1 Očarore puduiwuge emago pemegare tu pudui mare pagatu jere egoino. Emago paga paganure nou tuwadaruji. Imago pemegamode i dukeje boe egomode imago paga paga nuie iwadaruji jamedu. Ča imago pemegamode i tawiagai rugadu. Mare tamode tawia tugu iwadaruto dukeje tarduwamode imago paga karegure iwadaruji tawiagai. Boe jokodu jire inagoino tawiagai rugadu. 2 Imedu makomode ia imeduji tumoduie tonaregedu nogwaredu maku ai muguwo apo dukodire uo jetu pemegamode nou tonaregedu nogwareduji jii toro mugumode nou imedu apo du ka rugadu. Jetu pemegamode tonaregedu nogwareduji mugukawo toro ia imedu apo mare muguwo tu nou togwamagudure jiwu imedu apo rugadu. Tare nono nou nogwaredu mogadure. Ire nono nou nogwaredu uo mogadure. Mare nogwaredu ji karega inagoino. Uo ji karega inagoino jamedu. Imagore tai tameartorukawo ia boei. Tameartoruwo tu Jesus Cristoji rugadu. Du jire inagoino. Dukodi čare inagoino tai. Tameartorukaba ia boei. Tameartoru rakado tu Jesus Cristoji rugadu. Awu imeardae ure nono Pao Kurireu meardae mogadure. Emare aidure rugadu tameartoruwo tu pudui rugadu. 3-4 Mare boe etaregodure tagae tuwo tarduwado Jesusji. Mare nou emagore jiwu Jesus ukare nono awu čemagore jiwu mogadure. Ewadrarodunure tawiagai. Mare tameartorure nou ewadrarodaeji. Emagore jiboe ure tuginai. Emagokare Pao Kurireu Uwari bataruji tawiagai. Emagokare Jesus bataru pemegareuji tawiagai. Čegi čere tarduwado Pao Kurireu Uwari remawuji. Čere tarduwado Jesus bataru remawuji. Emagere ere tarduwado ia tuwari tuginaiwuji. Egore tameartoruwo tuwadaruji tawo taginorudo. Mare ewadaru ukare turugadu. Mare tagaidure ewadaruji. Dukodire imororamagadure tawagai. Tameartorumode ewadaruji dukeje ewadaru umode tameardaere jiboe pegado. Ewadaru umode tado tawia ra Jesus Cristo bataru piji. Tameartorumodukare ji pugeje. Emode taekiripagado nono awagu rore aredu boetojiwu Eva*11.3-4 Tagaiwodo Gênesis 3 kejewu bataruji tarduwo awu readodaeji. jitu mogadure ure jekiripagado tuwadrarodae tabo dumogadure.

5 Nou boe egore uture Jesus bataru tabowuge enuie pudumi. Egore tumago motuie rugadu Pao Kurireu bataruji boe ewiagai. Mare Pao Kurireu bataru remawu pa? Emago kana Pao Kurireu bataru ji rugadu? Nou uture Jesus bataru tabowu remawu nure imi. 6 Egore iorduwakaie imago motuwo boei. Boe rugadu. Iorduwakare imago motuwo boei rugadu. Mare iorduware jiboe kurire rugadu erduware jiboe kori. Ire tarduwado marigudu. Dukodire tarduware i marigudu. Tarduware boe jokodu jire inagoino tawiagai duji.

