1-2 Tare iwie tagaiduie tawo ia diero maku toro Judéia moto kejewuge meartorure Jesus jiwuge ewagai. Ire Galácia moto kejewuge meartorure Jesus jiwuge erduwado marigudu. Tarodo nono nou Galácia kejewu meartorure Jesus jiwuge ero mogadure. Ainore erore. Ere bato pui tu tu je domingo meri keje. Ere bato pui dukeje eiamedu boe ere ia to diero rogu maku. Erore aino tu tu je dukodire ere nou diero rogu kurido. Ča. Tarodo nono nou ero mogadure jii itaregodure tagae du ka. Nono itaregodumode tagae dukeje nou tare maku diero kurimode jamedu tawo maku toro Judéia moto kejewuge meartorure Jesus jiwuge ewagai. 3 Itaregodumode tagae dukeje pamode ia tagaidure jiwu boe etudo nou diero tabo ewo nou diero reko toro Judéia moto kejewuge ewagai Jerusalém ba kurireu ka. Imode atugoreboe maku etai nou Judéia moto kejewuge erduwawo kaibowu pijiba nou diero aregodure. 4 Boemode turugadu dukeje itumode ebo toro Jerusalém ba kurireu ka jamedu.

5 Itumode Macedônia moto ka. Dupijire itumode tagae iorduwo tai. 6 Nono iorduwakare kaba meri kejeba itumode tabiji. Itaidure iragoje raiwo tagabo. Mare iorduwakare. Imeardaere iragojewo tagabo jii toro biakumodewu ari akedu ka. Mare iorduwakare. Dukejere tamode tagera maku inai ituwo pugeje. Mare iorduwakare raga kaiba itumode. 7 Itaidukare ituwo tabiji kuri aino. Pagimijera Jesus aidumode dukeje iragoje raimode tagabo rugadu.

8 Iragojere woe Éfeso ba kurireu keje. Iragojemode woe kuri Judeu doge ewadae Pentecostes akedu ka. 9 Inure awu boe ewie Jesus jiwu bakaru pemegareuji. Etaidure tuiorduwawo čewadaruji rugadu. Emagare rugadu. Imeardaere emeartorumode Jesusji rugadu. Mare ia boe erdu pegare čewadaruji jamedu. Nou jordu pegare čeiwuge emagare jamedu.

10 Timóteo aregodumode tagae dukeje tagimadudo apo rugadu mugu pemegawo tagabo. Emare maragodure Pagimijera ai nono imaragodu mogadure. 11 Tagaba tameardae pegado ji. Tagera maku ai utu pemegawo tugodure jiwu awaraji. Utumode tabiji dukeje Timóteo aregodumode mato itae pugeje ia meartorure Jesus jiwugebo pugeje. Ipagare ewagai woe.

12 Imagore pamedia Apoloji utuwo tagae jamedu ia meartorure Jesus jiwugebo. Mare meardaere tugaie turugadu tuduwo kuri aino. Mare umode turugadu dukeje utumode tagae rugadu.

13 Taeku jado. Tameartoru rakado Jesusji. Taragado tai. Tabagudukaba. 14 Tameardu kurido Pao Kurireuji tawo tarore jiboe jamedu boe udo turugadu Pao Kurireu jakai. Tameardu kurido boei jamedu tawo tarore jiboe jamedu boe udo turugadu boei.

15-16 Imedage nure tagi. Dukodire imode tawie. Tarduware imedu Estéfanaji. Tarduware uwai kejewugei. Meartorure Jesus jiwuge boetojiwuge nure emage tago moto keje, Acaia moto keje. Ere tumagu tagai. Ere tumagu meartorure Jesus jiwuge etai jamedu tuwo tarduwado Pao Kurireu bataruji tuwo boe pemegado tai, tuwo boe pemegado meartorure Jesus jiwuge eiamedu boei. Tameartorudo nou Estéfanas uwai kejewugei. Ia boe emaragodumode Estéfanas apo turowo nono Estéfanas ro mogadure dukeje tameartorudo ei jamedu. Tarodo nono ero mogadure tawo boe pemegado meartorure Jesus jiwugei jamedu. Imedage nure tagi. Dukodire inagoino tai.

17 Imedu Estéfanas aregodure itae. Imedu Fortunato aregodure itae. Imedu Acaico aregodure itae jamedu. Etaregodure mato itae tabiji. Ekimadure itabo tagai. Dukodire ere iagaredo i. 18 Ikiarigodure tawagai mare ekimadure itabo tagai dukodire iagarere i pugeje. Ere iagaredo i nono ero moga tai toro dumogadure. Awu ime ero pemegare rugadu. Tawiagodukaba epiji. Tamago pemegado pu biagai erore jiboeji.

19 Ásia moto kejewu meartorure Jesus jiwuge etaidure tugimaduwo tagabo jamedu. Imedu Áquila, aredu Priscila etaidure tugimaduwo tagabo. Meartorure Jesus jiwuge emode bato pui ewai tada tu tu je. Nou meartorure Jesus jiwuge etaidure tugimaduwo tagabo jamedu. 20 Awu woewu meartorure Jesus jiwuge etaidure tugimaduwo tagabo jamedu. Tagimadudo puapo nono meartorure Jesus jiwuge eiamedu boe ero mogadure. Meartorure Jesus jiwuge ere tumedagedo pugi dukodire eroino pui tugimadu tabo.

21 Paulo nure imi. Imire ire awu bataru bu awu bapera keje ikera tabo rugadu ikimaduwo tagabo rugadu.

22 Boe pegamode meardu kurikare Jesus jiwugei. Ainore inagore. Itaidure Pagimijera Jesus aregoduwo kuri aino jamedu. Aregodumode dukeje meardu kurikare Jesus jiwuge ewarigudumode bope doge eda kejewu joru pegareuto rugadu.

23 Mare pagimijera Jesus Cristo uwo turo pemegareu maku tagai rugadu. Aregodukare pawagai raga.

24 Pameartorure Jesus Cristoji dukodire pawobe nure pugi. Dukodire imeardu kurire tai rugadu. Iwadaru urugadureu.*16.24 Brae eno tabo ia bíblia akomode “amém” aino awu bataru akedu keje. Brae egore aino tagoino jiwu bataru jetuwo pudui rugadu. Dujire egoino amém aino tuwadaru akedu keje.