1 ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་པར་དད་པ་བྱེད་མཁན་ཐམས་ཅད་དཀོན་མཆོག་ནས་སྐྱེས་པ་དང་། རང་ཉིད་སྐྱེས་ཡུལ་གྱི་དཀོན་མཆོག་ལ་གཅེས་མཁན་ཐམས་ཅད་ཀྱིས་དཀོན་མཆོག་ནས་སྐྱེས་པ་གཞན་ལའང་གཅེས་པའོ།། 2 བདག་ཅག་གིས་དཀོན་མཆོག་ལ་གཅེས་ཤིང་ཁོང་གི་བཀའ་རྣམས་ཀྱང་སྲུང༌བ་ཡིན་ན། དེ་ལས་བདག་ཅག་གིས་དཀོན་མཆོག་གི་བུ་ཕྲུག་ལ་བྱམས་ཤིང་གཅེས་པའང་ཤེས། 3 བདག་ཅག་གིས་དཀོན་མཆོག་གི་བཀའ་རྣམས་སྲུང་བ་ནི་ཁོང་ལ་གཅེས་པ་ཡིན༌ལ། ཁོང་གི་བཀའ་རྣམས་ནི་སྲུང་དཀའ་བ་ཞིག་མིན། 4 རྒྱུ་མཚན་ནི་དཀོན་མཆོག་ནས་སྐྱེས་པ་ཐམས་ཅད་འཇིག་རྟེན་ལས་རྣམ་པར་རྒྱལ༌བ་ཡིན་པས་སོ།། བདག་ཅག་འཇིག་རྟེན་ལས་རྒྱལ་བའི་རྒྱུ་ནི་བདག་ཅག་གི་དད་པ་དེ་ཡིན། 5 འཇིག་རྟེན་ལས་རྣམ་པར་རྒྱལ་མཁན་ནི་སུ་ཡིན་ཞེ་ན། སྐྱབས་མགོན་ཡེ་ཤུ་ནི་དཀོན་མཆོག་གི་སྲས་ཡིན་པར་དད་པ་བྱེད་མཁན་རྣམས་ཡིན་ནོ།།

6 ཆུ་དང་ཁྲག་ལ་བརྟེན་ནས་བྱོན་པ་དེ་ཉིད་ནི་ཡེ་ཤུ་མཱ་ཤི་ཀ་ཡིན། དེ་ནི་ཆུ་ཁོ་ནར་བརྟེན་པ་མ་ཡིན་པར། ཆུ་དང་ཁྲག་གཉིས་ལ་བརྟེན་པ༌དང༌། དམ་པའི་ཐུགས་ཉིད་ཀྱིས་དོན་དེར་བདེན་དཔང་མཛད་པའོ།། ཅིའི་ཕྱིར་ཞེ་ན། དམ་པའི་ཐུགས་ཉིད་ནི་བདེན་པ་ཉིད་ཡིན་པའི་ཕྱིར་རོ།། 7 ཡང་དོན་དེར་བདེན་དཔང་གསུམ་ཡོད༌དེ། 8 དམ་པའི་ཐུགས་ཉིད་དང༌། ཆུ། ཁྲག་བཅས་ཡིན༌ལ། དེ་གསུམ་ནི་ཕན་ཚུན་འགལ་བ་མིན་ནོ།། 9 བདག་ཅག་གིས་མིའི་བདེན་དཔང་དང་དུ་ལེན་པ་ཡིན་ན། དཀོན་མཆོག་གི་བདེན་དཔང་དེ་བས་ཀྱང་དང་དུ་ལེན་འོས་སོ།། རྒྱུ་མཚན་ནི་དཀོན་མཆོག་གི་བདེན་དཔང་ནི་རང་ཉིད་ཀྱི་སྲས་ལ་མཛད་པའི་ཕྱིར༌རོ།། 10 དཀོན་མཆོག་གི་སྲས་ལ་དད་པ་བྱེད་མཁན་གྱི་སེམས་སུ་བདེན་དཔང་འདི་ཉིད་ཡོད་ལ། དཀོན་མཆོག་ལ་དད་པ་མི་བྱེད་པའི་སེམས་སུ་དཀོན་མཆོག་ནི་ཞལ་རྫུན་གསུང་མཁན་དུ་བརྩིས་པའོ།། ཅིའི་ཕྱིར་ཞེ་ན། དཀོན་མཆོག་གིས་རང་ཉིད་ཀྱི་སྲས་ལ་མཛད་པའི་བདེན་དཔང་དེ་ཁས་མ་བླངས་པའི་ཕྱིར་རོ།། 11 བདེན་དཔང་ནི་འདི་ལྟ་སྟེ། དཀོན་མཆོག་གིས་བདག་ཅག་ལ་མཐའ་མེད་པའི་ཚེ་སྲོག་གནང་བ༌ཡིན་ལ། མཐའ་མེད་པའི་ཚེ་སྲོག་འདི་ཡང་ཁོང་གི་སྲས་ཀྱི་ནང་དུ་བཞུགས་པ་ཡིན། 12 མི་སུ་ལའང་དཀོན་མཆོག་གི་སྲས་ཡོད་ན་མཐའ་མེད་པའི་ཚེ་སྲོག་དེ་ཉིད་ཡོད་ལ། དཀོན་མཆོག་གི་སྲས་མེད་ན་མཐའ་མེད་པའི་ཚེ་སྲོག་དེ་ཡང་མེད་དོ།།

