Ⅰ Lɛmɛ Yesu de ɛnaa Kugua Futse Ɔtɔ a akũ. Ⅱ Kĩ kade nyina ɔnɔnɛ tutuutu a, Yesu muniki ɛya nɛ Baguma Asɔli Kɔla a kamɛ. Bati pii yakpɔta nɛ ye akũ, ade ɛkɛna akũ edzi eyi be fɔtsa katsa kayɔ a. Ⅲ Yudafɔ mbla batsanɛ mɔ Farisifɔ a kpã otsole odi nɛ adɔpaa kabɔa kamɛ bɛyadzɛla nɛ bati a flee anɛ kamɛ. Ⅳ Ade bibi Yesu kĩ, “Fɔtsa Ɔtsanɛ, bipi otsole kĩĩ kĩ onyole bɛbã awa mɔ ye. Ⅴ Nɛ boe mbla a kamɛ ni, Mose kpa otumi kĩ bɛtalɛ otsole kĩĩ odu boe bɛkɔ. Litsa nɔ kɔ̃ alɛ nɛ foe akũ?” Ⅵ Bivia fukĩĩ kĩ bakɔa banaĩ ye, ayekĩ baana kalɛ kadi bɛkɔa bitsua ye onukpɛ̃.

Lɛmɛ Yesu kɛna akũ ɛkɔa lawobi ɛtsɛlɛ fɔtsa nɛ tite.

Ⅶ Kĩ bɛdza bɛkavia ye fɔlɛtsa a, ɛdzɛla akũ ade ebi be kĩ, “Mi kamɛ owula a kĩ ɛtákɛna tɔkpa tidima tɔ̃ ni, ɛnya lɔtɔ ɛta de ɛbɔa otsole a.” Ⅷ Ade ke ebuki ɛkɛna akũ ɛtsɛlɛ fɔtsa nɛ tite a.

Ⅸ Kĩ binu fɔlɛtsa kĩĩ a, be flee bɛdzakũ ɔmɔa ɔmɔa, kito banɔkɔɛ̃ a akũ kɛnawo kĩ kite Yesu mɔ otsole a odi nɛ awã.

Ⅹ Yesu dzɛla akũ evia otsole a kĩ, “Boe ɔma, nde bati a? Be kamɛ odima táte kĩ yakɔ nɔ kɔtɔ?”

Ⅺ Otsole a kpa mbuayɛ kĩ, “Ɔnɔkɔɛ̃, oowo.”

Ade ke Yesu bi ye kĩ, “Kekɔ̃ yĩ malo ntákɔ nɔ kɔtɔ. Dzakũ kanaa, lɛmɛ tabuki ɔkɛna tɔkpa.”

Ⅻ Yesu buki ebi bati a kĩ, “Yĩ nyɛ katinya kamɛ ɔhaĩ, odi nyɛ odi kĩ etomɔ yĩ ni, yaana nkpã ɔhaĩ a, ade ɛláatsã nɛ ɔtũ kamɛ da a.”

ⅩⅢ Farisifɔ a bi ye kĩ, “Adi adansiɛ nɛ nɔ mɔawɛ akũ, foesũ nɔ adansiɛ a tákpɔla.”

ⅩⅣ Yesu kpa be mbuayɛ kĩ, “Ntɛ madi adansiɛ nɛ yĩ mɔawɛ akũ malo ni, lɛtsa a kĩ malɛ a kpɔla, kitonɛkĩ ĩnyina awã kĩ nto mɔ awã kĩ manaa a. Mi linyína awã kĩ nto ĩye awã kĩ manaa a. ⅩⅤ Miadzɛ fɔlɛtsa nɛ batidziwa kamɔ onukpɛ̃, lɛmɛ yĩ kɔ̃ maádzɛmɔ odima. ⅩⅥ Lɛmɛ ntɛ maadzɛ mɔ bati ni, yĩ kadzɛ a aakpɔla, kitonɛkĩ nnɛ́ yĩ odi adzɛ kalɛ, mbom bɔmɔ Nda a kĩ edo yĩ a adzɛ fɔlɛtsa. ⅩⅦ Bɛtsɛlɛ nɛ mi mbla a kamɛ kĩ ntɛ adansifɔ nviã onukpɛ̃ kɛna ɔmɔa ni, lɛtsa a kĩ bɛlɛ a kpɔla. ⅩⅧ Madi adansiɛ kakpa yĩ akũ, ade Nda a kĩ edo yĩ a lɛmɛ adi yĩ akũ adansiɛ a.”

