1 དེ་ནས་ཕོལ་ལོལ་དང་པཱར་ན་པཱ་གཉིས་མཉམ་དུ་ཨི་ཀོན་ཡུ་ལ་ཡོད་པའི་ཡ་ཧུ་དཱ་པའི་ཆོས་ཁང་ལ་སོང་ནས། དེར་བཀའ་ལེགས་པར་གསུངས་པས་ཡ་ཧུ་དཱ་པ་དང་གྷི་རིག་པ་ཤིན་ཏུ་མང་པོ་དད་པར་གྱུར་ཏོ།། 2 འོན༌ཀྱང༌། དད་པ་མེད་པའི་ཡ་ཧུ་དཱ་པ་རྣམས་ཀྱིས་ཕྱི་ཕྱོགས་པ་རྣམས་ལ་ངན་སྐུལ་བྱས་ཏེ། སྤུན་ཟླ་རྣམས་དང་དེ་རྣམས་ཀྱི་བར་ལ་ཕྲ་མ་བཅུག 3 ཁོང་གཉིས་ཡུལ་དེར་ཡུན་རིང་དུ་བཞུགས༌ཤིང༌། གཙོ་བོ་ལ་བརྟེན་ནས་སྤོབས་པ་ཆེན་པོས་བཀའ་གསུངས་པ༌དང༌། གཙོ་བོས་ཀྱང་ཁོང་གཉིས་བརྒྱུད་ནས་གྲུབ་རྟགས་དང་ངོ་མཚར་བའི་དོན་བསྟན་ཏེ་རང་ཉིད་ཀྱི་ཐུགས་རྗེའི་བཀའ་ལ་བདེན་དཔང་མཛད་དོ།། 4 དེ་ནས་གྲོང་ཁྱེར་གྱི་མི་དེ་རྣམས་ཕྱོགས་གཉིས་སུ་གྱེས༌ཏེ། ལ་ལ་ནི་ཡ་ཧུ་དཱ་པའི་ཕྱོགས༌དང༌། ལ་ལ་ནི་སྐུ་ཚབ་པའི་ཕྱོགས་སུ་འཁོར། 5 དུས༌དེར། ཕྱི་ཕྱོགས་པ་དང་ཡ་ཧུ་དཱ་པ་རྣམས༌དང༌། གཞན༌ཡང༌། དེ་དག་གི་འགོ་དཔོན་རྣམས་དང་བཅས་པས་ཕོལ་ལོལ་དང་པཱར་ན་པཱ་གཉིས་ལ་བརྙས་བཅོས་བྱེད་པ་དང་རྡོ་རུབ་གཏོང་བར་རྩོམ་པ༌ལ། 6 ཁོང་གཉིས་ཀྱིས་དོན་དེ་ཤེས་ནས་ལི་ཀ་ཨོན་ཡཱ་ཡུལ་གྱི་ལིས་ཏྲ་དང་དིར་སྦེ་གྲོང་ཁྱེར་གཉིས་དང་དེའི་མཐའ་འཁོར་གྱི་ཡུལ་དུ་བྲོས༌ཤིང༌། 7 གནས་དེ་ནས་ཀྱང་མུ་མཐུད་དུ་འཕྲིན་བཟང་བསྒྲགས༌སོ།།

8 དེ་ཡང་ལིས་ཏྲ་གྲོང་ཁྱེར་དུ་རྐང་པར་ཤེད་ཤུགས་མེད་ཅིང་སྐྱེས་མ་ཐག་ནས་རྐང་པ་ཞ་བ་དང་གོམ་པའི་འདེགས་འཇོག་བསྒྱུར་མ་མྱོང་བའི་མི་ཞིག་ཡོད༌དེ། 9 ཁོས་ཕོལ་ལོལ་གྱིས་ཆོས་འཆད་པ་ལ་མཉན༌ཞིང༌། ཕོལ་ལོལ་གྱིས་ཀྱང་ཞ་བོ་དེ་ལ་ཞིབ་ལྟ་བྱས་པ༌ན། ཞ་བོ་དེ་ལ་རང་གི་ནད་གསོ་ཐུབ་པའི་དད་པ་ཡོད་པ་མཐོང༌སྟེ། 10 གསུང་སྐད་ཆེན་པོས་འདི་ལྟར། ཁྱོད་ཀྱིས་རང་གི་རྐང་པ་སར་བཙུགས་ནས་དྲང་མོར་ལོངས་ཤིག་ཅེས་གསུངས་པ༌ལ། ཞ་བོ་དེ་ཡར་ལྡིང་ཞིང་འགྲོ་བར་བྱས་སོ།། 11 