1 ད་ངས་ཁྱེད་རྣམས་མ་སྐྱོ་བའི་ཕྱིར་ཡང་བསྐྱར་ཁྱེད་ཚོའི་རྩར་མ་འོང་བའི་ཐག་གཅོད་བྱས། 2 གང་ཡིན་ཞེ་ན། གལ་ཏེ་ངས་ཁྱེད་རྣམས་སེམས་སྐྱོ་བར་བཅུག་ན། ངས་སེམས་སྐྱོ་བར་བཅུག་པ་དེ་ལས་གཞན་སུས་ང་སེམས་སྐྱིད་པོ་བཟོ། 3 ཡང་ངས་ཁྱེད་རྣམས་ལ་སྔར་བྲིས་པའི་འཕྲིན་ཡིག་གི་དོན་ནི། ང་ཡོང་སྐབས་ང་སེམས་སྐྱིད་པོ་བཟོ་དགོས་པ་རྣམས་ཀྱིས་ང་སེམས་སྐྱོ་བར་མི་འཇུག་པའི་ཕྱིར་ཡིན། ང་དགའ་བ་དེ་ཁྱེད་ཚོ་ཚང་མ་ཡང་དགའ་བར་འགྱུར་བར་ངས་ཡིད་ཆེས་བྱས། 4 ངས་སེམས་འཁྲུགས་པ་དང་ཡིད་སྐྱོ་བའི་མིག་ཆུས་ཁེངས་བཞིན་ཁྱེད་ཚོར་འཕྲིན་ཡིག་བྲིས་པ་དེ། ཁྱེད་ཚོ་ལ་སེམས་སྡུག་ཡོང་བའི་ཕྱིར་མ་ཡིན་གྱི། ངས་ཁྱེད་རྣམས་ལ་ལྷག་པར་བྱམས་པ་དེ་ཁྱེད་ཚོས་ཤེས་པའི་ཕྱིར་ཡིན།

5 སུ་ཞིག་གིས་སེམས་སྡུག་ཏུ་བཅུག་ན། འུར་བཤད་མི་བྱེད་དེ། ང་མིན་པར་ཁྱེད་ཐམས་ཅད་སེམས་སྐྱོ་བར་ཅུང་ཙམ་བཅུག 6 ཁྱེད་ཚོ་མང་ཆེ་བས་དེ་ལྟ་བུའི་མི་ལ་ཉེས་ཆད་བཏང་བ་ནི་འོས་སོ། 7 སེམས་སྡུག་ཆེ་བའི་བསྔལ་གྱིས་མི་གནོན་པའི་ཕྱིར། ཁྱེད་ཚོས་ཁོ་ལ་གུ་ཡངས་གཏོང་ཞིང་སེམས་གསོ་བྱེད་དགོས། 8 དེའི་ཕྱིར་ཁྱེད་ཚོས་ཡང་བསྐྱར་ཁོ་ལ་བྱམས་པ་སྟོན་པར་སྐུལ། 9 ཁྱེད་ཚོས་རྣམ་པ་ཀུན་ཏུ་ཁ་ལ་ཉན་ནམ་མི་ཉན་ཉམས་ཚོད་བྱེད་པའི་ཕྱིར་ངས་ཁྱེད་ཚོར་བྲིས། 10 ཁྱེད་ཚོས་སུ་ཞིག་ལ་གུ་ཡངས་བཏང་ན་ངས་ཀྱང་གུ་ཡངས་གཏོང༌། ཡང་ངས་གང་ཞིག་ལ་གུ་ཡངས་བཏང་བ་དེ་ནི་མཱ་ཤི་ཀའི་དྲུང་དུ་ཁྱེད་ཚོར་ཕན་པའི་ཆེད་དུ་ཡིན། 11 ཡང་བདུད་སཱ་ཏན་གྱིས་ང་ཚོར་མགོ་སྐོར་མི་གཏོང་བའི་ཕྱིར་དེ་ལྟར་བྱེད། གང་ལགས་ཤེ་ན། ཁོའི་ཇུས་ངན་ང་ཚོས་ཤེས་པས་སོ། །

12 དེ་སྔོན་ང་མཱ་ཤི་ཀའི་འཕྲིན་བཟང་སྒྲོག་པར་ཏྲོ་ཡཱ་གྲོང་ཁྱེར་དུ་སླེབས་ནས་གཙོ་བོས་ང་ལ་གོ་སྐབས་གནང་བྱུང་ཡང༌། 13 ངའི་སྤུན་ཟླ་ཐེ་ཏུ་མ་རྙེད་སྟབས་སེམས་བདེ་བར་བསྡད་མ་ཐུབ་པས། ཁོ་ཚོ་དང་ཁ་གྱེས་ནས་ང་མ་ཀེ་དོན་ཡཱ་ཡུལ་དུ་ཕྱིན།

14 མཱ་ཤི་ཀའི་སྒོ་ནས་རྒྱལ་བའི་རུ་སྒྲིག་ལ་ང་ཚོ་རྟག་ཏུ་འཁྲིད་མཁན་དཀོན་མཆོག་ལ་བཀའ་དྲིན་ཆེ་ཞུའོ། ཁོང་གིས་ང་ཚོའི་སྒོ་ནས་ཁོང་ངོ་ཤེས་པའི་དྲི་བཟང་ཕྱོགས་ཀུན་ཏུ་ཁྱབ་པར་མཛད། 15 གང་ཡིན་ཞེ་ན། ཐར་བར་འགྱུར་བ་དང༌། འཇིག་པར་འགྱུར་བ་རྣམས་ལ་ང་ཚོ་དཀོན་མཆོག་གི་སྤྱན་སྔར་མཱ་ཤི་ཀའི་དྲི་བཟང་ཡིན་ཏེ། 16 ང་ཚོ་ནི་ཁ་ཅིག་ལ་འཆི་བའི་དྲི་ངན་ལྟར་ཡིན་པ་དང༌། ཁ་ཅིག་ལ་ཚེ་ཡི་དྲི་བཟང་ཡིན། འཕྲིན་བཟང་སྒྲོག་པའི་ལས་ཀ་དེ་བྱེད་འོས་པ་སུ་ཡིན། 17 མི་མང་པོ་དང་མི་འདྲ་བར་ང་ཚོ་རྒྱུ་ནོར་འཐོབ་ཕྱིར་དཀོན་མཆོག་གི་བཀའ་སྒྲོག་མཁན་མ་ཡིན། དེ་ལས་ལྡོག་སྟེ་དཀོན་མཆོག་ནས་མངགས་པ་ལྟར་མཱ་ཤི་ཀའི་སྒོ་ནས་དཀོན་མཆོག་གི་སྤྱན་སྔར་ང་ཚོས་ལྷག་བསམ་ཟོལ་མེད་ཀྱིས་སྨྲའོ། །