1 Judas nure imi. Tiago uwie nure imi. Jesus Cristo utugare nure imi.

Ire awu atugoreboe pemegado iwo maku Pao Kurireu makore bagaiwuge meartorure Jesus jiwuge ewagai. Pao Kurireu makore bagaiwuge nure tagi. Pao Kurireu meardu kurire tai rugadu. Jesus Cristo aiwo pemegare tai rugadu.

2 Pao Kurireu okudugoduwo tagabo rugadu, uwo tabemegado pudui rugadu, meardu kuriwo tai rugadu jii toro rugadu.

3 Imeardu kurire jiwu imedage nure tagi rugadu. Imeardaere iwo atugoreboe pemegado iwo tarduwado Jesus rore paidu jiboeji. Pameartorure Jesusji dukodire ure paginorudo pawarigudukawo bope doge eda kejewu joruto paro pegareu moriče. Itaidure iwo nou inodu bu awu atugoreboe keje. Mare iorduware batrarodureuge etaregodure tagae dukodire ire awu atugoreboe pemegado imara tabo iwo taragado tameartoruwo Jesusji rugadu. Pao Kurireu umodukare ia tuwadaru maku boe etai pugeje. Awu ure maku boe etaiwu tuwadaru ure turugadu boe emeartoruwo ji rugadu jii toro rugadu.

4 Mare ia meartorukare Pao Kurireu jiwuge ere bato pui toro tagae. Mare tagare taeku jado ei nou emeardaeji emagore jiboeji. Emagore Pao Kurireu bataruji mare ere nou tumagore jiboe mekido Pao Kurireu bataru remawu piji. Egore boe emeartorukaiago tu Jesus Cristoji emeartoruiago toro iaji jamedu. Egore Pao Kurireu kaieguie ema. Etaidukare tuwo tugera ra turo pegareu piji. Dukodire egoino. Egore Pao Kurireu ro pemegaie boei dukodire Pao Kurireu umodukaie boe ero pegareu morido etai. Egore boe ero pegamoduie du pegakaie. Egore pegakaie boe eribariwo tumugukare apowugei. Egore nono mare pagare egoino. Marigudu Pao Kurireu ure mariguduwuge ewie nuba turomode awu batrarodureugei. Akore turo pegamoduie ei nou ewadrarodae moriče. Mare pameartorure Jesus Cristoji rugadu. Pagimijera Kurireu nure ema. Pameartorumodukare iaji toro.

5 Tarduware awu iwadaruji marigudu. Mare itaidure iwo tawie pugeje. Marigudu Pagimijera ure Israel doge ekinorudo Egito moto piji. Mare du inodu tabo toro ia meri keje ure meartorukare puduiwuge Israel doge etagedudo.*1.5 Awu Judas readodure jiboe padure Êxodo 12.51 keje, Números 14.29-30 keje jamedu. Tarduware. 6 Marigudu ia Pao Kurireu utugarege baru tadawuge ere tugera ra Pao Kurireu ure maku pudaiwu tumaragodae piji. Boe eimijerage parutowugere emage mare du inodu tabo ere tugera ra Pao Kurireu piji. Dukodire Pao Kurireu ure ekogudo corrente tabo moto kuda boečo tada. Edu kimore nono jii aino. Pao Kurireu umodukare etawuje rugadu jii toro. Ia meri keje Pao Kurireu umode ro pegareuge ero morido etai. Nou meri keje umode nou boečo tadawu tudugarege etawuje tuwo ewarigu bope doge eda kejewu joru pegareuto ero pegareu moriče. Tarduware. 7 Tarduware Sodoma ba kurireu kejewuge erore jiboeji. Tarduware Gomorra ba kurireu kejewuge erore jiboeji.†1.7 Awu Judas readodure jiboe padure Gênesis 19.1-24 keje. Marigudu nou ba kurireu kejewuge erore nono nou baru tadawuge ero mogadure. Eribari kigodure tumugukare apowugei tu tu je. Ere turo pegado pui tieribari tabo. Dukodire ewarigudure bope doge eda kejewu joru pegareuto. Eragojere nou joru tada jii aino boe erduwawo nuba Pao Kurireu romode ro pegareugei. Nou joru akedumodukare jii toro rugadu. Tarduware nou inoduji rugadu.