དེ་ནས་ཕོལ་ལོལ་གྱིས་མཛད་པའི་དོན་དེ་མི་ཚོགས་ཀྱིས་མཐོང་ནས་སྐད་ཆེན་པོས་ལི་ཀ་ཨོན་ཡཱ་ཞེས་པའི་ཡུལ་སྐད༌དུ། ལྷ་རྣམས་མི་རུ་སྤྲུལ་ནས་བདག་ཅག་གི་ཁྲོད་དུ་བབས་ཞེས་བཤད་པ༌དང༌། 12 པཱར་ན་པཱའི་མིང་ལ་བཟོའུ་ཟི་*བཟོའུ་ཟི་ཞེས་པ་ནི་གཞི་བདག་གམ་སྲུང་མ་ལྟ་བུར༌གོཞེས་བཏགས་པ༌དང༌། ཕོལ་ལོལ་ནི་གསུང་མཁན་གཙོ་བོ་ཡིན་པས་མིང་ལ་ཧུར་མེ་ †ཧུར་མེ་ཞེས་པའང་བཟོའུ་ཟི་དང་འདྲ་བར་ལྷ་ཞིག༌ཡིན།ཞེས་བཏགས༌སོ།། 13 གྲོང་ཁྱེར་གྱི་ཕྱི་རོལ་ཏུ་ཡོད་པའི་བཟོའུ་ཟི་ལྷ་ཁང་གི་མཆོད་དཔོན་གྱིས་མི་རྣམས་དང་མཉམ་དུ་སྐུ་ཚབ་པ་ལ་མཆོད་པ་འབུལ་བའི༌ཕྱིར། བ་གླང་འགའ་ཁྲིད་ཅིང་མེ་ཏོག་གི་ཕྲེང་བ་བཟུང་ནས་སྒོ་འགྲམ་དུ་སླེབས་སོ།། 14 འོན༌ཀྱང༌། སྐུ་ཚབ་པ་པཱར་ན་པཱ་དང་ཕོལ་ལོལ་གཉིས་ཀྱིས་དོན་དེ་ཤེས་ནས་རང་གི་ཕྱི་གོས་གཤགས་ཏེ་མི་ཚོགས་ཀྱི་ཁྲོད་དུ་བརྒྱུགས་ཤིང་སྐད་གསང་མཐོན་པོས་འདི་སྐད༌དུ། 15 མི་ཚོགས༌ཀྱེ། ཁྱོད་ཅག་གིས་འདི་ལྟར་བྱེད༌དོན་ཅི་ཡིན་ནམ། ངེད་གཉིས་ཀྱང་ཁྱོད་རྣམས་དང་འདྲ་བར་མིའི་རང་བཞིན་དང་ལྡན༌ཞིང༌། ཁྱོད་རྣམས་ལ་འཕྲིན་བཟང་སྒྲོག་དོན་ནི་ཁྱོད་རྣམས་ཀྱིས་ཁུངས་ལུང་མེད་པའི་དོན་འདི་རྣམས་སྤངས༌ཏེ། གཏན་དུ་གསོན་པོར་བཞུགས་པའི་དཀོན་མཆོག་གི་ཕྱོགས་སུ་འཁོར་དགོས་པ་དེ་ཡིན། དཀོན་མཆོག་ནི་ནམ་མཁའ་དང་ས༌གཞི། རྒྱ་མཚོ་བཅས་དང་དེ་དག་ལ་ཡོད་པའི་དངོས་པོ་ཐམས་ཅད་སྐྲུན་མཁན་ཡིན༌ལ། 16 ཁོང་གིས་འདས་ཟིན་པའི་དུས་དེར་མི་རིགས་ཀུན་ལ་རང་རང་གི་འདོད་མོས་བཞིན་བྱེད་ན་བྱེད་དུ་བཅུག་གོ། 17 འོན་ཀྱང་ཁོང་གིས་ཁྱོད་རྣམས་ལ་དུས་རྟག་ཏུ་ཐུགས་རྗེ་གནང་ཞིང་གནམ་ལས་ཆར་བ་དང་ས་ལས་ལོ་ལེགས་གནང༌སྟེ། ཁྱོད་རྣམས་ལ་བཟའ་བཏུང་རང་གྲུབ་དང་ཡིད་སེམས་དགའ་སྤྲོས་ཁེངས་པར་མཛད་པའི་སྒོ་ནས་ཁོང་རང་ཉིད་ལ་བདེན་དཔང་མཛད་ཅེས་གསུངས་སོ།། 18 ཁོང་གཉིས་ཀྱིས་དེ་ལྟར་གསུངས་ནས་མཆོད་པ་འབུལ་བའི་ལས་དེ་དཀའ་ཚེགས་དང་བཅས་བཀག་པ་རེད། 19 