13 བདག་གིས་དཀོན་མཆོག་གི་སྲས་ཀྱི་མཚན་ལ་དད་པ་བྱེད་མཁན་ཁྱོད་རྣམས་ལ་དོན་འདི་དག་འབྲི་དོན༌ནི། ཁྱོད་རྣམས་ཀྱིས་རང་ཉིད་ལ་མཐའ་མེད་པའི་ཚེ་སྲོག་ཡོད་པ་ཤེས་པའི་ཆེད་དུ༌ཡིན་ནོ།། 14 བདག་ཅག་གིས་ཁོང་གི་ཐུགས་དགོངས་ལྟར་ཅི་ཞིག་ཞུས་པ་ཡིན་ན། ཁོང་གིས་བདག་ཅག་གི་ཞུ་བ་ལ་གསན་པ་ཡིན༌ཏེ། འདི་ནི་བདག་ཅག་གིས་ཁོང་ལ་བཅངས་པའི་བག་ཕེབས་ཞུམ་མེད་ཀྱི་སེམས་ཡིན། 15 བདག་ཅག་གིས་ཁོང་ལ་ཅི་ཞིག་ཞུས་པ་ཁོང་གིས་གསན་ངེས་པ་ཤེས༌ན། ཁོང་ལ་ཞུས་པ་རྣམས་མི་ཐོབ་པ་ཅི་ཡང་མེད་པའང་བདག་ཅག་གིས་ཤེས༌སོ།།

16 གལ་ཏེ། སུ་ཞིག་གིས་རང་གི་སྤུན་ཟླས་འཆི་ལམ་དུ་མི་འཇུག་པའི་སྡིག་པ་བྱས་པ་མཐོང༌ཚེ། ཁོའི་དོན་དུ་གསོལ་བ་འདེབས་དགོས༌ཤིང༌། དཀོན་མཆོག་གིས་དེ་ལ་ཚེ་སྲོག་གནང་ངེས༌སོ།། འཆི་ལམ་དུ་འཇུག་པའི་སྡིག་པ་ཡོད་པ་ལ། དེའི་དོན་དུ་གསོལ་བ་འདེབས་དགོས་ཞེས་བདག་གིས་སྨྲས་པ་མ་ཡིན། 17 དྲང་བདེན་མིན་པའི་ལས་ཐམས་ཅད་ནི་སྡིག་པ་ཡིན༌ལ། འཆི་ལམ་དུ་མི་འཇུག་པའི་སྡིག་པའང་ཡོད༌དོ།།

18 སུ་ཞིག་དཀོན་མཆོག་ནས་སྐྱེས་པ་ཡིན་ན། དེ་ཡིས་རྟག་ཏུ་སྡིག་པ་མི་བྱེད་པ་ནི་བདག་ཅག་གིས་ཤེས་ལ། དཀོན་མཆོག་ནས་འཁྲུངས་པ་ཁོང་གིས་མི་དེ་བསྲུང་ངེས་ཤིང༌། བདུད་ངན་ཀྱིས་མི་དེ་ལ་གནོད་འཚེ་བྱ་མི་ནུས་སོ།། 19 བདག་ཅག་ནི་དཀོན་མཆོག་ལ་གཏོགས་ཤིང༌། འཇིག་རྟེན་ཡོངས་རྫོགས་བདུད་ངན་གྱི་དབང་འོག་ཏུ་ཡོད་པ་བདག་ཅག་གིས་ཤེས༌པ་ཡིན། 20 དཀོན་མཆོག་གི་སྲས་ཕེབས་ཟིན་ཅིང་། བདེན་པའི་དཀོན་མཆོག་ཉིད་ཤེས་པའི་ཕྱིར། བདག་ཅག་ལ་ཤེས་རབ་གནང་བའང་བདག་ཅག་གིས་ཤེས༌པ་དང་། བདག་ཅག་ནི་བདེན་པའི་དཀོན་མཆོག་ཉིད་ཀྱི་ནང་དུ་གནས་ཤིང་། ཁོང་གི་སྲས་ཡེ་ཤུ་མཱ་ཤི་ཀའི་ནང་དུའང་གནས༌པ་ཡིན། ཁོང་ནི་དཀོན་མཆོག་བདེན་པ་དང་མཐའ་མེད་པའི་ཚེ་སྲོག་ཀྱང་ཡིན༌ནོ།།

21 བུ་ཕྲུག༌རྣམས། ཁྱོད་ཅག་གིས་རང་ཉིད་བསྲུངས་ནས་སྐུ་འདྲ་དང་རིང་དུ་གྱེས་པར་བྱའོ།། །།