1 དེ་ཡང་ཟླ་བདུན་པའི་ཚེས་ཉེར་གཅིག་ཉིན་དཀོན་མཆོག་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་ལ་བྱུང་ནས་འདི་སྐད་དུ། 2 ཁྱོད་ཀྱིས་ཞིད་ཨལ་ཐེ་ཨེལ་གྱི་བུ་སྟེ་ཡ་ཧུ་དཱའི་འགོ་དཔོན་ཟེ་རུ་པཱ་པེལ་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་གཉིས་དང་ལྷག་ལུས་རྣམས་ལ་འདི་ལྟར། 3 ཁྱོད་ཅག་ལྷག་ལུས་རྣམས་ལས་སུ་ཞིག་གིས་མཆོད་ཁང་འདིའི་སྔ་མའི་གཟི་བརྗིད་མཐོང་མྱོང་ངམ། ད་ལྟ་ཁྱོད་རྣམས་ཀྱིས་བལྟས་ན་འདི་ཅི་འདྲ་འདུག་གམ། མིག་ནང་དུ་འདི་ནི་ཅི་ལའང་མི་བརྩི་བ་མ་ཡིན་ནམ་ཞེས་སྨྲོས་ཤིག 4 དཀོན་མཆོག་ཡ་ཝཱེས་འདི་སྐད་དུ། ཡིན་ནའང་། ཀྱེ་ཟེ་རུ་པཱ་པེལ་ད་ལྟ་ཁྱོད་ནི་སྟོབས་དང་ལྡན་པར་གྱུར་ཅིག ཀྱེ་ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་ཁྱོད་ཀྱང་སྟོབས་དང་ལྡན་པར་གྱུར་ཅིག ཀྱེ་ས་འདིའི་འབངས་མི་ཐམས་ཅད་ཁྱོད་རྣམས་ཀྱང་སྟོབས་དང་ལྡན་པར་གྱུར་ནས་ལས་ཀ་བྱོས་ཤིག ཅིའི་ཕྱིར་ཞེ་ན། བདག་ཁྱོད་དང་མཉམ་དུ་ཡོད་པས་སོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། ། 5 འདི་ནི་ཁྱོད་རྣམས་ཨེ་ཅིབ་ཡུལ་ནས་ཡོང་བའི་དུས་སུ་ངས་ཁྱོད་རྣམས་ལ་བཞག་པའི་ཞལ་ཆད་ཡིན་ལ། དེའི་དུས་སུ་ངའི་སེམས་ཉིད་ཁྱོད་ཅག་གི་ཁྲོད་དུ་གནས་པས་ཁྱོད་རྣམས་མ་འཇིགས་ཤིག 6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། མི་འགྱངས་པར་ངས་གནམ་ས་གཉིས་ཀ་དང་། རྒྱ་མཚོ། སྐམ་ས་བཅས་གཡོ་བར་བྱའོ། ། 7 ངས་མི་རིགས་ཐམས་ཅད་བསྒུལ་ཞིང་མི་རིགས་ཀུན་གྱི་ནོར་བུ་རྣམས་དྲངས་ཏེ། མཆོད་ཁང་འདི་ལ་གཟི་བརྗིད་ཀྱིས་འགེང་བར་བྱའོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་སོ། ། 8 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དངུལ་རྣམས་ངའི་ཡིན་ལ། གསེར་རྣམས་ཀྱང་ངའི་ཡིན་ནོ། ། 9 མཆོད་ཁང་ཕྱི་མའི་གཟི་བརྗིད་ནི་མཆོད་ཁང་སྔ་མའི་གཟི་བརྗིད་ལས་ཀྱང་ཆེ་བར་འགྱུར། མཆོད་ཁང་འདིའི་ནང་དུ་བདག་གིས་ཞི་བདེ་གནང་བར་འགྱུར་ཞེས་གསུངས་ཏེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་སོ། །