ⅩⅨ Bati a via Yesu kĩ, “Ndia aga deĩ?”

Ɛkpa be mbuayɛ kĩ, “Minyína yĩ, ĩye Nda. Ntɛ kanyina minyina yĩ ni, kufɛ míanyi Nda lɛmɛ.” ⅩⅩ Yesu lɛ fɔlɛtsa kĩĩ flee nɛ tɔgɔlɛ katekɔ̃ a, kĩ ɛkatsa fɔtsa nɛ Asɔli Kɔla kamɛ a, lɛmɛ odima tápi ye, kitonɛkĩ ye lɔkɔ táwo tɔ̃ ɔtɔ.

ⅩⅪ Yesu buki ebi be kĩ, “Maadzakũ, ade míawɛ yĩ, lɛmɛ míaku nɛ mi tɔkpa kamɛ. Miláapuli minaa awã kĩ manaa a.”

ⅩⅫ Ade ke Yudafɔ banɔkɔɛ̃ a via kĩ, “Ye akũ yanaakɔ sũ mɔ ɛlɛ kĩ, ‘Miláapuli miya nɛ awã kĩ manaa a’?”

ⅩⅩⅢ Yesu kpa be mbuayɛ kĩ, “Tite kĩĩ akũ mito, lɛmɛ yĩ kɔ̃ ode nto ĩya. Katinya kĩĩ kamɛ bati mianɛ, lɛmɛ nnɛ́ katinya kĩĩ kamɛ oti manɛ. ⅩⅩⅣ Ade foesũ mbi mi kĩ míaku nɛ mi tɔkpa kamɛ a. Míaku nɛ mi tɔkpa kamɛ ntɛ mitátɛ mido kĩ yĩ nyɛ oti a kĩ ye manɛ a.”

ⅩⅩⅤ Bɛdani bivia ye kĩ, “Owei anɛ?”

Yesu kpa be mbuayɛ kĩ, “Lɛtsa a kĩ mbi mi kito anɛ kayɔkayi a, ade foe mɔapɛ a. ⅩⅩⅥ Ndeĩ fɔlɛtsa pii kĩ maalɛ nɛ mi akũ nkɔa nkɔ mi kɔtɔ, lɛmɛ oti a kĩ edo yĩ a adi ɔnɔkɔali, ade lɛtsa a kĩ nnu ntomɛna ye sɛkɛ̃ a odi mabi katinya kamɛ bati a.”

ⅩⅩⅦ Bati a tánu foe kayɔ kĩ Ɔlɛga akũ fɔlɛtsa Yesu kabi be. ⅩⅩⅧ Foesũ ebi be kĩ, “Ntɛ midɛla Otidziwa Obi a nɛ ode a fɔmɔ míanyi kĩ yĩ nyɛ oti a kĩ ye manɛ a. Ade ke míanyi kĩ maákɛna lɛtsama nɛ yĩ mɔawɛ kɔbɛ̃ akũ, mbom lɛtsa a kĩ Nda tsa yĩ kĩ nlɛ a odi malɛ. ⅩⅩⅨ Oti a kĩ edo yĩ a deĩ nɛ yĩ ɔwɛ̃. Ɛtáfɔnɛ yĩ odi eyi, kitonɛkĩ makɛna lɛtsa a kĩ lawo ye anɛ a daa.” ⅩⅩⅩ Kĩ Yesu lɛ fɔlɛtsa kĩĩ a, bati pii tɛ ye bido.

