1 དེ་ནས་སྐྱབས་མགོན་ཡེ་ཤུ་རི་བོ་ལས་མར་བབས་ཤིང་མི་སྐོར་ཚོ་མང་པོའང་ཁོང་གི་རྗེས་སུ༌འབྲངས། 2 དེའི་དུས༌སུ། མཛེ་ནད་བྱུང་བའི་མི་ཞིག་ཁོང་གི་དྲུང་དུ་ཡོང་ནས་ཁོང་ལ་ཕྱག་བཙལ་ཏེ། གཙོ་བོ༌ལགས། ཁྱེད་ཐུགས་མཉེས་པ་ཡིན༌ན། ཁྱེད་ཀྱིས་ང་རང་གཙང་མར་མཛད་ནུས་པ་ཡིན་ཞེས་ཞུས་པ༌ན། 3 སྐྱབས་མགོན་ཡེ་ཤུས་ཕྱག་བརྐྱངས་ནས་ཁོ་ལ་རེག༌སྟེ། ང་རང་འཐད་པ༌ཡིན། ཁྱོད་རང་གཙང་མར་གྱུར་ཅིག་ཅེས་གསུངས་མ་ཐག་མི་དེའི་མཛེ་ནད་བསལ་ནས་གཙང་མར༌གྱུར། 4 ཡང་ཁོང་གིས་མི་དེ་ལ་འདི་སྐད༌དུ། ཁྱོད་ཀྱིས་གཟབ་གཟབ༌གྱིས། དོན་འདི་གཞན་སུ་ལའང་མི་སྨྲ་བར༌གྱིས། ཁྱོད་རང་ཕྱིར་སོང་ནས་རང་གི་ལུས་པོ་མཆོད་དཔོན་ལ་སྟོན༌ཅིག མི་རྣམས་ལ་བདེན་དཔང་བྱེད་པའི་ཆེད་དུ་མོ་ཤེ་ *མོ་ཤེ་ཞེས་པ་ནི་ཡ་ཧུ་དཱ་པ་རྣམས་སྔར་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཐར་བར་མཛད༌དེ། དཀོན་མཆོག་ནས་བཀའ་ཁྲིམས་ཐམས་ཅད་ཐོབ་ཅིང་ཡ་ཧུ་དཱའི་མི་རིགས་ལ་གནང་བའི་སྐྱེས་བུ་དམ་པ་ཞིག༌སྟེ། ཁོང་ནི་སྤྱི་ལོ་སྔོན་གྱི་1500ལོའི་ཡས་མས་སུ༌བཞུགས།ཡིས་བཀའ་གནང་ཡོད་པ་བཞིན་མཆོད་པ་ཕུལ་ཅིག་ཅེས་གསུངས༌སོ།།

5 དེ་ནས་སྐྱབས་མགོན་ཡེ་ཤུ་ཁོང་ཉིད་ཀཱ་ཕར་ན་ཧུམ་དུ་ཕེབས་པ༌ན། བརྒྱ་དཔོན་ཞིག་ཁོང་གི་དྲུང་དུ་ཡོང༌སྟེ། 6 གཙོ་བོ༌ལགས། བདག་གི་གཡོག་པོ་ཞ་བོར་གྱུར་ཅིང་ཁྱིམ་ནས་ཉལ་སར་ལྷུང༌སྟེ། སྡུག་བསྔལ་ཧ་ཅང་ཆེ་ཞེས་ཞུས་པ༌ལ། 7 སྐྱབས་མགོན་ཡེ་ཤུས་འདི་སྐད༌དུ། ང་རང་སོང་ནས་ཁོའི་ནད་གཞོམ་པར་བྱ་ཞེས་གསུངས་པ༌དང༌། 8 བརྒྱ་དཔོན་ན༌རེ། གཙོ་བོ༌ལགས། ཁྱེད་རང་ཕྲན་ཆུང་བདག་ལྟ་བུ་ཞིག་གི་ཁྱིམ་དུ་ཕེབས་ན་ང་རང་མི་འོས༌པས། ཁྱེད་ཀྱིས་བཀའ་ཞིག་གསུངས༌དང༌། བདག་གི་གཡོག་པོའི་ནད་བསལ་ངེས་ཡིན༌ཏེ། 