1 དེའི་དུས༌སུ། རྗེས་འབྲང་པ་མང་དུ་འཕེལ་བ༌ན། གྷི་རིག་པའི་སྐད་རིགས་སྨྲ་མཁན་གྱི་ཨིབ་རི་པས་ནི་ཨིབ་རིའི་མི་རིགས་རང་གི་སྐད་སྨྲ་མཁན་ལ་སྨྲེ་ངག་བཏོན་ནོ།། རྒྱུ་མཚན་ནི་ཉིན་རེ་བཞིན་བགོ་སྐལ་གནང་སྐབས་ཨིབ་རི་པའི་ཡུགས་མོ་རྣམས་སྣང་མེད་དུ་བསྐྱུར་བའི་ཕྱིར༌ཡིན། 2 དེ་ནས་སྐུ་ཚབ་པ་བཅུ་གཉིས་པོས་ཆོས་ཚོགས་ཀྱི་རྗེས་འབྲང་པ་ཐམས་ཅད་བོས་ཏེ་འདི་སྐད༌དུ། ངེད་ཅག་གིས་དཀོན་མཆོག་གི་བཀའ་བསྐྱུར་ནས་ཟས་སྐལ་གཉེར་པ་ནི་མི་འོས་སོ།། 3 དེའི༌ཕྱིར། སྤུན་ཟླ༌རྣམས། ཁྱོད་ཅག་གི་ཁྲོད་ནས་མཚན་སྙན་གྲགས་ལྡན་པ་དང་དམ་པའི་ཐུགས་ཉིད་དང་ཤེས་རབ་ཀྱིས་ཁྱབ་པའི་སྐྱེས་པ་བདུན་འདེམས༌དང༌། ངེད་ཅག་གིས་མི་དེ་རྣམས་དོན་འདི་བདག་གཉེར་བྱེད་མཁན་དུ༌བསྐོ་བར་བྱའོ།། 4 འོན༌ཀྱང༌། ངེད་ཅག་གིས་དཀོན་མཆོག་ལ་གསོལ་བ་འདེབས་པ་དང་དཀོན་མཆོག་གི་བཀའ་སྒྲོག་པའི་ཞབས་ཏོག་ལ་བརྩོན་པར་བྱའོ་ཞེས་གསུངས༌སོ།། 5 དེ་ནས་མི་ཚོགས་ཐམས་ཅད་གསུང་དེར་ཡི་རང་བར་གྱུར༌ཏེ། དད་པ་ཆེ་ཞིང་དམ་པའི་ཐུགས་ཉིད་ཀྱིས་ཁྱབ་པའི་སི་ཏེ་ཕཱན་དང༌། གཞན༌ཡང༌། ཕི་ལིབ༌དང༌། ཕོ་རོ་ཁོ༌རུ། ནེ་ཀཱ༌ནོར། ཐི༌མོན། ཕར་མེན༌ནཱ། དེ་སྔར་ཡ་ཧུ་དཱ་པའི་ཆོས་ལུགས་ལ་ཞུགས་པའི་ཨན་ཏི་ཡོག་ཡཱ་ཡུལ་གྱི་ནེ་ཀོ་ལཱ་བཅས་བདམས༌ཤིང༌། 6 དེ་རྣམས་སྐུ་ཚབ་པ་རྣམས་ཀྱི་དྲུང་དུ་ཁྲིད༌ཅིང༌། ཁོང་རྣམས་ཀྱིས་གསོལ་བ་འདེབས་བཞིན་དེ་དག་གི་ལུས་ལ་ཕྱག་བཞག་ *གསོལ་བ་འདེབས་བཞིན་དེ་དག་གི་ལུས་ལ་ཕྱག་བཞག་ཅེས་པ་ནི་ལས་འགན་བསྐོ་བའི་རྣམ་པ༌ཡིན།པ་དང་། 7 དེ་ནས་དཀོན་མཆོག་གི་བཀའ་རིམ་བཞིན་དར་བ་དང་ཡེ་རུ་སཱ་ལེམ་དུ་རྗེས་འབྲང་པའི་མི་གྲངས་ཤིན་ཏུ་མང་པོར་འཕེལ༌ཞིང༌། མཆོད་དཔོན་མང་པོ་ཞིག་གིས་ཀྱང་དད་པ་འདི་ལ་བསྟུན་ནོ།།

