1 དེ་ནས་ཡང་སྐྱབས་མགོན་ཡེ་ཤུས་ཁོ་རྣམས་ལ་འདི་སྐད༌དུ། ངས་ཁྱོད་རྣམས་ལ་བདེན་པར་སྨྲ༌སྟེ། འདི་རུ་སྡོད་པའི་མི་རྣམས་ལས་འགའ་ཞིག་གིས་འཆི་བ་དངོས་སུ་མ་མྱོང་བའི་སྔོན༌དུ། དཀོན་མཆོག་གི་རྒྱལ་སྲིད་མཐུ་སྟོབས་དང་ལྡན་པའི་སྒོ་ནས་སླེབ་ཡོང་བ་མཐོང་བར་ངེས་ཞེས་གསུངས༌སོ།།

2 དེ་ནས་ཉིན་དྲུག་འགོར་བ༌དང༌། སྐྱབས་མགོན་ཡེ་ཤུས་པེ་ཏྲོ༌དང༌། ཡ༌ཀོབ། ཡོ་ཧ་ནན་བཅས་ཁྲིད་ནས་རི་མཐོན་པོ་ཞིག་ཏུ་ཕེབས་པ༌དང༌། ཁོ་རྣམས་ཀྱི་མདུན་དུ་ཁོང་གི་རྣམ་པ་འགྱུར༌ཏེ། 3 ན་བཟའ་ནི་འོད་འཕྲོ་ཞིང་ཤིན་ཏུ་དཀར་བ་འཇིག་རྟེན་དུ་འཁྲུད་མཁན་སུས་ཀྱང་དེ་ལྟར་དཀར་པོ་བྱེད་མི་ཐུབ་པ་ཙམ་དུ་གྱུར༌ཏོ།། 4 དེའི༌ཚེ། ཨེ་ལི་ཡཱ་དང་མོ་ཤེ་གཉིས་མངོན་སུམ་དུ་བྱུང་ནས་སྐྱབས་མགོན་ཡེ་ཤུ་དང་གསུང་མོལ་མཛད༌དོ།། 5-6 དེ་ནས་ཐུགས་སྲས་གསུམ་པོ་ཤིན་ཏུ་འཇིགས་ཏེ་པེ་ཏྲོས་ཅི་ལྟར་ཞུ་དགོས་པའང་མ་ཤེས༌པས། ཁོ་ན༌རེ། རཱབ་པེ༌ལགས། བདག་ཅག་འདི་རུ་བསྡད་ན་དངོས་གནས་ལེགས་པོ༌འདུག གུར་གསུམ་ཡང་བཟོ་བར་བྱ༌སྟེ། ཁྱེད་ལ་གཅིག་དང་མོ་ཤེ་ལ༌གཅིག ཨེ་ལི་ཡཱ་ལའང་གཅིག་ཅེས་ཞུས༌སོ།། 7 དེ་ནས་སྤྲིན་ཕུང་ཞིག་གིས་ཁོང་རྣམས་བསྒྲིབས་པ་དང་དེའི་ཁྲོད་ནས་སྐད་སྒྲ་ཞིག་གྲགས༌ཏེ། འདི་ནི་བདག་གི་གཅེས་པའི་བུ་ཡིན༌ཞིང༌། ཁྱོད་ཅག་གིས་ཁོའི་གཏམ་ལ་ཉོན་ཅིག་ཅེས༌གསུངས། 8 ཐུགས་སྲས་རྣམས་ཀྱིས་མྱུར་དུ་མཐའ་འཁོར་ལ་བལྟས་པ༌ན། སྐྱབས་མགོན་ཡེ་ཤུ་གཅིག་པུ་ཁོ་རྣམས་དང་མཉམ་དུ་བཞུགས་པ་ལས་ཅི་ཡང་མ་མཐོང༌ངོ༌།། 9 དེ་ནས་ཁོང་རྣམས་རི་བོ་ལས་མར་ཕེབས་པའི་དུས༌སུ། སྐྱབས་མགོན་ཡེ་ཤུས་འདི་སྐད༌དུ། མིའི་བུ་ད་དུང་འཆི་བ་ལས་སླར་གསོན་པའི་བར་དུ་ཁྱོད་ཅག་གིས་ཅི་མཐོང་བ་དེ་གཞན་སུ་ལའང་མི་སྨྲ་བར་གྱིས་ཞེས་བཀའ་བསྒོས༌སོ།། 