1 དེའི་དུས་སུ་ཉེ་གནས་རྣམས་ཡེ་ཤུའི་དྲུང་དུ་ཡོང་ནས་ཁོང་ལ་“དཀོན་མཆོག་གི་རྒྱལ་སྲིད་ནང་ཆེ་ཤོས་དེ་སུ་ཡིན་”ཞེས་དྲིས། 2 ཡེ་ཤུས་ཕྲུ་གུ་ཞིག་བོས་ཏེ་ཁོ་ཚོའི་དཀྱིལ་ལ་བཞག་པ་དང༌། 3 “ངས་ཁྱེད་ཚོར་བདེན་པར་ཟེར་རྒྱུར། སེམས་བསྒྱུར་ནས་ཕྲུ་གུ་དང་འདྲ་བར་མ་གྱུར་ན། ཁྱེད་ཚོ་དཀོན་མཆོག་གི་རྒྱལ་སྲིད་དུ་ཅི་ནས་ཀྱང་འཛུལ་མི་ཐུབ། 4 སུ་ཞིག་ཕྲུ་གུ་འདི་ལྟར་སྙེམས་ཆུང་དུ་འགྱུར་བ་ཁོ་ནི་དཀོན་མཆོག་གི་རྒྱལ་སྲིད་ནང་ཆེ་ཤོས་ཡིན། 5 སུས་ཀྱང་ཕྲུ་གུ་ཆུང་ངུ་འདི་འདྲ་བ་ཞིག་ངའི་མིང་གི་ཐོག་ནས་བསུ་བ་དེས་ང་རང་བསུ། 6 འོན་ཀྱང་མི་སུ་ཞིག་གིས་ང་ལ་དད་པ་བྱེད་པའི་བུ་ཕྲུག་འདི་ཚོ་ལས་གཅིག་ལ་ཡང་སླུ་བར་བྱས་ན། མི་དེའི་སྐེ་ལ་རང་འཐག་གི་རྡོ་ཆེན་པོ་ཞིག་བཏགས་ནས་རྒྱ་མཚོའི་གཏིང་དུ་ནུབ་ན་ལེགས་སོ། 7 བསླུ་བྲིད་ཀྱི་རྐྱེན་གྱིས་འཇིག་རྟེན་ལ་ཡ་རེ་ང༌། གང་ལགས་ཟེར་ན། བསླུ་བྲིད་འབྱུང་དགོས་ཀྱང༌། བསླུ་བྲིད་བྱེད་མཁན་དེ་ལ་ཡ་རེ་ང༌། 8 གལ་ཏེ་ཁྱེད་ཀྱི་ལག་པའམ་རྐང་པས་ཁྱེད་ལ་སྡིག་ཉེས་བྱེད་དུ་བཅུག་ན། དེ་བཅད་ནས་དབྱུགས་ཤིག ལག་པ་གཉིས་སམ། རྐང་པ་གཉིས་དང་ལྡན་པར་གསོད་པར་མི་འགྱུར་བའི་མེ་ལ་དབྱུག་པ་ལས། ཞ་བོར་གྱུར་ཡང་ཚེ་དཔག་ཏུ་མེད་པ་ཐོབ་པ་དེ་ལེགས་སོ། 9 གལ་ཏེ་ཁྱེད་ཀྱི་མིག་གིས་ཁྱེད་ལ་སྡིག་ཉེས་བྱེད་དུ་བཅུག་ན། མིག་དེ་བཏོན་ནས་དོར། ཁྱེད་རང་མིག་ཟུང་དང་ལྡན་པར་དམྱལ་ཁམས་ཀྱི་མེ་ལ་དབྱུག་པ་ལས། མིག་ཡ་གཅིག་མེད་ནའང་ཚེ་དཔག་ཏུ་མེད་པ་ཐོབ་པ་དེ་ལེགས་སོ། །”

10 “ཕྲུག་གུ་ཆུང་ངུ་འདི་རྣམས་ལས་གཅིག་ལ་ཡང་མཐོང་ཆུང་མ་བྱེད་ཅིག ངས་ཁྱེད་ཚོར་ཟེར་རྒྱུ། ཁོ་ཚོའི་ཕོ་ཉ་རྣམས་ཀྱིས་ཞིང་ཁམས་སུ་བཞུགས་པའི་ངའི་ཡབ་ཀྱི་ཞལ་རས་རྒྱུན་དུ་མཐོང༌། *18:10 མད་ཐཱ་ཡིས་བྲིས་པའི་འཕྲིན་བཟང་བཤུས་ཡིག་སྔ་ཤོས་རྣམས་ལ་གཤམ་གྱི་ཚིག་མེད། 11 མིའི་རིགས་ཀྱི་བུ་ནི་བརླག་པ་རྣམས་སྐྱོབ་པའི་ཆེད་དུ་ཡོང་ངོ༌། 12 