1 གལ་ཏེ་མི་རྣམས་ཀྱི་བར་ལ་རྩོད་པ་བྱུང་ན་དེ་དག་ཁྲིམས་རར་འགྲོ་དགོས་ཤིང་། ཁྲིམས་དཔོན་གྱིས་གྱོད་དོན་ཐག་གིས་གཅོད་དུས་དྲང་པོར་བདེན་ལུགས་གནང་བ་དང་ངན་པར་ཉེས་ཆད་གཅོད་དགོས། 2 གལ་སྲིད་ནག་ཉེས་ཅན་ལ་གཅར་རྡུང་འབབ་ན། ཁྲིམས་དཔོན་གྱིས་དེ་ཉལ་དུ་བཅུག་ནས་རང་གི་མིག་ལམ་ནས་ཉེས་པའི་ཚད་བཞིན་དུ། གྲངས་ཀ་ལྟར་ལྕག་ཚན་གཞུ་དགོས། 3 ལྕག་ཚན་བཞི་བཅུ་གཞུ་རུང་བ་ལས་དེ་ལས་མང་བ་གཞུ་མི་རུང་། གལ་སྲིད་ཁྱོད་རྣམས་ཀྱིས་ཁོ་ལ་ལྕག་ཚན་དེ་ལས་མང་བ་གཞུས་ན། ཁྱོད་ཅག་གི་མིག་ལམ་ནས་སྤུན་ཟླ་དེ་ཁྱད་དུ་བསད་པ་ཡིན་ནོ། །

4 གཡུལ་ཁ་གཅོག་པའི་དུས༌སུ་བ་གླང་གི་མཆུ་ཏོ་མ༌སྡོམ*འདིར་མཆུ་ཏོ་མ་སྡོམ་ཞེས་པར་གཡུལ་གཅོག་དུས་བ་གླང་གི་ཁ་འགོག་མི་རུང་བའི་དོན་ཡིན་པར་གོ་དགོས།།

5 སྤུན་ཟླ་རྣམས་མཉམ་དུ་སྡོད་སྐབས་གཅིག་ལ་བུ་མེད་པར་ཤི་ན། འདས་པོའི་ཆུང་མ་མི་གཞན་པར་གཉེན་སྒྲིག་བྱེད་མི་རུང་། ཁྱོ་གའི་སྤུན་མཆེད་ཀྱིས་ཁོ་མོ་ལ་སྤུན་ཟླའི་འགན་ཁུར་ཏེ། ཁོ་མོ་ཆུང་མར་བླངས་ནས་ཁོ་མོ་དང་ལུས་འབྲེལ་བྱེད་དགོས་པ་དང་། 6 སྤུན་འདས་པོ་དེའི་མིང་ཡེས་ར་ཨེལ་ནས་ནུབ་པར་མི་འགྱུར་བའི་ཕྱིར། ཁོ་མོ་ལས་སྐྱེས་པའི་བུ་སྐྱེས་འགོ་དེ་ཁོའི་སྤུན་འདས་པོའི་མིང་ལ་དབང་དགོས། 7 གལ་སྲིད་མི་དེས་རང་གི་སྤུན་གྱི་ཆུང་མ་ལེན་མི་འདོད་ན། ཁོའི་སྤུན་གྱི་ཆུང་མ་མཁར་སྒོ་རུ་རྒན་པོ་རྣམས་ཀྱི་དྲུང་དུ་སོང་སྟེ། ངའི་ཁྱོ་གའི་སྤུན་གྱིས་ཡེས་ར་ཨེལ་ནས་རང་གི་ཕུ་བོའི་མིང་འཇོག་མི་འདོད་ལ། ངའི་ཁྱོ་གའི་སྤུན་གྱིས་ང་ལ་འགན་འཁུར་མི་འདོད་དོ་ཞེས་སྨྲ་དགོས། 8 དེ་ནས་གྲོང་ཁྱེར་དེའི་རྒན་པོ་རྣམས་ཀྱིས་མི་དེ་བོས་ནས་ཁོ་ལ་གསལ་པོོར་སྨྲ་དགོས་ཤིང་། གལ་སྲིད་དེས་ཨུ་ཚུགས་ཀྱིས་ངས་ཁོ་མོ་ལེན་མི་འདོད་ཟེར་ན། 9 ཁོའི་ཕུ་བོའི་ཆུང་མ་ནི་རྒན་པོ་རྣམས་ཀྱི་མིག་མདུན་ནས་ཁོའི་གམ་དུ་སོང་སྟེ། ཁོའི་རྐང་པ་ལས་ལྷམ་བཤུས་ནས་གདོང་ལ་མཆིལ་མ་བཏབ་སྟེ་ཁོ་ལ། རང་གི་ཕུ་བོའི་རིགས་རྒྱུད་སྐྱོང་བར་མི་དགའ་བའི་མི་ལ་འདི་ལྟར་བྱེད་དགོས་ཞེས་སྡིགས་དགོས། 10 དུས་དེ་ནས་བཟུང་ཡེས་ར་ཨེལ་ནས་མི་དེའི་མིང་ལ་ལྷམ་བཤུས་པའི་ཁྱིམ་རྒྱུད་ཅེས་འབོད་པར་འགྱུར་རོ། །