10 ཐུགས་སྲས་རྣམས་ཀྱིས་གསུང་དེ་ཡིད་ལ་བཟུང༌ཞིང༌། འཆི་བ་ལས་སླར་གསོན་ཞེས་གསུངས་པའི་དོན་ཅི་ཡིན་ཕན་ཚུན་གླེང༌མོལ་བྱས། 11 ཁོ་རྣམས་ན༌རེ། མཁན་པོ་རྣམས་ཀྱིས་ཨེ་ལི་ཡཱ་སྔོན་དུ་འབྱོན་ངེས་ཡིན་ཞེས་ཟེར་དོན་ཅི་ཞུས་པ༌ལ། 12 ཁོང་གིས་འདི་སྐད༌དུ། ཨེ་ལི་ཡཱ་དངོས་སུ་སྔོན་ལ་བྱོན་ཏེ་ཐམས་ཅད་བསྐྱར་དར་བྱ་བར༌ངེས། གསུང་རབ་ཀྱི་མདོ༌ལས། མིའི་བུ་ཡི་སྐོར་ལ་ཇི་ལྟར་གསུངས་ཡོད་ཅེ༌ན། ཁོང་གིས་སྡུག་བསྔལ་མང་པོ་མྱང་བར་འགྱུར་ཞིང་མི་རྣམས་ཀྱིས་མཐོང་ཆུང་བྱེད་ངེས་ཡིན་ཞེས་བསྟན་ཡོད་པ་མ་ཡིན༌ནམ། 13 འོན༌ཀྱང༌། བདག་གིས་ཁྱོད་རྣམས་ལ་སྨྲས་པ་ནི་གསུང་རབ་ཀྱི་མདོ་ལས་ཨེ་ལི་ཡཱའི་སྐོར་བཀོད་ཡོད་པ་ལྟར་ཁོང་ཉིད་བྱོན་ཟིན༌ལ། མི་རྣམས་ཀྱིས་ཁོང་ལ་ཅི་འདོད་བཞིན་བྱས་པ་ཡིན་ཞེས་གསུངས༌སོ།།

14 དེ་ནས་ཁོང་རྣམས་ཐུགས་སྲས་གཞན་རྣམས་ཀྱི་གམ་དུ་ཕེབས་པ༌ན། མི་ཤིན་ཏུ་མང་པོས་ཐུགས་སྲས་གཞན་རྣམས་ཀྱི་མཐའ་བསྐོར༌ཞིང༌། ཡང་མཁན་པོ་འགའ་ཞིག་གིས་ཁོ་རྣམས་དང་རྩོད་གླེང་བྱེད་བཞིན་པ་གཟིགས༌སོ།། 15 དེ་ནས་མི་ཚོགས་ཀྱིས་སྐྱབས་མགོན་ཡེ་ཤུ་མཐོང་མ་ཐག་ཐམས་ཅད་ངོ་མཚར་བ་དང་ཁོང་གི་དྲུང་དུ་བརྒྱུགས་ཡོང་ནས་ཁོང་ལ་མཇལ༌ཏོ།། 16 དེ་ནས་སྐྱབས་མགོན་ཡེ་ཤུས་མི་དེ་རྣམས་ལ་འདི་སྐད༌དུ། ཁྱོད་ཅག་གིས་ཅི་ཞིག་རྩོད་བཞིན་ཡོད་དམ་ཞེས་དྲིས་པ༌ལ། 17 མི་ཚོགས་ཀྱི་ཁྲོད་ནས་མི་ཞིག་ན༌རེ། སློབ་དཔོན༌ལགས། ངས་རང་གི་བུ་ཁྱེད་ཀྱི་དྲུང་དུ་ཁྲིད་ཡོང་བ༌ཡིན། ངའི་བུ་ནི་གདོན་འདྲེ་ཞིག་གིས་བཟུང་སྟེ་ལྐུགས་པར་གྱུར༌ཅིང༌། 18 གང་ས་གང་དུའང་གདོན་འདྲེས་བཟུང༌ཚེ། བུ་ས་ལ་སྒྱེལ་ཞིང་ཁ་ནས་ལྦུ་བ་བཞུར་བ༌དང༌། སོ་འཆའ་ཞིང་ལུས་པོའང་རེངས་པོར་འགྱུར༌བས། ངས་ཁྱེད་ཀྱི་ཐུགས་སྲས་རྣམས་ལ་གདོན་འདྲེ་ཕྱིར་སྐྲོད་པར་ཞུས་ཀྱང་ཁོ་རྣམས་ཀྱིས་སྐྲོད་མ་ནུས་ཞེས་ཞུས༌སོ།། 