1 མི་ཁྲག་བཞུར་དུ་བཅུག་པའི་གྲོང་ཁྱེར་འདི་ལ་ཆག་སྒོ་འབྱུང་བ་ཡིན། གྲོང་ཁྱེར་ཡོངས་ཀྱིས་མགོ་གཡོག་མགོ་སྐོར་གཏོང་ཞིང་གདུག་རྩུབ་ཀྱིས་ཁེངས་པ་དང་། འཕྲོག་བཅོམ་བྱེད་པའི་དོན་ནི་ནམ་ཡང་མཚམས་མ་ཆད། 2 རྟ་ལྕག་གི་སྒྲ་དང་འཁོར་ལོའི་སྒྲ་ནི་ཆེ་ཞིང་། རྟ་མཆོག་བང་གིས་རྒྱུག་པ་དང་ཤིང་རྟ་རྣམས་ལང་ལོང་གིས་རྒྱུག 3 རྟ་དམག་རྣམས་གདོང་མཆོང་བྱེད་པ་དང་། རལ་གྲིའི་འོད་ནི་ཆེམ་ཆེམ་དུ་འཕྲོ་ཞིང་། མདའ་དང་མདུང་ལས་འོད་འཕྲོས་ནས་མི་ཤིན་ཏུ་མང་པོ་བསད་དེ་མི་རོ་ཕུང་ཆེན་སྤུངས་ཡོད་ལ། མི་རོ་བགྲང་ལས་འདས་པས་མི་རྣམས་དེར་ཐོགས་ནས་སར་འགྱེལ་བ་སྟེ། 4 དེ་ནི་བྱད་གཟུགས་མཛེས་པའི་སྨད་འཚོང་མ་མང་པོས་ལོག་གཡེམ་བྱས་ཤིང་སྒྱུ་འཕྲུལ་སྟོན་པར་གོམས་ཡོད། དེས་གཡེམ་སྤྱོད་ལ་བརྟེན་ནས་མི་རིགས་ཀུན་བསླུས་ཤིང་སྒྱུ་འཕྲུལ་ལ་བརྟེན་ནས་མི་སྡེ་ཀུན་བྲན་དུ་བཀོལ་བས་སོ། ། 5 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ལ་རྒོལ་བར་འགྱུར་ཞིང་། ངས་ཁྱོད་ཀྱི་སྨད་གཡོགས་ཡར་བཀྱགས་ནས་གདོང་ལ་འགེབ་ཅིང་། མི་རིགས་ཀུན་ལ་ཁྱོད་གཅེར་བུ་ཡིན་པ་མཐོང་བར་བྱ་ཞིང་། རྒྱལ་ཁམས་རྣམས་ལ་ཁྱོད་ཀྱི་ངོ་ཚ་མཐོང་བར་འཇུག་གོ ། 6 ངས་མི་གཙང་བ་དང་ཞེན་ལོག་གི་རྫས་ནི་ཁྱོད་ཀྱི་སྟེང་དུ་འཕངས་ནས་ཁྱོད་ལ་བརྙས་བཅོས་གཏོང་ཞིང་། ཁྱོད་ནི་མི་རྣམས་ཀྱི་ངོ་མཚར་བའི་ལྟད་མོར་བསྒྱུར་བར་བྱའོ། ། 7 དེ་ནས་ཁྱོད་མཐོང་མཁན་ཐམས་ཅད་བྲོས་ནས་ཁྱོད་དང་འབྲལ་ཞིང་ན་རེ། ནིན་ཝེ་སྟོངས་པར་གྱུར་ཏོ། །སུ་ཞིག་དེའི་ཆེད་དུ་ཡིད་སྐྱོ་བར་འགྱུར་རམ་ཞེས་ཟེར་ཞིང་། ངས་གནས་གང་ནས་ཁྱོད་ལ་སེམས་གསོ་བྱེད་མཁན་རྙེད་ཐུབ་བམ་ཞེས་གསུངས་སོ། །

8 ཁྱོད་རང་ནོ་ཨ་མོན་*ནོ་ཨ་མོན་ཞེས་པ་ནི་ལྷོ་ཨེ་ཅིབ་ཀྱི་རྒྱལ་སའི་མིང་ཡིན་ལ། མིང་གཞན་དུ་ཐེ་པེ་སི་ཞེས་ཀྱང་བྱ། ལས་སྟོབས་དང་ལྡན་པ་ཡིན་ནམ། ནོ་ཨ་མོན་ནི་ནེ་ལོ་གཙང་པོའི་ཆུ་རྒྱུན་འབབ་ཡུལ་དུ་ཆགས་ཤིང་། ཕྱོགས་བཞི་ཆུ་ཡིས་བསྐོར་ཡོད་པ་དང་། རྒྱ་མཚོ་དེ་ཡི་འཐབ་རགས་ཡིན་ལ། ཆུ་ནི་དེའི་ལྕགས་རི་ཡིན་ནོ། ། 9 གུ་ཤ་དང་ཨེ་ཅིབ་གཉིས་པོ་ནི་དེའི་འཛད་མཐའ་མེད་པའི་སྟོབས་ཤུགས་ཡིན་ཞིང་། །ཕུ་ཏཱ་པ་དང་ལེབ་ཡཱ་པ་གཉིས་ནི་དེའི་དཔུང་གྲོགས་ཡིན་ནོ། ། 10 