Ⅰ Mi Galatiafɔ kĩ minyína kadi! Owei koũ libula mi lɔlɔ kamɛ kade lɔmɔ? Mi mɔawɛ anɛ kamɛ bɛnyɛ bɛtsa mi yededeede ayekĩ bɛbɔa Yesu Kristo nɛ asendua akũ a! Ⅱ Mikpa yĩ kalɛ mɔa kĩĩ mbuayɛ. Baguma Hũhũ a kĩ mitɛ a ni, mbla a akũ mikɛna sũ, mbɔɛɛ kĩ Kalɛ Wĩ a mitse, mitɛ mido sũ mitɛ Hũhũ a? Ⅲ Nde mitɛnɛ kadzimbi lɔmɔ! Mikɔa Baguma Hũhũ a miyi adzuma kayɔ a ni, finyaakɔ̃ miawɛ kĩ miwũna ye mɔ miawɛ kɔbɛ̃? Ⅳ Mbɔɛɛ fɔtsa flee a kĩ foe kamɛ mitsã mitɛ̃ a dani fɔtsa pupulidza? Fɔláanya fɔtsa pupulidza da! Ⅴ Ayekĩ miakɛna nɛ mbla a akũ sũ Baguma kpa mi Hũhũ yakɛna awãwã fɔtsa nɛ mi kamɛ, mbɔɛɛ nɛ ayekĩ mitse Baguma fɔlɛtsa a mitɛ foe mido sũ?

Ⅵ Midã Abraham kadzi kamɛ. Katsɛlɛ Kpalɛwa a lɛ kĩ, “Abraham tɛ Baguma edo, ade nɛ ye katɛkado sũ Baguma tɛ ye ndɛ oti kĩ ɛkpɔla.” Ⅶ Foesũ kɛnɛ kĩ mianyi kĩ bati kĩ bɛtɛ bido nyɛ Abraham babi mɔ bawa. Ⅷ Bɛlɛ nɛ Katsɛlɛ Kpalɛwa a kamɛ biyi kĩ Baguma aakɛna bikĩ bɛnyɛ́ Yudafɔ a bati kpĩĩ nɛ be katɛkado sũ. Ade foesũ Katsɛlɛ Kpalɛwa a bi Abraham Kalɛ Wĩ a kɔkɔɛ eyi kĩ, “Baguma aatsã nɔ akũ ehila katinya kamɛ fude flee.” Ⅸ Abraham tɛ edo ade Baguma hila ye a. Foesũ odi nyɛ odi kĩ ɛtɛ edo ni, Baguma ahila ye ndɛ Abraham aye.

Ⅹ Lɛmɛ bati a kĩ bipi mbla a akũ kakɛna bido mɔ akũ ni, bidum be, kitonɛkĩ Katsɛlɛ Kpalɛwa a lɛ kĩ, “Odi nyɛ odi kĩ yaákɛna nɛ lɛtsa nyɛ lɛtsa kĩ lideĩ nɛ mbla a kamɛ ni, Baguma dumu ye!” Ⅺ Nɛ foesũ finyaa foe kamɛ kpalɛ kĩ odima lɛláapuli ɛkɛna oti kpĩĩ nɛ Baguma anɛ nɛ mbla a akũ kakɛna sũ. Kitonɛkĩ Katsɛlɛ Kpalɛwa a lɛ kĩ, “Oti a kĩ ɛtsã katɛkado kamɛ ɛkɛna oti kpĩĩ nɛ Baguma anɛ a, odi aadzi nkpã.” Ⅻ Lɛmɛ mbla a lɛtsɛ́la oti katɛkado akũ. Mbom Katsɛlɛ Kpalɛwa a lɛ kĩ, “Odi nyɛ odi kĩ yakɛna nɛ mbla a flee akũ ni, yaatsã foe kamɛ edzi nkpã.”

ⅩⅢ Kĩ Kristo yadani fudumutsa nɛ boe lɔlɔ sũ ni, ɛnyɛ boe etomɛna mbla kadumu a kamɛ. Kitonɛkĩ bɛlɛ nɛ Katsɛlɛ Kpalɛwa a kamɛ kĩ, “Odi nyɛ odi kĩ bɛvɛla ye nɛ asendua akũ ni, Baguma dumu ye.” ⅩⅣ Kristo kɛna fukĩĩ ayekĩ Baguma nhila a kĩ ɛlɛ eyi ɛkpa Abraham a aata mɔ bikĩ bɛnyɛ́ Yudafɔ a, ade fɔtsãmɛna Kristo Yesu akũ, bɔ́atsã katɛkado kamɛ bɔtɛ Hũhũ a kĩ Baguma lɛ eyi a.