19 དེ་ནས་སྐྱབས་མགོན་ཡེ་ཤུས་འདི་སྐད༌དུ། ཀྱེ། དད་པ་མེད་པའི་མི་རབས༌འདི། བདག་ནི་ཁྱོད་ཅག་དང་མཉམ་དུ་དུས་ནམ་ཞིག་གི་བར་དུ་སྡོད་དགོས༌སམ། ངས་དུས་ནམ་ཞིག་གི་བར་དུ་ཁྱོད་ཅག་ལ་བཟོད་བསྲན་བྱེད་དགོས༌སམ། བུ་དེ་བདག་གི་མདུན་དུ་ཁྲིད་ཤོག་ཅེས་གསུངས་པ༌དང༌། 20 མི་རྣམས་ཀྱིས་བུ་དེ་ཁོང་གི་དྲུང་དུ་ཁྲིད་ཡོང་བ༌དང༌། གདོན་འདྲེ་དེས་སྐྱབས་མགོན་ཡེ་ཤུ་མཐོང་མ་ཐག་བུ་དྲག་ཏུ་སྤྲུགས༌པས། བུ་ས་ལ་འགྱེལ་ཞིང་འགྲེ་ལྡོག་བརྒྱབ་པ་དང་ཁ་ནས་ལྦུ་བ་བཞུར༌ཏོ།། 21 དེ་ནས་སྐྱབས་མགོན་ཡེ་ཤུས་བུ་དེའི་ཕ་ལ་དུས་ནམ་ཞིག་ཏུ་འདི་ལྟ་བུར་གྱུར་ཏམ་ཞེས་དྲིས་པ༌ལ། ཕ་ན༌རེ། ཁོ་ཆུང་དུས་ནས་བཟུང་འདི་ལྟར༌ཡིན། 22 གདོན་འདྲེ་དེས་ངའི་བུ་གསོད་པའི་ཆེད་དུ་ཐེངས་མང་པོར་མེ་དང་ཆུའི་ནང་དུ་འཕངས༌མྱོང༌། ཁྱེད་ཀྱིས་ཅི་ཞིག་མཛད་ནུས༌ན། ངེད་ཅག་ལ་སྙིང་རྗེ་གནང་ཞིང་སྐྱབས་སུ་འཛིན་པར་མཛོད་ཅེས་ཞུས་པ༌དང༌། 23 སྐྱབས་མགོན་ཡེ་ཤུས་འདི་སྐད༌དུ། ཅི་ཞིག་མཛད་ནུས་ན་ཟེར༌རམ། སུས་ཀྱང་དད་པ་བྱས་ན་དོན་ཐམས་ཅད་འགྲུབ་སྲིད་ཅེས་གསུངས༌སོ།། 24 བུའི་ཕ་ཡིས་དེ་མ་ཐག་སྐད་ཆེན༌པོས། ངས་དད་པ༌བྱེད། འོན་ཀྱང་ངའི་དད་པ་མི་འདང་བས་རོགས་རམ་མཛོད་ཅིག་ཅེས་ཞུས་པ༌ལ། 25 སྐྱབས་མགོན་ཡེ་ཤུས་མི་ཚོགས་ཐམས་ཅད་རྒྱུག་ཡོང་བ་གཟིགས་པ་དང་གདོན་འདྲེ་ལ་འདི་སྐད་བཀའ་བཀྱོན་གནང་བ༌སྟེ། འོན་ཞིང་ལྐུགས་པའི་གདོན་འདྲེ༌ཁྱོད། ཁོའི་ལུས་ནས་ཕྱིར་བུད༌ཅིག ཕྱིན་ཆད་བུ་དེའི་ལུས་ལ་ཕྱིར་མ་ལོག་ཅིག་ཅེས་བཀའ་བབས་པ་ཡིན་ཞེས་གསུངས༌སོ།། 26 དེ་ནས་གདོན་འདྲེས་འུར་བརྒྱབ་ཅིང་བུ་འདར་དུ་བཅུག་ནས་ཕྱི་རུ་ཐོན་པ༌ན། བུ་བེམ་པོ་ལྟར་གྱུར་པས་མི་མང་ཤོས་ཀྱིས་བུ་དེ་ཤི་ཟིན་ཞེས་སྨྲས༌སོ།། 