9 ང་ནི་གཞན་གྱི་དབང་འོག་གི་མི་ཡིན༌ལ། ངའི་དབང་འོག་ཏུའང་དམག་མི་ཡོད༌དེ། ངས་མི་འདིར་སོང་ཞིག་ཅེས་སྨྲས་ན་ཁོ་རང་ཕར་འགྲོ་དགོས༌ཤིང༌། མི་གཞན་ལ་ཤོག་ཅིག་ཅེས་སྨྲས་ན་ཁོ་རང་ཚུར་ཡོང་བ༌ཡིན། བདག་གིས་གཡོག་པོར་ལས་ཀ་འདི་སྒྲུབས་ཤིག་ཅེས་སྨྲས་ན་ཁོས་བསྒྲུབ་པར་འགྱུར་བའི་ཕྱིར་རོ་ཞེས་ཞུས༌སོ།། 10 དེ་ནས་སྐྱབས་མགོན་ཡེ་ཤུས་གཏམ་དེ་གསན་ནས་ཡ་མཚན་སྐྱེས༌ཏེ། ཁོང་གི་རྗེས་སུ་འབྲངས་པའི་མི་རྣམས་ལ་འདི་སྐད༌དུ། བདག་གིས་ཁྱོད་རྣམས་ལ་བདེན་པར༌སྨྲའོ། །བདག་གིས་ཡེས་ར་ཨེལ་མི་རིགས་ལས་ཀྱང་འདི་འདྲའི་དད་སེམས་ཆེན་པོ་ཅན་ཞིག་མཐོང་མ༌མྱོང༌། 11 ཡང་ངས་ཁྱོད་རྣམས་ལ་སྨྲ་བར་བྱ༌སྟེ། མ་འོངས་པར་ཕྱོགས་བཞི་མཚམས་བརྒྱད་ནས་མི་གཞན་མང་པོ་ཡོང༌སྟེ། ཨབ་ར་ཧམ༌དང༌། ཨི༌སཱག ཡ་ཀོབ་བཅས་དང་མཉམ་དུ་ནམ་མཁའི་རྒྱལ་སྲིད་དུ་གསོལ་སྟོན་ལ་ཞུགས་པར༌འགྱུར། 12 འོན༌ཀྱང༌། རྒྱལ་སྲིད་འདིའི་བུ་རྣམས་ནི་སྒོའི་ཕྱི་རོལ་གྱི་མུན་ནག་ནང་དུ་ཕུད༌ཅིང༌། གནས་དེ་རུ་ངུ་འབོད་བྱས་ནས་ཨམ་གཙིགས་བསྡམ་པར་འགྱུར་ཞེས་གསུངས༌སོ།། 13 ཡང་ཁོང་གིས་བརྒྱ་དཔོན་ལ་འདི་སྐད༌དུ། ཁྱོད་རང་ཕྱིར་སོང༌དང༌། ཁྱོད་ཀྱི་དད་པ་བཞིན་དུ་འགྲུབ་པར་འགྱུར་ཞེས་གསུངས་པ༌དང༌། དེའི་དུས་སུ་གཡོག་པོ་དེའང་ནད་ལས་ཐར༌རོ།།

14 དེ་ནས་སྐྱབས་མགོན་ཡེ་ཤུ་ཁོང་ཉིད་པེ་ཏྲོའི་ཁྱིམ་དུ་ཕེབས་པ༌ན། པེ་ཏྲོའི་སྒྱུག་མོར་ཚ་བརྒྱབ་སྟེ་ཉལ་ནས་བསྡད་ཡོད་པ༌གཟིགས། 15 ཁོང་གིས་ཁོ་མོའི་ལག་པར་རེག་པ་དང་ཚ་བཞག༌ཅིང༌། ཁོ་མོ་ཡར་ལངས་ནས་ཁོང་ལ་ཞབས་ཕྱི་བྱས༌སོ།། 16 ཉིན་དེའི་མཚན༌མོར། མི་རྣམས་ཀྱིས་གདོན་འདྲེས་བཟུང་བའི་མི་མང་པོ་ཁོང་གི་དྲུང་དུ་ཁྲིད་ཡོང་བ༌དང༌། ཁོང་གིས་བཀའ་གནང་སྟེ་གདོན་འདྲེ་རྣམས་ཕར་བསྐྲད་ཅིང་ནད་པ་ཐམས་ཅད་གསོས༌པའོ།། 17 དེ་ལ་ལུང་སྟོན་པ་ཡེ་ཤ་ཡཱ་ཡི་མདོ་ལས་ཇི་སྐད༌དུ།

