1 ཁྱོད་ཚོས་ཛ་ཡན་དུ་རྭ་དུང་བུས་ལ། ངའི་རི་བོ་དམ་པ་ནས་ཉེན་བརྡ་ཐོངས་དང་། ཡུལ་འདིའི་མི་ཀུན་འདར་དུ་ཆུག གང་ལ་ཞེ་ན། དཀོན་མཆོག་ཡ་ཝཱེའི་ཉིན་མོ་སླེབས་ལ་ཉེ་སྟེ། དེ་ནི་སླེབ་བཞིན་པས་སོ། ། 2 དེ་ནི་མུན་པ་དང་སྨག་རུམ་འཐིབས་པའི་ཉིན་མོ་དང་། སྤྲིན་ནག་དང་མུན་ནག་འཐིབས་པའི་ཉིན་མོ་སྟེ། རི་བོ་རྣམས་ལ་སྐྱ་རེངས་ཤར་བ་བཞིན། རྒྱ་ཆེ་ཞིང་སྟོབས་དང་ལྡན་པའི་ཆ་ག་འབུ་ཡི་དཔུང་ཚོགས་ཤིག་སླེབས་འོང་སྟེ། དེ་དང་འདྲ་བ་སྔར་བྱུང་མ་མྱོང་ལ། ཕྱིས་སུའང་མི་རབས་ནས་མི་རབས་བར་ནམ་ཡང་འབྱུང་བར་མི་འགྱུར་རོ། ། 3 དེ་དག་གི་མདུན་དུ་མེ་ཡིས་ཁྱུར་མིད་གཏོང་བ་དང་། རྒྱབ་ཏུ་སྲེག་བྱེད་ཀྱི་མེ་ལྕེ་ཡོད། དེ་དག་མ་སླེབས་སྔོན་དུ་ས་གཞི་ནི་ཨེ་དེན་ལྡུམ་ར་དང་མཚུངས་མོད། དེ་དག་སོང་རྗེས་ས་གཞི་ནི་དབེན་སྟོང་དུ་གྱུར་ཅིང་། དེ་དག་ལས་གཅིག་ཀྱང་མ་ཐར་ཏོ། ། 4 དེ་དག་གི་གཟུགས་དབྱིབས་ནི་རྟ་དང་མཚུངས་ལ། དམག་རྟ་བཞིན་དུ་རྒྱུག་པ་ཡིན། 5 སྒྲ་ནི་ཤིང་རྟ་རྣམས་རི་རྩེ་ནས་མཆོང་བ་དང་། མེ་ལྕེས་སོག་རོ་འབར་བ་དང་འདྲ་སྟེ། ཡང་སྟོབས་དང་ལྡན་པའི་དམག་དཔུང་གིས་འཐབ་མོ་བཤམས་པ་དང་འདྲའོ། ། 6 དེ་དག་གི་མདུན་དུ་མི་རྣམས་གདུང་བས་གཟིར་ནས་ངོ་མདོག་ཀྱང་འགྱུར་རོ། ། 7 དེ་དག་ནི་དཔའ་བོ་ལྟར་རྒྱུག་ཅིང་། དམག་མི་བཞིན་དུ་མཁར་ལ་འཛེགས་ཏེ། རེ་རེ་རང་གི་ལམ་ལ་ཞུགས་ནས་གྲལ་མི་འཆོལ། 8 དེ་ཚོས་ཕན་ཚུན་ཕུད་རྒྱག་མི་བྱེད་པར་རང་གི་ལམ་ལ་ཞུགས་ཏེ། མཚོན་ཆ་རྣམས་ལས་བརྒལ་ནས་མདུན་དུ་བསྐྱོད་དོ། ། 9 དེ་རྣམས་གྲོང་ཁྱེར་དུ་རྒྱུག་ཅིང་། ལྕགས་རིའི་སྟེང་མཆོང་ཞིང་ཁང་པར་འཛེགས་ཏེ། རྐུན་མ་བཞིན་དུ་སྒེའུ་ཁུང་ནས་ནང་དུ་འཛུལ། 10 དེ་དག་གི་མདུན་དུ་ས་ནི་འགུལ་ཞིང་ནམ་མཁའ་ཡང་གཡོ་བ་དང་། ཉི་མ་དང་ཟླ་བ་འགྲིབ་ཅིང་སྐར་ཚོགས་རྣམས་ཀྱི་འོད་སྣང་ཟད། 