8 དེ་ཡང་སི་ཏེ་ཕཱན་ལ་ཐུགས་རྗེ་དང་མཐུ་སྟོབས་ཀྱིས་ཁྱབ༌པས། མི་རྣམས་ཀྱི་ཁྲོད་དུ་ངོ་མཚར་ཆེ་བའི་དོན་དང་གྲུབ་རྟགས་བསྟན་ཏོ།། 9 འོན༌ཀྱང༌། རང་དབང་ཅན་ཟེར་བའི་ཆོས་ཁང་ལ་གཏོགས་པའི་ཀི་རེ་ནེ་དང་ཨ་ལིག་སན་དྲི་ཡཱའི་མི་འགའ་ཤས༌དང་། གཞན༌ཡང༌། ཀི་ལིག་ཡཱ་དང་ཨེ་ཞི་ཡཱའི་ཡུལ་མི་ཁ་ཤས་ཀྱིས་སི་ཏེ་ཕཱན་ལ་རྩོད་པ་བྱས༌ནའང༌། 10 སི་ཏེ་ཕཱན་གྱིས་ཤེས་རབ་དང་དམ་པའི་ཐུགས་ཉིད་ཀྱི་སྒོ་ནས་གཏམ་སྨྲས་པ་ལ་དེ་དག་གིས་རྒོལ་མ་ནུས་པས། 11 མི་གཞན་ལ་ལྐོག་ནས་ངན་བསྐུལ་ཏེ་མི་འདིས་མོ་ཤེ་དང་དཀོན་མཆོག་ལ་སྐུར་བ་འདེབས་པའི་གཏམ་སྨྲས་པ་ངེད་ཀྱིས་ཐོས་པ་ཡིན་ཞེས་སྨྲ་རུ་བཅུག་གོ། 12 ཡང་དེ་དག་གིས་མི་རྣམས༌དང༌། རྒན༌པོ། མཁན་པོ་བཅས་ལ་ངན་སྐུལ་བྱས་ཤིང་གློ་བུར་ཡོང་ནས་ཁོ་རང་བཟུང་སྟེ་དཔོན་རིགས་ཚོགས་པའི་ཚོགས་མིའི་མདུན་དུ་བཙན་ཁྲིད་བྱས་པ༌དང༌། 13 དཔང་པོ་རྫུན་མ་བཙལ་ཏེ་ན༌རེ། མི་འདིས་རྟག་ཏུ་གནས་མཆོག་འདི་དང་བཀའ་ཁྲིམས་ལ་དམའ་འབེབས་བྱེད༌ཅིང༌། 14 སྔོན་ཆད་ནཱ་ཙ་རེལ་པ་ཡེ་ཤུ་དེས་གནས་འདི་བཤིག་སྟེ་མོ་ཤེ་ཡིས་ངེད་རྣམས་ལ་སྤྲད་པའི་གོམས་སྲོལ་རྣམས་ཀྱང་བསྒྱུར་བར་བྱའོ་ཞེས་ཟེར་བ་ངེད་ཀྱིས་ཐོས་པ་ཡིན་ཞེས་སྨྲས་པ༌དང༌། 15 ཚོགས་རའི་ནང་དུ་སྡོད་པའི་མི་ཐམས་ཅད་ཀྱིས་མིག་ཅེ་རེར་སི་ཏེ་ཕཱན་ལ་བལྟས་པ༌ན། ཁོའི་གདོང་ནི་ཕོ་ཉའི་ཞལ་རས་དང་མཚུངས་པ་མཐོང༌ངོ༌།།