1 དེ་ཡང་དམ་པའི་ཐུགས་ཉིད་ཀྱིས་འདི་སྐད༌དུ། དུས་ཕྱི༌མར་ཁ་ཅིག་གིས་དད་པ་རིང་དུ་སྤངས༌ཏེ། མི་ལ་བསླུ་བྲིད་བྱེད་པའི་ལོག་སེམས་དང་གདོན་འདྲེའི་ལོག་ལྟ་ལ་བརྟེན་ངེས་ཞེས་གསལ་པོར་གསུངས་སོ།། 2 དེ་ནི་རྫུན་སྨྲ་མཁན་རྣམས་ཀྱི་ཚུལ་འཆོས་ལས་བྱུང༌ཞིང༌། མི་དེ་རྣམས་ཀྱི་བསམ་པ་ནི་ངར་ལྕགས་ཀྱིས་བསྲེགས་པ་དང་མཚུངས༌པས་སོ།། 3 མི་དེ་དག་གིས་མནའ་མ་ཚུར་ལེན་ཕར་བསྐྱལ་བྱེད་མི་རུང་བ༌དང༌། ཁ་ཟས་ལ་ལ་བཟའ་མི་རུང་བར་བྱེད། འོན་ཀྱང༌། དད་པ་ཅན་དང་བདེན་པ་ཉིད་རྟོགས་མཁན་རྣམས་ཀྱིས་དྲིན་ལན་ཞུ་བའི་ངང་ནས་ལོངས་སུ་སྤྱོད་པའི༌ཕྱིར། དཀོན་མཆོག་གིས་ཁ་ཟས་དེ་དག་མཛད༌པ་ཡིན་ནོ།། 4 དཀོན་མཆོག་གིས་བསྐྲུན་པ་ཐམས་ཅད་ནི་ལེགས་པོ་ཡིན༌པས། བཀའ་དྲིན་ཞུ་བའི་ངང་ནས་དང་དུ་བླངས་ན་འདོར་འོས་པ་གཅིག་ཀྱང་མེད༌དེ། 5 ཅིའི་ཕྱིར་ཞེ་ན། དེ་རྣམས་དཀོན་མཆོག་གི་བཀའ་དང་མི་ཡིས་གསོལ་བ་བཏབ་པའི་དབང་གིས་དམ་པར་གྱུར་པའི་ཕྱིར༌རོ།།

6 ཡང་ཁྱོད་ཀྱིས་དོན་འདི་དག་སྤུན་ཟླ་རྣམས་ལ་དྲན་སྐུལ་བྱེད༌ན། ཁྱོད་ནི་མཱ་ཤི་ཀ་ཡེ་ཤུའི་ཞབས་ཕྱི་པ་བཟང་པོ་ཞིག་ཡིན༌ཞིང༌། དད་པའི་བཀའ་དང་ཁྱོད་ཀྱིས་སྔར་ནས་དང་ལེན་བྱས་པའི་ཡང་དག་པའི་བསྟན་པ་ལས་ཁྱོད་ལ་སློབ་གསོ་འཐོབ༌པ་ཡིན་ནོ།། 7 ཡང་འཇིག་རྟེན་པའི་བཤད་རྒྱུན་དང་རྒན་མོ་རྣམས་ཀྱི་ཁུངས་ལུང་མེད་པའི་འཆལ་གཏམ་དག་རིང་དུ་སྤངས༌ཏེ། དད་གུས་ཐད་ལ་རང་ཉིད་སྦྱོང་བརྡར་བྱོས༌ཤིག 8 ལུས་ཀྱིས་རྩལ་སྦྱོང་བྱས་ན་ཕན་ཐོགས་ཅུང་ཙམ་ཡོད༌ཀྱང༌། དད་གུས་ནི་དོན་ཐམས་ཅད་ལ་ཕན་ཐོགས་ཡོད༌དེ། མི་ཚེ་འདི་དང་མ་འོངས་པའི་ཚེ་སྲོག་གཉིས་ལ་ཞལ་བཞེས་གནང་ཡོད་པས༌སོ།། 