11 གལ་ཏེ་མི་གཉིས་རྒྱག་རེས་བྱེད་པའི་ཚེ། གཅིག་གི་ཆུང་མས་རང་གི་ཁྱོ་ག་གཞན་པ་དེའི་ལག་ནས་སྐྱོབ་ཆེད་ཚུར་ཡོང་ནས་མི་དེའི་འདོམས་ལ་ལག་པས་འཇུས་ན། 12 ཁྱོད་རྣམས་ཀྱིས་སྙིང་རྗེ་མི་བསྐྱེད་པར་ཁོ་མོའི་ལག་པ་གཅོད་དགོས་སོ། །

13 ཁྱོད་རྣམས་ཀྱིས་སྒྱེ་མོ་ནང་དུ་རྒྱ་རྡོ་ཆེ་ཆུང་གཉིས་མཉམ་དུ་འཇོག་མི་རུང་། 14 ཁྱོད་རྣམས་ཀྱི་ཁྱིམ་དུ་ཚད་འཇལ་ཆས་ཆེ་ཆུང་གཉིས་ཡོད་མི་རུང་། 15 ཁྱོད་རྣམས་ལ་རྒྱ་རྡོ་མཉམ་ཞིང་དྲང་བ་དང་། འཇལ་ཆས་ཚད་ལྡན་དྲང་པོ་ཞིག་ཡོད་དགོས། དེ་འདྲ་ཡོད་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་དུ་ཁྱོད་རྣམས་ཡུན་རིང་པོར་འཚོ་ཐུབ། 16 སུ་ཞིག་གིས་གཡོ་སྒྱུའི་སྦྱོར་བ་འདི་དག་སྤེལ་ན། དེ་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཞེ་ལོག་པ་ཡིན་ནོ། །

17 ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཐོན་པའི་ལམ་དུ། ཨ་མཱད་ལེག་པས་ཁྱོད་རྣམས་ལ་ཅི་བྱས་པ་དེ་དྲན་དགོས། 18 དེ་ཚོས་དཀོན་མཆོག་ལ་གུས་ཤིང་འཇིགས་པར་མི་བྱ་ཞིང་། ལམ་བར་དུ་ཁྱོད་རྣམས་ལ་ཇི་ལྟར་ཕྲད་པ་དང་། ཁྱོད་རྣམས་ཐང་ཆད་ནས་དཀའ་ངལ་གྱི་གནས་སུ་ལྷུང་ཡོད་དུས། ཁྱོད་རྣམས་ཀྱི་རྗེས་སུ་ལུས་པ་གཉོད་ཆུང་རྣམས་ལ་རྒོལ་བའོ། ། 19 དེ་བས་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་མཐའ་འཁོར་གྱི་དགྲ་ཐམས་ཅད་ལས་བསྐྱབས་ཤིང་། ཁོང་གིས་ཁྱོད་རྣམས་ལ་ས་སྐལ་དུ་གནང་བའི་ཡུལ་དུ་བདེ་བར་གནས་པའི་ཚེ། ཁྱོད་ཀྱིས་ཨ་མཱད་ལེག་མི་རིགས་ཀྱི་མིང་ནི་གནམ་འོག་ནས་ནུབ་པར་བྱེད་དགོས་པ་མ་བརྗེད་ཅིག