ⅩⅤ Nwaɛ̃ amɛ, mawɛ kĩ makpa mi kadzi kamɛ nfantuhũ adi. Ntɛ bati nviã kɛna nhihiɛ adi, mɔ bɛtsɛlɛ ovoli bido awɛ nɛ kayɔ ni, odima lɛláapuli ɛnyɛ lɛtsama ĩye ɛkɔa lɛtsa bɛbã ebu. ⅩⅥ Mite anɛ kĩ Abraham mɔ ye obi Baguma kɛna nhihiɛ ɛkpa. Katsɛlɛ Kpalɛwa a tálɛ kĩ, “Abraham babi” kĩ fɔatsa kĩ bati beblebee, mbom ɛlɛ kĩ, “obi” kĩ fɔatsa kĩ oti mɔapɛ. Ade oti kĩĩ nyɛ Kristo a. ⅩⅦ Lɛtsa a kĩ matsa nyɛ kĩ Baguma kɛna nhihiɛ ɛkpa Abraham mɔ ye obi, ade eke otse kĩ yaakɛna nɛ ye akũ a. Foesũ mbla a kĩ Baguma kpa Mose nɛ futeli ɔha ɛna mɔ foe taalɛ liti a, lɛláapuli ɛdani ĩye ɛwɔla Baguma nhihiɛ a. ⅩⅧ Kitonɛkĩ ntɛ Baguma futetsa a tsã mbla akũ ni, kekɔ̃ fubuki fɔtsɛ́ ye nhihiɛ a akũ. Lɛmɛ Baguma mɔawɛ nhihiɛ yanɛ sũ ɛkɔa futetsa a ɛkpa Abraham.

ⅩⅨ Kekɔ̃, litsa sũ bɛkɛna mbla a? Bɛkɛna mbla a bibu ayekĩ oti aamɔ lɛtsa a kĩ lɛnyɛ tɔkpa, ade fɔwaa kɛnaawo lɔkɔ a kĩ Abraham obi a kĩ bɛkpa nhihiɛ a aaya. Baguma ode fɔtɔ banyanɛ lɛkɔa mbla a bɛma oti a kĩ edeĩ nɛ bati mɔ Baguma kayite. ⅩⅩ Lɛmɛ kayite ɔnanɛ tásĩ ntɛ fɔnyɛ kĩ oti mɔapɛ akɛna nhihiɛ, ade Baguma mɔapɛ yanɛ a.

ⅩⅪ Katsa fukĩĩ atsa kĩ mbla a tia Baguma nhihiɛ a? Oowo. Fɔlá lɔmɔ! Kitonɛkĩ ntɛ batidziwa tɛ mbla adi kĩ yaapuli ɛkpa oti nkpã ni, kufɛ odi nyɛ odi aapuli ɛkɛna oti kpĩĩ nɛ Baguma anɛ, ntɛ ɛkɛna nɛ ye akũ. ⅩⅫ Lɛmɛ Katsɛlɛ Kpalɛwa a lɛ kĩ katinya kamɛ flee deĩ nɛ tɔkpa kɔbɛ̃ kayɔ, foesũ futetsa a kĩ Baguma lɛ eyi nɛ Yesu Kristo katɛkado kamɛ a waa fɔkpa bikĩ bɛtɛ bido.

ⅩⅩⅢ Lɛmɛ fɔmɔ Kristo katɛkado ya ni, mbla a pili boe flee edo nɛ kɔla ndɛ kɔla bawanɛ aye, kɛnawo lɔkɔ a kĩ baanyɛ Kristo katɛkado kĩĩ kanya. ⅩⅩⅣ Foesũ mbla a lɛkadãmɛna boe akũ kɛnawo kĩ Kristo ya, ayekĩ fɔ́atsã boe katɛkado kamɛ bɛkɛna boe bati kpĩĩ nɛ Baguma anɛ. ⅩⅩⅤ Finyaakĩĩ, kĩ katɛkado a yawo boe kamɛ a, mbla a buki ɛnyɛ́ boe ɔdãmɛnanɛ.

ⅩⅩⅥ Ayekĩ mi flee mitɛ Kristo Yesu mido sũ ni, mi flee midani Baguma babi. ⅩⅩⅦ Mi a kĩ bɛwɔla mi mui, kĩ mikɛna ɔmɔa mɔ Kristo a, mido Kristo ndɛ atadiɛ aye. ⅩⅩⅧ Nɛ foesũ ntsitsemu adima buki ɛláa Yudafɔ mɔ bikĩ bɛnyɛ́ Yudafɔ kayite, mɔ basate ĩye bikĩ bidzi be akũ akũ, mɔ batsole ĩye banyole, mbom mi flee mikɛna ɔmɔa nɛ Kristo Yesu kamɛ. ⅩⅩⅨ Ntɛ minyɛ Kristo bade ni, kekɔ̃ minyɛ Abraham babi mɔ bawa, ade míakɛna fɔtsa a kĩ Baguma lɛ eyi a banyanɛ a.