10 དེ་ཡང་རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་དགུ་པ་ཡི་ཚེས་ཉེར་བཞི་ཉིན་དཀོན་མཆོག་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་ལ་བྱུང་ནས་འདི་སྐད་དུ། 11 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་མཆོད་དཔོན་རྣམས་ལ་བཀའ་ཁྲིམས་ཕྱོགས་ཀྱི་དོན་རྣམས་འདི་ལྟར་འདྲི་དགོས་པ་སྟེ། 12 གལ་ཏེ་མི་ཞིག་གིས་རང་གི་ཐུ་བའི་ནང་དུ་ཤ་དམ་པ་ཁྱེར་རྗེས་ཡང་ཐུ་བ་དེས་བག་ལེབ་དང་ཡང་ན་ཁུ་བའམ། རྒུན་ཆང་ངམ། སྣུམ་མམ་ཡང་ན་ཟས་གང་རུང་ལ་རེག་ན། དེ་དོན་ངོ་མས་དམ་པར་བརྩིའམ་ཞེས་པའོ་ཞེས་གསུངས་པ་དང་། མཆོད་དཔོན་རྣམས་ཀྱིས་ལན་དུ་དམ་པར་མི་བརྩི་ཞེས་སྨྲས། 13 ཡང་ཧག་གཱ་ཨི་ཡིས་འདི་ལྟར། གལ་ཏེ་རོ་ལ་རེག་ནས་མི་གཙང་བར་གྱུར་པའི་མི་ཞིག་གིས་དངོས་པོ་འདི་དག་ལས་གཅིག་ལ་རེག་ན། དེ་དོན་ངོ་མས་མི་གཙང་བར་བརྩིའམ་ཞེས་དྲིས་པ་ན། མཆོད་དཔོན་རྣམས་ཀྱིས་ལན་དུ་དེ་ནི་མི་གཙང་བར་བརྩིའོ་ཞེས་སྨྲས་པ་དང་། 14 དེ་ནས་ཧག་གཱ་ཨི་ན་རེ། དཀོན་མཆོག་ཡ་ཝཱེས་འདི་སྐད་གསུངས་ཏེ། མི་སྡེ་འདི་དང་ཡུལ་ཁམས་འདི་ཡང་ངའི་མདུན་དུ་དེ་བཞིན་ཡིན་ལ། དེ་རྣམས་ལག་གི་ལས་ཀ་ཐམས་ཅད་དང་། ཁོ་ཚོས་གནས་དེར་ཕུལ་བ་ཐམས་ཅད་མི་གཙང་བ་ཡིན་ནོ། ། 15 ད་ལྟ་ཁྱོད་ཚོས་རང་གི་གནས་ཚུལ་ལ་བརྟག་ནས་དེ་རིང་ཡར་སྔོན་གྱི་དུས་ལ་ཕྱིར་དྲན་གྱིས་ཤིག དེའི་དུས་སུ་དཀོན་མཆོག་ཡ་ཝཱེའི་མཆོད་ཁང་གི་རྡོ་རྣམས་གཅིག་ཐོག་གཅིག་བརྩེགས་མེད་པ་ཡིན། 16 དེའི་དུས་སུ་ཁྱོད་རྣམས་ཅི་འདྲ་ཡིན་ནམ། མི་ཞིག་འབྲུ་རིགས་མང་སར་འོངས་ཏེ་འབྲུ་རིགས་བྲེ་ཉི་ཤུ་འཐོབ་འདོད་ཀྱང་བྲེ་བཅུ་མ་གཏོགས་མ་ཐོབ་ལ། མི་ཞིག་རྒུན་འབྲུམ་འཚིར་གཞོང་ཡོད་སར་ཕྱིན་ནས་འཚིར་གཞོང་ལས་རྒུན་ཆང་ཟོ་ལྔ་བཅུ་འཐོབ་འདོད་ཀྱང་ཟོ་ཉི་ཤུ་མ་གཏོགས་མ་ཐོབ་པ་ཡིན། 