1 Nono itaiwore pugeje. Iordure Pao Kurireu utugarege baru tadawugere pobe puibiji duji. Eragojere moto jamedu boe parugajeje. Ere tugeragu bakuruji. Dukodire bakuru akedure rugadu. Bakuru bokware pugeje. Bakuru jetukare motoji, poboji, ituraji. 2 Pao Kurireu ure nou tudugarege ere pobe puibijidu eragado tuwo moto pegado, pobo pegado. Nono iordure ia Pao Kurireu utugare baru tadawuji. Meri rutu pijire aregodure. Umode Pao Kurireu ie bu meartorure Pao Kurireu jiwuge eri keje. Dukodire makore nouia baru tadawugei. 3 Akore: – Kajao. Tagaba moto pegado, pobo pegado, iguru pegado raga. Pamode Pao Kurireu ie bu meartorure Pao Kurireu jiwuge eri keje.

4 Kodire ere iwie Pao Kurireu ie padure kejewu boe enodo padu kejewure 144,000 boe. Nou 144,000 boe Israel dogere emage. Israel doge etumana mage enodo padu kejewure doze. 5-8 Eiere Judá, Rúben, Gade, Aser, Naftali, Manassés, Simeão, Levi, Issacar, Zebulom, José, Benjamim. Nou 144,000 boe epijire Judá uwobe enodo padu kejewure 12,000. Rúben uwobe enodo padu kejewure 12,000. Gade uwobe enodo padu kejewure 12,000. Aser uwobe enodo padu kejewure 12,000. Naftali uwobe enodo padu kejewure 12,000. Manassés uwobe enodo padu kejewure 12,000. Simeão uwobe enodo padu kejewure 12,000. Levi uwobe enodo padu kejewure 12,000. Issacar uwobe enodo padu kejewure 12,000. Zebulom uwobe enodo padu kejewure 12,000. José uwobe enodo padu kejewure 12,000. Benjamim uwobe enodo padu kejewure 12,000 jamedu.

9 Ča itaiwore pugeje. Nono iordure ia boei. Emagare rugadu. Boe eroiwakare tuwo awu boe eremagu. Moto jamedu boe pijire etaregodure. Eragojere nou boe eimijera kurireu muga jokorai, Cordeiro Jesus jokorai. Ekudau areia pemegareu kigadure. Ekedure bai oroji. 10 Ewadodu rakare. Egore: – Pao Kurireu mugure boe eimijera kurireu muga ira keje. Emare umode boe edo činorudo! Cordeiro Jesus umode boe edo činorudo!

11 Nou ere taiado Pao Kurireu apowuge ere tubu jodo nou boe eimijera kurireu muga jokorai. Pao Kurireu utugarege baru tadawuge enure emage. Nouia boe eimijerage ere tubu jodo nou boe eimijera kurireu muga jokorai. Nou baregere pobe puibijidu ere tubu jodo nou boe eimijera kurireu muga jokorai jamedu. Eiamedu boe emago pemegare Pao Kurireuji. 12 Egore: – Ainore ure rugadu. Boe emago pemegawo tugimadu tabo Pao Kurireu apo. Boe ewo Pao Kurireu ie kurido rugadu. Boe erduwawo Pao Kurireu jorduware boe eiamedu boe ekori. Boe erduwawo Pao Kurireu pemegare rugadu duji. Boe erduwawo Pao Kurireu raka kodure boe eiamedu boe ekori duji. Ainore Pao Kurireu ure. Ainore Pao Kurireu umode jii toro rugadu. Akedumodukare rugadu. Ema nure ema rugadu.

13 Nono ia boe eimijera unarare i. Akore: – Ioguduba boeba enure nou ukudau areia kigadureugeče? Kaibowu boeba enure emage?

14 Inagore: – Iorduwakare. Aki arduware rugadu.

Nono akore: – Iorduware. Nou boe emeartorure Pao Kurireuji dukodire boe pegare ei. Mare Pao Kurireu ure edo činorudo. Cordeiro Jesus bire emugato boe ero pegareu moriče. Dukodire Pao Kurireu ure ero pegareu kabi epiji nou Cordeiro Jesus ku tabo nono boe emode tugudau areia kabi dumogadure. 15 Dukodire eragojere aino Pao Kurireu muga ira jokorai uwai tada turowo nono Pao Kurireu aidu mogadure meriji, boečoji. Ema rakojemode ebo rugadu boe pegakawo ei pugeje. 16-17 Cordeiro Jesus rakoje puredure nou boe eimijera kurireu muga iraji. Emare jetu pemegamode ei jamedu. Umode erego pobo pemegareuto. Ekudumode nou poboče dukeje ewimodukare pugeje. Dukodire boe eke boeimodukare ei pugeje. Pobo boeimodukare ei pugeje. Meri umodukare ekowu pugeje. Joru umodukare ekowu pugeje. Pao Kurireu umode ekiarigodu barigu epiji etragudukawo pugeje.

Ainore nou boe eimijera akore.