8 Awu rakojere tagabowuge batrarodureuge erore nono Sodoma ba kurireu kejewuge ero mogadure. Emeartorure tuniauji Pao Kurireu bataru piji dukodire egore tumeartorumodukaie boe eimijeragei, tumeartorumodukaie Pao Kurireu bataruji. Emago pegare Pao Kurireu baru tadawu utugaregei jamedu. Eribarire tuwire epiji dukodire ere boe pegado pudui rugadu. 9 Marigudu Pao Kurireu utugarege baru tadawuge eimijera Miguel urugodure bope doge eimijeraji. Etokire pui Moisés bi keje tuwo tugeragu nou Moisés biji pudae. Mare Miguel ukare tumago pegado nou bope doge eimijeraji. Akore: – Pao Kurireu jorduware turomode ai duji.

10 Mare awu rakojere tagabowuge batrarodureuge emago pegare tuiorduwakare jiboe jamedu boeji. Emeardae bokware nono barogo meardae bokwareuge emogadure. Nou rakojere tagabowu boe emeardae bokware dutabo ero pegare. Nou turo pegareu tabore emode boe pegado pudui. Emage emode turugadu akedudo rugadu. 11 Boe pegamode ei rugadu. Erore nono nou imedu Caim ro mogadure. Etaidure dieroji dukodire ere tumegido Pao Kurireu bataru remawu piji nono nou imedu Balaão ro mogadure. Emeartoru bokware Pao Kurireu bataruji nono nou imedu Corá mogadure. Pao Kurireu ure nou imedu Corá akedudo rugadu. Nono umode awu boe etagedudo jamedu. 12 Nou boe epoguru bokware. Nono etaregodumode tawadae ka togwagewo tagabo tuwo meartorure Jesus jiwugedo pudumi. Mare pagare eroino. Emeardaere tietu pemegawo tu pudui. Ere nono bubutu bokwareu boetugu pegareu mogadure. Boetugumode dukeje boe epagare bubutu bagai mare bakuru umode nou boetugu pegareu barigu toro. Bubutumodukare. Mare boetugu ji karega inagoino. Nou boeire inagoino. Emeardaekare tuwo boe pemegado ia boei. Emeardaere tu tuwo boe pemegado pudui tu rugadu. Dujire inagoino. Ere nono tudu bokwareu i mogadure. Ia i tudumodukare dukeje nou ore i čewu umode nou i kado. Umode tawuje moto piji tuwo barigu toro. Dukodire nou i bimode. Tudumodukare rugadu. Mare i tudu ji karega inagoino. Nou boeire inagoino. Emeardaekare tuwo turo pemegado boei. Dujire inagoino. Dukodire Pao Kurireu umode boe pegado ei. 13 Ere nono pobo maereu mogadure. Bakuru rakareu jetumode pobo maereuji dukeje umode pobo barigu toro boe ao ka. Ure padaru kuru barigu pobo ao ka. Mare pobo maereu ji karega inagoino. Boe erdure ero pegareuji mare du inodu tabo nou ro pegareuge epogurukare turore aino duji. Dujire inagoino. Ia kuieje doge ekodure tumuga piji meru pagawo baru oiaji. Du nou boe ere nono nou kuieje doge emeru paga dumogadure. Mare kuieje ji karega inagoino. Pao Kurireu ure ia boečo pegareudo turugadu nou inagoino jiwu boe ewariguduwo to. Ewarigudumode to dukeje eragojemode tada jii toro rugadu. Boečore nono. Boečore rugadu. Eragojemode nono boečo tada jii toro rugadu. Dujire inagoino.

