Ⅰ Foesũ, finyaa litsa bɔ́alɛ? Bɔ́ana nɛ tɔkpa kakɛna kamɛ ayekĩ Baguma kɔnyakamɔ aapɔ kibu mbɔɛɛ? Ⅱ Oowo! Kĩ buku bɔkpa tɔkpa kɔkɔɛ a, nde bɔabuki budzi nkpã bɔkakɛna tɔkpa? Ⅲ Mbɔɛɛ minyína kĩ, kĩ bɛwɔla boe mui, bɔkɛna ɔmɔa mɔ Yesu Kristo a, bɛwɔla boe mui bɔkɛna ɔmɔa mɔ ye wuda a lɛmɛ? Ⅳ Nɛ boe mui kawɔla kĩĩ kamɛ a, bɔna tsɛfã nɛ ye wuda a kamɛ, ade bibila bɔmɔ ye a. Ndɛ ayekĩ Ɔlɛga a tsã ye kukũkpalɛ kɔbɛ̃ kamɛ ɛdzɛla Kristo etomɛna banɔkpa kamɛ a, ade aye boe malo bɔ́ayidza budzi nkpã vɔɛ̃ a.

Ⅴ Kitonɛkĩ ayekĩ bɔkɛna ɔmɔa mɔ ye nɛ ye wuda kamɛ a, ade ayea bɔ́abuki bɔkɛna ɔmɔa mɔ ye nɛ boe kadzɛla kadzi nkpã kamɛ ndɛ ayekĩ bɛdzɛla ye a. Ⅵ Bunyina kĩ, kĩ bɛbɔa boe kutitse kɔɛ a nɛ asendua akũ mɔ Kristo ayekĩ boe sukɛna kĩ sawɛ tɔkpa kakɛna a aawɔ, ayekĩ bɔláabuki bɔnya tɔkpa basate. Ⅶ Kitonɛkĩ ntɛ oti sila eku ni, bɛnyɛ ye nɛ tɔkpa kɔbɛ̃ kayɔ.

Ⅷ Ntɛ buku mɔ Kristo ni, bɔtɛ budo kĩ bɔ́adzi nkpã lɛmɛ mɔ ye. Ⅸ Bunyina kĩ, kĩ Baguma dzɛla Kristo etomɛna kanɔkpa sũ ni, ɛláabuki eku da. Wuda buki lɛláabuki ɛna kɔbɛ̃ kudima nɛ ye akũ. Ⅹ Wuda a kĩ Kristo ku a, eku ye deedimɔapɛ ɛkpa tɔkpa, lɛmɛ nkpã a kĩ edzi finyaa, edzi ye ɛkpa Baguma. Ⅺ Ade ayea mi malo mibu mi akũ kĩ miku mikpa tɔkpa, lɛmɛ Baguma nɛ ɔmɔa kakɛna mɔ Kristo Yesu kamɛ.

Ⅻ Kɛtánɛ kĩ tɔkpa tibuki tɛnya mi sukɛna a kĩ saku a akũ, ayekĩ míakakɛna nɛ se fɔwɛtsa akũ. ⅩⅢ Mitafɔnɛ mi sukɛna kakɔma awɛ mikpa tɔkpa tɛkɔa tɛkɛna ablɔ adima, mbom mikɔa mi akũ mikpa Baguma ndɛ bati kĩ ɛnyɛ etomɛna wuda kamɛ ɛyamɛna nɛ nkpã kamɛ. Mifɔnɛ mi akũ flee awɛ mikpa Baguma fɔnya fɔtsa kĩ yaakɔa ɛkɛna tuwĩ. ⅩⅣ Kɛtánɛ kĩ tɔkpa tɛnya mi akũ, kitonɛkĩ miláa mbla kayɔ, mbom mideĩ nɛ Baguma kɔnyakamɔ kayɔ.

ⅩⅤ Foesũ litsa bɔalɛ? Bɔ́akɛna tɔkpa kitonɛkĩ bɔláa mbla kayɔ, mbom budeĩ nɛ Baguma kɔnyakamɔ kayɔ sũ? Oowo! ⅩⅥ Minyina pefee kĩ ntɛ mikɔa mi akũ mikɛna odi basumunɛ ni, minyɛ ɔlate a kĩ ye kayɔ mideĩ a basate. Ntɛ mikɔa akũ mikpa tɔkpa kakɛna ni, lɛtsa a kĩ laanɛ nɛ foe kamɛ nyɛ wuda, lɛmɛ ntɛ mikɛna nɛ Baguma ɔlɛdo akũ ni, foe nfasɔ nyɛ kadzi kpĩĩ nɛ Baguma anɛ.

ⅩⅦ Bɔanyɛ Baguma kɔlɛ paa, kitonɛkĩ titɔ kĩ minya tɔkpa basate miyatɛ̃ malo ni, finyaa mitɛ ɔnɔkɔali fɔtsa katsa a mɔ mi tɔwɔlɛ, milamɔ foe akũ kakɛna pɛpɛɛpɛ. ⅩⅧ Baguma nyɛ mi etomɛna tɔkpa kamɛ, midani fɔtsa wĩ kakɛna basate.

ⅩⅨ Malɛ kɔdzɛla ndɛ otidziwa aye nɛ ayekĩ otidziwa adɔ nɛ sukɛna kamɛ sũ. Nɛ lɔkɔ lidi kĩ lɛtɛ̃ kamɛ ni, mifɔnɛ mi akũ flee awɛ ndɛ basate mikpa efĩĩ mɔ ablɔ fɔtsa kakɛna. Ade ayea kɛnɛ kĩ finyaa miafɔnɛ mi akũ flee awɛ mikpa ndɛ tuwĩ kakɛna basate a. ⅩⅩ Kĩ minya tɔkpa kakɛna basate a, tuwĩ kakɛna tánya ɔhɛ fɔkpa mi. ⅩⅪ Litsa nfasɔ mina mitomɛna fɔtsa a kĩ mikakɛna a kĩ finyaa fɔakɔ mi kɔnyɔã a kamɛ? Fɔtsa a na bamɛ flee kawũna nyɛ wuda.

ⅩⅫ Lɛmɛ finyaa, Baguma nyɛ mi nɛ tɔkpa kamɛ midani ye basate. Nfasɔ a kĩ míana nyɛ kĩ miakɔa mi akũ flee mikpa Baguma ɛkpalɛ ye akũ, lɔkɔa nɛ foe kawũna mina nkpã kĩ ɛlá kawũna a. ⅩⅩⅢ Kitonɛkĩ tɔkpa kɔtɔkase nyɛ wuda, lɛmɛ Baguma futetsa faa nyɛ nkpã kĩ ɛlá kawũna a, nɛ ɔmɔa kakɛna mɔ boe Ɔlate Kristo Yesu kamɛ.