Ⅰ Akũ akũ kadzi Kristo awɛ kĩ bɔna ade foesũ ɛnyɛ boe a. Nɛ foesũ midza pintii ndɛ bati kĩ bidzi be akũ akũ aye, mitafɔ̃ bibuki bɛkɛna mi basate.

Ⅱ Mitse fɔlɛtsa kĩĩ katse wĩ! Yĩ Paulo mabi mi kĩ ntɛ mifɔ̃ bitsua mi fɔkpati ni, fɔatsa kĩ Kristo buki ɛlá nfasɔ adima ɛkpa mi. Ⅲ Mbuki masipi kĩ ntɛ odi tunɔ bitsua ye lɛkpati ni, kɛnɛ kĩ ɛkɛna nɛ mbla a flee akũ. Ⅳ Mi a kĩ miawɛ kĩ miakɛna nɛ mbla a akũ lɔkɔa minya bati kĩ bɛkpɔla nɛ Baguma anɛ ni, minyɛ mi akũ nɛ Kristo akũ. Minɛ́ nɛ Baguma kɔnyakamɔ a kamɛ. Ⅴ Boe kɔ̃ ni, kĩ bɔtɛ budo Baguma Hũhũ a sũ ni, bɔna ɔwɔlɛ bɔɛɛ kĩ Baguma aakɛna boe bati kĩ bɛkpɔla. Ⅵ Kitonɛkĩ ntɛ bɔkɛna ɔmɔa mɔ Kristo Yesu ni, lɛkpati katsua ĩye de katatsua távɛmɛna lɛtsama. Lɛtsa a kĩ lisĩ nyɛ kĩ bɔ́alɛ katɛkado a kĩ kakɛna adzuma nɛ ɔdɔ kamɛ.

Ⅶ Mikabɔa mbɔdi paa kufɛ! Owei lisua mi osi kĩ mitakɛna nɛ ɔnɔkɔali osi a akũ? Ⅷ Nnɛ́ Baguma a kĩ ɛvɛ mi a lɛdani mi adzuni. Ⅸ Balɛ kĩ, “Fuyilatsa kabii bakɔa kado nɛ mbɔli kamɛ fɔmɔ yayila.” Ⅹ Lɛmɛ nɛ boe ɔmɔa kakɛna mɔ boe Ɔlate sũ ni, matɛ kado kĩ miláabuki mitɛ oti bɛbã adzuni kɛba yĩ ade. Lɛmɛ odi nyɛ odi kĩ ɛlamɛna mi adzuni kadani a ni, nde eti ɛla o-o, Baguma aavɛlɛ ye sɔtɔ kokooko. Ⅺ Nwaɛ̃ amɛ, yĩ kɔ̃ ntɛ mbuki made lɛtsã kĩ lɛkpati katsua sĩ ni, nde sũ bati buki biyidza bɛdza nɛ yĩ akũ? Ntɛ fɔnyɛ ɔnɔkɔali ni, kekɔ̃ yĩ lɛtsã kade nɛ Kristo wuda nɛ asendua akũ a lɛláayamɛna ɔhau odima. Ⅻ Mawɛ kĩ bati a kĩ batutulu mi a bipi akũ bɛnaa lɔtɔ bɛnyɛ be akũ tɛsaɛ lɔkɔa kalɛ kiwoli!

ⅩⅢ Nwaɛ̃ amɛ, mi kɔ̃ bɛvɛ mi kĩ mina mi akũ akũ kadzi. Lɛmɛ mitafɔ̃ mi akũ akũ kadzi kĩĩ lɛkpa mi osi mikɛna sukɛna fɔwɛtsa kpa, mbom mikɔa ɔdɔ misum mi akũ akũ. ⅩⅣ Kitonɛkĩ mbla a ɔlɛdo flee nyɛ kĩ, “Wɛ nɔ ɔkɔba kalɛ ndɛ ayekĩ awɛ nɔ akũ a.” ⅩⅤ Lɛmɛ ntɛ miakɛna mi akũ awɔda ndɛ bayaɛ kpa aye ni, midã kadã wĩ, ntɛ nnɛ́ aye míawɔla akũ.

ⅩⅥ Lɛtsa a kĩ malɛ nyɛ kĩ mifɔ̃ Hũhũ a ɛkpã mi nɛ mi nkpã kadzi kamɛ, ayekĩ miláakɔa akũ mikpa sukɛna fɔwɛtsa kpa kakɛna. ⅩⅦ Kitonɛkĩ lɛtsa a kĩ oti kutidu awɛ a ayidza kadza nɛ lɛtsa a kĩ Hũhũ a awɛ a akũ. Ade lɛtsa a kĩ Hũhũ a awɛ a lɛmɛ ayidza kadza nɛ oti kutidu fɔwɛtsa a akũ a. Fɔtsa nviã kĩĩ akesĩ akũ, ade fɔatsa kĩ miláapuli mikɛna lɛtsa a kĩ miawɛ a. ⅩⅧ Foesũ ntɛ Hũhũ akpã mi ni, mibuki miláa mbla a kayɔ.

ⅩⅨ Fɔtsa a kĩ oti kutidu akɛna a anɛ kawa yedede. Ade foe nyɛ litsolewɛ mɔ linyolewɛ, fɔtsa a kĩ fɔado akũ efĩĩ, kɔkɔbato, ⅩⅩ baviɔ̃ kasum, mɔ kabɔ katsɔ. Fɔbɛbã nyɛ likesĩ, ɔdzɛ kakɛna, anɛngbã, kalɔkpa kana, yĩ odi fude kalɛ, bati kayalɛ mɔ kasɛ̃ nɛ kutsu kutsu kamɛ, ⅩⅪ lineke kanɔ, bavɛ kawuga, kawɔlɛ kamɔ mɔ kuto kpa katɛ̃ ɔbɛ̃, mɔ fɔtsa bɛbã ndɛ fukĩĩ bamɛ. Mbuki madɛ mi finyaa ndɛ ayekĩ ĩnya lɔtɔ ndɛ mi a, kĩ bikĩ bakɛna fɔtsa kĩĩ bamɛ odu a lɛláanaa Baguma lɛgãkanyakɔ̃ a kamɛ.

ⅩⅫ Lɛmɛ fɔtsa a kĩ fɔanɛ kato Hũhũ a kamɛ nyɛ ɔdɔ, kawɔlɛ, lukudɔ, ɔwɔlɛ bɔɛɛ, sɛmɛkalɛ, tuwĩ kakɛna, fɔtsa kakɛna nɛ osi wĩ akũ, ⅩⅩⅢ akũ kadɔla mɔ akũ akũ kanya. Mbla adima lɛláa kĩ etia fukĩĩ flee kamɛ fudima. ⅩⅩⅣ Bati a kĩ bɛnyɛ Kristo Yesu bade a, kɔa be sukɛna bɛbɔa bɛmɛna nɛ asendua akũ, mɔ sɛ fɔwɛtsa mɔ ɔbla kpa flee. ⅩⅩⅤ Ntɛ Hũhũ a akpã boe ni, kekɔ̃ mifɔ̃ ye ɛkpã boe nɛ boe kadzi kamɛ. ⅩⅩⅥ Mitafɔ̃ bɔdɛla akũ nɛ ode, ĩye budo akũ kalɔkpa, ĩye bɔna anɛngbã nɛ boe akũ akũ.