1 Irore nono Jesus Cristo ro mogadure. Dukodi tarodo nono iro mogadure.

2 Tawiagodukare ipiji. Tameartorure ire tarduwado jiboeji. Ure turugadu iagai rugadu. 3 Mare itaidure iwo tarduwado iaboeji pugeje. Aredu ukimijerare toreduče. Imedu ukimijerare Jesusče. Jesus ukimijerare Pao Kurireuče. 4 Nono boe emode bato pui tumago pemegawo Pao Kurireuji. Nono imedu makomode baruto Pao Kurireu bagai nou boe egai dukeje umode tatadawu tawuje taora piji. Makomode Pao Kurireu bataruji nou boe ewiagai dukeje umode tatadawu tawuje taora piji. Umodukare tatadawu tawuje taora piji dukeje umode Jesus Cristo pogurudo.*11.4 Boe tuginaiwuge eire Paulo akoino. Boe etaotadawu jire akoino. Judeu doge ime emagore Pao Kurireu bagai baruto dukeje ia etaotadawu rogu tuginaiboe padure etaora keje. Mare nou ero pegakare. Tumagowo Pao Kurireu bagai baruto dubagaire eroino nou tatadawu rogu tabo dukodire ekare Pao Kurireu pogurudo nou turo tabo. 5 Mare aredu makomode baruto nou boe egai dukeje umode iaboe upodo taora tabo. Makomode Pao Kurireu bataruji nou boe ewiagai dukeje umode iaboe upodo taora tabo. Umodukare iaboe upodo taora tabo dukeje umode toredu pogurudo nono ia aredu ro pegareudo ro mogadure. Marigudu boe ere aredu ro pegareudo udo tao kado boe erduwawo ji ro pegareudo nure ema duji. Aredu umodukare iaboe upodo taora tabo tumagowo Pao Kurireu bataruji boe ewiagai dukeje ure tudo nono aredu ao kadodureudo mogadure. 6 Dukodire boe emode bato pui tumago pemegawo Pao Kurireuji dukeje areme ewo iaboe upodo taora tabo. Aredu umodukare iaboe upodo taora tabo dukeje uwo tao rugadu boe kado rugadu. Aredu umode tao rugadu boe kado dukeje čare pogurumode. Dukodire uwo iaboe upodo taora tabo tubogurukawo. 7 Mare imedu umodukare iaboe upodo taora tabo. Emare umode boe erdudo Pao Kurireu ro pemegareuji. Mare aredu umode boe erdudo toredu ro pemegareuji jamedu. 8 Pao Kurireu ukare iaboe tawuje aredu piji tuwo imedu boetojiwu towuje. Ure imedu boetojiwu jura tawuje piji tuwo aredu boetojiwudo towuje. 9 Pao Kurireu ure imedu towuje boetoji. Dukeje čare ure aredu towuje imedu boetojiwu metiawo ema. 10 Dukodire areme emode iaboe upodo taora tabo boe erduwo tumeartorure toredu jituji. Mare Pao Kurireu utugarege baru tadawuge erdumode boei dukodire areme emode iaboe upodo taora tabo nou baru tadawuge erduwo tumeartorure toredu jituji jamedu. 11 Pameartorure Pagimijera Jesusji. Dukodire aredu umodukare tumeardae udo tuginai toredu meardae piji. Nono imedu umodukare tumeardae udo tuginai toreduje meardae piji jamedu. 12 Pao Kurireu ure imedu boetojiwu jura tawuje piji tuwo aredu boetojiwudo towuje. Mare ime eiamedu ewodure tuje areme epiji jamedu. Dukodire emeardae umodukare tuginai pubiji. Nono Pao Kurireu koiare ure boe jamedu boe towuje rugadu.

13 Itaidure tawo tameardae tawuje rugadu. Boe emode bato pui tumago pemegawo Pao Kurireuji. Mare ukana turugadu aredu makowo baruto nou taora kedo tabo? 14 Boro. Ukare turugadu. Boe etaiwore Pao Kurireu ure towu boeji tuwo turore jiboe towuje. Paroia koiare imedu ao raimode dukeje nou imedu pogurumode nou tao raire duji. 15 Mare aredu ao raimode dukeje nou aredu motumode. Pao Kurireu ure aredu aodo atadawu ema. Mare atadawu ji karega inagoino. Nou aredu ao jire inagoino. 16 Ia tagi tagaidumodukare awu iwadaruji. Mare meartorure Jesus jiwuge eiamedu boe erore aino. Ainore čerore jamedu. Meartorure Jesus jiwuge emode bato pui tumago pemegawo Jesusji dukeje ainore erore rugadu.