11 དཀོན་མཆོག་ཡ་ཝཱེས་ཉིད་ཀྱི་དམག་དཔུང་གི་མདུན་དུ་གསུང་སྐད་འདོན་པ་དང་། ཁོང་གི་དམག་དཔུང་རབ་ཏུ་རྒྱ་ཆེའོ། །ཁོང་གི་བཀའ་བཞིན་སྒྲུབ་མཁན་རྣམས་ནི་ནུས་མཐུ་དང་ལྡན་པ་ཡིན། དཀོན་མཆོག་ཡ་ཝཱེའི་ཉིན་མོ་རབ་ཏུ་ཆེ་ལ་འཇིགས་སུ་རུང་བ་ཡིན་པས། སུ་ཞིག་གིས་དེ་བཟོད་ནུས་སམ།

12 ཡིན་ཡང་ད་ལྟ་ཁྱོད་ཚོས་སྨྱུང་གནས་བསྲུངས་ཏེ། ངུ་ཞིང་འོ་དོད་འབོད་ཀྱིན་བདག་གི་ཕྱོགས་སུ་རྩེ་གཅིག་གིས་ལོག་ཤོག་ཅེས་དཀོན་མཆོག་ཡ་ཝཱེས་འདི་སྐད་གསུངས་སོ། ། 13 ཡང་ཁྱོད་ཚོས་རང་གི་གྱོན་གོས་མི་གཤགས་པར། སེམས་འཁྲུག་ཀྱིན་ཁྱོད་ཅག་གི་དཀོན་མཆོག་ཡ་ཝཱེའི་ཕྱོགས་སུ་ལོག་དགོས་ཞེས་གསུངས་སོ། །ཅི་ལ་ཞེ་ན། ཁོང་ནི་ཐུགས་རྗེ་ཅན་དང་སྙིང་རྗེ་ཆེན་པོ་མངའ་བ། རང་དགར་ཐུགས་མི་ཁྲོ་བ། བྱམས་བརྩེ་མཐའ་ཡས་པར་མ་ཟད། བློ་ཁ་བསྒྱུར་ནས་ཆག་སྒོ་མི་མཛད་པ་ཡིན་ནོ། ། 14 ཁྱོད་ཅག་གི་དཀོན་མཆོག་ཡ་ཝཱེ་ལ་འབུལ་བའི་འབྲུ་མཆོད་དང་སྐྱེམས་མཆོད་དུ། ཁོང་གིས་བློ་ཁ་བསྒྱུར་ནས་བྱིན་རླབས་བསྐྱུར་ཡོད་ཀྱང་སྲིད་དེ་སུ་ཞིག་གིས་ཤེས་སམ། 15 ཁྱོད་ཚོས་ཛ་ཡན་དུ་རྭ་དུང་བུས་ལ། སྨྱུང་གནས་ཀྱི་དུས་ནི་དམ་པར་རྩིས་དང་། འདུ་འཛོམས་དམ་ནན་ཡོངས་སུ་སྒྲོགས་ཤིག 16 མི་སྡེ་མཉམ་དུ་སྡུས་ལ་ཆོས་ཚོགས་དམ་པར་བྱོས། རྒན་རབས་རྣམས་སྡུས་ལ་ཕྲུ་གུ་དང་མ་ཡི་པང་དུ་ནུ་མ་ནུ་བ་རྣམས་ཀྱང་སྡུས་ཤིག་དང་། ཡང་མག་པ་རང་གི་གཉེན་ཤག་དང་། བག་མ་རང་གི་གཟིམ་ཁང་དང་འབྲལ་བར་བཅུག 17 ཡ་ཝཱེ་ལ་ཞབས་ཏོག་སྒྲུབ་པའི་མཆོད་དཔོན་རྣམས་སྒོ་ཁྱམས་དང་མཆོད་ཁྲིའི་བར་དུ་ངུ་ཞིང་ན་རེ། ཀྱེ་དཀོན་མཆོག་ཡ་ཝཱེ་ལགས། ཉིད་ཀྱི་མི་སྡེ་ལ་བརྩེ་བར་མཛོད་ཅིག ཉིད་ཀྱི་ནོར་སྐལ་ངོ་ཚར་སྦྱར་ནས་མི་སྡེ་རྣམས་ཀྱི་ནང་དུ་བཞད་གད་དུ་མི་འགྱུར་བར་མཛོད་ཅིག ཅིའི་ཕྱིར་མི་རྣམས་ཀྱི་ནང་དུ་ཁོ་ཚོའི་དཀོན་མཆོག་གང་དུ་ཡོད་ཅེས་སྨྲ་རུ་འཇུག་གམ།

