48
I kdasal Dyékob i lwe tingà Dyosif
1 Na satu duh, nun tmulen ku Dyosif nun fdas i maan. Taman faginan lwe tingaan lagi, Manasas na Ifraim, du mlauy ku Dyékob. 2 Na di ktulenla ku Dyékob kakel i tingaan Dyosif, du mlauy kenen, fangalan i nawan, na sudeng di gumilean.
3 Na man Dyékob ku Dyosif, “Dwata, Too Mtulus, msut di deg di muna fa déén di banwe Lus di Kanaan, na banlén agu kafye. 4 Hae, du manan di deg, ‘Toota ge fbel, du fye i dad belam mgimò i bong lumbuk i dad to, na blégu dale tanà ani, na nfunla kel di landè sen.’
Ani gman Dwata di deg. 5 Na i lwe tingaam lagi i sut dini di Idyif di là agu fa salu dini, fakufgu ale di dad ngàgu. Hae, Ifraim na Manasas fasngadgu i dad ngàgu lagi, na kalnawagu dale salngad i too glut dad ngàgu lagi gambet ku Rubén na Simyon. 6 Ku nun fa i dad ngaam sut tmadol dale làgu fakuf di dad ngàgu, bay gablà di tanà gdawat i dad belgu di kfatigu, gakuf ale di lumbuk fagu di dad twegela Manasas demen Ifraim. 7 Nimògu ani, du too bong nawagu i yéam Rakél. Bong klidù nawagu di kfatin di Kanaan, mdadong di Éfrata di kulêgu mdà di Mésofotamya. Na lbanggu kenen mdadong di dalan salu di Éfrata.” (Éfrata ani, sadni dagitan Bétléhém.)
8 Di kite Dyékob i dad ngà Dyosif, smalek kenen, “Simto dad ngà ani?” 9 Tmimel Dyosif, “Mà, ani i dad ngà i blé Dwata deg dini di Idyif.” Na man Dyékob, “Fdadongam ale dini di deg, du fnigu di Dwata, fye banlén ale kafye.” 10 Takamwanal nan i kite Dyékob du mdà di taktuan, na én duenan là nan too mite. Taman fafdadong Dyosif i dad ngaan di maan, na lkafan na nalakan ale.
11 Na man Dyékob di ku Dyosif, “Là agu faglut ku teenta ge fa, bay bong fye di Dwata, du falohan ite fa site na lêgu teen fa i dad ngaam.”
12 Nwè Dyosif i dad ngaan di saféd Dyékob, na lkuad kenen di muna i maan. 13 Na nagotan i lwe dad ngaan, Ifraim gsen di ibeng Dyékob, na Manasas gsen di kwananan, na léan ale fdadong di kenen. 14 Kabay Dyékob balingan santaday i sigalan, taman i kmalan gsen di kwanan i agotan di tah ulu Ifraim, balù kenen i twali, na i ibengan di tah ulu Manasas, balù kenen i twege.
15 Kafnge én, mni di Dwata kafye ku Dyosif, manan, “E, Dwata, ge sa i Dwata lalò i fùgu Abraham na i màgu Isaak. Ge i Dwata malak dagu mdà di tukay agu kel i ani. 16 Ge i kasaligan i falwà dagu mdà di kdee dad fsasè dagu. Taman kayègu ku lê ge mlé moon kafye di dad sawang lagi ani. Na kayègu ku i dagitgu na i dagit i fùgu Abraham na i màgu Isaak, too magdengeg mdà di dad fùgu ani. Na lêgu kayè ku toom ale fbel di tah tanà ani.”
17 Na di kite Dyosif i fkah maan i kmalan gsen di kwanan di ulu Ifraim, laan lehew dun, taman nilin i kmal i maan di ulu Manasas. 18 Na manan di maan, “Mà, ise én, du ani i twege. Kenen ulu gumkaham i kwananam.” 19 Kabay là nagin maan i knayean, na manan, “Ngàgu, gadègu sa. I dad bel Manasas mbaling dee, bay i dad bel Ifraim, i twalin, mdatah fa di kenen, na i dad belan mgimò kadang dee sahal bung dad to too mlabung.” 20 Taman di duh én, fadlug kenen mni di Dwata kafye di dad fuan ani, manan, “Gamu dagit i gafaldam i dad belgu, kadang satu duh, di kafnila kafye, manla, ‘Kayèmi ku ge Dwata mlé gami kafye salngad i kablém ku Ifraim na Manasas.’ ”
Fagu di manan én, fdatah Dyékob Ifraim di twegen Manasas. 21 Di kdasalan, man Dyékob di ku Dyosif, “Tò, tamdadong nan i duh i kfatigu, bay fadlug Dwata samnagin ge, na fasfuléan i dad belta kadang satu duh di banwe i gumnè i dad gutambulta. 22 Blégu di ge, ise ku di dad flanekam, i tanàgu di Sikim. Too fye tanà ditù, tanwègu di dad to di Amori di kasfati ditù fagu di sudanggu na i boholgu.”