Ⅰ Kĩ kite fuwi evũ kĩ banya Wuda Katɛ̃ Luwi a, Yesu naa Betania, Lazaro ɔtɔ, awã kĩ ɛdzɛla ye etomɛna kanɔkpa a. Ⅱ Bɛtɔ olobe funitsã bɛkpa ye nɛ awã. Marta sum nɛ opunu akũ, ade Lazaro lɛmɛ na nɛ bati a kĩ bidzi bɛkanya mɔ Yesu a kamɛ a. Ⅲ Ade Maria bɔɛ kugua mɔ ɔlɛ̃ baũ, kĩ bavɛ koe nard, kĩ kudeĩ kɔya paa lita sɛkɛ ɛyatsɛla Yesu fɔnɛta, ade ɛkɔa ye lɔlɔ tɔlɔ ɛyɔ foe akũ a. Kugua a ɔlɛ̃ tɛ tɔtɔ a flee kamɛ.

Ⅳ Ye fɔtsa bakɔlɛnɛ a kamɛ ɔmɔa, Yuda Iskariot, kĩ ye aanyɛ Yesu ɛkpa a lɛ kĩ, Ⅴ “Nde sũ bɛtánɔ kugua kĩĩ sika ovoe ɔha ɛlalɛ lɔkɔa bɛkɔa sɛ bɛkpa ahiãfɔ?” Ⅵ Nnɛ́ kĩ ɛtsɛla ahiãfɔ akũ sũ ɛlɛ fukĩĩ, mbom oyekpanɛ yanɛ. Ye nɛɛ sika kuvũ a ade yado awɛ nɛ koe kamɛ a.

Ⅶ Ade Yesu lɛ kĩ, “Mifɔnɛ ye awɛ! Mifɔ̃ ɛmanɛ koe eyi ɛkpa yĩ kabila. Ⅷ Ahiãfɔ deĩ nɛ mi kamɛ luwi nyɛ luwi, lɛmɛ yĩ kɔ̃ nláana nɛ mi kamɛ daa.”

Ⅸ Yudafɔ pii nu kĩ Yesu deĩ nɛ Betania, foesũ bɛya nɛ awã. Nnɛ́ Yesu odi sũ bɛya, mbom kĩ bayaadã Lazaro a kĩ Yesu dzɛla etomɛna kanɔkpa a. Ⅹ Nɛ foesũ basɔfɔnɔkɔɛ̃ a pi adzuni kĩ baakɔ Lazaro lɛmɛ, Ⅺ kitonɛkĩ ye sũ Yudafɔ a pii kasĩ be kanaatɛ Yesu kado.

Ⅻ Kĩ kade nyina a, bati kɔdabu a kĩ bɛya nɛ Wuda Katɛ̃ Luwi kanyakɔ̃ a nu kĩ Yesu aya nɛ Yerusalem. ⅩⅢ Foesũ bɛbɔɛ tuko bɛnɛ kĩ banaatsɛlamɔ ye, ade bɛkabɔa fɔwɔla kĩ,

ⅩⅣ Yesu mɔ́ aflimu adi, ade ede edzi nɛ ye akũ ndɛ ayekĩ Katsɛlɛ Kpalɛwa a lɛ kĩ,

ⅩⅥ Ye fɔtsa bakɔlɛnɛ a tánu fukĩĩ kayɔ nɛ lɔkɔ a na kamɛ, lɛmɛ kĩ Baguma dzɛla Yesu ɛkpalɛ ye akũ a, bɛyate anɛ kĩ Katsɛlɛ Kpalɛwa a lɛ lɛtsa a kĩ bɛkɛna bɛkpa ye a nɛ ye akũ.

ⅩⅦ Bati a kĩ bɛna nɛ Yesu sɛkɛ̃, nɛ lɔkɔ a kĩ ɛvɛ Lazaro etomɛna linikɛ kamɛ edzi nkpã a, di adansiɛ nɛ lɛtsa a kĩ lɛya a akũ. ⅩⅧ Ade fukĩĩ sũ bati kɔdabu a natsɛlɛmɔ Yesu a, kitonɛkĩ binu kĩ ɛkɛna awãwã fɔtsa kĩĩ. ⅩⅨ Foesũ Farisifɔ a bi akũ kĩ, “Midã kĩ bɔlámɔ kadzakɔ̃ kana kɔlaa. Midã, katinya kamɛ bati a flee nɛ́ bitomɔ ye!”

