ADZUMA
Fɔtɔ Banyanɛ a Tudzuma
Ⅰ
Ⅰ-Ⅱ Nwaɛ̃ Tiofilo, nɛ yĩ ovoli ɔtɔnyade a kamɛ a, ntsɛlɛ ntsa lɛtsa nyɛ lɛtsa a kĩ Yesu kɛna mɔ fukĩ ɛtsa, kito nɛ lɔkɔ a kĩ eyi ye adzuma kayɔ, kɛnawo lɔkɔ a kĩ Baguma bɔɛ ye ɛnamɛna ode. Fɔmɔ Baguma bɔɛ ye bɛnamɛna ode a, Yesu tsã Hũhũ Kpalɛwa kɔbɛ̃ akũ ɛtsa ye fɔtɔ banyanɛ a kĩ ɛpau a fɔtsa. Ⅲ Nɛ ye wuda liti a, ɛnyɛ ye akũ ɛtsa be nɛ tisi pii akũ nɛ fuwi tɛna kamɛ, kĩ atsindze katɛ lɛláa foe kamɛ kĩ edzi nkpã. Ɛlɛmɔ bikĩ bɛmɔ́ ye a kɔdzɛla nɛ Baguma lɛgãkanyakɔ̃ fɔlɛtsa a akũ. Ⅳ Lɔkɔ a kĩ bɛkpɔta a, esi be mbla kĩ, “Mitadzakũ nɛ Yerusalem, mbom midzi midzɔlɛ Hũhũ Kpalɛwa a kĩ mbi mi kĩ yĩ Ɔlɛga lɛ eyi kĩ yaakpa mi a kaya. Ⅴ Yohanes kɔ̃ ni, mui ɛkɔa ɛwɔla bati. Lɛmɛ nɛ fuwi lukũ kamɛ ni, Baguma aakɔa Hũhũ Kpalɛwa ɛwɔla mi.”
Baguma Bɔɛ Yesu Ɛnamɛna Ode.
Ⅵ Lɔkɔ a kĩ Yesu mɔ ye fɔtɔ banyanɛ a buki bɛkpɔta a, bivia ye kĩ, “Boe Ɔlate, mbɔɛɛ finyaakĩĩ ɔwɛ kĩ ayaamunikimɔ Israelfɔ lɛgãkanyakɔ̃ a ɔkpa be?”
Ⅶ Ade Yesu bi be kĩ, “Fɔtásĩ kĩ mianyi lɔkɔ ĩye fuwi a kĩ yĩ ɔlɛga lɛ eyi ɛkpa kĩ litsedi lɛya a nɛ ye kɔbɛ̃ akũ a. Ⅷ Lɛmɛ ntɛ Hũhũ Kpalɛwa a yawo nɛ mi kamɛ ni, yaado mi kɔbɛ̃ lɔkɔa milɛ yĩ fɔlɛtsa a nɛ Yerusalem, mɔ Yudea flee mɔ Samaria, kɛnaawo katinya kamɛ tite kawũnakɔ̃.”
Ⅸ Kĩ ɛlɛ fukĩĩ eyua a nɛ be anɛ kamɛ naa, Baguma bɔɛ ye ɛnamɛna ode, ade ɛyɛla nɛ luflututu kamɛ a.
Ⅹ Kĩ bɛdza bɛkadã koee kĩ yanaa odetɔ́ kamɛ a, lɛtalɛta banyole nviã badi kĩ bideĩ nɛ fɔtsa ovoe kamɛ nyɛ be akũ bɛtsa be, Ⅺ ade bibi be kĩ, “Galileafɔ, nde sũ midzɛ̃ miadã odetɔ́ kamɛ lɔmɔ? Yesu a kĩ Baguma bɔɛ nɛ mi ɔwɛ̃ nɛ awĩ ɛnamɛna ode a, aabuki ɛya nɛ mi sɛkɛ̃ ndɛ ayekĩ mimɔ́ kĩ yanaa ode a.”
Matias Yatɛ Yuda Kadzakɔ̃.