ཡིན་ན་ཡང་དེ་ནི་ད་དུང་ཕར་བསྐྲད་ནས་བཙོན་དུ་ཁྲིད་པ་དང་། མོའི་ཕྲུ་གུ་རྣམས་ལམ་མདོ་དག་ཏུ་སར་བརྒྱབ་ནས་ཤི་བ་དང་། མི་རྣམས་ཀྱིས་མོའི་བཀུར་འོས་པ་རྣམས་ཀྱི་ཕྱིར་དུ་རྒྱན་འཕངས་ནས། མོའི་མི་ཆེན་མཐའ་དག་ལ་ལྕགས་སྒྲོག་བརྒྱབ་ཏོ། ། 11 ཡང་ཁྱོད་ནི་ཆང་གིས་བཟི་ཞིང་སྐུང་བར་འགྱུར་ཏེ། ཁྱོད་ཀྱིས་དགྲ་ཟླའི་རྐྱེན་དབང་གིས་སྐྱབས་བཅོལ་ས་འཚོལ་བར་འགྱུར། 12 ཁྱོད་ཀྱི་བཙན་རྫོང་ཐམས་ཅད་ནི་སྨིན་མ་ཐག་པའི་སེ་ཡབ་ཤིང་གི་ཤིང་ཏོག་དང་འདྲ་ཞིང་། གལ་ཏེ་གཡོ་བར་གྱུར་ན་ཟ་འདོད་ཀྱི་སྐྱེས་བུའི་ཁ་ནང་དུ་ལྷུང་བར་འགྱུར། 13 ལྟོས་ཤིག ཁྱོད་ཀྱི་དམག་མི་ཐམས་ཅད་ནི་བུད་མེད་དང་འདྲ་སྟེ། ཁྱོད་ཀྱི་མངའ་ཁོངས་ནང་གི་སྒོ་ཆེན་རེ་རེ་དགྲ་ཟླའི་ཕྱོགས་སུ་ཕྱེས་ཤིང་། ཁྱོད་ཀྱི་སྒོ་གཏན་རྣམས་མེས་བསྲེགས་པའོ། ། 14 ཁྱོད་ཀྱིས་ཆུ་བླངས་ཏེ་རང་གི་ལྕགས་རི་རྣམས་བརྟན་པོར་བྱེད་པ་དང་དགྲ་ཡིས་མཐའ་ནས་བསྐོར་བར་གྲ་སྒྲིག་བྱས་ཏེ། འདམ་ནང་བབས་ཏེ་འཇིམ་པ་བརྫིས་ནས་སོ་ཕག་སྲེག་ཁུང་ཞིག་གསོ་བྱེད་དགོས། 15 གནས་དེར་མེ་ཡིས་ཁྱོད་བསྲེག་ཅིང་། རལ་གྲིས་ཁྱོད་ཚར་དུ་གཅོད་པ་དང་ཆ་ག་པ་ཟ་བ་བཞིན་དུ་ཁྱུར་མིད་གཏོང་བས། ཁྱོད་ཀྱི་མི་གྲངས་ནི་ཆ་ག་པ་དང་ཆ་ག་འབུ་བཞིན་མང་བར་གྱིས་ཤིག 16 ཁྱོད་ཀྱིས་རང་གི་ཚོང་པ་འཕེལ་བར་བྱས་ནས་ནམ་མཁའི་སྐར་མ་ལས་ཀྱང་མང་ནའང་། ཆ་ག་པས་ཟོས་ཚར་རྗེས་འཕུར་འགྲོ་བ་ཡིན། 17 ཁྱོད་ཀྱི་གཙོ་འཛིན་ནི་ཆ་ག་འབུ་བཞིན་མང་ཞིང་། ཁྱོད་ཀྱི་དམག་དཔོན་ནི་ཨ་ཚག་ཚག་པའི་ཁྱུ་ལྟར་ཡོད་དེ། ནམ་ཟླ་འཁྱག་དུས་ར་སྐྱོར་གྱི་སྟེང་དུ་སྡོད་པ་དང་། ཉི་མ་འཆར་དུས་ཚང་མ་འཕུར་འགྲོ་ཞིང་། དེ་རྣམས་གང་དུ་ཡོད་པ་མི་ཡིས་རྟོགས་པར་མི་འགྱུར་རོ། །

18 ཀྱེ་ཨ་སུར་གྱི་རྒྱལ་པོ། ཁྱོད་ཀྱི་ལུག་རྫི་རྣམས་གཉིད་དུ་ཡུར་བ་དང་། ཁྱོད་ཀྱི་སྐུ་དྲག་རྣམས་ངལ་གསོས་པས། ཁྱོད་ཀྱི་མི་སྡེ་རྣམས་རི་ལུང་ཀུན་ལ་ཁ་ཐོར་དུ་སོང་ནས་དེ་རྣམས་བསྡུ་མཁན་གཅིག་ཀྱང་མེད་དོ། ། 19 ཁྱོད་ཀྱི་རྨ་ཁ་ལ་གསོ་ཐབས་མེད་དེ། ཁྱོད་ལ་བྱུང་བའི་རྨ་ཁ་ནི་ཤིན་ཏུ་ཚབས་ཆེན་ཡིན་ནོ། །ཁྱོད་ཀྱི་དོན་དེ་ཐོས་མཁན་རྣམས་ཀྱིས་ཁྱོད་ཀྱི་ཕྱོགས་སུ་ཐལ་མོ་རྡེབ་པར་འགྱུར། ཅི་ལ་ཞེ་ན། ཁྱོད་ཀྱིས་རྒྱུན་ཆད་མེད་པར་སྤྱོད་ངན་སྤྱད་པ་དེའི་གནོད་འཚེ་མ་ཐེབས་པ་སུ་ཞིག་ཡོད་དམ།། །།