1 དེ་ཡང་ཁྱོད་རྣམས་ཀྱིས་བདག་ལ་བསྐུར་བའི་འཕྲིན་ཡིག་གི་ནང་དུ་བྲིས་པའི་དོན༌དེར་མཚོན་ན། ད་ལྟ་བདག་གིས་ཀྱང་དོན་དེའི་སྐོར་ཁྱོད་ཅག་ལ་སྨྲ་བར་བྱ༌སྟེ། སྤྱིར་སྐྱེས་པ་ནི་བུད་མེད་དང་མ་འགྲོགས་ན་བཟང་མོད། 2 འོན་ཀྱང་ལོག་གཡེམ་གྱི་དོན་དག་མི་འབྱུང་བའི༌ཕྱིར། སྐྱེས་པ་རེ་ལ་ཆུང་མ་རེ་དང་། བུད་མེད་རེ་ལའང་སྐྱེས་པ་རེ་ཡོད་ན་འོས་སོ།། 3 བྱ་འོས་པའི་ཆགས་པ་ནི་ཁྱོ་གས་ཆུང་མ་ལ་དེ་བཞིན་བྱེད་དགོས༌ལ། ཆུང་མས་ཀྱང་ཁྱོ་ག་ལ་དེ་ལྟར་བྱེད་འོས་པ་ཡིན། 4 ཆུང་མའི་ལུས་པོ་ནི་རང་ཉིད་ལ་མི་དབང་བར་ཁྱོ་ག་ལ་དབང་བ༌དང༌། དེ་བཞིན་དུ་ཁྱོ་གའི་ལུས་པོའང་རང་ཉིད་ལ་མི་དབང་བར་ཆུང་མ་ལ་དབང༌བ་ཡིན། 5 དེའི༌ཕྱིར། ཁྱོད་རྣམས་ལས་སུ་ཞིག་བཟའ་ཟླ་ཡིན༌ན་སོ་སོར་སྡོད་པར་མི༌བྱའོ།། ཁོ་གཉིས་གྲོས་མཐུན་བྱུང་ནས་བློ་སེམས་རྩེ་གཅིག་གིས་གསོལ་བ་འདེབས་པའི་ཕྱིར་རེ་ཞིག་སོ་སོར་སྡོད་རུང༌ལ། དེའི་རྗེས་སུ་ཁོ་གཉིས་སླར་ཡང་མཉམ་དུ་སྡོད་དགོས་པ་ཡིན། དེ་ནི་ཁྱོད་རྣམས་ཀྱིས་རང་ཚོད་མི་ཟིན་པ་དང་། བདུད་སཱ་ཏན་གྱིས་གོ་སྐབས་དང་བསྟུན་ནས་ཁྱོད་ཅག་མི་བསླུ་བའི་ཕྱིར༌རོ།། 6 བདག་གིས་འདི་ལྟར་སྨྲས་པ་ནི་ཁྱོད་ཅག་ལ་བཟོད་སྒོམ་གནང་བ༌ལས་བཀའ་ཕབ་པ་མ་ཡིན། 7 སྤྱིར་མི་ཐམས་ཅད་ནི་བདག་དང་མཚུངས་ན་ལེགས་སྙམ༌མོད། འོན་ཀྱང་མི་རེ་རེར་དཀོན་མཆོག་ནས་ཐོབ་པའི་གནང་སྦྱིན་མི་མཚུངས༌ཏེ། མི་ལ་ལར་འདི་ལྟར་ཐོབ་པ་དང་ལ་ལར་དེ་ལྟར་ཐོབ༌པའོ།།

8 བདག་གིས་གཉེན་སྒྲིག་བྱས་མེད་པའི་མི་དང་ཡུགས་མོ་རྣམས་ལ་སྨྲ་བར་བྱ༌སྟེ། ཁོ་རྣམས་རྒྱུན་དུ་བདག་དང་མཚུངས་ན་ལེགས། 9 འོན་ཀྱང་། རང་ཚོད་རང་གིས་མི་ཟིན་ན་གཉེན་སྒྲིག་བྱེད་རུང༌ཞིང་། འདོད་ཆགས་ཀྱི་དབང་གིས་སྨྱོ་བ་ལས་གཉེན་སྒྲིག་བྱས་ན་ལེགས༌སོ།།

