HEBRIFƆ
Ovoli Kĩ Bɛtsɛlɛ Bɛma Hebrifɔ
Baguma Tsã Obi Akũ Ɛlɛ Kɔdzɛla.
Ⅰ Nɛ kɔkɔɛ a, Baguma lɛmɔ boe bawanyɔ a kɔdzɛla lɔkɔ pii nɛ tisi ahɔlɔ ahɔlɔ akũ, ɛtsãmɛna ye onukpɛ̃ banyɛnɛ akũ. Ⅱ Lɛmɛ nɛ fuwi nkaɛ kĩĩ kamɛ ni, Baguma lɛmɔ boe kɔdzɛla ɛtsãmɛna ye Obi akũ. Ade Obi kĩĩ akũ ɛtsã ɛbɔa katinya flee, ɛpau ye kĩ ɛnya lɛtsa nyɛ lɛtsa ɔlate a. Ⅲ Obi a lɛnyɛ ayekĩ Baguma kukũkpalɛ la ɛtsa, ade Baguma kutidu a pɛpɛɛpɛ ye malo edeĩ a. Obi a kɔa Baguma kalɛ a kɔbɛ̃ epini katinya flee. Kĩ ɛvɔlɛ bati tɔkpa eyua a, ɛnadzi nɛ Baguma Kpale nɛ ode flee a sɔmɔna.
Baguma Obi a Nyɛ Ode Fɔtɔ Banyanɛ a Ɔnɔkɔɛ̃.
Ⅳ Baguma kɛna ye Obi a ɛbɛ̃ Baguma ode fɔtɔ banyanɛ a, kitonɛkĩ dĩ a kĩ Baguma te ye a tɛ kɔya lɛba be bade a.
Ⅴ Kitonɛkĩ Baguma tábi ye fɔtɔ banyanɛ a kamɛ odima tɔ̃ kĩ,
“Nɔ nyɛ yĩ Obinyole.
Nviã luwi kĩĩ mma nɔ.”
Bio Baguma tálɛ nɛ ye ode fɔtɔ banyanɛ a kamɛ odima akũ kĩ,
“Maanya ye Ɔlɛga,
ade ye malo ɛnya yĩ Obi a.”
Ⅵ Ade lɔkɔ a kĩ Baguma wɛ kĩ yado ye obinyole ɔtɔnyade nɛ katinya kamɛ a ni, ɛlɛ kĩ,
“Ode fɔtɔ banyanɛ a flee, misum ye.”
Ⅶ Lɛmɛ nɛ ode fɔtɔ banyanɛ a akũ ni, Baguma lɛ kĩ,
“Baguma kɛna ye ode fɔtɔ banyanɛ ndɛ ɔwɛ,
ade ɛkɛna ye ode basumunɛ ndɛ fi fɔmɛ a.”
Ⅷ Lɛmɛ nɛ ye Obi akũ ni, Baguma lɛ kĩ,
“O Baguma, nɔ lɛgãkanya aawa daa daa.
Nɔ bati akũ kanya tsɛ̃ osi kpĩĩ akũ.
Ⅸ Awɛ tuwĩ kakɛna lɛmɛ akesĩ tɔkpa a.
Ade foesũ Baguma, nɔ Baguma a pau nɔ a,
ɛkpa nɔ obũ kadzikɔ̃ kĩ kawɔlɛ deĩ kɛbɛ̃ nɔ bakɔba flee kade a.”
Ⅹ Baguma buki ɛlɛ kĩ,
“Boe Ɔlate, nɔ lɛbɔa tite nɛ kayɔkayi a,
ade ɔkɔa nɔ mɔa awɛ ɔkɛna ode lɛmɛ a.
Ⅺ Fɔtsa kĩĩ flee aawɔ, lɛmɛ nɔ kɔ̃ aana daa,
foe flee fɔ́adɛ fɔtsɛ ndɛ tɛtadiɛ.
Ⅻ Aabuta foe ndɛ atadiɛ,
ade fɔ́adani ndɛ tɛtadiɛ.
Lɛmɛ nɔ kɔ̃ ade ayea aana daa a,
ade nɔ nkpã kadzi lɛlá kawũna a.”
ⅩⅢ Baguma tábi ye ode fɔtɔ banyanɛ a kamɛ odima tɔ̃ kĩ,
“Dzi nɛ yĩ sɔmɔna nɛ awĩ,
kɛnaawo kĩ nkɔa nɔ bakesĩnɛ nkɛna nɔ abɔa katekɔ̃.”
ⅩⅣ Kekɔ̃ baáde nyɛ ode fɔtɔ banyanɛ a? Ade be nyɛ hũhũ a kĩ basum Baguma, ade yado be lɛmɛ kĩ bɛnaabumɛna bati a kĩ baana nkpã katɛ a.