1 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ཉིན་དེ་ནི་མེ་འབར་བཞིན་པའི་ཁྲོ་ཐབ་དང་འདྲ་བར་སླེབ་འོང་། ང་རྒྱལ་ཅན་དང་ངན་པ་སྤྱོད་མཁན་ཐམས་ཅད་སོག་མ་ལྟ་བུར་འགྱུར་ཞིང་། སླེབ་པར་འགྱུར་བའི་ཉིན་མོ་དེས་ཁོ་རྣམས་རྩ་བ་ནས་བསྲེག་པར་འགྱུར་ལ། ཁོ་རྣམས་ལ་རྩ་བ་གཅིག་དང་ཡལ་ག་གཅིག་ཀྱང་ལུས་པར་མི་བྱའོ། ། 2 ཡིན་ནའང་ངའི་མིང་ལ་གུས་ཤིང་འཇིགས་པ་ཁྱོད་རྣམས་ལ་དྲང་བདེན་གྱི་ཉི་མ་འཆར་བ་དང་། དེའི་འོད་ལ་གསོ་བྱེད་ཀྱི་ནུས་པ་ལྡན་པས། ཁྱོད་ཅག་ནི་ལྷས་རའི་ནང་གི་བ་ཕྲུག་བཞིན་དུ་ཕྱི་རོལ་ཏུ་འོངས་ནས་མཆོང་ལྡིང་བྱེད་པར་འགྱུར་ཞེས་གསུངས་སོ། ། 3 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡང་ཁྱོད་ཅག་གིས་མི་ངན་རྣམས་ལ་རྡོག་བརྫིས་གཏོང་བ་དང་། ངས་དོན་རྣམས་སྤྱོད་པའི་ཉིན་མོར་དེ་དག་ནི་ཁྱོད་ཅག་རྐང་འོག་གི་ཐལ་བར་འགྱུར་ངེས་ཡིན། 4 ངའི་ཞབས་ཕྱི་མོ་ཤེའི་བཀའ་ཁྲིམས་ཏེ། ངས་ཧོ་རེབ་རི་བོ་ནས་ཡེས་ར་ཨེལ་པ་ཐམས་ཅད་ཀྱི་ཆེད་དུ་བསྒོས་པའི་སྒྲིག་ཁྲིམས་དང་སྒྲིག་སྲོལ་རྣམས་ནི་ཁྱོད་ཅག་གིས་གཟབ་གཟབ་བྱས་ནས་ཡིད་ལ་འཛིན་དགོས། 5 ལྟོས་དང་། དཀོན་མཆོག་ཡ་ཝཱེའི་རབ་ཏུ་ཆེ་ཞིང་འཇིགས་སུ་རུང་བའི་ཉིན་མོ་མ་སླེབས་སྔོན་ལ། ངས་ལུང་སྟོན་པ་ཨེ་ལི་ཡཱ་ཁྱོད་ཅག་གི་གམ་དུ་མངག་པར་བྱ་སྟེ། 6 ངས་གནས་འདིར་རྒོལ་ཏེ་རྩ་བ་ནས་མེད་པར་མི་བྱ་བའི་ཆེད་དུ། ཁོས་ཕ་ཡི་སེམས་བུ་ཕྲུག་གི་ཕྱོགས་དང་། བུ་ཕྲུག་གི་སེམས་ཕ་ཡི་ཕྱོགས་སུ་འཁོར་བར་བྱའོ་ཞེས་གསུངས་སོ།། །།