14-15 Imedu boetojiwu Adão boe etuo nure ema. Ia onaregedu iere Enoque. Awu Enoque ure boe ewie nuba Pao Kurireu romode ro pegareugei. Akore: – Pagimijera aregodumode baru tadawuge tudugaregebo. Nou baru tadawuge utugarege emagamode rugadu. Emagamode emagamode rugadu. Etaregodumode taiwowo ro pegareuge ewagai, tuwo boe pegado nou ro pegareugei ero pegareu moriče. Ro pegareuge ero pegare. Ro pegareuge emago pegare Pao Kurireuji. Dukodire Pao Kurireu umodukare ekinorudo. Umode boe pegado ei ero pegareu jamedu boe moriče.‡1.14-15 Awu Enoque makore jiboe padure Judeu doge eno bakaru keje Padukare Pao Kurireu bataru keje. Mare aino Pao Kurireu Uwari ure awu Judas batarudo aino Pao Kurireu bataruwo awu bataruče.

16 Awu ro pegareuge emago pegare boe emeardaeji. Emago pegare boe erore jiboeji. Egore turo pegakaie mare ia boe ero pegaie. Emeartorure tu tumeardae pegareuji. Emago pemegare turoji. Ere tuwadaru motudo ia boei. Egore nou boei: – Tamodure, tabemegare.

Mare pagare egoino. Etaidure tuwo boe eimijeragedo pudumi. Boe emeartoruwo pudui du bagaire eroino.

17 Mare imeardu kurire jiwu imedage nure tagi. Boe ere tarduwado Pagimijera Jesus Cristo bataru remawuji. Uture Jesus bataru tabowuge nure emage. Tawiagodukaba nou ere tarduwado jiwu ewadaru piji. 18 Egore: – Awu moto puredugodumode tageduwo dukeje boe ekadakagirimode tai rugadu. Boe emeartorumode tu tumeardae pegareuji turo pegawo tu tu je.

19 Awu egoino jiwuge etaidure tuwo boe emeardae pegado pui. Ewiapagare tu taidure jiwu tumeardae pegareuji turo pegawo tu tu je. Pao Kurireu Uwari rakojekare ebo. 20 Mare imeardu kurire jiwu imedage nure tagi. Tameartoru kurido Jesusji. Tamagodo pui tameartoruwo tu Jesusji rugadu. Tamagodo baruto Pao Kurireu bagai Pao Kurireu Uwari meardae tabo. 21 Pao Kurireu meardu kurire tai rugadu. Dukodire tameardu kurido Pao Kurireuji jamedu jii toro Jesus Cristo aregodumode tawagai du ka. Pagimijera nure ema. Emare okudugodure pagabo dukodire umode paginorudo. Umode paewodudo pawikawo pugeje pamuguwo pudabo jii toro rugadu.

22 Ia boe emororamagadure Jesus bataruji. Emeartoru rakakare Jesusji. Du tagogududo ebo. 23 Ia boe emeartorukare. Tamagodo ei emeartoruwo Jesusji rugadu. Emeartorumodukare dukeje ewarigudumode bope doge eda kejewu joru pegareuto. Ia boe emeardaere tu turo pegawo aremei. Tagogududo ebo jamedu. Mare taeku jado emeardaere jiboeji. Ewiapagare tumeardae pegareuji tu tu je tieribari kigoduwo aremei. Dujire inagoino. Tawiapagakaba emeardaeji rugadu. Nou emeardae barigu tabiji rugadu.

24-25 Pao Kurireu ure mitotu je. Tu emare umode boe ekinorudo boe ewarigudukawo bope doge eda kejewu joru pegareuto. Emare jetu pemegamode tai tameartoru raiwo Jesusji. Umode taro pegareu jamedu boe barigu tabiji tuwo tadudo pudae. Taegaremode tai rugadu umode tadudo pudae duji. Emare rakojere boe pemegareu keje rugadu. Emare umode paginorudo rugadu. Jesus Cristo bitodure ipo padure pugajejewu keje paro pegareu moriče. Pagimijera nure ema. Boe eiamedu boe emago pemegawo ji. Boe eiamedu boe ewo ie kurido. Boe eiamedu boe erduwawo Pao Kurireu nure ema duji rugadu. Ia bokware rugadu. Boe eiamedu boe erduwawo boe rakareu nure ema rugadu. Boe eiamedu boe emeartoruwo ji rugadu jii toro. Pao Kurireu nure ema rugadu marigudu. Pao Kurireu mode ema jii toro rugadu. Akedumodukare rugadu. Ainore ure rugadu!

Ča iwadaru urugadureu.