27 འོན་ཀྱང་སྐྱབས་མགོན་ཡེ་ཤུས་བུའི་ལག་པར་འཇུས་ཏེ་བསྐྱོར་བ་ན་བུའང་ཡར༌ལངས། 28 དེ་ནས་སྐྱབས་མགོན་ཡེ་ཤུ་ཁང་པའི་ནང་དུ་ཕེབས་ཤིང་ཟུར་ནས་ཐུགས་སྲས་རྣམས་ན༌རེ། ངེད་ཅག་གིས་ཅིའི་ཕྱིར་གདོན་འདྲེ་དེ་ཕྱིར་བསྐྲོད་མ་ནུས་ཞེས་ཞུས་པ༌ལ། 29 ཁོང་གིས་འདི་སྐད༌དུ། གདོན་འདྲེ་འདིའི་རིགས་གསོལ་བ་འདེབས་པ་ལས་གཞན་ཐབས་གང་གིས་ཀྱང་ཕྱི་རུ་ཕུད་མི་ནུས་ཞེས་གསུངས༌སོ།། *ཚིག་རྐང་ཉེར་དགུ་པ་ལྟ་བུ་ནི་དམ་པའི་གསུང་རབ་ཀྱི་མ་ཕྱི་ལ་ལར་དཀོན་མཆོག་ལ་གསོལ་བ་འདེབས་པ་དང་སྨྱུང་གནས་སྲུང་བ་ལས་གཞན་ཐབས་གང་གིས་ཀྱང་འདྲེ་དེའི་རིགས་ཕྱིར་བསྐྲོད་མི་ནུས་ཞེས་ཀྱང༌འབྱུང༌།

30 དེ་ནས་ཁོང་རྣམས་ལམ་ལ་ཆས་ཤིང་ག་ལིལ་ཡུལ་བརྒྱུད་ནས་ཕེབས་པ༌དང༌། སྐྱབས་མགོན་ཡེ་ཤུས་དོན་དེ་མི་གཞན་ལ་ཤེས་སུ་མི་འཇུག་པར་དགོངས༌ཏེ། 31 ཐུགས་སྲས་རྣམས་ལ་འདི་སྐད༌དུ། མིའི་བུ་མི་རྣམས་ཀྱི་ལག་ཏུ་སྤྲོད༌ཅིང༌། དེ་དག་གིས་ཁོ་རང་གསོད་པར་འགྱུར༌ལ། བསད་ནས་ཉིན་གསུམ་གྱི་རྗེས་སུ་ཁོ་རང་སླར་གསོན་པར་ངེས་ཞེས་གདམས༌སོ།། 32 ཐུགས་སྲས་རྣམས་ཀྱིས་གསུང་དེའི་དོན་མ་རྟོགས་ཀྱང་ཁོང་ལ་དྲི་བ་འདོན་མ་ཕོད༌དོ།།

33 དེ་ནས་ཁོང་རྣམས་ཀཱ་ཕར་ན་ཧུམ་དུ་སླེབས་པ་དང་སྐྱབས་མགོན་ཡེ་ཤུ་ཁང་པའི་ནང་དུ་བཞུགས་པའི་ཚེ་ཐུགས་སྲས་རྣམས་ལ་འདི་སྐད༌དུ། ཁྱོད་ཅག་གིས་ལམ་བར་ནས་ཅི་ཞིག་གླེང་བ་ཡིན་ཞེས༌དྲིས། 34 ཁོ་རྣམས་ཀྱིས་ལམ་བར་དུ་ཁོ་རྣམས་ལས་སུ་ཞིག་མཆོག་ཏུ་གྱུར་པ་ཡིན་པར་རྩོད་གླེང་བྱས་པས་སུས་ཀྱང་ཁ་མ་གྲགས༌སོ།། 35 ཁོང་ཉིད་མར་བཞུགས་རྗེས་ཐུགས་སྲས་བཅུ་གཉིས་པོ་བོས་ཏེ་འདི་སྐད༌དུ། སུ་ཞིག་གིས་རང་ཉིད་མཆོག་གྱུར་ཡིན་པར་འདོད༌ན། དེ་ནི་མི་ཐམས་ཅད་ཀྱི་མཐའ་མ་དང་མི་ཀུན་ལ་ཞབས་ཕྱི་སྒྲུབ་མཁན་ཏུ་འགྱུར་དགོས་པ་ཡིན་ཞེས་གསུངས༌ཤིང༌། 