10
1 I uldin i dad Dyu, là sikofan, na là glalòan di too kaglutan. Lo alung i dad fan kel. Nulitla dsù kat fali i dad sahal dsù. Taman, dét kibò i uldin smikof dad to mayè fdadong di Dwata fagu di dad dsù ani? 2 Ku glut, ta maglaneb salà i dad to mangamfù ayé, ta là msamuk nawala moon di salàla, na ta là lê ale damsù. 3 Bay i dad dsù kat fali, yé fafaldam dad to i dad salàla, 4 du i litè dad safì na dad kambing, là ti gafalmon i dad salà.
5 Taman, di fan ksalu Krayst dini di tah tanà, manan di Dwata,
“Ise ku lmanaf na dad tadè blé i knayèam, bay nun tagàam do laweh du dsù.
6 Là fnò nawam di dad lmanaf snakuf di gudamsù ku demen i dad dsù falmo moon i salà.
7 Taman, ani man-gu, Dwata, ani agu sa du dnohògu i knayèam, salngad i ta gsulat gablà di do di gugsulat i uldin.”
8 Yé funan man,
“Ise yé knayèam, na là fnò nawam di dad lmanaf, na dad tadè blé, ku demen dad lmanaf snakuf di gudamsù, na dad dsù falmo moon i salà.”
Yé manan balù ku kdee dad dsù ani glalò di man i uldin. 9 Na kafnge ayé, manan,
“Dwata, ani agu sa, du dnohògu i knayèam.”
Taman, kah Dwata i dad muna dsù, na yé tlasan dun i dsù Krayst. 10 Du mdà di kimen Dyisas Krayst di knayè i Dwata, ta maglaneb ato di dad salàto fagu di lo sulê kadsùan i lawehan, na ta sikof nan.
11 Kat to mnè di bleng i dad Dyu, nimòla i dale alel kat du, na sansulitla i dad sahal dsù, bay là gagan i dad dsù falmo salà. 12 Bay Krayst, lo sulêan damsù i kton di salà, na ta sikof kel di landè sen. Na kafnge ayé, ta sudeng kenen gsen di kwanan i Dwata. 13 Na ditù gufatanan i kafkah Dwata i dad to muteh dun nawa di dungan i falel blìan. 14 Taman, fagu di lo satu dsù, snikofan kel di landè sen i dad to flaneb i salàla. 15 I Mtiu Tulus, lê nun tulenan di gito du manan,
16 “Man i Amu, ani i kasafnè nimògu di dad to. Nun du kadang, fnègu i dad uldin-gu di fandamla, na fkahgu di nawala.”
17 Na lêan man,
“Fnasinsyagu i dad salàla, na ta là fandamgu i dad gugasyatla.”
18 Taman, du ta magfasinsya dad salà, ta landè gukmamu i dad dsù falmo i dad salà.
Fdadong ato di Dwata
19 Taman, dad flanekgu, ta là gdè ato fusuk di Too Mtiu Snifil du mdà di kfaloh Dyisas i litèan. 20 Du ta nukàan di gito i sati falami dalan too mlawil fles di bali kurtina ta kasê, dunan i lawehan.*10:20 Yé satu gumtatek i manan dini ta nukàan di gito i falami dalan mlé nawa landè sen. Yé kayèan man i kurtina, dunan i laweh Dyisas du kanto mati, salngan di kaftoh i nawan, tadè kasê i bong kurtina i tagnè gamsang i dad to mayè fdadong di Dwata. 21 Ta nun satu Too Mdatah Mnè di Blengto. Kenen Ulu i too glut gumnè Dwata. 22 Taman, tooto fdà di nawato fdadong di Dwata, na fbagal ato di kaftoo du ta mlaneb i fandamto, na ta là msamuk nawato di dad salàto, na i lawehto ta lnaneb i mtiu éél. 23 Na too ato fbagal di fanden nagotto, na nang lwe nawato, du gsalig Dwata dmohò i fakangan. 24 Sfinit ato nawa, fye sakdo ato na gamgimò ato fye. 25 Nang ato tlag smimba salngad i nimò dademe. Bay nidulto i kasfinit nawato du gadèto ta mdadong i kasfulê Amuto.
26 Ku ta gadèto i kaglutan, bay tan-gaadto fadlug mimò salà, ta landè nan dsù falmo salàto. 27 Bay i mkel kadang, too maglikò, kukum na too minit lifoh falmo i dad to matu di Dwata. 28 Di muna, ku nun to lmafà i uldin Mosis, na lwe ku demen tlu to tmulen i ktoon, landè kakdola kenen, na fnatila. 29 Taman, dét mkel di to mlék i Ngà Dwata? Du là fabtasan i litè mlé kbagal di kasafnè nimò Dwata i lmaneb kenen moon di dad salàan, na nadoyan i Tulus mlé kafye. Fandamyu kun ku dét kablat flayam i gten di kenen. 30 Du ta gadèto ku simto i man,
“Do i tong malas, na do i falmayam.”
Na i lê man,
“I Amu mukum i dad ton.”
31 Too ti maglikò i flayam Dwata too mto di dad to gambet ayé ku ta bang Dwata kamfè dale.
32 Fandamyu ku dét i mkel di gamu di ta kgumah i kaglut Tnalù Dwata gamu. Dee kaflayam gnaguyu, bay gamtayud gamu. 33 Slaan nadoyla na falnayamla gamu di kanfe i dad to, na nun slaan, kayèyu flam gamu di kaflayam i dademeyu gmagu salngad ayé. 34 Kandoyu i dad to mnè di blanggù, na baling gamu lehew dmawat i kaflayam di kladla i kdee knunyu, du ta gadèyu nun too fye knun gfunyu kel di landè sen.
35 Taman, nangyu fantulah i ksaligyu du nun bong lubayyu. 36 Là fakay ku là fantahàyu nawayu du fye gimòyu i knayè Dwata, na gdawatyu i fakangan. 37 Du ani man Tnalù Dwata,
“Ta là mlo nan, kel i sanfatanto, na là ti fganggàan. 38 I dad togu tluh, ftoo ale na mlawil. Bay ku nun di dale mahal, là fye nawagu dun.”
39 Bay ise ato i dad to kmagol na malmo, du ftoo ato gito, na ta galwà ato.
*10:20 10:20 Yé satu gumtatek i manan dini ta nukàan di gito i falami dalan mlé nawa landè sen. Yé kayèan man i kurtina, dunan i laweh Dyisas du kanto mati, salngan di kaftoh i nawan, tadè kasê i bong kurtina i tagnè gamsang i dad to mayè fdadong di Dwata.