Ⅻ Ke liti a, fɔtɔ banyanɛ kĩĩ dzakũ nɛ Kugua Futse Ɔtɔ akũ a bɛnaa Yerusalem ɔmatɔ kamɛ. Kito awã kɛnawo ɔmatɔ a kamɛ ana ndɛ lisikũ sɛkɛ. ⅩⅢ Kĩ biwo ɔmatɔ a kamɛ a, bɛnaa be kadzikɔ̃ nɛ abansulu kɔla ode. Bati a kĩ bɛna nɛ awã nyɛ Petro, Yohanes, Yakobo, Andrea, Filipo, Toma, Bartolomeo, Mateo, Yakobo kĩ ɛnyɛ Alfeo obi, mɔ Simon kĩ epili ye kade lɔlɔ, mɔ Yuda kĩ ɛnyɛ Yakobo obi. ⅩⅣ Bati kĩĩ flee katsɛna lɔkɔ nyɛ lɔkɔ mɔ kakɔna mɔa, kabɔa mpaɛ kakpa Baguma. Bati a badi lɛmɛ nyɛ batsole mɔ Yesu ɔma Maria, mɔ Yesu bawaɛ̃nyole.
ⅩⅤ Nɛ fuwi a na kamɛ a, bikĩ bɛtɛ bido a tsɛna, be lidede aawo ndɛ bati ɔha mɔ be tɛya. Ade Petro yidza ɛdza ebi be kĩ, ⅩⅥ “Nwaɛ̃ amɛ, kɛnɛ kĩ lɛtsa a kĩ bɛtsɛlɛ nɛ Katsɛlɛ Kpalɛwa a kamɛ, kĩ Hũhũ Kpalɛwa a lɛ eyi ɛtsãmɛna Lɛgã Dawid akũ nɛ Yuda kĩ ye lɛnya bati lɔtɔ bipi Yesu a, fɔya lɔmɔ. ⅩⅦ Yuda nya boe kamɛ ɔmɔa kĩ boe Ɔlate nyɛ ye kĩ ɛkɛna fɔtɔ banyanɛ adzuma.”
ⅩⅧ Lɛmɛ ɛkɛna tɔkpa kĩ ɛnatɛ sika kĩ se bɛkɔa bɛya tite a kĩ te akũ eku a. Ade awã na kĩ eto ode ɛtɔ a, ye lupu tui lɛbɛ̃, ade ke ye fɔmɛtsa flee nɛ fuko nɛ tite a. ⅩⅨ Ye wuda a akũ fɔlɛtsa gba nɛ Yerusalem kĩ odi nyɛ odi nu foe. Foesũ awã kĩ ɛnaku ɛwa a bavɛ ke kĩ Akeldamak, foe kayɔ nyɛ Babɔanɛ Tite.
ⅩⅩ Foesũ Petro buki ɛlɛ kĩ, “Bɛtsɛlɛ nɛ Dawid Tɔnɔ Ovoli a kamɛ kĩ,
‘Mifɔ̃ ye tɔtɔ tɛwa luto,
odima ɛtabuki edzi nɛ te kamɛ.’
Bɛtsɛlɛ lɛmɛ kĩ,
‘Mifɔ̃ oti bɛbã ɛtɛ ye kadzakɔ̃ a.’
ⅩⅪ-ⅩⅫ Foesũ fusĩ kĩ oti bɛbã ɛyaawo nɛ boe kamɛ ndɛ ɔdansini ɛkpa boe Ɔlate Yesu kayidza kato kanɔkpa a. Ade fusĩ lɛmɛ kĩ ɛnya oti kĩ ɛnya boe bati a kĩ bɔtsã butomɛna boe Ɔlate Yesu a kamɛ ɔmɔa, kito lɔkɔ a kĩ Yohanes de lɛtsã nɛ mui kawɔla amaniɛ akũ kɛyawo lɔkɔ a kĩ Baguma bɔɛ Yesu nɛ boe sɛkɛ̃ ɛnamɛna ode a.”
ⅩⅩⅢ Foesũ bɛnyɛ bati nviã ade be nyɛ Matias mɔ Yosef kĩ bavɛ Barsaba kĩ babuki kavɛ Yusto a.
ⅩⅩⅣ-ⅩⅩⅤ Ade bɛbɔa mpaɛ bɛvɛ Baguma kĩ, “Boe Ɔlate, nɔ nyina odi nyɛ odi lɔlɔ kamɛ. Tsa boe bati nviã kĩĩ kamɛ ekĩ ɔnyɛ kĩ ɛdza ndɛ fɔtɔ ɔnyanɛ nɛ kadzakɔ̃ a kĩ Yuda fɔnɛ awɛ eyi ɛnaa awã kĩ kɛfɛta ye a.” ⅩⅩⅥ Kĩ bɛta bavulibi nɛ bati nviã kĩĩ fɔlɔ a, fɔyake nɛ Matias akũ, ade bɛkɔa ye bibumɛna fɔtɔ banyanɛ ewua-odi a akũ a.