17 Mare imago pemegamodukare ia tarore jiboeji. Tare bato pui tamago pemegawo Pao Kurireuji. Mare tare boe pegado tai. 18 Boe ere iwie tarore jiboeji. Egore tabokaie puapo. Ia tagi tameardae uie tuginai nouia tamedage epiji. Ainore boe egore. Itaidukare imeartoruwo nou ere iwie jiboeji. Mare imeartorure. 19 Meardae pemegareuge emode tumeardae udo tuginai meardae pegareuge epiji rugadu. Dukodire boe etaiwomode tameardaeji dukeje erduwamode. Ia tagi tameardae pemegare. Boe etaiwomode dukeje erduwamode nou inoduji. 20 Tare bato pui dukeje tameardaere tawo Pagimijera Jesus uke amireu ko taguduwo nou uva kuruče jamedu. Mare tagare Pagimijera Jesus uke amireu ko tagudukare nou uva kuruče jamedu. 21 Tare bato pui dukeje taiamedu boe tagaregodure tage tabo. Nono tare tage kowuje nono rugadu. Tabagakare pu bagai tagwagewo puapo. Dukodire iage eke bokware. Kočare iage eke kurure ei jamedu. 22 Kočare tage boeimode tai dukeje tagwagedo tu toro tawai keje rugadu. Mare tadure tage tabo boe ere bato puiwu bai ka tagwagewo boe egai mare tagare boe ekuna. Tare uke bokwareuge epogurudo. Du taro peganure meartorure Pao Kurireu jiwuge eiamedu boei. Dukodire čare imago peganure awu tarore jiboeji. Tagaidure imago pemegawo tarore jiboeji. Mare itaidukare ji. Ukare turugadu.

23 Pagimijera Jesus ure iorduwado rugadu. Ainore paromode pawo Pagimijera Jesus uke kowuje. Imedu ure Jesus maku boe eimijerage pegareuge etai. Nou boečoji Pagimijera Jesus ure tumugudo ture jorduwadowugebo tuge keje. Ure tugeragu amireuji. 24 Imadure Pao Kurireu bagai nou tuge amireu paru tabo. Dukejere ure nou amireu kado puiato. Nono akore: – Awu amireu ikodu reo. Ire imagu boe ero pegareu moriče. Dujire inagoino. Tagwagedo ji tawiabutuwo iwugeje.

25 Enogwagere dukeje Jesus ure tugeragu vinho kuruji jamedu. Akore: – Ikure nou uva kuru rema. Pao Kurireu meardae maiwu koiare imode iku redo boe ero pegareu moriče. Tagududo awu uva kuruče tawiabutuwo iwugeje, irore jiboe keje jamedu.

26 Tagwagemode awu Pagimijera uke amireuji. Tagudumode awu Pagimijera uke uva kuruče. Tarore aino dukeje tamode boe erduwado Pagimijera bire boe ero pegareu moriče duji boe ewiabutuwo nou bire dukeje. Tarodo aino tu tu je jii toro Pagimijera aregodu ka. 27-28 Mare tagaiwodo tarore jiboeji tameardaere jiboeji ia taro pegareu bagai, ia tameardae pegareu bagai. Ia tameardae pegareu metumode tagabo dukeje tagaba awu Pagimijera uke kowuje. Ia tameardae pegareu metumode tagabo mare tamode ko dukeje taro peganure Pagimijera koduji, taro peganure Pagimijera kuji. Ia taro pegareu metumode tagabo kimo mare tamode Pagimijera uke kowuje dukeje tamode nono nou ure Pagimijera bitowuge emogadure. 29 Tagudumode awu Pagimijera uke uva kuruče, tagwagemode awu Pagimijera uke amireuji. Mare tawiagodumode Pagimijera Jesus bire paro pegareu moriče dupiji dukeje boe pegamode tai rugadu. 30 Kočare ainore tarore rugadu. Dukodire kogodureuge tamagare. Rakakareuge tamagare jamedu. Ia tamedage ewire jamedu. 31 Mare pagaiwowo parore jiboeji boetoji paro pegareu bagai, pameardae pegareu bagai pawo pameardae tawuje parokawo aino pugeje pameardaekawo aino pugeje. Dukejere Pao Kurireu ro pegamodukare pai. 32 Pao Kurireu aiwomode paroji. Jordumode ia paro pegareuji dukeje umode boe pegado pai tuwo paro pemegado meartorukareuge epiji. Dukodire pawarigudumodukare toro joru pegareuto meartorukare Jesus jiwugebo.

33 Dukodire tamode bato pui tagwagewo Pagimijera ukeji dukeje tabagado pu bagai tagwagewo puapo. Imedage nure tagi. 34 Ia tagi tage boeire tai dukeje tagwagedo tawai keje boetoji. Nono tamode bato pui dukeje taro pegareu bokwamode. Nono Pao Kurireu umodukare boe pegado tai.

Itaregodumode tagae dukeje imode tarduwado pugeje iwo ia taro jetorodo pugeje.