36 དེ་ནས་ཁོང་གིས་བྱིས་པ་ཆུང་ངུ་ཞིག་ཁྲིད་ཡོང་སྟེ་ཁོ་རྣམས་ཀྱི་དཀྱིལ་ནས་སྡོད་དུ་བཅུག་པ༌དང༌། ཡང་བྱིས་པ་དེ་ཁོང་གི་པང་དུ་བཟུང་སྟེ་འདི་སྐད༌དུ། 37 སུ་ཞིག་གིས་ངའི་མིང་གི་ཕྱིར་འདི་འདྲའི་བྱིས་པ་ཆུང་ངུ་ཞིག་ལ་བསུ་བ་བྱས༌ན། དོན་དམ་དུ་བདག་ལ་བསུ་བ་བྱས་པ༌ཡིན། ཡང་སུ་ཞིག་གིས་ང་རང་ལ་བསུ་བ་བྱས་པ་ཡིན༌ན། དོན་དམ་དུ་ང་རང་ལ་བསུ་བ་བྱས་པ་མ་ཡིན་པར་ང་རང་མངགས་མཁན་ཁོང་ལ་བསུ་བ་བྱས་པ་ཡིན་ཞེས་གསུངས༌སོ།།

38 དེ་ནས་ཡོ་ཧ་ནན་ན༌རེ། སློབ་དཔོན༌ལགས། མི་གཞན་ཞིག་གིས་ཁྱེད་ཀྱི་མཚན་ལ་བརྟེན་ནས་གདོན་འདྲེ་སྐྲོད་བཞིན་པ་ངེད་རྣམས་ཀྱིས་མཐོང་བྱུང༌ངོ༌། །འོན་ཀྱང་མི་དེ་ནི་བདག་ཅག་གི་རྗེས་སུ་མི་འབྲང༌བས། ངེད་རྣམས་ཀྱིས་དོན་དེ་ལྟར་བྱེད་པ་བཀག་པ་ཡིན་ཞེས་ཞུས་པ༌ལ། 39 སྐྱབས་མགོན་ཡེ་ཤུས་འདི་སྐད༌དུ། མི་གཞན་གྱིས་བདག་གི་མིང་ལ་བརྟེན་ནས་དོན་ངོ་མཚར་ཅན་བྱས༌རྗེས། མྱུར་དུ་བདག་ལ་ཚིག་ངན་སྨྲ་བར་མི་ནུས་པས་ཁོ་རང་མ་འགོག༌ཅིག 40 བདག་ཅག་དགྲ་རུ་མི་འཛིན་པ་དེ་ནི་བདག་ཅག་གི་ཕྱོགས༌ཡིན། 41 ངས་ཁྱོད་རྣམས་ལ་བདེན་པར་སྨྲ༌སྟེ། སུ་ཞིག་གིས་ཁྱོད་ཅག་ནི་མཱ་ཤི་ཀ་ལ་གཏོགས་པའི་མི་ཡིན་པའི༌ཕྱིར། ཁྱོད་རྣམས་ལ་ཆུ་ཕོར་བ་གང་བྱིན་ནའང་མི་དེའི་བྱ་དགའ་ཅི་ནས་ཀྱང་སྟོང་བར་མི་འགྱུར་ཞེས་གསུངས༌སོ།།

42 དེ་ནས་སྐྱབས་མགོན་ཡེ་ཤུས་འདི་སྐད༌དུ། སུ་ཞིག་གིས་བདག་ལ་དད་པའི་བྱིས་པ་ཆུང་ངུ་འདི་རྣམས་ལས་གཅིག་ལ་སྡིག་པ་བྱེད་དུ་འཇུག་པ༌ལས། མི་དེའི་སྐེ་ལ་རང་འཐག་གི་རྡོ་ཆེན་པོ་ཞིག་བཏགས་ནས་རྒྱ་མཚོའི་ནང་དུ་འཕངས་ན་ལེགས༌སོ།། 43 གལ་ཏེ་ཁྱོད་ཀྱི་ལག་པས་ཁྱོད་ལ་སྡིག་པ་བྱེད་དུ་འཇུག༌ན། ལག་པ་དེ་ཆོད༌ཅིག