10 བདག་གིས་གཉེན་སྒྲིག་བྱས་ཟིན་པ་རྣམས་ལ་འདི་ལྟར་བཀའ་བསྒོ་བར༌བྱ་སྟེ། དོན་དམ་དུ་བདག་གི་བཀའ་མ་ཡིན་པར་གཙོ་བོའི་བཀའ་ཡིན༌ཏེ། ཆུང་མ་ནི་རང་གི་ཁྱོ་ག་དང་བཟའ་ཐོར་བྱེད་མི་རུང༌ལ། 11 གལ༌ཏེ། བཟའ་ཐོར་བྱས་ན་སྐྱེས་པ་གཞན་དང་གཉེན་སྒྲིག་བྱེད་མི་རུང༌། ཡང་ན་རང་གི་ཁྱོ་གར་འགྲིག་མཐུན་ཡོང་ན་ལེགས། དེ་བཞིན་དུ་ཁྱོ་གའང་རང་གི་ཆུང་མ་དང་བཟའ་ཐོར་བྱེད་མི་རུང༌ངོ༌།།

12 བདག་གིས་མི་གཞན་དག་ལ་སྨྲ་བར༌བྱ་སྟེ། དོན་དམ་དུ་གཙོ་བོས་གསུངས་པ་མིན༌ཏེ། དད་ལྡན་ཞིག་ལ་དད་པ་མེད་པའི་ཆུང་མ་ཞིག་ཡོད༌པ་དང་། ཁོ་མོའང་དད་ལྡན་དེ་དང་མཉམ་དུ་སྡོད་པར་འདོད༌ན། ཁོས་ཆུང་མ་དེ་དང་བཟའ་ཐོར་བྱེད་མི་རུང་ངོ༌།། 13 ཡང་དད་ལྡན་བུད་མེད་ཅིག་ལ་དད་པ་མེད་པའི་ཁྱོ་ག་ཞིག་ཡོད༌པ་དང་། ཁྱོ་ག་དེའང་ཁོ་མོ་དང་མཉམ་དུ་སྡོད་པར་འདོད༌ན། ཁོ་མོས་ཀྱང་ཁྱོ་ག་དེ་དང་བཟའ་ཐོར་བྱེད་མི་རུང་ངོ༌།། 14 ཅིའི་ཕྱིར་ཞེ་ན། དད་པ་མེད་པའི་ཁྱོ་ག་དེ་ནི་ཆུང་མའི་རྐྱེན་གྱིས་དམ་པར་གྱུར་པ༌དང༌། དད་པ་མེད་པའི་ཆུང་མ་དེའང་ཁྱོ་གའི་རྐྱེན་གྱིས་དམ་པར་གྱུར་པའི་ཕྱིར༌རོ།། དེ་ལྟར་མིན༌ཚེ། ཁྱོད་ཅག་གི་བུ་ཕྲུག་ནི་གཙང་མ་མིན༌མོད་ཀྱང༌། ད་ལྟ་ཁོ་རྣམས་ནི་དམ་པར་གྱུར༌པའོ།། 15 འོན་ཀྱང་། དད་པ་མེད་པའི་མི་སུ་ཞིག་རང་གི་བཟའ་ཟླ་དང་ཁ་འབྲལ་འདོད་ན་དེ་ལྟར་བྱེད་པར༌གྱིས། དད་པ་དང་ལྡན་པའི་ཁྱོ་གའམ་ཆུང་མ་སུ་ཞིག་ཡིན༌ཡང༌། དོན་དེ་ལྟ་བུར་ཕྲད་ནའང་རང་དབང་ཡོད་པར༌གྱིས། དཀོན་མཆོག་གིས་བདག་ཅག་འགྲིག་མཐུན་ངང་ནས་འཚོ་ཞིང་གཞེས་པར་ཞལ་འབོད་གནང་བ་ཡིན། 16 ཁྱོད་ཆུང་མ་རྣམས་ཀྱིས་རང་གི་ཁྱོ་ག་སྐྱོབ་མི་ནུས་པ་ཅི་ལྟར་ཤེས༌སམ། ཁྱོད་ཁྱོ་ག་རྣམས་ཀྱིས་ཀྱང་རང་གི་ཆུང་མ་སྐྱོབ་མི་ནུས་པ་ཅི་ལྟར་ཤེས༌སམ།

