1 དཔྱིད་ཀའི་དུས་སུ། ཁྱོད་རྣམས་ཀྱིས་དཀོན་མཆོག་ཡ་ཝཱེར་དཔྱིད་ཆར་ཞུས་ཤིག་དང་། དཀོན་མཆོག་ཡ་ཝཱེས་གློག་དམར་འཁྱུག་པར་མཛད་དེ། མི་ལ་དཔྱིད་ཆར་གནང་ནས་མི་རེ་རེའི་ས་ཞིང་ལས་སྔོ་ཚལ་སྐྱེ་བར་མཛད། 2 ཅི་ལ་ཞེ་ན། སྐུ་འདྲས་སྟོང་བཤད་རྒྱག་པ་དང་། མོ་པ་རྣམས་ཀྱིས་མཐོང་བ་ནི་འཁྲུལ་སྣང་ཡིན། ཁོ་རྣམས་ཀྱིས་རྨི་ལམ་རྫུན་མ་བཤད་དེ་མི་ལ་ཕན་ཐོགས་མེད་པའི་སེམས་གསོ་གཏོང་བས། མི་རྣམས་ནི་ལུག་རྫི་མེད་པའི་ལུག་ཁྱུ་བཞིན་འཁྱམ་ཞིང་དཀའ་སྡུག་ཆེའོ། ། 3 བདག་ལུག་རྫི་འདི་རྣམས་ལ་ཤིན་ཏུ་ཁྲོས་ཏེ། བདག་གིས་ར་ཐུག་དེ་རྣམས་ལ་ཉེས་ཆད་གཅོད་པར་བྱ། ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཉིད་ཀྱི་ལུག་ཁྱུ་སྟེ་ཡ་ཧུ་དཱའི་ཁྱིམ་རྒྱུད་ལ་ཐུགས་ཁུར་མཛད་པས། དེ་རྣམས་གཡུལ་སའི་དམག་རྟ་གཟི་བྱིན་ཅན་དང་འདྲ་བར་མཛད་དོ། ། 4 ཁང་པའི་ཟུར་རྡོ་དང་གུར་གྱི་ཕུར་པ། དམག་ལ་འཐབ་པའི་གཞུ། དབང་འཛིན་མཁན་ཐམས་ཅད་ནི་ཡ་ཧུ་དཱ་ནས་འཐོན་པར་འགྱུར། 5 དེ་དག་གིས་དཔའ་བོ་བཞིན་དུ་གཡུལ་ས་ནས་དགྲ་བོ་རྣམས་སྲང་ལམ་གྱི་འདམ་ནང་དུ་བརྫི་ཞིང་། ཡང་དཀོན་མཆོག་ཡ་ཝཱེ་དེ་རྣམས་དང་མཉམ་དུ་བཞུགས་པས་ཁོ་རྣམས་འཐབ་པར་འགྱུར་ལ། དེ་དག་གིས་དགྲ་ཟླའི་སྐྱ་མི་རྣམས་ངོ་ཚ་བར་བྱེད་དོ། །

6 ཡང་བདག་གིས་ཡ་ཧུ་དཱའི་ཁྱིམ་རྒྱུད་ནི་སྟོབས་དང་ལྡན་པར་བྱས་ནས་ཡོ་སེབ་ཀྱི་ཁྱིམ་རྒྱུད་སྐྱོབ་པར་བྱ། ངས་དེ་རྣམས་ལ་སྙིང་རྗེ་བས་ཁོ་རྣམས་ཕྱིར་ལོག་ཏུ་འཇུག་དགོས། དེ་དག་ནི་ངས་ནམ་ཡང་དོར་མ་མྱོང་བར་འདྲ་ཞིང་། བདག་ནི་དེ་དག་གི་དཀོན་མཆོག་ཡ་ཝཱེ་ཡིན་པས་ངས་དེ་རྣམས་ལ་ལན་གནང་བར་བྱའོ། ། 7 ཨེ་ཕཱར་ཡིམ་པ་རྣམས་ནི་དཔའ་བོ་དང་འདྲ་སྟེ། ཁོ་ཚོའི་སེམས་ནི་རྒུན་ཆང་འཐུང་བ་བཞིན་དགའ་ཞིང་། ཁོ་ཚོའི་བུ་རྒྱུད་རྣམས་ཀྱང་དེ་མཐོང་ནས་དགའ་བར་འགྱུར་ལ། ཁོ་ཚོའི་སེམས་ནི་དཀོན་མཆོག་ཡ་ཝཱེའི་རྐྱེན་གྱིས་དགའ་ཞིང་མགུ་བར་འགྱུར། 8 བདག་གིས་དེ་དག་བོས་ནས་ཁོ་རྣམས་བསྡུ་བར་བྱ་སྟེ། གང་ལ་ཞེ་ན། བདག་གིས་དེ་དག་བསྐྱབས་པས་སོ། །ཁོ་ཚོའི་མི་གྲངས་ནི་སྔར་བཞིན་འཕེལ་བར་འགྱུར། 9 བདག་གིས་དེ་དག་ནི་མི་སྡེ་རྣམས་ཀྱི་ཁྲོད་དུ་གཏོར་ན་ཡང་། དེ་དག་གིས་རྒྱང་རིང་ནས་ང་རང་དྲན་པར་འགྱུར་ལ། དེ་དག་དང་ཁོ་ཚོའི་བུ་རྒྱུད་རྣམས་ནི་གསོན་པོར་ལུས་ཤིང་ཕྱིར་ལོག་པར་འགྱུར་རོ། ། 10 ངས་དེ་དག་ནི་ཨེ་ཅིབ་ཡུལ་ནས་ཕྱིར་འཁྲིད་ཡོང་དགོས་ཤིང་། ཨ་སུར་ཡུལ་ནས་ཁོ་རྣམས་བསྡུས་ཏེ་གིལ་ཨད་ཀྱི་ཡུལ་དང་ལེ་པཱ་ནོན་དུ་འཁྲིད་པར་བྱ་སྟེ། དེར་ཁོ་རྣམས་མི་ཤོང་བ་ཡིན། 11 དཀོན་མཆོག་ཡ་ཝཱེ་ནི་སྡུག་བསྔལ་གྱི་རྒྱ་མཚོ་རྒྱུ་ཞིང་རྒྱ་མཚོའི་རྦ་རླབས་རྣམས་ལ་བརྡེག་པ་དང་། ནཱ་ཡོལ་གཙང་པོའི་ཆུ་གཏིང་བསྐམ་པར་མཛད་ཅིང་། ཨ་སུར་གྱི་ང་རྒྱལ་ནི་དམའ་སར་འབེབ་པ་དང་། ཨེ་ཅིབ་ཀྱི་སྲིད་འཁར་ *འདིར་ཨེ་ཅིབ་ཀྱི་སྲིད་འཁར་ཞེས་པ་ནི་ཨེ་ཅིབ་རྒྱལ་པོའི་དབང་ལ་གོ་དགོས།ཡང་ཉམས་པར་འགྱུར། 12 བདག་གིས་རང་གི་མི་རྣམས་ནི་བདག་ལ་བརྟེན་ནས་སྟོབས་འབྱོར་ལྡན་པར་བྱེད་ཅིང་། དེ་དག་གིས་ངའི་མིང་གི་སྒོ་ནས་སྤྱད་པ་སྤྱོད་དོ་ཞེས་དཀོན་མཆོག་ཡ་ཝཱེས་གསུངས་སོ། །