18 དེ་ནས་དཀོན་མཆོག་ཡ་ཝཱེས་ཉིད་ཀྱི་ཡུལ་ལུང་ལ་ཐུགས་ཁུར་མཛད་དེ། ཉིད་ཀྱི་མི་སྡེ་ལ་སྙིང་རྗེ་དགོངས་པ་ཡིན། 19 དཀོན་མཆོག་ཡ་ཝཱེས་ཉིད་ཀྱི་མི་སྡེ་ལ་བཀའ་ལན་གནང་ཞིང་འདི་སྐད་དུ། ལྟོས་ཤིག བདག་གིས་ཁྱོད་རྣམས་ལ་འབྲུ་རིགས་དང་རྒུན་ཆང་གསར་པ། སྣུམ་གསར་པ་བཅས་གནང་སྟེ་ཁྱོད་ཅག་ཚིམ་པར་བྱེད་ཅིང་། ཡང་བདག་གིས་ཁྱོད་རྣམས་མི་རིགས་ཁག་གི་སྨད་པའི་ཡུལ་དུ་མི་བྱའོ། ། 20 བདག་གིས་བྱང་གི་དམག་དཔུང་ཁྱོད་ལས་རྒྱང་དུ་བསྐྲད་དེ། དེ་དག་སྐམ་ས་དང་དབེན་སྟོང་དུ་འདེད་ཅིང་། དེའི་དཔུང་ཁག་སྔོན་མ་ཤར་མཚོ་དང་། དཔུང་ཁག་རྗེས་མ་ནུབ་མཚོའི་ནང་དུ་འདེད་པ་དང་། དེ་ལས་དྲི་ངན་བྱུང་ནས་ནམ་མཁའ་ཡོངས་ལ་འཐུལ་བར་འགྱུར་ཏེ། དཀོན་མཆོག་ཡ་ཝཱེས་དངོས་གནས་དོན་ཆེན་མཛད་པ་རེད། 21 ཀྱེ་ཡུལ་ཁམས། མི་འཇིགས་པར་རབ་ཏུ་དགའ་བར་གྱིས་ཤིག ཅི་ལ་ཞེ་ན། དཀོན་མཆོག་ཡ་ཝཱེས་དོན་ཆེན་མཛད་པས་སོ། ། 22 ཐང་གི་རི་དྭགས་རྣམས་མ་འཚབ་ཅིག ཅི་ལ་ཞེ་ན། དབེན་སྟོང་གི་རྩྭ་སྔོན་སྐྱེས་ཤིང་། ལྗོན་ཤིང་ལ་འབྲས་བུ་ཐོགས་པ་དང་། སེ་ཡབ་ཤིང་དང་རྒུན་ཤིང་གིས་ཀྱང་འབྲས་བུ་མང་དུ་བསྐྱེད་དོ། ། 23 ཀྱེ་ཛ་ཡན་གྱི་མི་སྡེ་ཁྱོད་རྣམས་དགའ་བར་གྱིས་ཤིག ཁྱོད་ཅག་གི་དཀོན་མཆོག་ཡ་ཝཱེའི་རྐྱེན་གྱིས་སྤྲོ་བར་གྱིས་ཤིག ཅི་ལ་ཞེ་ན། ཁོང་གིས་ཁྱོད་རྣམས་ལ་དུས་དང་འཚམ་པའི་སྟོན་ཀའི་ཆར་པ་གནང་ཞིང་། ཁྱོད་ཚོའི་ཆེད་དུ་དུས་ཆར་གནང་བ་སྟེ། སྔར་བཞིན་སྟོན་དཔྱིད་གཉིས་ཀྱི་ཆར་ཆུ་གནང་བར་མཛད། 24 གཡུལ་ཁ་འབྲུ་ཡིས་བཀང་ཞིང་། འཚིར་གཞོང་རྣམས་ལས་རྒུན་ཆང་དང་སྣུམ་གསར་པ་མེར་བར་མཛད། 25 