18 དེ་ནས་སྐྱབས་མགོན་ཡེ་ཤུས་མི་མང་པོས་རང་ཉིད་བསྐོར་བ་གཟིགས་ཏེ་མཚོའི་ཕ་རོལ་ཏུ་འགྲོའོ་ཞེས་བཀའ་གནང་བ༌དང༌། 19 དེའི་དུས༌སུ། མཁན་པོ་ཞིག་ཁོང་གི་དྲུང་དུ་ཡོང༌སྟེ། སློབ་དཔོན༌ལགས། ཁྱེད་རང་གང་དུ་ཕེབས་ནའང་ང་རང་ཁྱེད་ཀྱི་རྗེས་སུ་འབྲང་ངོ་ཞེས་ཞུས་པ༌ན། 20 སྐྱབས་མགོན་ཡེ་ཤུས་འདི་སྐད༌དུ། ཝ་ལ་ཁུང་བུ་དང་ནམ་མཁའི་བྱ་ལའང་ཚང་ཡོད༌ཀྱང༌། མིའི་བུ་ལ་མགོ་སྔས་ས་ཙམ་ཡང་མེད་ཅེས་གསུངས༌སོ།། 21 ཡང་རྗེས་འབྲང་པ་རྣམས་ལས་མི་ཞིག་ན༌རེ། གཙོ་བོ༌ལགས། ང་རང་ཐོག་མར་རང་ཡུལ་དུ་ཕ་དུར་ལ་སྦ་རུ་འགྲོ་བར་མཛོད་ †ཕ་དུར་ལ་སྦ་རུ་འགྲོ་བར་མཛོད་ཅེས་པ་ལ་འགྲེལ་ཚུལ་དུ་མ༌ཡོད། མདོར་བསྡུས༌ན། ཕ་འཆི་རག་བར་དུ་བདག་སྐྱོང་བྱེད་དུ་འགྲོ་བར་མཛོད་ཅེས་པ༌སྟེ། དོན་གྱིས་མྱུར་བ་མྱུར་དུ་སྐྱབས་མགོན་ཡེ་ཤུའི་རྗེས་སུ་འབྲང་མ་འདོད་པ༌མཚོན། ཅེས་ཞུས་པ༌ལ། 22 སྐྱབས་མགོན་ཡེ་ཤུས་འདི་སྐད༌དུ། བེམ་པོ་དང་འདྲ་བའི་མི་དག་ལ་རང་གི་བེམ་པོ་དུར་དུ་སྦ་བར་གྱིས༌ཤིག ཁྱོད་རང་བདག་གི་རྗེས་སུ་འབྲང་བར་གྱིས་ཞེས་གསུངས༌སོ།།

23 དེ་ནས་སྐྱབས་མགོན་ཡེ་ཤུ་མཚོ་གྲུར་བཞུགས་ཤིང་ཐུགས་སྲས་རྣམས་ཀྱང་ཁོང་གི་རྗེས་སུ༌འབྲངས། 24 གློ་བུར་ཉིད་ལ་རླུང་ཆེན་གཡུགས་ཏེ་མཚོའི་རྦ་རླབས་ཀྱིས་མཚོ་གྲུ་བཀབ་ནའང་ཁོང་ཉིད་གཟིམས་འདུག༌གོ། 25 ཐུགས་སྲས་རྣམས་ཀྱིས་ཁོང་གཟིམས་ལས་བསླངས༌ཏེ། གཙོ་བོ༌ལགས། བདག་ཅག་འཆི་ལ་ཉེ་བས་སྐྱོབ་པར་མཛོད་ཅེས་ཞུས་པ༌ལ། 26 