7 Imagore Pao Kurireu bataruji tawiagai tarduwawo Jesus bataru pemegareuji. Mare imagokare tai tawo morido inai. Nou iage ere tado morido pudai. Imi ikare ino diero kurido. Nou iage ere to diero kurido. Ča iro pegareu pa? Iro pega karegure tai dukodire ire nono marenarue doge emogadure iwo tawie Jesus bataruji boe pemegawo tai rugadu. 8 Imagore Pao Kurireu bataruji tawiagai mare tagare diero maku inai nou imaragodae moriče. Ia mugu jaereuge meartorure Jesus jiwuge eigoiare ere diero maku inai. Dutabore ire akirodo ikeji inoe rogu boeji imuguwo nono tagabo. 9 Iragojere tagabo dukeje ino diero bokware rugadu. Mare imagokare tai ia tago diero bagai inoče. Nou Macedônia moto kejewuge meartorure Jesus jiwuge etaregodure nouia diero rogu tabo tuwo maku inai iwo akirodo ike roguji inoe rogu boeji. Nono iromode tai pugeje nono nou iro mogadure rugadu. Imagomodukare tai iaboe bagai inai rugadu. 10 Jesus Cristo bataru remawu meture itaora tada rugadu. Dukodire imode iwadaru udo turugadu tawiagai. Awu irore jiboe imagomodukare tai tawo morido inai. Tamodukare iwarigu awu irore aino dupiji. Acaia moto kejewuge eiamedu boe emodukare iwarigu awu irore aino dupiji rugadu. 11 Inogwamagudukare tai diero bagai dukodire ia tagi tameardaere imeardu kurikare tai duji. Dukodiba tameardaere aino? Imeardu kurire tai dukodire irore aino tai. Pao Kurireu jorduware boe jokodu jire inagoino tai duji.

12 Iromode nono awu irore jiboe mogadure rugadu. Iage egore uture Jesus bataru tabowuge enuie pudumi. Mare pagare egoino. Dukodire itaidukare boe emeartoruwo nou boei. Nono eroiwamodukare tumago pemegawo turore jiboeji. Enogwa aregodumodukare čemagore jiboe ka. Emago pagarumode tawiagai. 13 Uture Jesus bataru tabowuge remawuge karegure emage. Ewadrarodure turore jiboeji boe ewiagai. Etaidure tuwo boe ekiripagado. Egore uture Jesus bataru tabowuge enuie pudumi. Mare pagare egoino. Ere tudo nono uture Jesus bataru tabowuge emogadure. Mare pagare egoino. 14 Mare paga karega. Erore nono tugimijera pegareu ro mogadure. Ekimijera Satanás umode tudo nono baru tadawu jorugu pemegareu mogadure jamedu boe emeartoruwo pudui dubagai. Umode turo pemegado boe egai boe ewo tie mekido tiagwai. Emeartoruwo tu pudui. Emeartorukawo Pao Kurireuji pugeje. 15 Dukodire nou boe erore nono nou tugimijera Satanás ro mogadure. Ere tudo nono ro pemegareuge emogadure. Mare pagare eroino. Toro ia meri keje boe pegamode ei rugadu nou ero pegareu jamedu boe moriče.

