1 Taman flulen Dyékob i kdee nfunan, na mdà ale di Kanaan. Na di kakella di banwe Bérsiba dsù Dyékob dad lmanaf di Dwata, i Dwata maan Isaak.

2 Na di kakifun nun kanteen Dyékob, na tlo kenen Dwata, manan, “E Dyékob.”

Na tmimel Dyékob, manan, “Hae, gani agu.”

3 Na man Dwata, “Agu i Dwata, i Dwata i maam. Na nang ge likò salu di Idyif, du ditù kadang toogu fbel gamu, na gamu mgimò kadang i satu bung dad to too mlabung. 4 Naginta ge salu ditù di Idyif, na kafnge én, nebegu i dad belam samfulê di banwe Kanaan. Na kadang di kfatim déén Dyosif di safédam.” Én gman Dwata di ku Dyékob.

5 Na kafnge én, mdà ale Dyékob di Bérsiba, na fadlug ale di kagula. Fsakay i dad ngaan i màla, na i dad ngala, na i dad yaanla di dad kaditon febe Faraon, i harì di Idyif. 6 Na nebela dad lmanafla, na i dad kandeenla gwèla di Kanaan, na salu ale di Idyif. Na fagin Dyékob di Idyif i kdee dad belan, 7 i dad ngaan lagi, i dad ngaan libun, na i kdee dad fuan lagi na libun.

26 Na nam falò nam i kdee dad bel Dyékob magin kenen salu di Idyif. Na là gakuf di kse ani i dad yaan i dad ngaan lagi. 27 Na nun lwe dad ngà Dyosif sut di Idyif, na taman i kdee dad malay Dyékob masdagub fitu falò di ksalula di Idyif.

28 Na fsalu Dyékob i tingaan Dyuda muna ditù di ku Dyosif, du fatdoan i dalan salu di Gosén. Na di kakella mdadong nan di Gosén, 29 smakay Dyosif i snakayan fadyol i kudà, na salu di Gosén, du snitongan maan. Na di kakelan, lkafan i maan na too mlo mngel. 30 Na man Dyékob di ku Dyosif, “Tò, balù kilen nan gatlagad agu mati. Hae, du tateenta ge na toogu gadè mto ge fa.”

31 Kafnge ani, man Dyosif di dad flanekan na i dad dademe dad malay i maan, manan, “Salu agu ditù di ku Faraon i harì, du tulengu kenen, takel gamu i dad flanekgu, na i dad dademe dad malay i màgu, mdà di banwe Kanaan. 32 Tulengu kenen kadang, gamu i dad gal mifat i dad bilibili, na dad baka, na tanebeyu dini i dad bilibiliyu, i dad kambingyu, na i dad bakayu, na i kdee nfunyu. 33 Taman ku tlo gamu i harì na snalekan ku tan i galyu nimò, 34 tooyu man di kenen, gamu i dad lifanan, gamu gal mifat i dad bilibili mdà fa di tingà gamu fa, salngad tamgimò i dad gutambulyu di muna. Ani manyu di kenen, du fye i gufnean gamu dini di Gosén, du dad to mnè di Idyif ani knangla dad to mifat bilibili.”