9 གཏམ་འདི་ནི་ཡིད་རྟོན་རུང་བ་དང་ཧ་ཅང་ཁས་ལེན་བྱེད་འོས་པ་ཞིག་ཡིན་ནོ།། 10 ད་ལྟ་བདག་ཅག་གིས་དོན་དེར་ངལ་བས་བརྩོན་པར༌བྱའོ།། ཅིའི་ཕྱིར་ཞེ་ན། བདག་ཅག་གིས་གཏན་དུ་གསོན་པོར་བཞུགས་པའི་དཀོན་མཆོག་ལ་རེ་སྨོན་བྱེད༌པ་དང༌། ཁོང་ནི་མི་ཐམས་ཅད་ཀྱི་སྐྱབས་མགོན་ཡིན་ཞིང་ལྷག་ཏུ་དད་ལྡན་རྣམས་ཀྱི་སྐྱབས་མགོན་ཡིན་པའི་ཕྱིར༌རོ།།

11 ཁྱོད་ཀྱིས་དོན་འདི་དག་མི་གཞན་ལ་ཁ་བསྒོ་དང་སློབ་སྟོན་བྱེད་དགོས༌ཤིང༌། 12 ཁྱོད་ཀྱིས་རང་ཉིད་ལོ་ན་གཞོན་པར་སུ་ལའང་མཐོང་ཆུང་བྱེད་དུ་མི་འཇུག༌པར། སྨྲ་བརྗོད༌དང༌། བྱ༌སྤྱོད། བྱམས༌སེམས། དད༌སེམས། རྣམ་དག་ཡིན་པ་བཅས་ནས་དད་ལྡན་རྣམས་ལ་མིག་དཔེ་སྟོན་པར༌གྱིས། 13 ང་རང་ཡོང་བའི་བར་དུ་ཁྱོད་ཀྱིས་གསུང་རབ་ཀློག་འདོན་དང༌། སྐུལ་སློང༌། སློབ་སྟོན་བཅས་བྱེད་པ་ལ་བརྩོན་པར་བྱའོ།། 14 ཁྱོད་ཀྱི་སེམས་ཁོང་དུ་ཡོད་པའི་དམ་པའི་ཐུགས་ཉིད་ཀྱི་གནང་སྦྱིན་ཏེ། དེ་སྔར་ཆོས་ཚོགས་ཀྱི་རྒན་པོ་རྣམས་ཀྱིས་ལུང་བསྟན་བརྒྱུད་ནས་ཁྱོད་ཀྱི་ལུས་ལ་ལག་པ་བཞག་པའི་དུས་སུ་ཐོབ་ཟིན་པ་དེར་མཐོང་ཆུང་མི་བྱའོ།། 15 མི་ཐམས་ཅད་ཀྱིས་ཁྱོད་རང་ཡར་རྒྱས་སུ་འགྲོ་བ་མཐོང་བར་འགྱུར་བའི་ཕྱིར། ཁྱོད་ཀྱིས་དོན་འདི་རྣམས་ཧུར་ཐག་གིས་བསྒྲུབ་ཅིང་བློ་སེམས་རྩེ་གཅིག་བྱེད་པར༌གྱིས། 16 ཁྱོད་ཀྱིས་རང་ཉིད་དང་རང་གི་སློབ་སྟོན་ལ་གཟབ་གཟབ་བྱས་ནས་དོན་དེའི་ཐད་ལ་སྙིང་རུས་སྐྱེད༌ཅིག ཅིའི་ཕྱིར་ཞེ་ན། དེ་ལྟར་བྱས་ན་ཁྱོད་དང་ཁྱོད་ཀྱི་གཏམ་ལ་ཉན་མཁན་རྣམས་ཀྱང་བསྐྱབ་ནུས་པའི་ཕྱིར༌རོ།།