1 ༼དཱ་བིད་ཀྱིས་ཡ་ཧུ་དཱའི་དབེན་སྟོང་དུ་བརྩམས་པའི་མགུར༌མ།༽ ཀྱེ་ཀྱེ་དཀོན་མཆོག་ཁྱེད་ངའི་དཀོན་མཆོག༌ཡིན། །བདག་གིས་སྙིང་རུས་བསྐྱེད་ནས་ཁྱེད་རང༌བཙལ། །ས་ཆ་སྐམ་ཞིང་ཉམ་ཐག་ཆུ་མེད༌སར། །བདག་གི་ལུས་སེམས་གཉིས་ཀ་ཁྱེད་ལ༌གདུང༌།། 2 ཁྱེད་ཀྱི་སྟོབས་དང་གཟི་དཔལ་མཇལ་བའི༌ཕྱིར། །གནས་མཆོག་ནང་དུ་བདག་གིས་ཁྱེད་ལ༌བལྟས།། 3 ཁྱེད་ཀྱི་བྱམས་བརྩེ་ཚེ་སྲོག་ལས་ཀྱང༌ལྷག །དེའི་ཕྱིར་བདག་གི་ངག་ནས་ཁྱེད་ལ༌བསྟོད།། 4 བདག་གིས་མི་ཚེ་གང་པོར་ཁྱེད་ལ༌བསྟོད། །ཁྱེད་མཚན་བརྗོད་ཅིང་ལག་ཟུང་ཡར་འདེགས༌འོང༌།། 5 ཚིལ་དང་རྐང་གིས་ང་རང་འགྲང་པ༌ལྟར། །ང་ཡི་སེམས་ཀྱང་དེ་བཞིན་ཚིམ་པར༌འགྱུར། །དགའ་མགུ་རངས་པའི་ངག་གིས་ཁྱེད་ལ༌བསྟོད།། 6 མལ་དུ་ཉལ་དུས་བདག་གིས་ཁྱེད་དྲན༌ཞིང་། །མཚན་མོ་གང་པོར་ཁྱེད་རང་སྒོམ་པ༌ཡིན།། 7 ཁྱེད་ཀྱིས་ང་ལ་རོགས་རམ་གནང་བས༌ན། །འདབ་གཤོག་འོག་ཏུ་དགའ་སྤྲོའི་ཀི་སྒྲ༌སྒྲོག། 8 ངའི་སེམས་ཁྱེད་ཀྱི་རྗེས་སུ་དམ་པོར༌སྙེག །ཁྱེད་ཕྱག་གཡས་པས་ང་རང་སྐྱོར༌བ་འོ།། 9 ཡིན་ཡང་ང་ཡི་ཚེ་སྲོག་སྙེག་མཁན༌རྣམས། །ས་ཡི་མཐིལ་ལ་འགྲོ་བར་གདོན་མི༌ཟ།། 10 དེ་རྣམས་རལ་གྲིའི་འོག་ཏུ་གཏོད་བྱེད༌ཅིང༌། །དེ་རྣམས་ཁྱི་སྤྱང་ཁ་ཡི་ཟས་སུ༌འགྱུར།། 11 རྒྱལ་པོ་དཀོན་མཆོག་ནང་དུ་དགའ་བར༌འགྱུར། །དཀོན་མཆོག་དཔང་དུ་འཛུགས་མཁན་ཐམས་ཅད༌འཕར། །རྫུན་གཏམ་སྨྲ་བའི་ཁ་རྣམས་དགག་པར༌བྱ།།