བདག་གིས་ཁྱོད་ཚོའི་གམ་དུ་མངགས་པའི་དཔུང་ཚོགས་ཏེ། ཆ་ག་འབུ་དང་ཆ་ག་པ། ཨ་ཚག་ཚག་པ། ཆ་ག་པའི་འབུ་ཆུང་བཅས་ཀྱིས་ལོ་དེ་དག་གི་རིང་ལ་ཟོས་པ་ཡོད་ཚད། བདག་གིས་ཁྱོད་ཚོར་སྐྱིན་ཚབ་གནང་ངེས་ཡིན། 26 ཡང་ཁྱོད་རྣམས་ཀྱིས་ཟོས་ནས་ཡིད་ཚིམ་པར་འགྱུར་ཏེ། ཁྱོད་རྣམས་ལ་དོན་ངོ་མཚར་ཅན་མཛད་མཁན་ཏེ་ཁྱོད་ཅག་གི་དཀོན་མཆོག་ཡ་ཝཱེའི་མཚན་ལ་བསྟོད་བསྔགས་བརྗོད་ཅིག དེ་ཡང་ངའི་མི་སྡེ་ནི་ནམ་ཡང་སྐྱེངས་པར་མི་འགྱུར། 27 དེ་ནས་བདག་ནི་ཡེས་ར་ཨེལ་གྱི་ཁྲོད་དུ་གནས་པ་དང་། ཁྱོད་ཅག་གི་དཀོན་མཆོག་ཡ་ཝཱེ་ཡིན་ལ། བདག་མ་གཏོགས་དཀོན་མཆོག་གཞན་གང་ཡང་མེད་པ་ཁྱོད་རྣམས་ཀྱིས་ཤེས་པར་འགྱུར་ཞིང་། ངའི་མི་སྡེ་ནི་ནམ་ཡང་སྐྱེངས་པར་མི་འགྱུར་རོ། །

28 རྗེས་སུ་བདག་གིས་རང་གི་ཐུགས་ཉིད་ནི། །འཇིག་རྟེན་མི་བུ་ཀུན་ལ་སྩོལ་བར་བྱ། །ཁྱོད་ཚོའི་བུ་དང་བུ་མོས་ལུང་བསྟན་འཆད། །བགྲེས་པོ་རྣམས་ལ་རྨི་ལམ་འབྱུང་བ་དང་། །གཞོན་ནུ་རྣམས་ཀྱིས་ངོ་མཚར་ཞལ་གཟིགས་མཐོང་། ། 29 དུས་དེར་བདག་གིས་རང་གི་ཐུགས་ཉིད་མཆོག །ང་ཡི་ཞབས་ཕྱི་དད་ལྡན་ཕོ་མོར་སྩོལ། ། 30 ཡང་བདག་གིས་ནམ་མཁའ་དང་ས་གཞི་རུ་དོན་ངོ་མཚར་ཅན་རྣམས་སྟོན་པར་འགྱུར་ཞིང་། ཁྲག་དང་མེ་དང་དུ་བའི་ཀ་བ་འབྱུང་། 31 ཁྲི་གདུགས་ཉི་མ་ནག་པོ་དང་བསིལ་ཟེར་ཟླ་བ་ཁྲག་ཏུ་འགྱུར། དེ་ཐམས་ཅད་ནི་དཀོན་མཆོག་ཡ་ཝཱེའི་རབ་ཏུ་ཆེ་ཞིང་འཇིགས་སུ་རུང་བའི་ཉིན་མོ་དེ་མ་སླེབས་གོང་དུ་འབྱུང་ངེས་ཡིན། 32 དུས་དེར་དཀོན་མཆོག་ཡ་ཝཱེའི་མཚན་ནས་འབོད་པ་རྣམས་ཐར་བར་འགྱུར། ཅིའི་ཕྱིར་ཞེ་ན། དཀོན་མཆོག་ཡ་ཝཱེས་གསུངས་པ་བཞིན་དུ། རི་བོ་ཛ་ཡན་དང་ཡེ་རུ་སཱ་ལེམ་དུ་མི་རྣམས་ཐར་བ་དང་། དཀོན་མཆོག་ཡ་ཝཱེས་ཞལ་འབོད་གནང་བ་རྣམས་ནི་ལྷག་ལུས་རྣམས་ཀྱི་གྲས་སུ་ཚུད་པར་འགྱུར་བས་སོ། །