1 ལུ་གུས་ཐམ་ག་བདུན་པ་ཁ་འབྱེད་པའི་དུས་སུ། ནམ་མཁའི་ཞིང་ཁམས་ནི་ཆུ་ཚོད་ཕྱེད་ཀའི་རིང་ལ་ལྷིང་འཇགས་སུ་གྱུར་ཏོ།། 2 དེ་ནས་དཀོན་མཆོག་གི་མདུན་དུ་ཡར་འགྲེངས་ནས་བསྡད་ཡོད་པའི་ཕོ་ཉ་བདུན་པོ་བདག་གིས་མཐོང་ཞིང་། དེ་དག་ལ་དུང་བདུན་གནང་ཡོད་དོ།།

3 དེ་ནས་ལག་ཏུ་གསེར་གྱི་སྤོས་ཕོར་ཐོགས་པའི་ཕོ་ཉ་གཞན་ཞིག་མཆོད་ཁྲིའི་གམ་དུ་ཕེབས་ཏེ་ཡར་འགྲེངས་ནས་སྡོད་ཅིང་། དེ་ལ་སྤོས་མང་པོ་གནང་ཡོད་དོ།། དེ་ནི་དད་ལྡན་དམ་པ་ཐམས་ཅད་ཀྱི་སྨོན་ལམ་དང་ལྷན་དུ། བཞུགས་ཁྲིའི་མདུན་དུ་ཡོད་པའི་གསེར་གྱི་མཆོད་ཁྲིའི་སྟེང་དུ་འབུལ་བའི་ཕྱིར་ཡིན། 4 དེ་ནས་སྤོས་ཀྱི་དུ་བ་དང་དད་ལྡན་དམ་པ་རྣམས་ཀྱི་སྨོན་ལམ་ནི་མཉམ་དུ་ཕོ་ཉའི་ཕྱག་ནས་ཡར་དཀོན་མཆོག་གི་དྲུང་དུ་སླེབས་སོ།། 5 ཕོ་ཉས་ཕྱག་ཏུ་སྤོས་ཕོར་ཐོགས་ཤིང་། སྤོས་ཕོར་ནང་དུ་མཆོད་ཁྲིའི་སྟེང་གི་མེས་གང་བར་བྱས་ཤིང་ས་གཞིར་གཏོར་བ་ན། འབྲུག་སྒྲ་གྲགས་པ་དང་། ལྡིར་སྒྲ་སྒྲོག་པ། གློག་དམར་འཁྱུག་པ། ས་འགུལ་ཡོང་བ་བཅས་བྱུང་བར་གྱུར་ཏོ།།

6 དེ་ནས་དུང་བདུན་ཕྱག་ཏུ་ཐོགས་པའི་ཕོ་ཉ་བདུན་པོས་དུང་འབུད་པར་སྟ་གོན་བྱས་སོ།།

7 ཕོ་ཉ་དང་པོས་དུང་བུས་པ་ན། ཁྲག་འདྲེས་པའི་སེར་བ་དང་མེ་ཕུང་དག་ས་སྟེང་དུ་འཕངས་ཏེ། ས་གཞིའི་གསུམ་ཆའི་གཅིག་དང་ཤིང་སྡོང་གི་གསུམ་ཆའི་གཅིག་མེར་བསྲེགས་པ་དང་། རྩྭ་སྔོན་ཐམས་ཅད་ཀྱང་མེར་བསྲེགས་སོ།།

8 ཕོ་ཉ་གཉིས་པས་དུང་བུས་པ་ན། མེ་འབར་བ་ལྟ་བུའི་རི་ཆེན་པོ་རྒྱ་མཚོའི་ནང་དུ་འཕངས་ཏེ། རྒྱ་མཚོའི་གསུམ་ཆའི་གཅིག་ཁྲག་ཏུ་གྱུར་པ་དང་། 9 རྒྱ་མཚོའི་སེམས་ཅན་ལས་གསུམ་ཆའི་གཅིག་ཤི་བ་དང་། གྲུ་གཟིངས་ལས་གསུམ་ཆའི་གཅིག་ཀྱང་བརླག་པར་གྱུར་ཏོ།།

10 ཕོ་ཉ་གསུམ་པས་དུང་བུས་པ་ན། སྐར་ཆེན་ནི་དཔལ་འབར་བཞིན་ནམ་མཁའ་ནས་སར་ལྷུང་ཞིང་། གཙང་པོའི་གསུམ་ཆའི་གཅིག་དང་ཆུ་མིག་གི་སྟེང་དུ་ལྷུང་ངོ་།། 11 སྐར་མ་དེའི་མིང་ལ་མཁན་པ་ཟེར་ཞིང་། ཆུའི་གསུམ་ཆའི་གཅིག་ཁ་མོར་གྱུར་པ་དང་། ཆུ་ཁ་མོར་གྱུར་པའི་རྐྱེན་གྱིས་མི་མང་པོ་ཤིའོ༎

12 ཕོ་ཉ་བཞི་པས་དུང་བུས་པ་ན། ཉི་མའི་གསུམ་ཆའི་གཅིག་དང་། ཟླ་བའི་གསུམ་ཆའི་གཅིག སྐར་མའི་གསུམ་ཆའི་གཅིག་བཅས་ལ་ཕོགས་པས། ཉི་ཟླ་སྐར་གསུམ་གྱི་གསུམ་ཆའི་གཅིག་མུན་ནག་ཏུ་གྱུར་ཅིང་། ཉིན་མོའི་གསུམ་ཆའི་གཅིག་ལ་འོད་མ་འཕྲོས་པ་དང་། མཚན་མོའང་དེ་བཞིན་ནོ།།

13 དེ་ནས་ཡང་བདག་གིས་ཕར་བལྟས་པ་ན། གླག་ཅིག་མཁའ་དབྱིངས་སུ་འཕུར་བཞིན་ཡོད་ཅིང་། དེས་སྐད་ཆེན་པོས་འདི་སྐད་དུ། ཕོ་ཉ་གཞན་གསུམ་པོས་དུང་འཕྲོ་མ་རྣམས་འབུད་རྒྱུ་ཡིན་པས། ས་སྟེང་དུ་སྡོད་པའི་མི་རྣམས་ལ་ཆག་སྒོ་འབྱུང་ངོ་།། ཆག་སྒོ་འབྱུང་ངོ་།། ཆག་སྒོ་འབྱུང་ངོ་ཞེས་བརྗོད་པའང་བདག་གིས་ཐོས་སོ།།