ⅩⅩ Helafɔ badi na nɛ bati a kĩ bɛnaa Yerusalem kĩ baasum Baguma nɛ luwi a kanya kamɛ a kamɛ. ⅩⅪ Ade bɛnaa Filipo, kĩ eto Betsaida a nɛ Galilea sɛkɛ̃, ade bibi ye kĩ, “Ɔnɔkɔɛ̃, bɔawɛ kĩ bɔamɔ Yesu.” ⅩⅫ Filipo nabi Andrea, ade be nviã a bɛnabi Yesu a.

ⅩⅩⅢ Ade Yesu bi be kĩ, “Finyaa kɔ̃ lɔkɔ a wo ɔtɔ kĩ baadɛla Otidziwa Obi a nɛ ode. ⅩⅩⅣ Mabi mi nɛ ɔnɔkɔali kamɛ kĩ ntɛ ligbanɔbi táwo nɛ tite kamɛ lɛvɔ̃ ni, libi mɔapɛ keĩ a lanɛ, lɛmɛ ntɛ lɛvɔ̃ ni, lado babi beblebee. ⅩⅩⅤ Odi nyɛ odi kĩ yawɛ ye nkpã kalɛ ni, yaayɛla ye, lɛmɛ odi nyɛ odi kĩ ekesĩ ye nkpã nɛ katinya kĩĩ kamɛ ni, ɛkɔla ye ɛkpa nkpã kĩ ɛla kawũna a. ⅩⅩⅥ Odi nyɛ odi kĩ yawɛ kĩ yasum yĩ ni, kɛnɛ kĩ etomɔ yĩ, kitonɛkĩ awã kĩ ndeĩ a, ade awã yĩ ɔsumunɛ lɛmɛ ana a. Ade Nda aado obu nɛ odi nyɛ odi kĩ yasum yĩ akũ.

ⅩⅩⅦ “Yĩ ɔwɔlɛ aha yĩ finyaa. Lɛmɛ litsa maalɛ? Kalɛ maalɛ kĩ, ‘Nda, nyɛ yĩ katomɛna lubo kamɔ lɔkɔ kĩĩ kamɛ mbɔɛɛ’? Oowo, ade foesũ ĩya nɛ katinya kamɛ a, ayekĩ maatsã lubo kamɔ lɔkɔ kĩĩ kamɛ. ⅩⅩⅧ Nda, do nɔ dĩ akũ obu.”

Adeke odo odi to ode ɛlɛ kĩ, “Ndo de obu kɔkɔɛ, ade maabuki ndo de a.”

ⅩⅩⅨ Bati kɔdabu a kĩ bɛdzɛ̃ nɛ awã nu odo a, ade be kamɛ badi lɛ kĩ, ɔplala lɛnyɛ onukpɛ̃, lɛmɛ badi lɛ kĩ, “Ode fɔtɔ ɔnyanɛ odi lɛlɛ kɔdzɛla mɔ ye!”

ⅩⅩⅩ Lɛmɛ Yesu bi be kĩ, “Nnɛ́ yĩ sũ odo a lɛ́ kɔdzɛla, mbom mi sũ.

ⅩⅩⅪ “Finyaa nyɛ lɔkɔ a kĩ Baguma aadzɛmɔ katinya kamɛ. Finyaa mɔ baablɔmɛna katinya kĩĩ kamɛ akũ ɔnyanɛ a. ⅩⅩⅫ Ntɛ bɛdɛla yĩ nɛ ode nɛ asendua akũ ni, maavɛlɛ bati flee ĩyamɛna nɛ yĩ sɛkɛ̃.” ⅩⅩⅩⅢ Yesu lɛ fukĩĩ yakɔa ɛtsa wuda odu a kĩ yaaku.

ⅩⅩⅩⅣ Adeke bati kɔdabu a kpa ye mbuayɛ kĩ, “Boe Mbla Ovoli a atsa boe kĩ Kristo a aadzi nkpã daa. Nde fɔya mɔ alɛ kĩ baadɛla Otidziwa Obi a nɛ ode nɛ asendua akũ? Owei nyɛ Otidziwa Obi kĩĩ a?”

