2 João
João Ure Awu Atugoreboe Towuje Jamedu
1
Meartorure Jesus jiwuge eimijera nure imi. Inure awu atugoreboe pemegado iwo maku tagai. Muga paje nure aki. Pao Kurireu ure tugeragu ai. Muga paje ore nure tagi. Pao Kurireu ure tugeragu tai jamedu. Imeardu kurire tai rugadu. Jorduware boe jokodu jiwuge eiamedu emeardu kurire tai rugadu. Parduware boe remawuji. Metumode pagabo jii toro. Akedumodukare.
Dukodire Pao Kurireu umode turo pemegareu maku pagai. Okudugodumode pagabo. Umode pabemegado pudui. Umode pabemegado pui. Pao Kurireu Onaregedu Jesus Cristo romode pai nono tuo ro mogadure rugadu. Boe remawu jire eromode pai rugadu. Emeardu kurire pai dutabore eromode aino pai.
Parduwawo Boe Remawuji. Parduwawo Pameardu Kuriwo Boei.
Iorduware ia akore erore nono Boe Remawu ro mogadure. Emeartorure Pao Kurireu bataruji rugadu. Dukodire iagarere i rugadu. Dukodire inagoino. Pameardu kuriwo pui. Awu ire maku akaiwu iwadaru maiwu karega. Makudure pagai boetoji. Pameardu kurimode aino pui dukeje pameartoruwo Pao Kurireu bataruji jamedu. Emare ure pawie marigudu paiamedu boe pameardu kuriwo pui rugadu.
Ure boe ekiripagadowuge emagare. Eture moto jamedu boe parugajeje. Emagere egore Jesus Cristo nuie ia boe etuwariče. Emeardaekare emaie rugadu duji. Ainore etaidure tuwo boe ekiripagado. Erdu pegare Jesusji. Dukodire taeku jado. Tagaba tagera ra taro pemegareu piji. Taro pemegareu moridodumode tagai rugadu.
Meartorukare Jesus Cristo bataru jiwu meartorumode ia bataruji jamedu. Meartorure ia bataruji pugeje dukeje mugukare Pao Kurireu apo. Meartorure tu Jesus Cristo bataru jiwu mugure Pao Kurireu apo, Onaregedu apo. 10 Dukodire ia boe etaregodumode tawaito tuwo tarduwado ia bataruji tuwo taekiripagado dukeje tagaba eremo tawaito. Tagimadukaba ebo. 11 Mare tagimadumode ebo dukeje tamode tamedagedo emage. Tagimadumode ebo dukeje tamode ero pegareu maedo. Dukodire inagoino. Tagimadukaba ebo.
Bataru Urugadureu
12 Iwadaru kurire imagowo tai. Mare imodukare bu bapera keje. Dukodire itaidure itaregoduwo tagae iwo tawie. Dukejere paegaremode pui rugadu.
13 Pao Kurireu ure tugeragu atuieji marigudu. Nou atuie ore etaidure tugimaduwo tawagai rugadu.