1 Na di kafngela kmaan man Dyosif di saligan, “Fananoam i dad saku i dad lagi ani kalbong i gagan nebe i dad dongkila. Kafdu én, fuléam kdee filak nebela, na fkaham di tah di lam i saku i kat satu dale. 2 Na di kafkaham kadang i filak di lam i saku i twalila, fakufam i tabùgu salafì.” Na nimen i salig Dyosif i dekan kenen. 3 Na di kwal én too flafus, fdaan i dad saflanek ani. 4 Di là ale fa too mawag di banwe én, man Dyosif di saligan, “Faflal ge, laloam ale. Na di kgumaham dale tulenam dale i mangu ani, manam, ‘Tan kè duenyu malas sasè di kafye mgimò i ganlal di gamu? 5 Tan kè duenyu tmaku i tabù salafì? I tabù én galan guminum, na galan gumeye fye gadean ku tan knayè i Dwata. I nimòyu ani too sasè.’ ”

6 Na di kgumah i salig dale, tulenan dale i kdee gman Dyosif. 7 Kabay tmimel ale, manla, “Tabyà, tulenam gami tan kè duenam mangman ani? Gami i dad lifanan, là gami sa mimò én, làmi sa tnaku i tabù i ganlal. 8 Gafaldamam sa kè i kasfulêmi di banwe Kanaan, i filak teenmi di lam i dad sakumi fulêmi sa. Taman tan ku mayè gami tmaku i salafì ku demen blawen di gumnè amum? 9 Tabyà ku teenam i tabù én di satu di gami, fakayam fnati, na dademe di gami nimoam lifanam.” 10 Na tmimel i salig, manan, “Hae, nimògu i manyu ani gine. Balù di simto to gumitegu i tabù én, kenen alò nimògu lifangu. Na i dademe kadang fakay mulê.”

11 Na fnaflal nawas i dad saflanek i dad saku di dad dongki na fkahla di tanà na nukalla. 12 Kafnge én, tanbù nan i salig too mngabal, fandaan di saku i sangal twege, kel di saku i sangal twali. Na i gumiten i tabù én baling di saku Bénhamin. 13 Taman i saflanek ani knasêla i klawehla, du mdà di too sasè klidùla. Na lêmanla lulen dad saku di dad dongkila na samfulê ale di syudad Idyif.

14 Na di kasfulê Dyuda na i dad flanekan di gumnè Dyosif, déén fa kenen, na gasil ale lkuad di munan. 15 Na man Dyosif di dale, “Tan kè duenyu tmaku i tabùgu ani? Làyu kè gadè i dad ulu gambet deg gmagan gmadè i dad gbuni?” 16 Na Dyuda tmimel, manan, “Landè kibòmi msen i ktomi, taman landè fakaymi man di ge, du tafite Dwata too nun salàmi. Kdeemi ani, i lifanam nan, là alò twalimi, i gumite i tabuam.” 17 Kabay man Dyosif, “Là agu mayè mimò gambet i manam gine. Alò i to gumite i tabùgu kadang i nimògu lifangu. Kabay i dademe di gamu fakay mulê di màyu.”

18 Kaklinge i saflanek i man Dyosif, fdadong Dyuda di kenen, na manan, “Amumi, là agu gablà talù di ge, du gadègu i glalam salngad i glal i harì. Bay begam agu faloh moon talù di ge. Na nang ge flabè deg i lifanam. 19 Amu, gafaldamam kè aye di ksalekam gami ku nun màmi na ku nun dademe fa flanekmi lagi. 20 Na gmanmi di ge, nun màmi too tua nan, na nun twalimi sut di taktua màmi nan. Na smibi kenen tamati, taman alò kenen gdè di satu yaan mà, taman kenen too kando i màmi.

21 “Na di muna fa, toom fni di gami, gami i dad lifanam, ku faginmi dini twalimi, du fye sitem. 22 Na tatulenmi too malima di màmi ku faginmi twalimi dini, du ku faginmi, na nun gaslokan, én kadang gamfati i màmi. 23 Kafnge én, manam di gami, là gami fakay samfulê di ge, silang ku faginmi i twalimi. 24 Na di kulêmi di màmi, tulenmi kenen i kdee gmanam gami, ge i amumi.

25 “Na là mlo dek gami màmi samfulé dini di Idyif, du mayad fali. 26 Kabay manmi di kenen, là fakay, du là gami fakay samfulê di ge, silang ku magin gami i twalimi.

27 “Kafnge én, man i màmi di gami, ‘Gadèyu, alò lwe dad ngàgu lagi mdà di satu yaangu Rakél. 28 Na tamati nan i satu, du fnati kè i labè lmanaf di bnas. Na kel sadni làgu kenen teen. 29 Na ani ku lêmanyu fagin i satu ani, na ku nun gaslokan di dalan, gamfati deg di bong klidù nawagu kenen.’ Ani gman màmi. 30-31 Taman, ku samfulê agu ditù di màmi i lifanam, na teenan là gagin twalimi ani, mati sa kenen, du ani i tingaan toon kando. Na du too tua kenen, i klidù nawan ani kadang i gamfati kenen. 32 Lêgu fakang di màgu, agu mifat i twaligu ani, du fye landè gaslokan. Na mangu fa ku làgu gebe samfulê, agu sa i kmakif i salàgu kel di kfatigu. Ani i gmangu di màgu aye.

33 “Na Amumi, fneam agu dini di ge, du fye nimoam agu lifanam tlas i twalimi. Na faloham kenen moon mulê gagin di dademe flanekgu. 34 Tan i kibògu mulê di màmi ku là gagin i twalimi? Landè kibògu! Là agu mayè mite kadang i bong klidù i nawa màgu.”