲོ་འདོད་བཟོད་ཐབས་མེད་པ་བྱུང་སྐབས་ང་ཚོ་ཨ་ཐེ་ནེ་གྲོང་ཁྱེར་དུ་གཅིག་པུར་ལུས་པར་བསམས་ཏེ། 2 ཁྱེད་ཚོའི་དད་པ་བརྟན་པོ་དང་བློ་སྟོབས་སྤེལ་བའི་ཆེད་དུ་གཙོ་བོ་ཡེ་ཤུའི་འཕྲིན་བཟང་སྒྲོག་པའི་ཕྱིར་དཀོན་མཆོག་གི་ལས་གྲོགས་ཡིན་པ་དང་ང་ཚོའི་སྤུན་ཐི་མོ་ཐེ་ང་ཚོས་ཁྱེད་ཀྱི་རྩར་བཏང༌། 3 དེ་ནི་སྡུག་བསྔལ་དེས་མི་སུ་ཞིག་དཀྲུག་པར་མི་བྱེད་པའི་ཕྱིར་ཡིན། དོན་དེ་རྣམས་ནི་ང་ཚོ་མྱོང་རྒྱུ་ཡིན་པར་ཁྱེད་ཀྱིས་ཤེས། 4 དངོས་གནས་བྱས་ན་ང་ཚོ་ཁྱེད་དང་མཉམ་དུ་ཡོད་སྐབས་སྡུག་བསྔལ་མ་བྱུང་བའི་སྔོན་དུ་ང་ཚོས་ཡང་ཡང་མནར་གཅོད་མྱོང་རྒྱུ་ཡིན་ཞེས་བཤད་པ་དང་ཁྱེད་ཚོས་རྟོགས་པ་བཞིན་དུ་དེ་ལྟར་བྱུང་ངོ༌། 5 དེར་བརྟེན་ང་བཟོད་ཐབས་མེད་པའི་སྐབས་ཁྱེད་ཚོའི་དད་པའི་སྐོར་ཤེས་པའི་ཕྱིར་ཐི་མོ་ཐེ་བཏང༌། གང་ལགས་ཟེར་ན། བསླུ་བྲིད་བྱེད་མཁན་གྱིས་ཁྱེད་ཚོར་མགོ་སྐོར་བཏང་སྟེ་ང་ཚོའི་དཀའ་ལས་དོན་མེད་དུ་འགྲོ་བའི་སེམས་ཁྲལ་ཡོད་པས་སོ། །

6 ད་ལྟ་ཐི་མོ་ཐེ་ཁྱེད་ཀྱི་ས་ནས་སླེབས་ཏེ་ཁྱེད་ཀྱི་དད་པ་དང་བྱམས་སེམས་ཀྱི་གཏམ་བཟང་ང་ཚོར་བཤད་པ་མ་ཟད། ཁོང་གིས་ང་ཚོས་ཇི་ལྟར་ཁྱེད་རྣམས་མཇལ་འདོད་པ་བཞིན། དེ་ལྟར་ཁྱེད་རྣམས་ཀྱིས་ཀྱང་རྟག་ཏུ་ང་ཚོ་དྲན་པ་དང་ང་ཚོ་ཐུག་འདོད་ཡོད་ཅེས་གསུངས། 7 སྤུན་ཟླ་རྣམས། དེའི་ཕྱིར་ང་ཚོ་སྡུག་བསྔལ་དང་མནར་གཅོད་གྲངས་ལས་འདས་པ་མྱོང་ཡང་ཁྱེད་ཀྱི་དད་པའི་རྐྱེན་གྱིས་ང་ཚོའི་སེམས་ཁྱེད་ཚོ་ལ་བལྟས་ནས་གསོ་བར་གྱུར། 8 ཁྱེད་ཚོས་གཙོ་བོ་ཡེ་ཤུ་ལ་དད་པ་བརྟན་པོ་བྱས་ན་ང་ཚོའི་སེམས་བདེ་བར་འགྱུར། 9 ཁྱེད་ཀྱི་དད་པའི་རྐྱེན་གྱིས་དཀོན་མཆོག་གི་མདུན་དུ་ང་ཚོར་དགའ་སྤྲོ་ཆེན་པོ་སྦྱིན། དེའི་ཕྱིར་དཀོན་མཆོག་ལ་ལྡེང་ངེས་ཀྱི་བཀའ་དྲིན་ཆེ་ཞེས་ང་ཚོས་ཅི་ལྟར་ཞུ། 10 ང་ཚོས་ཉིན་མཚན་མེད་པར་ཁྱེད་ཚོ་ཡང་བསྐྱར་མཇལ་བ་དང་ཁྱེད་ཚོའི་དད་པ་ལ་བལྟས་ནས་གང་དགོས་གསོབ་པ་དེ་སྙིང་ཐག་པ་ནས་གསོལ་འདེབས་བྱེད།

11 ད་ང་ཚོའི་ཡབ་དཀོན་མཆོག་ཉིད་དང་ང་ཚོའི་གཙོ་བོ་ཡེ་ཤུས་ཁྱེད་རྩར་འགྲོ་བའི་ལམ་གྲ་སྒྲིག་གནང་བར་ཤོག 12 ང་ཚོས་ཇི་ལྟར་ཁྱེད་རྣམས་ལ་བྱམས་པ་བཞིན། དེ་ལྟར་ཁྱེད་རྣམས་ཕན་ཚུན་དང་མི་ཐམས་ཅད་ལ་བཅངས་པའི་བྱམས་སེམས་དེ་གཙོ་བོ་ཡེ་ཤུས་སྤེལ་ནས་ཕུན་སུམ་ཚོགས་པར་མཛོད་ཅིག 13 མ་ཟད་གཙོ་བོ་ཡེ་ཤུ་དང་ཁོང་གི་སྐྱེ་བོ་དམ་པ་ཚང་མ་འབྱོན་སྐབས་སུ་ང་ཚོའི་ཡབ་དཀོན་མཆོག་གི་མདུན་དུ་ཁྱེད་ཚོ་དམ་པ་དང་སྐྱོན་མེད་པ་ཡིན་པའི་ཕྱིར་ཁོང་གིས་ཁྱེད་ཀྱི་སེམས་བརྟན་པོར་མཛད་པར་ཤོག །