ⅩⅩⅩⅤ Yesu kpa be mbuayɛ kĩ, “Ɔhaĩ a aabuki ɛna nɛ mi sɛkɛ̃ lɔkɔ lukũ lidi pɛ. Lɔkɔ kĩ ɔhaĩ a deĩ nɛ mi kamɛ ni, mitsã nɛ ye kamɛ ayekĩ ɔtũ lɛláake edo mi, kitonɛkĩ oti kĩ ɛtsɛ̃ nɛ ɔtũ kamɛ linyína awã kĩ yanaa. ⅩⅩⅩⅥ Kĩ ɔhaĩ a deĩ nɛ mi sɛkɛ̃ kĩĩ ni, mitɛ ɔhaĩ mido ayekĩ míakɛna ɔhaĩ a kamɛ bati.”

Kĩ Yesu lɛ fɔlɛtsa kĩĩ eyua a, ɛdzakũ nɛ be sɛkɛ̃ ɛnabɛla.

ⅩⅩⅩⅦ Titɔ kĩ Yesu kɛna awãwã fɔtsa kĩĩ flee nɛ be anɛ kamɛ malo ni, bɛtátɛ ye bido.

ⅩⅩⅩⅧ Ayekĩ lɛtsa a kĩ Baguma Onukpɛ̃ Ɔnyɛnɛ Yesaya lɛ eyi a, aaya nɛ foe kamɛ kĩ,

ⅩⅩⅩⅨ Nɛ foesũ bɛtápuli bɛtɛ bido, kitonɛkĩ Yesaya buki ɛlɛ kĩ,

ⅩⅬⅡ Titɔ kĩ fɔla lɔmɔ malo a, Yudafɔ banɔkɔɛ̃ a pii tɛ Yesu bido, lɛmɛ nɛ Farisifɔ a sũ bɛtálɛ foe akũ kɔdzɛla nɛ kanade, ayekĩ bɛláablɔmɛna be nɛ be katsɛnakɔ̃ a. ⅩⅬⅢ Kitonɛkĩ bawɛ kĩ batidziwa bimu be kɛba kĩ Baguma aamu be.

ⅩⅬⅣ Ade Yesu bɔa fɔwɔla ɛlɛ kĩ, “Odi nyɛ odi kĩ ɛtɛ yĩ edo ni, nnɛ́ yĩ odi ɛtɛ edo, mbom mɔ oti a kĩ edo yĩ a ɛtɛ edo. ⅩⅬⅤ Odi nyɛ odi kĩ yamɔ yĩ ni, yamɔ oti a kĩ edo yĩ a lɛmɛ. ⅩⅬⅥ Ĩya nɛ katinya kamɛ ndɛ ɔhaĩ aye, ayekĩ odi nyɛ odi kĩ ɛtɛ yĩ edo ni, ɛláana nɛ ɔtũ kamɛ.

ⅩⅬⅦ “Ntɛ odi nu yĩ fɔlɛtsa a mɔ́ ɛtákɛna nɛ foe akũ ni, nláadzɛmɔ ye. Ntáya kĩ mayaadzɛmɔ katinya kamɛ bati, mbom ĩya kĩ mayaanyɛ be. ⅩⅬⅧ Oti a kĩ esĩ yĩ, kĩ ɛtátɛ yĩ fɔlɛtsa a deĩ oti kĩ yaadzɛmɔ ye. Fɔlɛtsa a kĩ nlɛ a aadzɛmɔ ye nɛ luwi nkaɛ a akũ! ⅩⅬⅨ Fukĩĩ nyɛ ɔnɔkɔali, kitonɛkĩ ntálɛ kɔdzɛla nɛ yĩ mɔawɛ otumi akũ, mbom Nda a kĩ edo yĩ a lɛkpa yĩ otumi kĩ nlɛ kɔdzɛla, nlɛ fɔlɛtsa a kĩ nlɛ a. Ⅼ Ade ĩnyina kĩ ye mbla a akpa nkpã kĩ ɛlá kawũna a. Nɛ foesũ fɔlɛtsa a kĩ malɛ a nyɛ fɔlɛtsa kĩ Nda bi yĩ kĩ nlɛ.”