1 དོན་དེར་ཡོ་ནཱ་ཤིན་ཏུ་མ་དགའ་ཞིང་ཁྲོ་བར་གྱུར་ནས། 2 དཀོན་མཆོག་ཡ་ཝཱེ་ལ་གསོལ་བ་བཏབ་པ་ནི། ཀྱེ་དཀོན་མཆོག་ཡ་ཝཱེ་ལགས། ང་རང་ཡུལ་དུ་ཡོད་དུས་འདི་ལྟར་ཞུས་པ་མ་ཡིན་ནམ། ཁྱེད་ནི་དཀོན་མཆོག་ཐུགས་རྗེ་ཅན་དང་། སྙིང་རྗེ་ཆེན་པོ་མངའ་བ། རང་དགར་ཐུགས་མི་ཁྲོ་བ། བྱམས་བརྩེ་མཐའ་ཡས་པ། བློ་ཁ་བསྒྱུར་ནས་ཆག་སྒོ་མི་མཛད་པའང་ངས་ཤེས་པས། སྔོན་ཆད་བདག་ཐཱར་ཞིས་གྲོང་ཁྱེར་དུ་བྲོས་པ་ཡིན། 3 ཀྱེ་དཀོན་མཆོག་ཡ་ཝཱེ་ལགས། ད་ནི་ང་སྲོག་དང་འབྲལ་བར་མཛོད་ཅིག འདི་ལྟར་གསོན་པ་ལས་འཆི་བ་ལེགས་སོ་ཞེས་ཞུས་པ་དང་། 4 དཀོན་མཆོག་ཡ་ཝཱེས་ཁོ་ལ། ཁྱོད་འདི་ལྟར་ཁྲོས་པར་རིགས་སམ་ཞེས་གསུངས་སོ།།

5 དེ་ནས་ཡོ་ནཱ་གྲོང་ཁྱེར་ལས་ཐོན་ཏེ་ཤར་ཕྱོགས་སུ་སོང་ནས་བསྡད་པ་དང་། གནས་དེར་སྤྱིལ་བུ་ཞིག་བཟོས་ཤིང་དེའི་བསིལ་གྲིབ་འོག་ཏུ་བསྡད་དེ། གྲོང་ཁྱེར་དེར་དོན་དག་ཅི་འབྱུང་ལ་བསྒུགས་སོ།། 6 དེ་ནས་དཀོན་མཆོག་ཡ་ཝཱེས་རྩི་ཤིང་ཞིག་ཡོ་ནཱའི་གོང་དུ་རིང་པོ་སྐྱེས་པར་མཛད་ནས། ཁོའི་མགོ་ལ་བསིལ་གདུགས་བཞིན་འཁོར་བར་བྱས་ཤིང་ཁོ་དཀའ་སྡུག་ལས་ཀྱང་ཐར་བར་མཛད། ཡོ་ནཱ་རྩི་ཤིང་དེ་ལ་རབ་ཏུ་དགའ་བར་གྱུར་ཏོ།། 7 འོན་ཀྱང་ཕྱི་ཉིན་ཐོ་རངས་དཀོན་མཆོག་གིས་འབུ་ཞིག་བཀོད་པ་དང་། འབུ་དེས་རྩི་ཤིང་བརྟོལ་ཞིང་བརྙིད་པར་བྱས་སོ།། 8 ཉི་འོད་ཤར་བ་ན་དཀོན་མཆོག་གིས་ཤར་ཕྱོགས་ནས་ཚ་རླུང་ཞིག་བརྒྱུགས་སུ་བཅུག་ནས། ཡོ་ནཱའི་མགོ་ལ་ཉི་འོད་ཕོག་སྟེ་བརྒྱལ་ལ་ཉེ་བས། ཡོ་ནཱས་ང་རང་གསོན་པ་ལས་འཆི་བ་ལེགས་སོ་ཞེས་སྨྲས་ཏེ་ཁོས་རང་ཉིད་འཆི་བར་ཞུ་བ་བྱས་སོ།།

9 དེ་ནས་དཀོན་མཆོག་གིས་ཡོ་ནཱ་ལ་འདི་སྐད་དུ། རྩི་ཤིང་དེའི་དོན་དུ་ཁོང་ཁྲོ་ལང་འོས་སམ་ཞེས་གསུངས་པ་དང་། ཁོས་ལན་དུ། འཆི་བར་འདོད་པ་ཙམ་དུ་ཁྲོ་བར་རིགས་སོ་ཞེས་ཞུས་སོ།། 10 ཡང་དཀོན་མཆོག་ཡ་ཝཱེས་ཁོ་ལ། མཚན་མོ་ཞིག་ལ་སྐྱེས་ནས་མཚན་མོ་ཞིག་ལ་བསྐམས་པ། ཁྱོད་ཀྱིས་མ་འབད་པ་དང་སྐྱེས་སུ་མ་བཅུག་པའི་རྩི་ཤིང་དེ་ལ་སྙིང་རྗེ་བསྐྱེད་ན། 11 གྲོང་ཁྱེར་ཆེན་པོ་ནིན་ཝེ་འདི་རུ་ལག་པ་གཡས་གཡོན་གྱི་དབྱེ་བའང་མི་འཁོར་བའི་མི་*ལག་པ་གཡས་གཡོན་གྱི་དབྱེ་བའང་མི་འཁོར་བའི་མི་ཞེས་པ་ནི་ནིན་ཝེ་གྲོང་ཁྱེར་གྱི་མི་རྣམས་ཀྱིས་བཟང་ངན་གྱི་དབྱེ་བ་མི་འཁོར་བ་དེ་ལ་གོ་དགོས།ཁྲི་སྐོར་བཅུ་གཉིས་ལྷག་དང་། སྒོ་ཕྱུགས་ཀྱང་མང་པོ་ཡོད་ཅིང་། ངས་དེ་རྣམས་ལ་སྙིང་རྗེ་བྱེད་པར་མི་རིགས་སམ་ཞེས་གསུངས་སོ།། །།