17 ངས་ཐན་པ་དང་གཡའ་སྤུ། སེར་བ་བཅས་ཀྱིས་ཁྱོད་ཅག་ལག་གི་ལས་ཀ་ཐམས་ཅད་ཀྱི་སྟེང་དུ་ཁྱོད་རྣམས་ལ་རྒོལ་ན་ཡང་། ཁྱོད་རྣམས་ད་དུང་ངའི་ཕྱོགས་སུ་མ་ལོག་གོ་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། ། 18 ཁྱོད་ཚོས་རང་གི་གནས་ཚུལ་ལ་བརྟག་ནས་དེ་རིང་ཡར་སྔོན་གྱི་དུས་ཏེ། ཟླ་དགུ་པའི་ཚེས་ཉེར་དགུ་ཉིན་ནས་དཀོན་མཆོག་ཡ་ཝཱེའི་མཆོད་ཁང་གི་རྩིག་གདན་བཏིངས་པའི་ཉིན་མོའི་བར་དུ་ཕྱིར་དྲན་གྱིས་ཤིག 19 འབྲུ་མཛོད་དུ་ད་དུང་ས་བོན་ཡོད་དམ། རྒུན་འབྲུམ་ཤིང་དང་སེ་ཡབ་ཤིང་། སེ་འབྲུ་ཤིང་། སྐྱུ་རུ་ཤིང་བཅས་ལས་འབྲས་བུ་མ་ཐོགས་པ་མིན་ནམ། དུས་དེ་རིང་ནས་བཟུང་ངས་བྱིན་རླབས་གནང་བར་འགྱུར་ཞེས་པའོ་ཞེས་སྨྲས་སོ། །

20 ཟླ་དེའི་ཚེས་ཉེར་བཞི་ཉིན་དཀོན་མཆོག་ཡ་ཝཱེའི་བཀའ་ནི་ཡང་བསྐྱར་ཧག་གཱ་ཨི་ལ་བྱུང་ནས་འདི་སྐད་དུ། 21 ཁྱོད་ཀྱིས་ཡ་ཧུ་དཱའི་འགོ་དཔོན་ཟེ་རུ་པཱ་པེལ་ལ་འདི་ལྟར་སྨྲོས་ཤིག ངས་གནམ་ས་གཉིས་ཀ་གཡོ་བར་བྱ་ཞིང་། 22 ངས་ཡུལ་ཁམས་ཀུན་གྱི་གསེར་ཁྲི་ལོག་ཏུ་བཅུག་ནས། ཕྱི་རོལ་པའི་རྒྱལ་ཁམས་ཀུན་གྱི་སྟོབས་ཤུགས་མེད་པར་བྱ་ཞིང་། ཡང་ངས་ཤིང་རྟ་དང་དེ་འདེད་མཁན་རྣམས་ལོག་ཏུ་འཇུག་གོ །དེ་ནས་རྟ་དང་སྐྱ་མི་རྣམས་སར་འགྱེལ་ནས་མི་རེ་རེ་རང་གི་སྤུན་གྱི་རལ་གྲིའི་འོག་ཏུ་འཆི་བར་འགྱུར་ཞེས་པའོ། ། 23 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཀྱེ་ཞིད་ཨལ་ཐེ་ཨེལ་གྱི་བུ་སྟེ་ངའི་ཞབས་ཕྱི་ཟེ་རུ་པཱ་པེལ་ལགས། ཉིན་དེར་ངས་ཁྱོད་ནི་མཐོ་སར་དྲངས་ཏེ་ཁྱོད་རང་མཛུབ་དཀྲིས་དམ་ཕྲུག་ཅན་དུ་བྱའོ་ཞེས་དཀོན་མཆོག་ཡ་ཝཱེས་གསུངས་པ་དང་། ཡང་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཅིའི་ཕྱིར་ཞེ་ན། ངས་ཁྱོད་རང་བདམས་པས་སོ་ཞེས་གསུངས་སོ།། །།