Ⅰ Nwaɛ̃ amɛ, ke kawũna a, mikɔlɛ mitomɛna boe sɛkɛ̃ ayekĩ míadzi nkpã kĩ yaawo Baguma anɛ. Ade aye midzi kɔkɔɛ a, lɛmɛ bɔado mi fi, nɛ boe Ɔlate Yesu dĩ akũ kĩ mikɛna fɔba lɔmɔ. Ⅱ Minyina fɔtsa a kĩ foe bɔtsa mi nɛ boe Ɔlate Yesu dĩ akũ a. Ⅲ Baguma awɛ kĩ mi akũ ɛkpalɛ nɛ linyolewɛ mɔ litsolewɛ akũ. Ⅳ Onyole nyɛ onyole enyi ɔtsɔ̃ kapi wĩ nɛ kukũkpalɛ mɔ obu kamɛ, Ⅴ ɛtatomɔ sukɛna fɔwɛtsa ɔmɛnɛ liti ndɛ bikĩ binyína Baguma aye. Ⅵ Nɛ fɔlɛtsa kĩĩ akũ ni, odima ɛtakɛna tɔkpa nɛ ɔkɔba akũ ĩye esisi ye. Bubi mi fukĩĩ tɔ̃, buke mi awɛ nɛ akũ mɔ ɔsĩ mɔ ɔsĩ kĩ boe Ɔlate aavɛlɛ bikĩ bakɛna fɔtsa kĩĩ bamɛ a sɔtɔ. Ⅶ Baguma távɛ boe kĩ bɔnya bati kĩ be akũ deĩ efĩĩ, mbom bɔnya bikĩ be akũ kpalɛ. Ⅷ Nɛ foesũ ntɛ odi sĩ nhihiɛ kĩĩ akũ kakɛna ni, nnɛ́ otidziwa esĩ, mbom eyidza ɛdza nɛ Baguma kĩ yakɔa ye Hũhũ Kpalɛwa kakpa mi a akũ.

Ⅸ Nɛ mi bawaɛ̃ batɛ badonɛ akũ kalɛkawɛ akũ kɔ̃ ni, fɔtásĩ kĩ matsɛlɛ litsedi nɛ foe akũ, kitonɛkĩ Baguma tsa mi kɔkɔɛ kĩ miwɛ mi akũ kalɛ. Ⅹ Fɔnyɛ ɔnɔkɔali kĩ miawɛ mi bawaɛ̃ batɛ badonɛ flee a kĩ bideĩ nɛ Makedonia flee a kalɛ, lɛmɛ bɔake mi aduli kĩ mikɛna foe fɔba lɔmɔ. Ⅺ Mi botaɛ fɔnya kĩ miadzi nkpã nɛ akũ kadɔla kamɛ, odi nyɛ odi ɛdã ye adzuma. Mikɔa awɛ mikɛna mi mɔawɛ adzuma minya ndɛ ayekĩ bubi mi a. Ⅻ Fukĩĩ aafɔ̃ bikĩ bɛnyɛ́ batɛ badonɛ a lɛkpa mi obu, lɔkɔa miláakɔa anɛ mite nɛ odima lɛtsama akũ.

ⅩⅢ Nwaɛ̃ amɛ, bɔawɛ kĩ bɔabi mi lɛtsa kĩ laaya nɛ bati kĩ biku bɛtɛ̃ a akũ, ayekĩ miláadzi nɛ ayɔlɔhɔ kamɛ ndɛ bati kĩ bɛlá kɔnɛte. ⅩⅣ Bɔtɛ budo kĩ Yesu ku ade ebuki eyidza edzi nkpã a. Foesũ bɔtɛ budo kĩ batɛ badonɛ flee a kĩ biku a ni, Baguma aafɔ̃ Yesu lɛkpã be ɛyamɛna nɛ ye kaya kamɛ. ⅩⅤ Lɛtsa a kĩ bɔatsa mi finyaakĩĩ nyɛ boe Ɔlate fɔtsa katsa, kĩ boe a kĩ bɔ́adzi nkpã nɛ luwi a kĩ boe Ɔlate aaya akũ a ni, bɔláanya bikĩ biku a lɔtɔ mɔ ode kanaa. ⅩⅥ Nɛ lɔkɔ a na ni, bɔ́anu boe Ɔlate kaya a mɔ fɔwɔla kɔɔba. Bɔ́anu ode fɔtɔ ɔnyanɛ ɔnɔkɔɛ̃ a odo. Baguma kagbulɛɛ aanɛ, lɔkɔa boe Ɔlate mɔawɛ aato ode ɛya. Bati a kĩ bɛtɛ Kristo bido fɔmɔ biku a aanya lɔtɔ biyidza. ⅩⅦ Ke liti a, Baguma aakpɔta boe a kĩ bute budzi nkpã a ɛnaabumɔ bikĩ biyidza a, bɔnaatsɛlamɔ boe Ɔlate nɛ odetɔ́ kamɛ. Lɔkɔa bɔ́adzi nɛ boe Ɔlate a sɛkɛ̃ daa. ⅩⅧ Foesũ mikɔa fɔlɛtsa kĩĩ mikaadɔla mi bawaɛ̃ tɔwɔlɛ.