17 དེ་ཡང་གཙོ་བོས་མི་རེ་རེར་གནང་བའི་བགོ་སྐལ་དང་དཀོན་མཆོག་གིས་མི་རེ་རེར་ཞལ་འབོད་གནང་བ་བཞིན་དུ་སྤྱད་པ་སྤྱོད༌ཅིག བདག་གིས་ཀྱང་ཆོས་ཚོགས་ཐམས་ཅད་ལ་དེ་ལྟར་ཁ་བསྒོ་གནང༌བ་ཡིན་ནོ།། 18 མི་སུ་ཡིན་ཡང་མཚན་སྐྱི་བཅད་རྗེས་ཞལ་འབོད་ཐོབ་པ་ཡིན༌ན། མཚན་སྐྱི་བཅད་པའི་རྟགས་ནི་འདོར་བར་མི༌བྱའོ།། མི་སུ་ཡིན་ཡང་མཚན་སྐྱི་མ་བཅད་པའི་དུས་སུ་ཞལ་འབོད་ཐོབ་པ་ཡིན༌ན། མཚན་སྐྱི་གཅོད་པར་མི༌བྱའོ།། 19 མཚན་སྐྱི་གཅོད་མིན་གང་ཡང༌རུང༌། དེ་ནི་ཅི་ཡང་མིན༌ཏེ། དཀོན་མཆོག་གི་བཀའ་བསྲུང་བར་བྱ་རྒྱུ་ནི་གལ༌ཆེ་བ་ཡིན། 20 དོན་དམ་དུ་ཁྱོད་ཅག་མི་རེ་རེ་ནི་ཞལ་འབོད་ཐོབ་པའི་དུས༌སུ་ཅི་འདྲ་ཡིན་ན་དེ་ལྟར་སྡོད་པར༌བྱའོ།། 21 དད་ལྡན་པ་ཁྱོད་ནི་བྲན་གཡོག་ཡིན་པའི་དུས་སུ་ཞལ་འབོད་ཐོབ་པ་ཡིན༌ན། དེ་ལ་སེམས་ཁུར་བྱ་མི་འོས། གལ༌ཏེ། ཁྱོད་ལ་བྲན་གཡོག་ལས་ཐར་བའི་གོ་སྐབས་བྱུང༌ན། དེ་ནི་ཤིན་ཏུ་ལེགས་སོ།། 22 ཅིའི་ཕྱིར་ཞེ་ན། སུ་ཡང་བྲན་གཡོག་ཡིན་པའི་དུས་སུ་གཙོ་བོའི་ཞལ་འབོད་ཐོབ་པ་ཡིན༌ན། བྲན་གཡོག་དེ་ནི་གཙོ་བོའི་རང་དབང་ལྡན་པ་ཡིན༌ལ། དེ་ལྟར་སུ་ཡང་རང་དབང་ལྡན་པ་ཡིན་པའི་དུས་སུ་ཞལ་འབོད་ཐོབ་པ་ནི་སྐྱབས་མགོན་མཱ་ཤི་ཀའི་བྲན་གཡོག་ཡིན་པའི་ཕྱིར༌རོ།། 23 ཁྱོད་ཅག་ནི་རིན་ཆེན་པོ་བཏང་ནས་ཉོས་པ་ཡིན༌པས། འཇིག་རྟེན་གྱི་མིའི་བྲན་གཡོག་ནི་མི༌བྱའོ།། 24 སྤུན་ཟླ༌རྣམས། ཁྱོད་ཅག་ལ་ཞལ་འབོད་གནང་བའི་དུས༌སུ་རང་རང་ཅི་འདྲ་ཡིན་ན། དཀོན་མཆོག་གི་དྲུང་དུའང་དེ་བཞིན་དུ་སྡོད་པར༌བྱའོ།།