ཁྱེད་ཚོས་ཅི་སེམས། ལུག་བརྒྱ་ཡོད་པ་གཅིག་ལས་བོར་བརླག་སོང་ན། དགུ་བཅུ་གོ་དགུ་དེ་རི་ལ་བཞག་ནས་བརླག་པ་དེ་མི་འཚོལ་ལམ། 13 ངས་ཁྱེད་ཚོར་བདེན་པར་ཟེར་རྒྱུར། ལུག་དེ་རྙེད་ན་མ་བརླག་པའི་དགུ་བཅུ་གོ་དགུ་ལས་རྙེད་པའི་ལུག་གཅིག་པོ་དེའི་ཕྱིར་དེ་བས་དགའ་བར་འགྱུར། 14 དེ་བཞིན་དུ་ཕྲུ་གུ་ཆུང་ངུ་འདི་རྣམས་ལས་གཅིག་མེད་པར་འགྱུར་བ་ནི་ཞིང་ཁམས་སུ་བཞུགས་པའི་ཁྱེད་ཀྱི་ཡབ་ཀྱི་དགོངས་པ་མ་ཡིན།”

15 “ཁྱེད་ཀྱི་སྤུན་ཟླ་ཡིས་སྡིག་ཉེས་བྱས་ན། ཁོ་ཟུར་དུ་འཁྲིད་ནས་ཁོའི་སྐྱོན་བརྗོད་པར་བྱེད། ཁོས་ཁྱེད་ཀྱི་ཁ་ལ་ཉན་ན་ཁྱེད་རང་གི་སྤུན་ཟླ་ཡང་བསྐྱར་རྙེད། 16 གལ་སྲིད་ཁྱེད་ཀྱི་ཁ་ལ་མ་ཉན་ན། དཔང་པོ་གཉིས་གསུམ་གྱི་ཁ་ཡིས་གཏམ་ཚང་མ་ནན་ཏན་བྱེད་པའི་ཕྱིར། རང་དང་མཉམ་དུ་མི་གཅིག་གམ་གཉིས་འཁྲིད་དེ་ཁོའི་རྩར་སོང༌། †18:16 ལུང་སྟོན་པ་མོ་ཤེའི་མདོ་ལྔ་པ་སྟེ་བཀའ་ལུང་ལེའུ་19 ཨང་གྲངས་15 ལ་གཟིགས། 17 ཁོས་ཁོ་ཚོའི་ཁ་ལ་མ་ཉན་ན། ཆོས་ཚོགས་ལ་ཤོད། ཆོས་ཚོགས་ལའང་མ་ཉན་ན། ཁོ་དད་ལྡན་མིན་པ་དང་ཁྲལ་སྡུད་མཁན་ལྟར་རྩིས་ཤིག 18 ངས་ཁྱེད་ཚོར་བདེན་པར་ཟེར་རྒྱུར། ཁྱེད་ཚོས་ས་ལ་གང་འཆིང་བ་དེ་དཀོན་མཆོག་གི་ཞིང་ཁམས་ལའང་འཆིང་བར་འགྱུར། ཁྱེད་ཚོས་ས་ལ་གང་འགྲོལ་བ་དེ་དཀོན་མཆོག་གི་ཞིང་ཁམས་ལའང་འགྲོལ་བར་འགྱུར། 19 དེ་མ་ཟད། ཁྱེད་ཚོ་གཉིས་ཀྱིས་གང་ཡང་ཞུ་བའི་སྐོར་ས་སྟེང་ལ་བློ་མཐུན་པར་བྱས་ན། ཞིང་ཁམས་སུ་བཞུགས་པའི་ངའི་ཡབ་ཀྱིས་དེ་ལྟར་གནང་བར་འགྱུར། 20 གང་ལགས་ཤེ་ན། གང་དུ་ངའི་མིང་ཐོག་ནས་མི་གཉིས་སམ་གསུམ་འཛོམས་ན། དེར་ངའང་ཁོ་ཚོའི་ཁྲོད་དུ་ཡོད་”ཅེས་གསུངས།

21 དེ་ནས་པེ་ཏྲོ་ཡོང་ནས་ཁོང་ལ་“གཙོ་བོ་ལགས། ངའི་སྤུན་ཟླ་ཡིས་ང་ལ་སྡིག་ཉེས་བྱས་ན་ངས་ལན་ཇི་ཙམ་གྱི་བར་དུ་གུ་ཡངས་གཏོང་དགོས། ལན་བདུན་གྱིས་ཆོག་གམ་”ཞེས་དྲིས་པ་ལ། 22 ཡེ་ཤུས་ཁོ་ལ་“ལན་བདུན་མི་ཟེར་གྱི། བདུན་ཅུ་ཐེངས་བདུན་ཟེར། 23 