Ⅰ Yĩ bakɔba kĩ maátunɔ kalɛ, mitatɛ odi nyɛ odi kĩ yalɛ kĩ Baguma Hũhũ deĩ nɛ ye kamɛ mido, mbom misɔ ye midã ntɛ hũhũ a kĩ edeĩ nɛ ye kamɛ a to Baguma sɛkɛ̃. Kitonɛkĩ fɔvã onukpɛ̃ banyɛnɛ pii nɛ bɛtsɛ̃ bamini nɛ katinya kamɛ. Ⅱ Ade fukĩĩ míakɔa minyi ntɛ Hũhũ a to Baguma sɛkɛ̃ a. Hũhũ adi nyɛ adi kĩ yalɛ kĩ Yesu Kristo ya nɛ katinya kamɛ ndɛ otidziwa aye ni, eto Baguma sɛkɛ̃. Ⅲ Lɛmɛ hũhũ adi nyɛ adi kĩ yaádi Yesu akũ adansiɛ ni, ɛtáto Baguma sɛkɛ̃. Ade ekĩĩ nyɛ Kristo okesĩnɛ hũhũ a kĩ minu kĩ yaaya a, ade finyaakĩĩ malo ɛya edeĩ nɛ katinya kamɛ kɔkɔɛ.

Ⅳ Lɛmɛ yĩ babi, Baguma bade mianɛ, ade minya fɔvã onukpɛ̃ banyɛnɛ a akũ, kitonɛkĩ Hũhũ a kĩ edeĩ nɛ mi kamɛ a bɛ̃ hũhũ a kĩ edeĩ nɛ katinya kamɛ bati kamɛ a. Ⅴ Ayekĩ katinya kamɛ bati banɛ sũ ni, fɔvã onukpɛ̃ banyɛnɛ a alɛ kɔdzɛla nɛ katinya kamɛ fɔtsa odi akũ, ade katinya kamɛ bati a atse be ɔlɛdo a. Ⅵ Lɛmɛ boe kɔ̃ ni, Baguma bade bɔanɛ. Odi nyɛ odi kĩ ɛnyina Baguma ni, yatse boe ɔlɛdo, lɛmɛ odi nyɛ odi kĩ ɛnyɛ́ Baguma ode ni, yaátse boe. Foesũ fukĩĩ bɔ́akɔa bɔmɔ́ ɔnɔkɔali Hũhũ mɔ fɔvã hũhũ.

Ⅶ Bakɔba kĩ maátunɔ kalɛ, mifɔ̃ bɔwɛ akũ kalɛ, kitonɛkĩ Baguma sɛkɛ̃ ɔdɔ to. Odi nyɛ odi kĩ yawɛ bati kalɛ ni, Baguma obi yanɛ ade enyina Baguma a. Ⅷ Odi nyɛ odi kĩ yaáwɛ bati kalɛ ni, enyína Baguma kitonɛkĩ Baguma nyɛ ɔdɔ. Ⅸ Ayekĩ Baguma nyɛ ye ɔdɔ ɛtsa boe nyɛ kĩ edo ye Obi mɔapɛ nɛ katinya kamɛ, fɔtsɛ̃ ye akũ ni, bɔna nkpã kĩ ɛla kawũna a. Ⅹ Ade fukĩĩ kamɛ bunyi lɛtsa a kĩ liti lɛnyɛ ɔdɔ a. Nnɛ́ ayekĩ bɔwɛ Baguma kalɛ, mbom ayekĩ Baguma wɛ boe kalɛ, edo ye Obi kĩ ɛnya oti kĩ yaatsã ye akũ ɛkɔa boe tɔkpa ete boe.

Ⅺ Yĩ bakɔba kĩ maátunɔ kalɛ, ntɛ aye Baguma wɛ boe kalɛ kɔ̃ ni, kɛfɛta kĩ boe malo bɔawɛ akũ akũ kalɛ. Ⅻ Odima támɔ tɔ̃ Baguma. Lɛmɛ ntɛ bɔawɛ akũ akũ kalɛ ni, kekɔ̃ Baguma deĩ nɛ boe kamɛ, ade ɛkɛna ye ɔdɔ a ɛkpɔla nɛ boe kamɛ a.

ⅩⅢ Bɔtɛ budo kĩ budeĩ nɛ Baguma kamɛ, ade ye malo edeĩ nɛ boe kamɛ a, kitonɛkĩ ɛkɔa ye mɔawɛ Hũhũ ɛkpa boe. ⅩⅣ Bɔmɔ́ fukĩĩ ade bude lɛtsã nɛ foe akũ bɔkpa bati kĩ Ɔlɛga a do ye Obi kĩ ɛyaanya katinya kamɛ Ɔtɛnɛ. ⅩⅤ Odi nyɛ odi kĩ ebinya ye kamɛ ɛlɛ kĩ Yesu nyɛ Baguma Obi ni, Baguma deĩ nɛ ye kamɛ ade ke ye malo edeĩ nɛ Baguma kamɛ a. ⅩⅥ Boe mɔawɛ a bunyina ade bɔtɛ Baguma ɔdɔ a kĩ edeĩ ɛkpa boe a budo a.

Baguma nyɛ ɔdɔ, ade odi nyɛ odi kĩ yawɛ bati kalɛ ni, edeĩ nɛ Baguma kamɛ ade Baguma lɛmɛ deĩ nɛ ye kamɛ a. ⅩⅦ Ade fukĩĩ kamɛ ɔdɔ a aakpɔla nɛ boe kamɛ ayekĩ bɔ́ado ɔwɔlɛ nɛ Kadzɛ Luwi a akũ, kitonɛkĩ boe nkpã kadzi kamɛ nɛ katinya kĩĩ kamɛ ketimɔ Kristo ade a. ⅩⅧ Libe lɛláa ɔdɔ kamɛ, mbom ɔdɔ a kĩ ɛkpɔla a, ablɔmɛna libe nɛ bati kamɛ. Nɛ foesũ odi nyɛ odi kĩ yavila ni, ye ɔdɔ tákpɔla kitonɛkĩ libe mɔ sɔtɔ kavɛlɛ tsɛ̃.

ⅩⅨ Bɔawɛ Baguma kalɛ kitonɛkĩ ye lɛnya lɔtɔ ɛwɛ boe kalɛ. ⅩⅩ Ntɛ odi lɛ kĩ, “Mawɛ Baguma kalɛ” lɛmɛ yakesĩ ɔwaɛ̃ ni, ɔvãlɛvã yanɛ. Kitonɛkĩ odi nyɛ odi kĩ yaáwɛ ɔwaɛ̃ a kĩ yamɔ mɔ anɛ kalɛ a, lɛláapuli ɛwɛ Baguma kĩ yaámɔ mɔ anɛ a kalɛ. ⅩⅪ Mbla a kĩ Kristo kpa boe nyɛ kĩ odi nyɛ odi kĩ yawɛ Baguma kalɛ ni, ɛwɛ ɔwaɛ̃ lɛmɛ kalɛ.