25 དེ་ཡང་ན་ཆུང་བུ་མོ་རྣམས་ཀྱི་སྐོར་ལ་གཙོ་བོའི་བཀའ་ནི་བདག་ལ་མེད༌ཀྱང༌། ངས་གཙོ་བོའི་ཐུགས་རྗེའི་ངང་རང་ཉིད་ནི་བློ་སེམས་དཀར་བའི་མི་ཡིན་པའི་ཆ༌ནས། རང་གི་བསམ་ཚུལ་ཁྱོད་ཅག་ལ་སྨྲ་བར༌བྱ་སྟེ། 26 ཅིའི་ཕྱིར་ཞེ་ན། བདག་གིས་ད་ལྟའི་དཀའ་སྡུག་ལ་བལྟས༌ན། མི་སུ་ཞིག་ཡིན་ཡང་རང་གི་རྒྱུན་ལྡན་གྱི་འཚོ་བ་ཅི་འདྲ་ཡིན་པ་དེ་ལྟར་བསྡད་ན་ལེགས་སྙམ། 27 ཁྱོད་ལ་ཆུང་མ་ཡོད་ན་ཁོ་མོ་དང་བཟའ་ཐོར་མི༌བྱའོ།། ཁྱོད་ལ་ཆུང་མ་མེད་ན་ཆུང་མ་འཚོལ་བར་མི༌བྱའོ།། 28 གལ༌ཏེ། ཁྱོད་ཀྱིས་ཆུང་མ་བླངས་ན་དེ་ནི་ཉེས་པ་མིན༌ལ། ན་ཆུང་བུ་མོ་བག་མར་སོང་ནའང་ཉེས་པ་མིན། འོན༌ཀྱང༌། གཉེན་བསྒྲིགས་ཟིན་པ་རྣམས་ཀྱིས་མི་ཚེ་འདིར་སྡུག་བསྔལ་མྱང་ངེས༌པས། ངས་ཁྱོད་ཅག་ནི་སྡུག་བསྔལ་དེ་ལས་སྐྱོབ་འདོད༌དོ།།

29 སྤུན་ཟླ༌རྣམས། བདག་གིས་ཁྱོད་ཅག་ལ་སྨྲ་བར་བྱ༌སྟེ། དུས་ཚོད་ཐུང་ཐུང་ཡིན་པས། ད་ནས༌བཟུང༌སྟེ་ཆུང་མ་ཡོད་པ་རྣམས་ཀྱིས་ཆུང་མ་མེད་པ་ལྟར་བྱེད༌ཅིང༌། 30 ངུ་མཁན་རྣམས་ཀྱིས་མི་ངུ་བ་ལྟར་བྱེད་པ༌དང༌། དགའ་སྤྲོ་དང་ལྡན་པ་རྣམས་ཀྱིས་དགའ་སྤྲོ་མེད་པ་ལྟར་བྱེད་པ༌དང༌། ཉོ་མཁན་རྣམས་ཀྱིས་ཅི་ཡང་མ་ཐོབ་པ་ལྟར་བྱེད་པ༌དང༌། 31 འཇིག་རྟེན་གྱི་དངོས་པོ་བཀོལ་མཁན་རྣམས་ཀྱིས་མི་བཀོལ་བ་བཞིན་དུ་བྱེད་པར༌གྱིས། ཅིའི་ཕྱིར་ཞེ་ན། འཇིག་རྟེན་འདིའི་རྣམ་པ་ནི་མེད་པར་འགྱུར་བའི་ཕྱིར༌རོ།།