དེའི་ཕྱིར་དཀོན་མཆོག་གི་རྒྱལ་སྲིད་ནི་རང་གི་བྲན་གཡོག་རྣམས་དང་རྩིས་དག་ཞུ་འདོད་པའི་རྒྱལ་པོ་ཞིག་དང་འདྲ་བ་ཡིན། 24 དེ་རྩིས་པའི་ཚེ་ཁོ་ལ་གསེར་གྱི་སྒོར་མོ་ས་ཡ་གཅིག་གི་བུ་ལོན་ཡོད་པ་ཞིག་རྒྱལ་པོའི་རྩར་ཁྲིད་དེ། 25 ཁོ་ལ་བུ་ལོན་འཇལ་རྒྱུ་མེད་པས། རྒྱལ་པོས་ཁོ་དང༌། བཟའ་ཟླ། ཕྲུ་གུ ཁོ་ལ་ཡོད་པ་ཐམས་ཅད་བུ་ལོན་དེ་འཇལ་བའི་ཕྱིར་འཚོང་དགོས་པའི་བཀའ་མངགས། 26 དེ་བས་ན་བྲན་གཡོག་དེ་རྒྱལ་པོའི་དྲུང་དུ་ཕྱག་འཚལ་དེ་ཁོང་ལ། ང་ལ་བཟོད་པར་མཛོད་ཅིག ངས་ཁྱེད་ལ་བུ་ལོན་ཐམས་ཅད་འཇལ་ཡོང་ཞེས་སྨྲས། 27 དེ་ནས་རྒྱལ་པོ་སྙིང་རྗེ་སྐྱེས་ནས་བྲན་གཡོག་དེ་གློད་གྲོལ་བཏང་སྟེ་བུ་ལོན་དེ་བསལ། 28 འོན་ཀྱང་བྲན་གཡོག་དེ་ཕྱིར་སོང་ནས་རང་དང་མཉམ་པའི་བྲན་གཡོག་རྣམས་ཀྱི་ནང་ནས་ཁོ་ལ་དངུལ་སྒོར་བརྒྱ་ཡི་བུ་ལོན་ཡོད་པ་ཞིག་དང་ཐུག་པས། སྐེ་བཙིར་ཏེ་ཁོ་ལ། བུ་ལོན་འཇོལ་ཞིག་ཅེས་སྨྲས། 29 བྲན་གཡོག་དེས་པུས་མོ་སར་བཙུགས་ནས་ཁོ་ལ། ང་ལ་བཟོད་པ་སྒོམ་རོགས། ངས་ཁྱེད་ལ་བུ་ལོན་འཇལ་ཡོང་ཞེས་བཤད། 30 འོན་ཀྱང་ཁོས་མ་ཉན་པར་སོང་ནས་བུ་ལོན་འཇལ་མ་ཚར་བའི་བར་དུ་བྲན་གཡོག་དེ་བཙོན་དུ་བཅུག 31 བྲན་གཡོག་གཞན་རྣམས་ཀྱིས་དེ་མཐོང་ནས་སེམས་ཤིན་ཏུ་འཁྲུགས་པར་གྱུར་ཏེ། རྒྱལ་པོའི་དྲུང་དུ་སོང་ནས་གནས་ཚུལ་དེ་ཐམས་ཅད་བཤད། 32 རྒྱལ་པོས་བྲན་གཡོག་དེ་བོས་ནས་ཁོ་ལ། གཡོག་པོ་ངན་པ་ཁྱོད། ཁྱོད་ཀྱིས་ང་ལ་ཞུ་བ་ཆེན་པོ་ཕུལ་བས་ངས་ཁྱོད་ཀྱི་བུ་ལོན་ཐམས་ཅད་བསལ། 33 ངས་ཁྱོད་ལ་སྙིང་རྗེ་བྱས་པ་ལྟར། ཁྱོད་ཀྱིས་ཀྱང་རང་དང་མཉམ་པའི་བྲན་གཡོག་ལ་སྙིང་རྗེ་བྱེད་དགོས་པ་མ་ཡིན་ནམ་ཞེས་སྨྲས། 34 རྒྱལ་པོ་ཁྲོས་ནས་བུ་ལོན་ཐམས་ཅད་འཇལ་མ་ཚར་བའི་བར་མནར་གཅོད་གཏོང་མཁན་རྣམས་ལ་གཏད། 35 གལ་ཏེ་ཁྱོད་ཚོ་མི་རེ་རེས་སེམས་གཏིང་ནས་རང་གི་སྤུན་ཟླར་གུ་ཡངས་མ་བཏང་ན། ཞིང་ཁམས་སུ་བཞུགས་པའི་ངའི་ཡབ་ཀྱིས་ཀྱང་ཁྱོད་ཚོར་དེ་ལྟར་མཛད་ངེས་ཡིན་”ཞེས་གསུངས་སོ། །