ཁྱོད་རང་ལག་པ་གཉིས་དང་ལྡན་པར་ནམ་ཡང་ཞི་བ་མེད་པའི་དམྱལ་བའི་གནས་ཀྱི་མེ་རུ་འཇུག་པ༌ལས། ལག་རྡུམ་དུ་གྱུར་ཀྱང་མཐའ་མེད་པའི་ཚེ་སྲོག་ཐོབ་པ་དེ་ལེགས༌སོ།། 44 དམྱལ་བའི་གནས་སུའང་མི་དེ་དག་ཟ་བའི་འབུ་མི་འཆི་ལ་མེ་ཡང་མི༌ཞིའོ།། 45 གལ་ཏེ་ཁྱོད་ཀྱི་རྐང་པས་ཁྱོད་ལ་སྡིག་པ་བྱེད་དུ་འཇུག༌ན། རྐང་པ་དེ་ཆོད༌ཅིག ཁྱོད་རང་རྐང་པ་གཉིས་དང་ལྡན་པར་དམྱལ་བའི་གནས་སུ་གཡུག་པ༌ལས། གྱོལ་པོར་གྱུར་ཀྱང་མཐའ་མེད་པའི་ཚེ་སྲོག་ཐོབ་པ་དེ་ལེགས༌སོ།། 46 དམྱལ་བའི་གནས་སུའང་མི་དེ་དག་ཟ་བའི་འབུ་མི་འཆི་ལ་མེ་ཡང་མི༌ཞིའོ།། 47 གལ་ཏེ་ཁྱོད་ཀྱི་མིག་གིས་ཁྱོད་ལ་སྡིག་པ་བྱེད་དུ་འཇུག༌ན། མིག་དེ་བཏོན་ནས་དོར༌ཅིག ཁྱོད་རང་མིག་ཟུང་དང་ལྡན་པར་དམྱལ་བའི་གནས་སུ་གཡུག་པ༌ལས། མིག་ཡ་གཅིག་མེད་ནའང་དཀོན་མཆོག་གི་རྒྱལ་སྲིད་དུ་ཞུགས་པ་དེ་ལེགས༌སོ།། 48 དམྱལ་བའི་གནས་སུའང་མི་དེ་དག་ཟ་བའི་འབུ་མི་འཆི་ལ་མེ་ཡང་མི༌ཞིའོ།། 49 རྒྱུ་མཚན་ནི་མི་རེ་རེ་ལ་མེ་ནི་ལན་ཚྭ་བཞིན་དུ་འདེབས་པར༌འགྱུར།†ཚིག་རྐང་ཞེ་དགུ་ལ་གོ་བ་ལེན་ཚུལ་གཉིས་ཡོད༌དེ། གཅིག་ནི་ཡེ་ཤུའི་ཆོས་ལས་དམྱལ་བའི་གནས་སུ་ལྷུང་བ་རྣམས་ལ་མེ་ཡི་ཉེས་ཆད་ཆེན་པོ་གཅོད་ངེས་པས་སྡུག་བསྔལ་ཤིན་ཏུ༌ཆེ། གཞན་ཞིག་ནི་ཡེ་ཤུའི་ཆོས་ཀྱི་དད་ལྡན་དང་རྗེས་འབྲང་པ་ཞིག་ཡིན༌ན། མི་ཚེ་འདིའི་ནང་དུ་མེ་ཡིས་བསྲེགས་པ་ལྟ་བུའི་སྡུག་བསྔལ་མྱངས་ཏེ། སྐྱབས་མགོན་ཡེ་ཤུ་བཞིན་དུ་རྣམ་པར་དག་ཅིང་གཙང་མར་འགྱུར་ཞེས་པའི་དོན༌ཡིན། 50 སྤྱིར་ལན་ཚྭ་ནི་ལེགས་ཀྱང་ལན་ཚྭའི་བྲོ་བ་ཡལ༌ན། དེའི་བྲོ་བ་གང་གིས་བསྐྱེད༌དམ། ཁྱོད་ཅག་གི་ཁྲོད་དུའང་ཚྭ་ཡོད་པ་ལྟར་གྱུར༌ནས། ཕན་ཚུན་འགྲིག་མཐུན་ངང་གནས་པར་གྱིས་ཤིག་ཅེས་གསུངས༌སོ།།