32 བདག་གིས་ཁྱོད་རྣམས་ལ་སེམས་ཁུར་ཅི་ཡང་མེད་པར་འདོད༌དེ། ཆུང་མ་མེད་པ་རྣམས་ཀྱིས་གཙོ་བོའི་དོན་ལ་སེམས་ཁུར་བྱེད༌ཅིང༌། དེ་ནི་གཙོ་བོ་ཇི་ལྟར་ཐུགས་དགྱེས་སུ་འཇུག་པར་སེམས་ཁུར་བྱེད༌པ་ཡིན་ནོ།། 33 ཆུང་མ་ཡོད་པ་རྣམས་ཀྱིས་འཇིག་རྟེན་གྱི་དོན་ལ་སེམས་ཁུར་བྱེད༌ཅིང༌། དེ་ནི་རང་གི་ཆུང་མ་ཇི་ལྟར་དགའ་རུ་འཇུག་པར་སེམས་ཁུར་བྱེད་པས། 34 ཁོའི་སེམས་ནི་སོ་སོར་གྱེས༌པའོ།། གཉེན་སྒྲིག་མ་བྱས་པའི་བུད་མེད་དང་ན་ཆུང་བུ་མོ་གཉིས་ཀྱིས་གཙོ་བོའི་དོན་ལ་སེམས་ཁུར་བྱེད༌ཅིང༌། དེ་ནི་ལུས་སེམས་གཉིས་ཀ་གཙང་མ་ཡིན་པར་དམིགས༌པ་དང་། གཉེན་སྒྲིག་བྱས་པའི་བུད་མེད་ཀྱིས་འཇིག་རྟེན་གྱི་དོན་ལ་སེམས་ཁུར་བྱེད༌ཅིང༌། དེ་ནི་རང་གི་སྐྱེས་པ་ཇི་ལྟར་དགའ་རུ་འཇུག་པར་སེམས་ཁུར་བྱེད༌པ་ཡིན། 35 བདག་གིས་དེ་ལྟར་སྨྲས་པ་ནི་ཁྱོད་རྣམས་ལ་ཕན་འདོགས་པའི་ཕྱིར་ཡིན་པ་ལས་ཁྱོད་ཅག་འཆིང་བའི་ཕྱིར་མིན༌ཏེ། ཁྱོད་ཅག་གིས་སྤྱོད་ལམ་བཟང་ཞིང་སེམས་མི་གཡེང་བར་ནན་ཏན་ངང་གཙོ་བོ་ལ་ཞབས་ཕྱི་བསྒྲུབ་དགོས་པའི་ཕྱིར་ཡིན༌ནོ།།

36 གལ་ཏེ། སུ་ཞིག་གིས་རང་གི་ན་ཆུང་བུ་མོར་ *འདིར་རང་གི་ན་ཆུང་བུ་མོ་ཞེས་པར་གཉེན་རྟགས་བརྒྱབ་པའི་བུད་མེད་ཅེས་བསྒྱུར་ཡང་རུང་། ལྟ་ཚུལ་མི་འོས་པ་བཟུང་ཡོད་པར་འདོད་ཅིང༌། བུ་མོ་དེའང་ན་ཚོད་ལས་བརྒལ་ཚེ། གཉེན་སྒྲིག་བྱེད་དུ་འཇུག་འདོད་ན་དེ་ལྟར་བྱས་ཀྱང་ཉེས་པ་མེད༌པས། ཁོ་གཉིས་གཉེན་སྒྲིག་བྱེད་དུ་བཅུག་ན་ལེགས། 37 གལ༌ཏེ། མི་སུ་ཞིག་གི་བསམ་པ་བརྟན་ཅིང་བསྒྲུབ་དགོས་པའི་དོན་གཞན་མེད་པ༌དང༌། རང་གི་སེམས་ལ་རང་དབང་ཡོད༌ཅིང་། བུ་མོ་དེ་མནའ་མ་མི་སྟེར་བའི་སེམས་ཐག་བཅད་ན་དེ་ལྟར་བྱས་ཀྱང་ལེགས། 38 དེ་ལྟར་ཡིན་ན། རང་གི་ན་ཆུང་བུ་མོ་མནའ་མར་སྟེར་བ་ནི་བཟང༌ཡང༌། མ་བྱིན་ན་ལྷག་ཏུ་བཟང༌ངོ༌།།

39 དེ་ཡང་ཁྱོ་ག་གསོན་པའི་དུས་སུ་ཆུང་མ་ལ་ཚོད་འཛིན་ཐེབས་ཡོད༌ཀྱང༌། ཁྱོ་ག་ཤི་བར་གྱུར་ན། ཆུང་མར་གཙོ་བོ་ནང་གི་མི་དང་གཉེན་སྒྲིག་བྱེད་པའི་རང་དབང་ཡོད། 40 འོན༌ཀྱང༌། བདག་གི་བསམ་ཚུལ་ནི། ཁོ་མོ་ནི་ནམ་རྒྱུན་ལྟར་བསྡད་ན་ལྷག་ཏུ་བདེ༌ཞིང༌། ངས་རང་ཉིད་ཀྱི་སེམས་སུ་དཀོན་མཆོག་གི་དམ་པའི་ཐུགས་ཉིད་ཡོད་པར་བསམས༌སོ།།