16 Iwo tawie pugeje. Jorduwa bokwareu karegure imi rugadu. Mare imago pemegamode irore jiboeji nono nou jorduwa bokwareuge emago mogadure. Dukodire tameardaemode jorduwa bokwareu nure imi duji. Mare tawiapaga pemegado iwadaruji tameartoruwo i nono tameartoru moga nou jorduwa bokwareugei dumogadure. 17 Pagimijera Jesus aidukare imago pemegawo irore jiboeji. Mare tameartorure nouia jorduwa bokwareugei. Jorduwa bokwareuge nure emage. Mare tameartorure ei. Dukodire imagomode nono emago mogadure tameartoruwo imagore jiboeji jamedu. 18 Mare mako pemegare turo jiwuge emagare. Dukodire inagomode nono ego mogadure. 19 Tameardaere tarduwaie rugadu. Mare tameartorure jorduwa bokwareugei. 20 Boe etaidure tuwo tudugaregedo tagi. Nono tamaragodure etai. Etaidure tuwo toe kurido tagoe tabo. Nono tare tagoe maku etai. Ere taro akedudo. Nono tarokare boeji pugeje. Egore maragodu bokwareuge enuie tagi. Mare tamagokare boeji ewadaru jipagi. Ere boe pegado tai mare tamagokare iaboeji ei. 21 Ipogurure imago pemegawo irore jiboeji mare čerokare nono nou boe erore jiboe umogadure. Emago pemegare turore jiboeji mare ero pegare rugadu. Imi imagore boe remawuji. Du inodu tabo imago pemegamode irore jiboeji rugadu nono nou jorduwa bokwareuge emago mogadure tarduwawo imago jetoronure duji. 22 Nou boe egore Judeu doge enuie pudumi. Judeu nure imi jamedu. Nou boe egore Pao Kurireu uwobe enuie pudumi. Pao Kurireu uwobe nure imi jamedu. Egore Abraão uwobe enuie pudumi. Abraão uwobe nure imi jamedu. 23 Egore Jesus Cristo utugarege enuie pudumi. Mare Jesus Cristo utugare remawu nure imi rugadu. Itaidukare imagowo aino. Imagore nono ia jorduwa bokwareuge emago mogadure. Nou boe egore tumaragodu rakaie. Mare imaragodae kodure emaragodae kori. Boe ere itugu baičoreuto. Boe ere boeto i barogo biri tabo dukejere ere tuiago iwido tu tu je. 24 Judeu doge ere barogo biri to i du oto padure kejewure 39. Du ere to idu ure ikera aboudure. 25 Romano doge ere iwara to i du ure pobe metia bokware. Ia boe eidore tori tabo i tuwo iwido rugadu. Iture tabowu ikarereu doge ere pobe metia bokware duwuge ewogware poboto itabo. Ipadure pobo maereu tada merire mito i boečore mito i jamedu pobo maereu tada. 26 Iture Jesus bataru tabo rugadu dukejere boe pegare i rugadu. Iwikare poboto. Iwogu kigodureuge ero pegare i jamedu. Iwobe Judeu doge ero pegare i jamedu. Boe tuginaiwuge ero pegare i jamedu. Itaregodure ba kurireuto dukeje ba kurireu kejewu boe ero pegare i jamedu. Boe pegare i itura maereu tada jamedu. Boe pegare i pobo maereu tada jamedu. Boe egore imedage enuie pudumi mare ere iordudo boe pegareuji rugadu. 27 Nou imaragodae tore inudu pemegakare, inogwage pemegakare, ikudukare poboče, iwai bokware, ikudau areia bokware. 28 Boe pegare i rugadu. Mare imororamagadure toro meartorure Jesus jiwuge eiamedu boe ewagai jamedu. Nou inodu ure imororamagadudo rugadu. 29 Boe eragakare dukodi čare iraga akedure ipiji jamedu. Boe ere ekiripagado ero pegawo rugadu dukodire ikiarigodure rugadu nou inoduji jamedu.

30 Imago pemegamode irore jiboeji dukeje inogwa jetumode tu aino boere i duji. Dukodire tarduwamode iraga akedure ipiji duji. 31 Iwadrarodukare. Pao Kurireu jorduware boe jokodu jire inagoino duji. Pagimijera Jesus uo nure ema rugadu. Boe emago pemegawo ji rugadu jii toro. 32 Marigudu iragojere Damasco ba kurireu keje dukeje nou moto kejewu boe eimijera kurireu iere Aretas. Nou Aretas ure ia timedia jetudo nou Damasco ba kurireuji boe eimijera governador uwo ema nono nou ba kurireu keje. Nou Damasco ba kurireu kejewu boe eimijera governador makore tugobaigaregei eduwo nou ba kurireu bai poro keje taiwo tabo iwagai tuwo tugeragu i tuwo itugu baičoreuto. 33 Mare boe ere irawuje moto ri aogejewu tuwai poro piji kadarabo kurireu tabo bukigu tabo toro moto ka. Dukodire ire ikinorudo nou boe eimijera pegareu piji.