ⅩⅩⅪ Yesu bi Yudafɔ a kĩ bɛtɛ ye bido a kĩ, “Ntɛ mitɛ yĩ fɔtsa katsa a midomɔ akũ ni, kekɔ̃ yĩ fɔtsa bakɔlɛnɛ wĩ mianɛ. ⅩⅩⅫ Míanyi ɔnɔkɔali a, ade ɔnɔkɔali a aakpa mi akũ akũ kadzi a.”

ⅩⅩⅩⅢ Bati a kpa ye mbuayɛ kĩ, “Abraham babi mɔ bawa bɔanɛ, ade bɔtánya tɔ̃ odima basate a. Nde sũ alɛ kĩ, ‘Míana akũ akũ kadzi’?”

ⅩⅩⅩⅣ Yesu bi be kĩ, “Mabi mi ɔnɔkɔali a kĩ odi nyɛ odi kĩ yakɛna tɔkpa ni, ɛnyɛ tɔkpa ɔsate. ⅩⅩⅩⅤ Ɔsate lánya kɔla obi daa, lɛmɛ obinyole kɔ̃ nyɛ kɔla obi daa. ⅩⅩⅩⅥ Foesũ ntɛ Obi a kpa mi akũ akũ kadzi ni, lɔkɔa mina akũ akũ kadzi wĩ. ⅩⅩⅩⅦ Ĩnyina kĩ Abraham babi mɔ bawa mianɛ, lɛmɛ miawɛ kĩ miakɔ yĩ, kitonɛkĩ yĩ fɔtsa katsa a táwo nɛ mi kamɛ. ⅩⅩⅩⅧ Fɔtsa a kĩ mmɔ́ nɛ Nda sɛkɛ̃ a, ade foe akũ malɛ kɔdzɛla a, lɛmɛ mi kɔ̃ miakɛna lɛtsa a kĩ mi ɔlɛga bi mi a.”

ⅩⅩⅩⅨ Bibi ye kĩ, “Boe ɔlɛga nyɛ Abraham.”

Yesu kpa mbuayɛ kĩ, “Ntɛ Abraham babi mɔ bawa paa mianɛ ni, kufɛ míakɛna fɔtsa ndɛ ayekĩ ɛkɛna a. ⅩⅬ Lɛmɛ miawɛ kĩ miakɔ yĩ oti a kĩ mbi mi ɔnɔkɔali fɔlɛtsa a kĩ ntɛ ntomɛna Baguma sɛkɛ̃ a. Abraham tákɛna fukĩĩ odu. ⅩⅬⅠ Mi miakɛna lɛtsa a kĩ mi ɔlɛga a kɛna a.”

Bɛkpa ye mbuayɛ kĩ, “Ɔlɛga mɔapɛ budeĩ, ade ye nyɛ Baguma a. Bɔnyɛ́ adɔpaa kamɛ babi.”

ⅩⅬⅡ Yesu bi be kĩ, “Ntɛ Baguma liti ɛnyɛ mi Ɔlɛga ni, kufɛ míawɛ yĩ kalɛ, kitonɛkĩ Baguma sɛkɛ̃ nto ĩya. Ntáya nɛ yĩ mɔawɛ kɔbɛ̃ akũ, mbom Baguma lido yĩ. ⅩⅬⅢ Nde sũ miánu fɔlɛtsa a kĩ malɛ a kayɔ? Kitonɛkĩ miáwɛ kĩ miatse yĩ fɔlɛtsa a. ⅩⅬⅣ Mi ɔlɛga Abonsam bade mianɛ, ade miawɛ kĩ miakɛna nɛ mi ɔlɛga a fɔwɛtsa akũ a. Owudini yanɛ kito anɛ kayɔkayi, ade yaátomɔ ɔnɔkɔali liti a, kitonɛkĩ ɔnɔkɔali lɛláa ye kamɛ da. Ntɛ ɛma fɔvã ni, ye kutitse ɛnyɛ yatsa, kitonɛkĩ ɛnyɛ ɔvãlɛvã mɔ fɔvã ɔlɛga. ⅩⅬⅤ Lɛmɛ yĩ kɔ̃ ɔnɔkɔali a mabi mi, ade foesũ miátɛ yĩ mido a. ⅩⅬⅥ Mi kamɛ owei aapuli ɛkɔ yĩ kɔtɔ kĩ nkɛna tɔkpa? Ntɛ nlɛ ɔnɔkɔali a ni, nde sũ mitátɛ yĩ mido? ⅩⅬⅦ Oti kĩ eto Baguma kamɛ a, atse Baguma fɔlɛtsa. Lɛmɛ ayekĩ mitáto Baguma kamɛ sũ ni, miátɛ yĩ fɔlɛtsa.”

