1 རྒྱལ་ཁམས་ཀུན་གྱི་གཙོ་བོ་དང་། མིའི་ནང་གི་སྙན་གྲགས་ཅན་དང་། ད་དུང་ཡེས་ར་ཨེལ་ཁྱིམ་རྒྱུད་ཡོང་ས་ཡིན་པའི་ཛ་ཡན་དང་སཱ་མར་ཡ་རི་བོར་བློ་བདེ་བག་ཕབ་ངང་སྡོད་པ་རྣམས་ལ་ཆག་སྒོ་འབྱུང་ཞིང་། 2 ཁྱོད་རྣམས་ཀལ་ནེ་རུ་ཕྱིན་ཏེ་ལྟོས་ཤིག་དང་། དེ་ནས་ཧ་མཱད་གྲོང་ཁྱེར་དུ་སོང་སྟེ། ཕེ་ལེ་ཤེད་ཀྱི་གཱད་བྱ་བར་བབས་ནས། རྒྱལ་ཁམས་དེ་དག་ཁྱོད་ཀྱི་རྒྱལ་ཁམས་ལས་སྟོབས་ལྡན་ཡིན་མིན་དང་། མངའ་ཁོངས་ནི་ཁྱོད་ཀྱི་ས་ལས་ཆེ་མིན་ལ་ལྟོས་དང་། 3 ཁྱོད་ཅག་གིས་གནོད་འཚེ་ཐེབས་པའི་ཉིན་མོ་ད་དུང་རྒྱང་རིང་བར་སེམས་མོད་ཀྱང་། ཁྱོད་ཅག་གི་སྤྱོད་པས་གདུག་རྩུབ་ཆེ་བའི་ཉེས་ཆད་འོང་བར་བཅུག 4 ཁྱོད་རྣམས་བ་སོའི་མལ་ཁྲིའི་སྟེང་དུ་ཉལ་ཞིང་། གཟིམ་ཁྲིའི་སྟེང་དུ་བསྙེས་ནས། ལུག་ཁྱུའི་ནང་གི་ལུ་གུ་དང་ཕྱུགས་རའི་ནང་གི་བ་ཕྲུག་ཟ་ཞིང་། 5 ཁྱོད་རྣམས་ཀྱིས་བློ་བདེ་བག་ཕབ་ངང་རྒྱུད་མངས་བརྡུངས་ཏེ་རོལ་ཆ་དཀྲོལ་བ་དང་། ཡང་དཱ་བིད་དང་འདྲ་བར་རང་ཉིད་ཀྱི་ཕྱིར་དུ་རོལ་ཆས་བཟོས་པ་ཡིན། 6 ཁྱོད་རྣམས་ཀྱིས་ཕོར་བ་ཆེན་པོས་ཆང་འཐུང་ཞིང་། ཆེས་ལེགས་པའི་སྣུམ་གྱིས་རང་ལུས་བྱུགས་པ་ལས། ཡོ་སེབ་ཀྱི་སྡུག་བསྔལ་ལ་སེམས་ཁྲལ་མ་བྱས། 7 དེའི་ཕྱིར་ཁྱོད་ཅག་ནི་ཐོག་མར་བཙོན་ལ་འཁྲིད་པ་དག་ཡིན་ཞིང་། དགའ་སྟོན་ལོངས་སུ་སྤྱོད་པའི་ཉིན་མོ་ནི་མེད་པར་འགྱུར་རོ། །དེ་དག་ལྷོད་ལྷོད་བྱས་ནས་སྡོད་པའི་དགའ་སྟོན་དེ་མེད་པར་འགྱུར། 8 གཙོ་བོ་ཡ་ཝཱེས་རང་ཉིད་དཔང་དུ་བཙུགས་ཏེ་དབུ་མནའ་བཞེས་ནས་འདི་སྐད་དུ། ཡ་ཀོབ་ཀྱི་གཟི་བརྗིད་ལ་ང་སྡང་ཞིང་། དེའི་མཁར་རྫོང་ངས་དོར་བས། ངས་གྲོང་ཁྱེར་དང་དེའི་ནང་གི་ཐམས་ཅད་དགྲའི་ལག་ཏུ་གཏོད་པར་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། ། 9 གལ་ཏེ་ཁྱིམ་གཅིག་ནས་མི་བཅུ་ལུས་ན། དེ་དག་ཀྱང་སྲོག་དང་འབྲལ་བར་འགྱུར། 10 བམ་རོ་སྲེག་མཁན་ཁྱིམ་མི་ཡིས་བམ་རོ་དེ་ཁྱིམ་གྱི་ཕྱི་རོལ་ཏུ་ཁྱེར་དུས། ཁང་པའི་ཕུག་ཏུ་སྦས་ཡོད་པའི་མི་ལ། ཁྱོད་ཡོད་སར་ད་དུང་མི་ཡོད་དམ་ཞེས་དྲིས་ན། མི་དེས་ན་རེ། མེད་དེ། ངེད་ཀྱིས་དཀོན་མཆོག་ཡ་ཝཱེའི་མཚན་གླེང་མི་རུང་བས། ཁ་རོག་ཏུ་སྡོད་ཅིག་ཅེས་སྨྲ་བར་འགྱུར་རོ། ། 11 ལྟོས་ཤིག དཀོན་མཆོག་ཡ་ཝཱེས་བཀའ་བབས་ན། ཁང་ཆེན་རྣམས་གཏོར་བར་འགྱུར་ཞིང་། ཁང་བུ་རྣམས་བཤིག་པར་འགྱུར། 12 རྟ་ནི་གཡང་སར་རྒྱུག་ནུས་སམ། མི་ཡིས་ས་དེར་གླང་གོག་གིས་རྨོ་འདེབས་བྱེད་ནུས་སམ། ཡིན་ཡང་ཁྱོད་ཀྱིས་དྲང་གཞག་དུག་རྩྭར་བསྒྱུར་ཏེ། དྲང་བདེན་གྱི་འབྲས་བུ་མཁན་པར་བསྒྱུར། 13 ཁྱོད་རྣམས་ལོ་དི་བེར་གྲོང་ཁྱེར་ལ་དགའ་ཞིང་རང་བསྟོད་ཀྱིས་ན་རེ། བདག་ཅག་གིས་རང་གི་སྟོབས་ཤུགས་ལ་བརྟེན་ནས་ཀར་ནཱ་ཡིམ་གྲོང་ཁྱེར་ཡང་རང་གི་དོན་དུ་བླངས་པ་མ་ཡིན་ནམ་ཞེས་སྨྲས་ཤིང་། 14 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ་གྱི་ཁྱིམ་རྒྱུད། ངས་རྒྱལ་ཁམས་ཤིག་དར་དུ་བཅུག་སྟེ་ཁྱོད་ལ་རྒོལ་བར་འགྱུར་ཞིང་། དེ་དག་གིས་ཧ་མཱད་ནས་ཨ་ར་པཱའི་གཙང་པོ་བར་དུ་ཁྱོད་ལ་བརྙས་བཅོས་དང་གཉའ་གནོན་བྱེད་པར་འགྱུར་ཞེས་གསུངས་སོ། །