1 ༼དཱ་བིད་ཀྱིས་རང་གི་སྲས་ཨབ་ཤཱ་ལོམ་ལས་བྲོས་བྱོལ་བྱེད་དུས་བཀོད་པའི་མགུར༌མ།༽ ཀྱེ་ཀྱེ་ཡ་ཝཱེ་ངའི་དགྲ་ག་ཙམ༌འཕེལ། །ང་ལ་རྒོལ་མཁན་ཅི་འདྲ་མང་བ༌ཨང༌།། 2 དཀོན་མཆོག་ཕྱོགས་ནས་ཁོ་ལ་སྐྱབས་མི༌འབྱུང༌། །དེ་ལྟར་ངའི་སྲོག་སྐོར་ལ་མང་པོས༌སྨྲ།། ༼ སེ༌ལཱ། *སེ་ལཱ་ཞེས་པ་ནི་དོན་ཚན་མཇུག་རྫོགས་པའི་རྟགས་ཏེ་རེ་ཞིག་རྫོགས་པའི་དོན༌ཡིན། ༽ 3 ཡ་ཝཱེ་ཁྱེད་ནི་ང་ཡི་ཕྱོགས་བཞིའི༌ཕུབ། །ང་ཡི་དཔལ་དང་མགོ་བོ་འདེགས་མཁན༌ལགས།། 4 སྐད་གསང་མཐོན་པོས་ཡ་ཝཱེ་ཞེས་འབོད༌དུས། །ཁོང་གིས་དམ་པའི་རི་ནས་བཀའ་ལན༌གནང༌།། ༼ སེ༌ལཱ། ༽ 5 ང་རང་ཉལ་ཞིང་གཉིད་དུ་ཡུར་བ༌དང༌། །ང་རང་གཉིད་ལས་སད་པ་འདི་ཐམས༌ཅད། །ཡ་ཝཱེས་ང་ལ་གཟིགས་སྐྱོང་གནང་བས༌ཡིན།། 6 བདག་གི་མཐའ་ནས་བསྐོར་ཅིང་རྒོལ་བ༌ཡི། །སྐྱེས་པ་ཁྲི་འབུམ་དེ་ལ་ང་མི༌འཇིགས།། 7 ཀྱེ་ཀྱེ་ཡ་ཝཱེ་ཡར་ལ་བཞེང་བར་མཛོད། །ང་ཡི་དཀོན་མཆོག་ང་རང་སྐྱོབ་པར༌མཁྱེན། །ཁྱེད་ཀྱིས་ང་ཡི་དགྲ་བོར་འགྲམ་ལྕག༌གཞུས། །མི་ངན་དག་གི་སོ་རྣམས་དུམ་བུར༌བཅག། 8 ཡ་ཝཱེ་ཁོང་ནས་ཐར་པ་འབྱུང་བ༌དང༌། །ཁྱེད་ཀྱི་འབངས་མི་ལ་ནི་བྱིན་རླབས༌མཛོད།། ༼ སེ༌ལཱ། ༽