ⅩⅬⅧ Yudafɔ a via Yesu kĩ, “Ntɛ bɔlɛ kĩ Samariani anɛ, ade hũhũ kpa lɛmɛ deĩ nɛ nɔ kamɛ a ni, bɔtálɛ ɔnɔkɔali?”

ⅩⅬⅨ Yesu kpa be mbuayɛ kĩ, “Hũhũ kpa adima lɛláa yĩ kamɛ. Makpa Nda obu lɛmɛ mi miasupa yĩ. Ⅼ Maáwɛ kĩ mado yĩ akũ obu, lɛmɛ odi deĩ kĩ yawɛ foe ade ye adzɛ kakpa yĩ a. ⅬⅠ Mabi mi nɛ ɔnɔkɔali kamɛ kĩ, odi nyɛ odi kĩ yakɛna nɛ yĩ fɔtsa katsa a akũ a, lɛláaku da.”

ⅬⅡ Yudafɔ a bi ye kĩ, “Ade owi bɔmɔ́ pefee kĩ hũhũ kpa deĩ nɛ nɔ kamɛ a! Abraham ku, Baguma onukpɛ̃ banyɛnɛ a lɛmɛ ku. Lɛmɛ nɔ kɔ̃ alɛ kĩ, ‘Odi nyɛ odi kĩ yakɛna nɛ yĩ fɔtsa katsa a akũ a, lɛláaku da.’ ⅬⅢ Mbɔɛɛ nɔ bɛ̃ boe ɔwanyɔ Abraham kĩ eku a? Baguma onukpɛ̃ banyɛnɛ a lɛmɛ ku. Owei abu kĩ ye anɛ?”

ⅬⅣ Yesu kpa be mbuayɛ kĩ, “Ntɛ mado yĩ mɔawɛ akũ obu ni, yĩ obu a lɛláana nfasɔ. Oti a kĩ ye ado yĩ obu a nyɛ Nda, oti kĩ mialɛ kĩ ɛnyɛ mi Baguma a. ⅬⅤ Minyína Nda a, lɛmɛ yĩ kɔ̃ ĩnyina ye. Ntɛ nlɛ kĩ ĩnyína ye ni, maakɛna ɔvãlɛvã ndɛ mi aye. Lɛmɛ nti ĩnyina ye ade makɛna nɛ ye kalɛ a akũ a. ⅬⅥ Mi ɔwanyɔ Abraham mɔ́ kawɔlɛ kĩ yaamɔ yĩ kaya. Ɛmɔ́ ke lɛmɛ ade kawɔlɛ de ye a.”

ⅬⅦ Ade ke Yudafɔ a bi ye kĩ, “Ɔtátɛ tɔ̃ futeli aduenum malo, ke mɔ alɛ kĩ ɔmɔ́ Abraham a?”

ⅬⅧ Yesu kpa mbuayɛ kĩ, “Mabi mi nɛ ɔnɔkɔali kamɛ kĩ, yĩ ndeĩ fɔmɔ bɛma Abraham.”

ⅬⅨ Ade ke bati a fila boe kĩ bata bɛbɔa ye a, lɛmɛ Yesu bɛla, ade ɛnɛ́ nɛ Baguma Asɔli Kɔla a kamɛ a.