དེ་ནས་ཨན་ཏི་ཡོག་ཡཱ་དང་ཨི་ཀོན་ཡུ་ནས་ཡོང་བའི་ཡ་ཧུ་དཱ་པ་ཁ་ཤས་ཀྱིས་མི་རྣམས་ལ་ངན་སྐུལ་བྱས༌ཤིང༌། དེ་རྣམས་ཀྱིས་ཕོལ་ལོལ་རྡོ་རུབ་བཏང་སྟེ་ཤི་བར་གྱུར་སྙམ་ནས་གྲོང་ཁྱེར་ཕྱི་རོལ་ཏུ་དྲུད་ནས་བཞག་གོ། 20 འོན༌ཀྱང༌། རྗེས་འབྲང་པ་རྣམས་ཀྱིས་ཁོང་གི་མཐའ་བསྐོར་ནས་སྡོད་པ་ལ། ཕོལ་ལོལ་ཡར་ལངས་ཏེ་ལིས་ཏྲ་གྲོང་ཁྱེར་དུ་ཕེབས༌ཤིང་། དེའི་ཕྱི༌ཉིན། པཱར་ན་པཱ་དང་མཉམ་དུ་དིར་སྦེ་རུ་ཕྱིན༌ཏོ།།

21 ཕོལ་ལོལ་དང་པཱར་ན་པཱ་གཉིས་ཀྱིས་གྲོང་ཁྱེར་དེའི་མི་རྣམས་ལ་འཕྲིན་བཟང་བསྒྲགས་ཏེ་མི་མང་པོ་སྐྱབས་མགོན་ཡེ་ཤུའི་རྗེས་སུ་འབྲང་དུ་བཅུག་གོ། དེ་ནས་ཁོ་གཉིས་ལིས་ཏྲ་དང་ཨི་ཀོན༌ཡུ། ཨན་ཏི་ཡོག་ཡཱ་བཅས་སུ་ཕྱིར་ལོག༌སྟེ། 22 རྗེས་འབྲང་པ་རྣམས་ཀྱི་སེམས་བརྟན་པོར་བྱས་ཤིང་དད་པ་ལ་གཏན་དུ་གནས་པར་བསྐུལ་ཏེ། བདག་ཅག་ནི་དཀོན་མཆོག་གི་རྒྱལ་སྲིད་དུ་ཞུགས༌ན། ངེས་པར་དཀའ་སྡུག་མང་པོ་མྱང་དགོས་ཞེས་གསུངས་སོ།། 23 དེ་ནས་ཁོང་གཉིས་ཀྱིས་ཆོས་ཚོགས་སོ་སོར་རྒན་པོ་འགའ་རེ་བསྐོས་ཤིང་སྨྱུང་གནས་བསྲུངས་པ་དང་གསོལ་བ་བཏབ༌ནས། དེ་རྣམས་རང་གི་དད་པ་བྱེད་ཡུལ་ཏེ་གཙོ་བོ་ལ་བཅོལ༌བ་རེད། 24 དེ་ནས་ཁོང་གཉིས་ཕུ་སིད་ཡཱ་ཡུལ་བརྒྱུད་ནས་ཕཱམ་ཕིལ་ཡ་ཡུལ་དུ་འབྱོར་པ༌དང༌། 25 ཕིར་གེ་རུ་དཀོན་མཆོག་གི་བཀའ་བསྒྲགས༌རྗེས། མར་ཨ་ཏལ་ཡཱ་རུ་ཕེབས༌ཤིང༌། 26 དེར་གྲུ་གཟིངས་ལ་བསྡད་ཅིང་ཨན་ཏི་ཡོག་ཡཱ་གྲོང་ཁྱེར་དུ་ཕྱིར་ལོག ཨན་ཏི་ཡོག་ཡཱ་ནི་དེ་སྔར་ཁོང་གཉིས་ཀྱིས་བསྒྲུབས་ཟིན་པའི་དོན་དེ་དག་གི༌ཕྱིར་དུ་མི་རྣམས་ཀྱིས་ཁོང་གཉིས་དཀོན་མཆོག་གི་ཐུགས་རྗེ་ལ་བཅོལ་བའི་ཡུལ་ཡིན། 27 ཁོང་གཉིས་དེར་སླེབས༌རྗེས་ཆོས་ཚོགས་ཀྱི་མི་རྣམས་བསྡུས༌ཏེ། དཀོན་མཆོག་གིས་ཁོང་གཉིས་དང་ལྷན་དུ་མཛད་པའི་དོན་ཐམས་ཅད༌དང༌། གཞན༌ཡང༌། ཕྱི་ཕྱོགས་པ་རྣམས་ལ་དད་པའི་སྒོ་ཇི་ལྟར་ཕྱེ་བར་མཛད་པའི་ཚུལ་རྣམས་སྨྲས་ཤིང་། 28 ཁོང་གཉིས་གྲོང་ཁྱེར་དེ་རུ་རྗེས་འབྲང་པ་རྣམས་དང་མཉམ་དུ་ཡུན་རིང་པོར་བཞུགས༌སོ།།