ཁོང་གིས་དེ་རྣམས་ལ་འདི་སྐད༌དུ། དད་པ་ཆུང་བ་ཁྱོད་རྣམས་ཅིའི་ཕྱིར་སྐྲག་གམ་ཞེས་གསུངས་ནས་ཡར་བཞེངས༌ཏེ། རླུང་དང་མཚོ་ལ་བཀའ་བཀྱོན་མཛད་པ༌ན། རླུང་དང་མཚོའང་ཡོངས་སུ་ཞི་བར༌གྱུར། 27 ཐུགས་སྲས་རྣམས་དོན་དེར་ངོ་མཚར་སྐྱེས༌ཏེ། རླུང་དང་མཚོ་ཡིས་ཀྱང་ཁོང་གི་བཀའ་ལ་མཉན་པས་མི་འདི་ནི་ཅི་ལྟ་བུ་ཞིག་ཡིན་ནམ་ཞེས་སྨྲས༌སོ།།

28 སྐྱབས་མགོན་ཡེ་ཤུ་མཚོའི་ཕ་རོལ་གྱི་གེ་ར་སཱ་ཡུལ་དུ་ཕེབས་པ༌ན། གདོན་འདྲེས་བཟུང་བའི་མི་གཉིས་དུར་ཁྲོད་ནས་ཐོན་ཏེ་ཁོང་ལ༌མཇལ། མི་དེ་གཉིས་ནི་ཤིན་ཏུ་གཏུམ་དྲག་ཆེ༌བས། ཐ་ན་མི་སུ་ཡང་ལམ་དེ་བརྒྱུད་ནས་འགྲོ་མི༌ཕོད། 29 དེ་གཉིས་ཀྱིས་སྐད་ཆེན༌པོས། ཀྱེ། དཀོན་མཆོག་གི༌སྲས། ཁྱེད་རང་ངེད་གཉིས་དང་འབྲེལ་བ་ཅི་མཆིས༌སམ། དུས་དེ་ད་དུང་མ་སླེབས་པས། ཁྱེད་ཉིད་འདིར་ཕེབས་ནས་ངེད་གཉིས་སྡུག་ལ་སྦྱོར་རམ་ཞེས༌སྨྲས། 30 དེ་རྣམས་དང་རྒྱང་ཐག་རིང་བའི་ས་རུ་ཕག་ཁྱུ་ཆེན་པོ་ཞིག་འཚོ་བཞིན་ཡོད༌ལ། 31 གདོན་འདྲེ་དག་གིས་སྐྱབས་མགོན་ཡེ་ཤུ་ལ་འདི་ལྟར་སྨྲས༌པ། གལ༌ཏེ། ཁྱེད་ཀྱིས་ངེད་རྣམས་ཕར་སྐྲོད༌ན། ཕག་ཁྱུའི་ནང་དུ་འཇུག་པར་མཛོད་ཅེས་ཞུ་བ་ཞུས་པ༌དང༌། 32 སྐྱབས་མགོན་ཡེ་ཤུས་གདོན་འདྲེ་དེ་རྣམས་ལ་སོང་ཞིག་ཅེས་བཀའ་གནང༌བས། གདོན་འདྲེ་དེ་དག་ཕྱི་རུ་ཐོན་ཏེ་ཕག་ཁྱུའི་ནང་དུ་ཞུགས་པ༌དང༌། ཕག་ཐམས་ཅད་གཡང་གཟར་ནས་བརྒྱུགས་ཤིང་མཚོ་ནང་དུ་ལྷུང་སྟེ་ནུབ་ནས༌ཤིའོ།། 33 དེ་ནས་ཕག་རྫི་རྣམས་བྲོས་ནས་གྲོང་ཁྱེར་དུ་སོང༌སྟེ། དོན་དེ་ཐམས་ཅད་དང་གདོན་འདྲེས་བཟུང་བའི་མི་གཉིས་ལ་ཅི་ཞིག་བྱུང་བ་མི་རྣམས་ལ་སྨྲས་པ༌དང༌། 34 གྲོང་ཁྱེར་དེའི་མི་ཐམས་ཅད་སྐྱབས་མགོན་ཡེ་ཤུ་འཚོལ་དུ་སོང༌སྟེ། ཁོང་མཐོང་ནས་ཁོ་རྣམས་ཀྱི་ཡུལ་དང་འབྲལ་དགོས་པར་ཞུ་བ་བྱས༌སོ།།